Luslahng audepe kan

luslahng audepe kan

 IREN ONOP 36

Armakedon Wia Rohng Mwahu Ehu!

Armakedon Wia Rohng Mwahu Ehu!

“Irail kihpene irail nan . . . Armakedon.”​—KAUD. 16:16.

KOUL 150 Rapahki Komourpomw Rehn Koht

AUDEPEN ONOP *

1-2. (a) Dahme kahrehda Armakedon wia rohng mwahu ehu ong aramas? (b) Peidek dah kan me kitail pahn koasoiapene nan iren onop wet?

MIE pak me ke rong aramas akan nda lepin lokaia wet “Armakedon” ni arail koasoia duwen ohlahn sampah de mahwen laud ehu me pahn doadoahngki pakudang kehlail? Weksang met, Paipel mahsanih me Armakedon kin wia rohng mwahu ehu me kin kaperenda aramas! (Kaud. 1:3) Mahwen en Armakedon sohte pahn kasohrehla aramas ahpw e pahn doarehla irail! Ia duwen?

2 Paipel kasalehda me mahwen en Armakedon pahn doarehla tohnsampah sang ni eh pahn kasohrehla kaundahn aramas. Mahwen wet pahn kasohrehla me suwed kan oh doarehla me pwung kan. E pahn pil doarehla aramas sang ni eh pahn kihsang irail me kin kauwehla sampah. (Kaud. 11:18) Pwehn kalaudehla atail wehwehkihla padahk mehlel pwukat, kitail pahn koasoiapene peidek pahieu: Dahkot Armakedon? Mwekid laud dah kan me pahn wiawi mwohnte Armakedon? Ia duwen atail kak iang irail kan me pahn poadoandoarla nan Armakedon? Ia duwen atail kak kolokolete atail lelepek ni Armakedon eh kerendohr?

DAHKOT ARMAKEDON?

3. (a) Ia wehwehn lepin lokaia wet “Armakedon”? (b) Ia duwen Kaudiahl 16:14, 16 eh kasalehda me Armakedon kaidehn uhdahn wasa ehu nin sampah?

3 Wadek Kaudiahl 16:14, 16. Lepin lokaia wet “Armakedon” pwarada pak ehute nan Paipel, oh e kohsang lepin lokaiahn Ipru me wehwehki “Nahna en Mekiddo.” (Kaud. 16:16, ntp.) Mekiddo iei kahnimw ehu nan Israel mahso. (Sos. 17:11) Ahpw Armakedon sohte dokedoke uhdahn wasa ehu nin sampah. E kin dokedoke irair ehu me “nanmwarki kan en sampah pwon” pokonpene pwe ren uhwongada Siohwa. (Kaud. 16:14) Ahpw, nan iren onop wet, kitail pil pahn doadoahngki lepin lokaiao “Armakedon” ong mahwen me pahn wiawi mwurinte pokonpenehn nanmwarki kan en sampah. Ia duwen atail ese me Armakedon kin dokedoke wasa ehu ni karasaras? Keieu, sohte nahna ehu me adaneki Mekiddo. Keriau, wasa  me kapilpene Mekiddo sohte uhdahn laud pwe “nanmwarki kan en sampah pwon” oh pil neirail sounpei oh dipwisou en mahwen kan en kak pokonpene ie. Kesiluh, nin duwen atail pahn diarada mwuhr, mahwen en Armakedon pahn tepida ahnsou me “nanmwarki kan” en sampah pahn mahweniong sapwellimen Koht aramas akan me kin kousoan wasa koaros nin sampah.

4. Dahme kahrehda Koht ketin doadoahngki ahd wet Mekiddo ong kaimwiseklahn mahwen lapalapo?

4 Dahme kahrehda Siohwa ketin doadoahngki ahd wet Mekiddo ong kaimwiseklahn mahwen lapalapo? Mekiddo oh Wahu en Sesreel me mi karanih wia wasa kei me mahwen laud tohto wiawi. Ekei pak, Siohwa kin ketin sewese sapwellime aramas akan en kana nan mahwen ko. Karasepe, “ni keilen piletik Mekiddo,” Koht ketin sewese Sounkopwung en Israel Parak en kalowehdi karis en sounpei en Kenan me kaun Sisera kahluwa. Parak oh lih soukohpo Depora kalahngankihong Siohwa arail kana ni ahl kapwuriamwei ehu. Ira koulki: “Usu kan pil mahwen sang pahnlahng . . . mahweniong Sisera. Ahd kehlail en Kison kapeiraillahr.”​—Sounkopwung 5:19-21.

