Luslahng audepe kan

luslahng audepe kan

Brother Rutherford wia padahk ni mihting tohrohro nan Cedar Point, Ohio, 1919

1919​—Sounpar Epwiki Samwalahro

1919​—Sounpar Epwiki Samwalahro

NAN pahr 1919, Mahwen Lapalapo (mwuhr adaneki Mahwen Keieu en Sampah), me wiawihki daulih sounpar pahieu, imwisekla. Ni imwilahn pahro mwowe, wehi kan uhdihsang arail mahmahwen, oh nan January 18, 1919, mihting ehu pwehn wiahda popohl (Paris Peace Conference) tepida. Ehu ire me pweida nan mihting wet iei doaropwehn kamanamanlahn popohl nanpwungen wehi kan (Treaty of Versailles) me kauhdi mahwen me wiawi nanpwungen Sehmen oh eh imwintihti kan. Doaropwe wet sainla nan June 28, 1919.

Re pil wiahda pwihn kapw ehu me adaneki League of Nations. En pwihn wet ar mehn akadei iei “en kaminiminpene koaros nin sampah pwon oh popohl oh sohte perki mehkot en wiawi wasa koaros.” Tohto pelien lamalam kan me dene irail Kristian kei kin utung pwihn wet. Pwihn me adaneki Federal Council of the Churches of Christ nan Wehin Amerika nda me League of Nations iei “palien politik en Wehin Koht nin sampah.” Pwihn wet kin utung League of Nations sang ni arail kin kadarala wilieperail kan ni mihtingo Paris Peace Conference. Emen irail nda me mihtingo “iei tepidahn mwehi kapw ehu nan poadopoad en sampah.”

Mwehi kapw ehu tepidahr, ahpw kaidehn irail kan me iang mihtingo me pahn katapiada. Nan pahr 1919, mwehi kapw ehu en doadoahk en kalohk tepida ni ahnsou me Siohwa ketin kakehlailihada sapwellime aramas akan pwe ren kalohk laudsang mahs. Ahpw keieu, wekidekla laud ehu anahne wiawi ong irair en Tohnsukuhl kan en Paipel.

PILIPIL APWAL EHU

Joseph F. Rutherford

Ahnsoun usuhs me kin wiawi sounpar koaros duwen ihs irail kan me pahn wia director en Watch Tower Bible oh Tract Society koasoansoandi en wiawi Rahn Kaunop, January 4, 1919. Ni ahnsowo, Joseph F. Rutherford me kin tiengla mwowe nanpwungen sapwellimen Siohwa aramas akan, iangahki ienge meh isimen selidi pwehki kopwung sapahrek nan Atlanta, Georgia, U.S.A. Peideko iei, Brother kan me selidi me wia director kei mwoweo anahne pwurehng usuhsda? De re anahne weliali?

Evander J. Coward

Nan imweteng me e mi loaleo, Brother Rutherford kin pwunodki dahme pahn wiawihong sapwellimen Koht pwihn. E ese me ekei brother ko medewe me e pahn keieu mwahu en usada emen tohrohr en wia president. Pwehki kahrepe wet, e ntingihada kisinlikou ehu ong irail oh nda me Evander J. Coward me pahn mwahu en wia president. Rutherford kawehwehda me Coward kin “meleilei,” “ese lamalam,” oh “uhdahn poadidiong  Kauno.” Ahpw, brother tohto ahneki madamadau me weksang met, re men kihla ahnsoun usuhso en wiawi mwurin sounpwong weneu. Pwihn en sounrepenpwuhng ko me kin utung brother ko me selidi pil pwungki pilipil wet. Erein arail koasoakoasoiapene dahme pahn wiawi, ekei brother ko nsensuwedla.

