Luslahng audepe kan

luslahng audepe kan

 IREN ONOP 11

Rong Kapitien Siohwa

Rong Kapitien Siohwa

“Iet nei Pwutak . . . Kumwail rong ih.”​—MAD. 17:5.

KOUL 89 Rong, Peik, oh Ale Kapai

AUDEPEN ONOP *

1-2. (a) Ia duwen Siohwa eh kin ketin mahseniong aramas akan? (b) Dahme kitail pahn koasoiapene nan iren onop wet?

SIOHWA kupwurki mahseniong kitail. Mahso, e ketin doadoahngki soukohp kan, tohnleng kan oh sapwellime Ohlo, Krais Sises pwehn kasalehiong kitail sapwellime madamadau. (Eimw. 3:7; Kal. 3:19; Kaud. 1:1) Rahnwet, e ketin doadoahngki sapwellime Mahsen, Paipel pwehn mahseniong kitail. E ketikihong kitail Paipel pwe kitail en kak sukuhlki sapwellime madamadau oh wehwehki sapwellime ahl akan.

2 Ni ahnsou me Sises ketiket sampah, Siohwa ketin mahsendihdo sang nanleng pak siluh. Kitail tehkpene dahme Siohwa ketin mahsanih, dahme kitail kak sukuhlkihsang sapwellime mahsen ko, oh ia duwen atail kin paiekihda dahme e mahsanih.

“KOWE ME NEI PWUTAK KOMPOAKE”

3. Ni atail wadek Mark 1:9-11, dahme Siohwa ketin mahsanih ni Sises eh papidaisla, oh ire mehlel kesempwal dah kan me sapwellime mahsen ko kadehdehda?

3 Mark 1:9-11 ntingihedi tepin ahnsou me Siohwa ketin mahsendihdo sang nanleng. (Wadek.) E mahsanih: “Kowe me nei Pwutak kompoake; I kin kupwurperenkin uhk.” Ele met uhdahn kamwakid Sises ni eh rong Semeo eh ketin kasalehda eh koapworopworki oh poakohng ih! Sapwellimen Siohwa mahsen ko kadehdehda ire kesempwal siluh duwen Sises. Keieu, Sises iei sapwellime Ohl. Keriau, Siohwa ketin poakohng sapwellime Ohlo. Oh kesiluh, Siohwa kupwurperenki sapwellime Ohlo. Kitail tehk kanahieng ehuehu ire mehlel pwukat.

4. Nanpwungmwahu kapw dahieu me Sises ahneki rehn Koht ni eh papidaisla?

4 “Kowe me nei Pwutak.” Sang ni mahsen pwukat, Siohwa ketin kadehdehda me sapwellime Ohl kompoake, Sises, ahneki nanpwungmwahu kapw Reh. Ni Sises eh patopato nanleng, e wiahier  sapwellimen Koht Ohl. Ahpw ni eh papidaisla, e wiahla sapwellimen Koht Ohl ni ahl kapw ehu. E keikihdi sapwellimen Koht manaman oh ahneki koapworopwor en patohdahla nanleng pwehn wiahla sapwellimen Koht Nanmwarki oh Samworo Lapalap men me idihdida. (Luk 1:31-33; Ipru 1:8, 9; 2:17) Eri ni ahnsou me Sises papidaisla, Semeo ketin sapwellimanki kahrepe mwahu en mahsanih: “Kowe me nei Pwutak.”​—Luk 3:22.

Kitail kin pweida ni atail rong kaping oh kangoang kan (Menlau kilang parakrap 5) *

5. Ia duwen atail kak alasang sapwellimen Siohwa mehn kahlemeng en kasalehda eh ketin kupwurki oh poakohng emen?

5 “Kowe me . . . kompoake.” Sapwellimen Siohwa mehn kahlemeng duwen en ketin kasalehda limpoak oh kupwurki emen kin katamankihong kitail en rapahki ahnsou mwahu kan en kangoange meteikan. (Sohn 5:20) Kitail kin pweida ni emen me kitail nsenohki eh kasalehiong kitail limpoak oh kapingahki soahng mwahu kan me kitail kin wia. Pil duwehte met, riatail Kristian kan nan mwomwohdiso oh tohn atail peneinei kan anahne atail limpoak oh kangoang. Ni atail kin kapinga meteikan, kitail kin kakehlakahda arail pwoson oh sewese irail en papah Siohwa ni loalopwoat. Pahpa nohno kan keieu anahne kangoange neirail seri kan. Ni pahpa nohno kan ar kin kapinga neirail seri kan ni mehlel oh kasalehiong irail limpoak, irail kin sewese neirail seri kan en pweida mwahu.