5. Ia duwen mahwen en Armakedon eh pahn weksang mahwen me Parak iango?

5 Parak oh Depora kaimwisengkihla ara koulo mahsen pwukat: “Maing KAUN, sapwellimomwi imwintihti kan koaros en mehla duwehte mwo, a irail kan me kin poakohng komwi en lingaling rasehng dakadahn ketipin.” (Sounkopwung 5:31) Nan mahwen en Armakedon, sapwellimen Koht imwintihti kan pahn pil sohrala, ahpw irail kan me kin poakohng ih pahn poadoandoarla. Ahpw mie wekpeseng kesempwal ehu nanpwungen mahwen riau pwukat. Nan Armakedon, sapwellimen Koht aramas akan sohte pahn mahwen. Re sohte pil pahn naineki tehtehn mahwen kan! Arail kehl pahn kohsang arail en meleilei oh “koapworopworkin” Siohwa oh sapwellime karis en tohnleng kan nanleng.​—Ais. 30:15; Kaud. 19:11-15.

6. Ia duwen Siohwa eh pahn ketin kalowehdi sapwellime imwintihti kan nan Armakedon?

6 Ia duwen Koht eh pahn ketin kalowehdi sapwellime imwintihti kan nan Armakedon? E kak ketin doadoahngki ahl tohto. Karasepe, e kak ketin doadoahngki rerrer en sahpw, keteu aihs, oh lioal sang nanleng. (Sohp 38:22, 23; Esek. 38:19-22) E kak ketin kahrehiong sapwellime imwintihti kan en mahwenpene nanpwungarail. (2 Kron. 20:17, 22, 23) Oh e kak ketin doadoahngki sapwellime tohnleng kan en kemehla aramas suwed kan. (Ais. 37:36) Sohte lipilipil ahl dah me Koht pahn ketin doadoahngki, e pahn ketin kana. Sapwellime imwintihti kan koaros pahn sohrala. Oh me pwung kan koaros pahn poadoandoarla.​—Lep. Pad. 3:25, 26.

MWEKID DAH KAN ME PAHN WIAWI MWOHN ARMAKEDON?

7-8. (a) Nin duwen me 1 Deselonika 5:1-6 mahsanih, pakair kapwuriamwei dahieu me kaun en sampah kan pahn wia? (b) Dahme kahrehda met wia likamw keper ehu?

7 Pakairpen “popohl oh sohte keper” pahn wiawi mwohnte “rahnen Siohwa.” (Wadek 1 Deselonika 5:1-6.) Nan 1 Deselonika 5:2, “rahnen Siohwa” kin dokedoke “kahn kamakam kowahlap.” (Kaud. 7:14) Ia duwen atail pahn ese iahd me kahn kamakam kowahlapo pahn tepida? Paipel padahkihong kitail duwen pakair kapwuriamwei ehu. Pakair wet pahn wia kilelepen kahn kamakam kowahlapo eh pahn tepida.

8 Pakairo me kokohpda iei “popohl oh sohte keper.” Dahme kahrehda kaun en sampah kan pahn nda met? Ia duwe, kaun en pelien lamalam kan pahn iang irail? Ei kakete. Ahpw pakair wet pahn wiahte ehu padahk likamw en ngehn saut kan. Likamw wet pahn uhdahn keper pwehki e pahn kahrehiong aramas akan en medewe me re sohte mi nan keper, ahpw ni mehlel kahn kamakam kowahlapo me keieu laud nan poadopoad en aramas pahn tepidahr. Ei, “kauparail ahpw pahn mwadangete lelohng irail, rasehng medek en neitik en lih liseian men.” Ahpw ia duwen  sapwellimen Siohwa ladu loalopwoat kan? Ele re pahn pwuriamweikihla rahnen Siohwa eh mwadangete tepida, ahpw re pahn onopadahng met.