Richard H. Barber

Ahpw mehkot wiawi me kahrehda Richard H. Barber en kawehwehda mwuhr me met duwehte omw ‘wudekihdi leh nan pihl.’ Emen brother ko kauhdi irail oh nda: “I sohte samanih dahme kosonned kin pidada, ahpw I ese dahme loalopwoat kin pidada. Loalopwoat iei dahme Koht kin ketin kupwurki. Ahl me keieu mwahu me kitail kak kasalehda atail loalopwoat ong Koht iei en wia usuhs oh pwurehng pilada Brother Rutherford en wia president.”​—Mel. 18:25.

Alexander H. Macmillan

A. H. Macmillan, me pil iang selidi, nda me rahno mwuri Brother Rutherford letelet ni dihd en pere me e selidi loale oh kihong ih kisinlikou ehu me brother kan kadarohng Brother Rutherford duwen pilipil en usuhso. Macmillan mwadangete ese ia wehwehn met. Kisinlikowo kasalehda me director ko koaros pwurehng usuhsda oh me Joseph Rutherford oh William Van Amburgh pahn wiahte director. Met wehwehki me Brother Rutherford pahn pousehlahte wia president.

SALEDEKLA!

Erein brother welimeno wie sensel, Tohnsukuhl en Paipel lelepek kan peki rehn aramas akan en sainihala doaropwe ehu ong koperment me peki brother ko en saledekla. Brother oh sister eimah pwukat kamwakid aramas 700,000 en sainihala doaropweo. Niesil, March 26, 1919, mwohn doaropweo kohwong koperment, Brother Rutherford oh brother koahiek teiko saledekla.

Ni eh wia kapahrek ehu ong irail kan me kasamwohdo ih, Brother Rutherford nda: “I kamehlele me dahme kitail koaros lelohng wia mehkot me pahn kaunopada kitail ong ahnsou uhdahn apwal akan. . . . Amwail peiki irair wet kaidehn ihte pwehn kasaledekihala riamwail Kristian kan sang nan imweteng. Kaidehn ih uhdahn kahrepen amwail doadoahk laud. . . . Kahrepen amwail peiki met iei pwehn kalinganahla Siohwa, oh irail kan me wia met ale kapai kaselel ehu.”

Irair kan me wiawi erein kopwung en riatail brother ko ele kasalehda me Siohwa kin ketin kaukaweid irail. Nan May 14, 1919, mwoalen kopwung nda: “Irail kan me peiki arail pwuhng sohte alehdi ... kopwung pahrek me re konehng alehdi, oh pwehki kahrepe wet, kopwungo anahne kapwurpwursang.” Brother ko ale karaun likamw ong tiahk mwersuwed me uhdahn laud, oh met pahn mihmihte nan neirail rekord kan ma mwoalen kopwung ihte katikala de kamwotehla arail ahnsou nan imweteng. Re pil sohte alehdi kopwung teikan. Pwehki met, Sounkopwung Rutherford kolokolete eh pwukoa nin duwen sounrepenpwuhng men pwehn uhpalih sapwellimen Siohwa aramas akan mwohn Mwoalen Kopwung  Lapalap en Wehin Amerika, mehkot me e wia pak tohto mwurin eh saledekla.

KOASOANEHDI TENG EN KALOHK

Brother Macmillan nda: “Se sohte pahn mwomwohdseli sohte wia mehkot awiawih Kauno en ketikidahla kiht nanleng. Se pohnese me se anahne wia mehkot pwehn esehla ia uhdahn kupwuren Kauno.”

Ahpw riatail Kristian kan ni poasen kaun en Sounkadehdehn Siohwa kan sohte kak ihte pousehla wia doadoahk me re kin wia sounpar tohto. Dahme kahrehda? Pwehki erein arail wie sensel, mete pileit (printing plates) kan koaros me kadoadoahk ong wiahda sawaspen Paipel kan ohla. Met uhdahn kansensuwed, oh ekei riatail Kristian kan medewe ma doadoahk en kalohk nekier.

Ia duwe, miehte me men esehla duwen rongamwahu en Wehio me Tohnsukuhl kan en Paipel kin kalohki? Pwehn sapengala peidek wet, Brother Rutherford koasoanehdi en wia padahk ehu. Wehipokon ale luhk en towehda. Brother Macmillan nda: “Ma sohte me iang towehda mihtingo, se eseier me doadoahk en kalohk nekier.”

