Luslahng audepe kan

luslahng audepe kan

Ke Kin Ese Duwen Met?

Ke Kin Ese Duwen Met?

Dahme kahrehda Sises sohte ketin kupwurki kitail en kin kahula?

NAN Kosonned en Moseso, mie ahnsou me e konehng mehn Suhs kan en kin kahula. Ahpw ni mwehin Siseso, met kin kalapw wiawi. Kereniong soahng koaros me mehn Suhs kan pahn nda, re anahne kahukihla. Re kin wia met pwehn kamehlelehiong meteikan me dahme re nda uhdahn mehlel. Ahpw Sises ketin kasalehda pak riau me e sohte kupwurki wiewia soh katepe wet. E mahsanih: “Amwail koasoi kan en kin ndahte, ‘Ei’ de ‘Soh.’”​—Mad. 5:33-37; 23:16-22.

Nin duwen me dikseneri en Paipel ehu (Theological Dictionary of the New Testament) kasalehda, pwuhken Talmud sewese kitail en kilang ia uwen mehn Suhs ko kin kalapw kahula. Met pwehki pwuhken Talmud kawehwehda ni oaritik mehnia kahula me re sohte kak kauwehla oh mehnia me re kak kauwehla.

Kaidehn Sises kelehpw me sohte ketin kupwurki wiewia sapwung wet. Karasepe, soupoad en mehn Suhs, Flavius Josephus, ntingihedi duwen pelien lamalam en Suhs ehu me kin soikala kahula. Tohn pelien lamalamo kamehlele me en kahula kin suwedsang en likamw. Re medewe me ma aramas emen kin kahula pwe meteikan en kamehlele ih, eri aramaso uhdahn sounlikamw men. Ehu nein mehn Suhs ko pwuhk me adaneki Erpit en Sirak pil koasoia: “Aramas emen me pahn kin kahula ahnsou koaros, pahn direkihla dihp.” Sises sohte ketin kupwurki emen en kahukihla soahng kan me sohte kesempwal. Ma kitail kin ahnsou koaros lokaia mehlel, kitail sohte anahne kahula pwehn kamehlelehiong meteikan dahme kitail nda.