9. Ia mwomwen Koht eh pahn ketin kasohrehla ahn Sehdan sampah?

9 Siohwa sohte pahn ketin wiahkintehieu kasohrehla ahn Sehdan sampah, duwehte me e ketin wia ni mwehin Nohao. Ahpw e pahn ketin kasohrehla ni mwomwen mwekid riau. Keieu, e pahn ketin kasohrehla Papilon Lapalap, me iei pwihn en pelien lamalam likamw koaros. Mwuhr, nan Armakedon, e pahn ketin kasohrehla ahn Sehdan sampah, iangahki koasoandi kan en palien koperment, palien sounpei, oh palien pesines kan. Kitail pahn tehkpene mwekid laud riau pwukat.

10. Nin duwen me Kaudiahl 17:1, 6, oh pil 18:24 mahsanih, dahme kahrehda Siohwa pahn ketin kasohrehla Papilon Lapalap?

10 “Kadeik ong lihen netiki paliwere ndand.” (Wadek Kaudiahl 17:1, 6; 18:24.) Papilon Lapalap kahredahr aramas tohto en sohla wauneki mwaren Koht. E kin kihda padahk likamw kan duwen Koht. Ni karasaras, e netiki paliwere ni eh utungada kaunen sampah kan. E kin doadoahngki eh manaman pohn towe kan oh kihsang neirail mwohni kan. Oh e kemelahr aramas tohto, pil iangahki ekei sapwellimen Koht ladu kan. (Kaud. 19:2) Ia duwen Siohwa eh pahn ketin kasohrehla Papilon Lapalap?

11. Ihs me ‘mahn lawalo weitahtao’ karasaraskihong, oh ia duwen eh pidada pweidahn kupwuren Koht ong Papilon Lapalap?

11 Siohwa pahn ketin kasohrehla ‘lihen netiki paliwere ndando’ sang ni eh pahn ketin doadoahngki “kode eisek” en “mahn lawalo weitahta men.” Mahn lawalou kin karasaraskihong United Nations. Kod eisek ko kin karasaraskihong palien koperment kan me kin utungada United Nations. Ni ahnsou me Koht ketin koasoanehdi, palien koperment pwukat pahn uhwongada Papilon Lapalap. Re pahn “kihsang mehkoaros me e ahneki oh kakilisawihada,” me wehwehki, re pahn kihsang eh kepwe koaros oh kasalehiong koaruhsie uwen eh suwed. (Kaud. 17:3, 16) Kasohrala wet me pahn wiawi ni pitipit​—mwomwen ni rahn ehute—​pahn uhdahn kapwuriamwei ong irail kan me kin utung ih. Met  pwehki erein ahnsou reirei, Papilon Lapalap kin suweiki: “I kin mwomwohd duwehte lih nanmwarki men, oh kaidehn ngehi liohdi men, oh I sohte mwahn pahn mwahiei.”​—Kaud. 18:7, 8.

12. Dahme Siohwa sohte pahn ketin mweidohng wehi kan en wia, oh dahme kahrehda?

12 Koht sohte pahn ketin mweidohng wehi kan en kasohrehla sapwellime aramas akan. Sapwellime aramas akan kin pohlki arail weuwa mware, oh re kin peikiong sapwellime kehkehlik en tangasang Papilon Lapalap. (Wiewia 15:16, 17; Kaud. 18:4) Re pil pahn doadoahk laud pwehn sewese meteikan tangasang ih. Eri sapwellimen Siohwa ladu kan sohte pahn “iang lokolongki eh kalokolok kan.” Ahpw arail pwoson pahn pil lelohngete kasongosong.

Sohte lipilipil wasa me re mi ie nin sampah, sapwellimen Koht aramas akan pahn koapworopworki ih ni ahnsou me mahweno pahn tepida (Menlau kilang parakrap 13) *

13. (a) Ihs Kok? (b) Nin duwen me Esekiel 38:2, 8, 9 mahsanih, dahme pahn kahrehda mahwen en Armakedon en tepida?