6. Dahme kahrehda kitail kak koapworopworki Sises?

6 “I kin kupwurperenkin uhk.” Mahsen pwukat kasalehda me Siohwa ketin koapworopworki me Sises pahn ni lelepek kapwaiada kupwuren Semeo. Siohwa ketin koapworopworki sapwellime Ohlo, eri kitail pil kak uhdahn koapworopworki me Sises ni lelepek pahn ketin kapwaiada sapwellimen Siohwa inou koaros. (2 Kor. 1:20) Ni atail kin medewehla duwen sapwellimen Sises mehn kahlemeng, met kalaudehla atail kin koasoanehdi teng en ale kasukuhl  sang ih oh idawehn ih. Duwehte Siohwa eh ketin koapworopworki Sises, e pil pahn ketin koapworopworki me, nin duwen pwihn ehu, sapwellime ladu kan pahn pousehlahte ale kasukuhl sang sapwellime Ohlo.​—1 Pit. 2:21.

“KUMWAIL RONG IH”

7. Nin duwen me Madiu 17:1-5 kasalehda, ni ahnsou dahieu me Siohwa ketin mahsendihdo sang nanleng, oh dahme e ketin mahsanih?

7 Wadek Madiu 17:1-5. Keriaun ahnsou me Siohwa ketin mahsendihdo sang nanleng iei ni Sises eh “wekila.” Sises ketin luke Piter, Seims, oh Sohn en iang ih kohla ni nahna ileile ieu. Nin doken arail mi mwo, irail kilangada kaudiahl kapwuriamwei ehu. Silangin Sises marainla oh sapwellime likou pwupw lingaling. Ong wahnpoaron ko, e mwomwen me aramas riemen, Moses oh Elaisa, tepida patohwanohng Sises duwen eh pahn ketin pwoula oh iasada. Mendahki wahnpoaron silimeno “toutoukilahr ar men meir,” irail kilangada kaudiahl kapwuriamweio ni ahnsou me re uhdahn pirida. (Luk 9:29-32) Mwurin mwo, depwek marain ehu kipeiraildi, oh re rong ngihl ehu sang nan depweko​—me iei kapitien Koht! Duwehte dahme wiawi ni ahnsou me Sises papidaisla, Siohwa ketin kasalehda me e kupwurperenki oh poakohng sapwellime Ohlo ni eh mahsanih: “Iei nei Pwutak kompoake me I kin kupwurperenki.” Ahpw ni ahnsou wet Siohwa pil ketin mahsanih: “Kumwail rong ih.”

8. Ia duwen Sises oh tohnpadahk ko ar mwekidki kaudiahlo?

8 Kaudiahlo kasalehda me ni ahnsou kohkohdo Sises pahn ketin linganla oh sapwellimanki manaman nin duwen Nanmwarki en Wehin Koht. Krais uhdahn ketin alehdi mehn kangoang oh kehl pwehki lokolok oh pwoula me e pahn ketin dadaur pah. Kaudiahlo pil kalaudehla ahn tohnpadahk ko ar pwoson oh kakehlakahda irail ong arail pahn lelohng kasongosong en arail lelepek oh doadoahk laud me re pahn anahne wia. Mpen sounpar 30 mwuri, wahnpoaron Piter koasoia duwen kaudiahlo me pid Sises eh ketin wekila kin kasalehda eh tamatamante soahng koaros duwen kaudiahlo.​—2 Pit. 1:16-18.