Doaropwehn nuhs me pakairki duwen ahn Brother Rutherford padahko “Koapworopwor ong Aramas me Wie Lokolok” me wiawi Los Angeles, California, 1919

Eri Rahn Sarawi, May 4, 1919, Brother Rutherford, mendahki e soumwahu laud, wia padahko “Koapworopwor ong Aramas me Wie Lokolok” nan Los Angeles, California. Mpen aramas 3,500 towehda, oh aramas epwiki samwa kohdo ahpw sohte kak iang pwehki sohte itar wasa. Rahno mwuri, aramas 1,500 pil iang towehda. Riatail Kristian kan alehdi pasapengo​—aramas akan uhdahn men esehla padahk mehlel!

Dahme riatail Kristian kan wia mwuhr kamwakid mwomwen Sounkadehdehn Siohwa kan ar kin wia doadoahk en kalohk rahnwet.

ONOPADAHNG KEKEIRDA ME PAHN WIAWI

Kahn Iroir en August 1, 1919, kasalehda me nan tepin September, mie mihting tohrohr ehu pahn wiawi Cedar Point, Ohio. Clarence B. Beaty, Tohnsukuhl en Paipel men nan Missouri,  nda: “Koaros pehm me re anahne kohla iang.” Riatail Kristian 6,000 me iang towehda mihting tohrohr wet, met uhdahn tohtohsang dahme re kasik. Mehkot me pil uhdahn kaperen me wiawi ni mihting tohrohro iei aramas daulih 200 papidaisla ni Lake Erie me karanih wasao.

Kilin tepin makasihno The Golden Age, en October 1, 1919

Nan September 5, 1919, rahn kelimau en mihting tohrohro, nan ahn Brother Rutherford padahko “Ong me Iang Doadoahko,” e kasalehda duwen wiawihdahn makasihn kapw ehu me adaneki The Golden Age. * Makasihn wet pahn “audaudki rohng kesempwal kapw kan oh kihda iren Paipel kan me kawehwehda dahme kahrehda mwekid laud pwukat kin wiewiawi.”

Kangoang kohwong Tohnsukuhl en Paipel kan koaros en kalohk ni eimah doadoahngki makasihn kapw wet. Kisinlikou ehu me kasalehda ia duwen doadoahko eh pahn soandi mwahu nda: “Emenemen rehn me papidaisla kan en tamataman me met wia pai kaselel ehu en papah, oh isaneki ahnsou mwahu wet oh iang wia doadoahk en kalohk wet nin sampah pwon.” Aramas tohto iang doadoahk wet! Nan December, sounkalohki Wehio ngoang kan alehdi oaht daulih 50,000 en makasihn wet sang aramas akan.

Brother kan nan Brooklyn, New York, kesihnen limwahn sidohsa me audaudki makasihno The Golden Age

Ni imwin pahr 1919, sapwellimen Siohwa aramas akan kehlailda oh pwurehng wiahla pwihn ehu. Patehng met, ekei kokohp kesempwal kan me pidada imwin rahn akan pweida. Kasongosong me lelohng sapwellimen Koht aramas akan oh arail kamwakelda pweidahr nin duwen me Malakai 3:1-4 kohpada. Sapwellimen Siohwa aramas akan saledeksangehr arail wie sensel ni karasaras pahn “Papilon Lapalap,” oh Sises ketin idihada “ladu lelepek oh loalokong.” * (Kaud. 18:2, 4; Mad. 24:45) Met Tohnsukuhl en Paipel ko onopadahngehr doadoahk me Siohwa ketin kupwurki irail en wia.

^ par. 22 The Golden Age mwuhr adanekihla Consolation nan pahr 1937 oh Awake! (lokaiahn wai) nan pahr 1946.

^ par. 24 Menlau kilang Kahn Iroir en July 1, 2013, pali 16-18, 27-29; March 2016, pali 29-31.