13 Mahwen en Kok. (Wadek Esekiel 38:2, 8, 9.) Mwurin kasohrlahn pwihn en pelien lamalam likamw koaros, sapwellimen Koht aramas akan pahn kelehpwla rasehng tuhke ehu me kin kelehpwla mwurin melimel laud ehu. Sehdan pahn uhdahn lingeringerda. E pahn kasalehda eh lingeringer sang ni eh pahn doadoahngki “rohng samin,” de likamw en ngehn saut akan, me pahn kahrehiong pwihn en wehi kan en mahweniong sapwellimen Siohwa ladu kan. (Kaud. 16:13, 14) Pwihn en wehi pwukat iei me adaneki “Kok, . . . nan sapwen Makok.” Ni wehi kan ar tepida mahweniong sapwellimen Siohwa aramas akan, mahwen en Armakedon pahn tepida.​—Kaud. 16:16.

14. Dahme Kok pahn mwadang esehda?

14 Kok pahn koapworopworkihla “manaman en aramas,” me iei nah karis en sounpei kan. (2 Kron. 32:8) Ahpw kitail pahn koapworopworki Siohwa atail Koht​—koapworopwor ehu me pahn mwomwen pweipwei ong wehi kan. Dahme kahrehda? Pwehki Papilon Lapalap uhdahn kehlail mwoweo ahpw eh koht kan sohte doarehla ih sang “mahn lawalou” oh “kode eisek” ko. (Kaud. 17:16) Eri Kok pahn medewe me e pahn mengei en kana. “Rasehng melimel ehu me mwekimwekid pohn sahpw,” e pahn mahweniong sapwellimen Siohwa aramas akan.  (Esek. 38:16) Ahpw Kok pahn mwadang esehda me e sohte kak pitila. Duwehte Parao ni Sehd Weitahtaho, Kok pahn esehda me e mahmahweniong Siohwa.​—Eks. 14:1-4; Esek. 38:3, 4, 18, 21-23.

15. Dahme Sises pahn ketin wia nan Armakedon?

15 Krais oh nah karis en tohnleng kan pahn doarehla sapwellimen Koht aramas akan oh kamwutepene nein Kok pwihn kan. (Kaud. 19:11, 14, 15) Ahpw dahme pahn wiawihong sapwellimen Siohwa imwintihti keieu laudo, Sehdan, me eh likamw kan kahrehiong wehi kan en pokonpene ni Armakedon? Sises pahn ketin kesepwekehdilahng nan pwoahr loalo me soh kapi Sehdan oh nah ngehn suwed kan, wasa me re pahn selidi erein sounpar kid.​—Kaud. 20:1-3.

IA DUWEN OMW KAK PITILA NAN ARMAKEDON?

16. (a) Ia duwen atail en kasalehda me kitail kin “ese Koht”? (b) Dahme kahrehda atail ese Koht kak wia kapai ehu nan Armakedon?

16 Sohte lipilipil ma kitail mi nan padahk mehlel erein sounpar tohto de soh, pwe kitail en pitila nan Armakedon, kitail anahne kasalehda me kitail kin “ese Koht” oh kin “peikiong rongamwahu duwen atail Kaun Sises.” (2 Des. 1:7-9) Kitail kin “ese Koht” ni atail ese dahme e kin ketin kupwurki, sohte kupwurki, oh pil duwen sapwellime koasoandi kan. Kitail pil kasalehda me kitail ese ih ni atail kin poakohng, peikiong oh kaudokiong ih kelehpw. (1 Sohn 2:3-5; 5:3) Atail kasalehda me kitail ese Koht pahn wia kapai ehu pwehki met wehwehki me e kin “ketin mwahngih” duwen kitail, oh kapai wet pahn komourkitailla nan Armakedon! (1 Kor. 8:3) Ia duwen? Pwehki eh “ketin mwahngih” duwen kitail, met kak wehwehki me e ketin kupwurperenkin kitail.