9. Kaweid kesempwal dahieu me Sises ketikihong sapwellime tohnpadahk kan?

9 “Kumwail rong ih.” Siohwa ketin kasalehda ni sansal me e kupwurki kitail en rong dahme sapwellime Ohlo mahsanih oh peikiong. Dahme Sises mahsanih ni ahnsou me e ketiket sampah? E mahsanih soahng tohto me kesempwal kitail en karonge! Karasepe, Ni limpoak, e ketin padahkihong sapwellime tohnpadahk kan duwen arail en kalohki rongamwahwo, e ketin pwurupwurehng katamankihong irail en mwasamwasahn. (Mad. 24:42; 28:19, 20) E pil ketin kangoange irail en doadoahk laud, oh ketin kangoange irail en dehr uhdi. (Luk 13:24) Sises ketin kasalehda me sapwellime tohnpadahk ko anahne poakohng emenemen, en miniminpene, oh kapwaiada sapwellime kehkehlik kan. (Sohn 15:10, 12, 13) Kaweid me Sises ketikihong sapwellime tohnpadahk ko uhdahn kesempwal! Kaweid wet pil kesempwal rahnwet duwehte pil ni ahnsowo me Sises ketikihda kaweido.

10-11. Ia duwen atail kak kasalehda me kitail kin rong Sises?

10 Sises mahsanih: “Koaros me kisehn me mehlel kin rong ngilei.” (Sohn 18:37) Kitail kin kasalehda me kitail kin rong ih ni atail kin “kanengamahiong emenemen oh mahkpene.” (Kol. 3:13; Luk 17:3, 4) Kitail pil kin doulahte kasalehda me kitail kin rong ih sang ni atail kin ngoangki kalohki rongamwahwo “ni ahnsou mwahu oh ahnsou apwal.”​—2 Tim. 4:2.

11 Sises mahsanih: “Nei sihpw kan kin rong ngilei.” (Sohn 10:27) Sapwellimen Krais tohnpadahk kan kin kasalehda me irail kin rong Sises kaidehn ihte sang ni arail kin tehk kanahieng sapwellime mahsen kan ahpw pil sang ni arail kin kapwaiada. Irail sohte kin kedirepwkihla “pwunod en mour.” (Luk 21:34) Ahpw irail wiahkihla  arail peikiong sapwellimen Sises kehkehlik kan me keieu kesempwal nan arail mour, mehnda ma irail mi nan irair apwal akan. Riatail Kristian tohto kin dadaur pahn kalokolok laud kan, iangahki uhwong sang meteikan, semwehmwe laud, kahpwal kan en melimel, rerrer en sahpw de iloak laud ape. Mendahki mepwukat koaros, irail kin kolokolete arail lelepek ong Siohwa, sohte lipilipil dahme irail lokolongki. Sises ketin kamehlelehiong irail: “Mehmen me kin ale ei kehkehlik kan oh kapwaiada iei ih me kin poakohng ie. Sahmo pahn ketin poakohng mehmen me kin poakohng ie.”​—Sohn 14:21.

Atail doadoahk en kalohk kin sewese kitail en medemedewehte atail kin papah Siohwa (Menlau kilang parakrap 12) *

12. Ia pil ehu ahl me kitail kak kasalehda me kitail kin rong Sises?

12 Iet pil ehu ahl me kitail kak kasalehda me kitail kin rong Sises: sang ni atail kin uhpahiong irail kan me idihdida pwehn tiengla mwowe nanpwungatail. (Ipru 13:7, 17) Me keren, sapwellime Koht pwihn wiadahr wekidekla tohto, me iangahki doadoahngki mehn doadoahk oh wiepe kapw kan nan atail doadoahk en kalohk, koasoandi kan ong mihting en nan wihk kan, mwomwen atail kin kauwada, kamwahwihala, oh apwalih mwahu atail Wasahn Kaudok kan. Ia uwen atail kalahnganki arail limpoak oh kaweid kan me re medewehda mwahu mwohn arail kihong kitail! Kitail kak kamehlele me Siohwa pahn ketin kapaiahda atail kin nantihong idawehn kaweid kan me kohsang sapwellime pwihn.

13. Ia kamwahu kan me kohsang atail rong Sises?

13 Kitail kin paiekihda ni atail kin rong soahng koaros me Sises ketin padahngki. Sises ketin kamehlelehiong sapwellime tohnpadahk kan me sapwellime padahk kan pahn kansenamwahwihala irail. E ketin mahsanih: “Kumwail ahpw pahn diar nsenamwahu. Pwe ei mehn wisik me kansenamwahu oh dahme I peki kumwail en wahda me marahra.” (Mad. 11:28-30) Mahsen en Koht, me pil iangahki pwuhken Rongamwahu pahieu ko duwen sapwellimen Sises mour oh kalohk, kin kansenamwahwih kitail, kakehlakahda atail pwoson, oh kahrehiong kitail en ahneki erpit. (Mel. 19:7; 23:3) Sises mahsanih: “Meid pai irail me kin rong mahsen en Koht oh kapwaiada!”​—Luk 11:28.