17. Ia wehwehn en “peikiong rongamwahu duwen atail Kaun Sises”?

17 “Rongamwahu duwen atail Kaun Sises” kin pidada padahk mehlel koaros me Sises ketin padahngki me dierek nan Mahsen en Koht. Kitail kin peikiong rongamwahwo ni atail kin doadoahngki nan atail mour. Atail peik kin pidada atail en mwohneki mahs sapwellimen Siohwa doadoahk nan atail mour, peikiong sapwellime koasoandi kan, oh kalohki duwen sapwellime Wehio. (Mad. 6:33; 24:14) E pil kin pidada atail utung rien Krais me keidi kan ni arail kin apwahpwalih  arail doadoahk kesempwal kan.​—Mad. 25:31-40.

18. Ni ahl dahieu me rien Krais me keidi kan pahn kak katingiheki pokon kalaimwuno soangen kadek me re kasalehiong irail?

18 Sapwellimen Koht ladu me keidi kan pahn kereniong katingiheki “sihpw teikan” soangen kadek me re kin kasalehiong irail. (Sohn 10:16) Ia duwen? Mwohn Armakedon eh tepida wiawi, irail meh 144,000 ko koaros pahn pwekipwekdahla nanleng nin duwen ngehn kei me sohte kak mehla. Irail pahn wia kisehn karis en tohnleng kan me pahn kamwutepene Kok oh doarehla “pokon kalaimwun” en sapwellimen Siohwa aramas akan. (Kaud. 2:26, 27; 7:9, 10) Ei, pokon kalaimwuno uhdahn paiekihda arail kak utung sapwellimen Siohwa ladu keidi kan ni ahnsou me irail kin mihmihte nin sampah!

IA DUWEN ATAIL KAK LELEPEKTE NI IMWIO EH KERENDOHR?

19-20. Mendahki atail kahpwal kan, ia duwen atail kak kolokolete atail lelepek ni Armakedon eh kerendohr?

19 Erein imwin rahn apwal pwukat, sapwellimen Siohwa aramas tohto kin dadaur pahn kahpwal kan. Mendahki met, kitail kak dadaur ni peren. (Seims 1:2-4) Ehu ahl me pahn uhdahn sewese kitail en wia met iei en kapakap ni ngidingid sang nan mohngiongitail. (Luk 21:36) Ahpw kitail en dehr ihte kapakap ahpw kitail en pil onopki Mahsen en Koht rahn koaros oh doudouloale, iangahki kokohp kapwuriamwei kan me pid atail ahnsou. (Mel. 77:12) Soahng pwukat oh pil en iang pidada laud doadoahk en kalohk pahn kakehlaka atail pwoson oh koapworopwor!

20 Medewehla ia uwen omw pahn peren ni Papilon Lapalap eh sohralahr oh ni Armakedon eh imwisekla! Kesempwal sang met, medewehla ia uwen kaperen en ahnsou me koaruhsie pahn wauneki mwaren Koht oh pil sapwellime pwuhng en kaunda! (Esek. 38:23) Ei, Armakedon iei rohng mwahu ehu ong irail kan me ese Koht, peikiong sapwellime Ohlo, oh kin dadaur lel ni imwi.​—Mad. 24:13.

KOUL 143 Pousehlahte Doadoahk, Mwasamwasahn, oh Kasikasik

^ par. 5 Sapwellimen Siohwa aramas akan kin kasikasik Armakedon erein ahnsou reirei. Nan iren onop wet, kitail pahn koasoiapene dahkot Armakedon, soangen mwekid laud dah kan pahn wiawi mwohnte Armakedon, oh ia duwen atail kak kolokolete lelepek ni imwio eh kerendohr.

^ par. 71 WEHWEHN KILEL: Mwekid laud kan wiewiawi limwahtail. Kitail pahn (1) iang doadoahk en kalohk ni uwen ahnsou me luhwe, (2) wiewiahte atail koasoandi en onop, oh (3) pousehlahte likih me Koht pahn ketin doareikitailla.

^ par. 85 WEHWEHN KILEL: Pilismen kan tangalahng imwen peneinei en Kristian ehu me kin koapworopworki me Sises oh ienge tohnleng kan mwahngih dahme wiewiawi.