‘I PAHN KALINGANAHDA EDEI’

14-15. (a) Dahme wiawi ni kesiluh en ahnsou me kileldi nan Sohn 12:27, 28, ni ahnsou me Siohwa ketin mahsendihdo sang nanleng? (b) Dahme kahrehda mahsen en Siohwa ko kansenamwahwihala oh kakehlakahda Sises?

14 Wadek Sohn 12:27, 28. Rongamwahu en Sohn ntingihedi kesiluh en ahnsou me Siohwa ketin mahsendihdo sang nanleng. Rahn kei mwohn eh ketin pwoula, Sises ketiket Serusalem pwehn kasarawih kaimwiseklahn  Pahsohpao me e pahn ketin towehda. E mahsanih: “I uhdahn nsensuwed.” Ih eri patohwan loulouki: “Semei, komw ketin kalinganahda mwaromwi.” Pwehn sapeng ih, Semeo ketin mahsendihdo sang nanleng, mahsanih: “I kalinganahdahr edei oh I pahn pil pwurehng kalinganahda.”

15 Sises uhdahn ketin pwunodada pwehki pwukoa laud me e sapwellimanki pwehn kolokolete eh lelepek ong Siohwa. Sises ketin mwahngih me e pahn ketin lokolok laud oh pwoula ni ahl ehu me uhdahn suwed. (Mad. 26:38) Dahme keieu kesempwal ong Sises iei en kalinganahla mwaren Semeo. Aramas akan kin karaunehki me Sises kin ketin lahlahwe, oh e ketin pwunodki me eh pwoulao pahn kasohwauwih mwaren Koht. Ia uwen sapwellimen Siohwa mahsen ko eh kakehlakahda Sises! E kak kamehlele me mwaren Siohwa pahn linganla. Mahsen en Semeo ele uhdahn kansenamwahwihala Sises oh kakehlakahda ih ong dahme pahn wiawi mwuhr. Ele Sises kelehpw me wehwehki dahme Semeo mahsanih ni ahnsowo, Siohwa ketin tehk mwahu me Sapwellime mahsen kan en ntingdi ong kitail koaros.​—Sohn 12:29, 30.

Siohwa pahn ketin kalinganahla mwareo oh doarehla sapwellime aramas akan (Menlau kilang parakrap 16) *

16. Dahme kahrehda ele ekei pak kitail kin pwunodki duwen aramas akan ar kin kasohwauwih mwaren Koht?

16 Duwehte Sises, ele kitail pil kin pwunodki duwen aramas akan ar kin kasohwauwih mwaren Siohwa. Ele duwehte Sises, kitail kin lelohng wiewia sapahrek kan. De kitail kin pwunodkihda koasoi likamw kan me me uhwong kan kin kihpeseng duwen kitail. Ele kitail kin medemedewe duwen soahng pwukat ar kin kasohwauwih  mwaren Siohwa oh sapwellime pwihn. Ni soangen ahnsou pwukat, mahsen kan en Siohwa kin uhdahn kansenamwahwihala kitail. Kitail en dehr nohn pwunodki soahng kan me kak kasohwauwih mwaren Siohwa oh sapwellime pwihn. Kitail kak kamehlele me “sapwellimen Koht popohl me inenen siksang madamadau en aramas koaros pahn pere [atail] mohngiong oh [atail] kehl en madamadau pwehki Krais Sises.” (Pil. 4:6, 7) Siohwa pahn ketin ahnsou koaros kalinganahda mwareo. Pwehki Wehin Koht, e pahn ketikihsang soahng suwed koaros me Sehdan oh sampah wet wiahiong Sapwellime ladu lelepek kan.​—Mel. 94:22, 23; Ais. 65:17.

PAIEKIHDA ATAIL RONG KAPITIEN SIOHWA RAHNWET

17. Duwehte me Aiseia 30:21 mahsanih, ia duwen Siohwa eh ketin mahseniong kitail rahnwet?

17 Siohwa pil kin ketin mahmahseniong kitail rahnwet. (Wadek Aiseia 30:21.) Mehlel me kitail sohte kin rong Koht eh ketin mahsendihdo sang nanleng. Ahpw e ketikihda sapwellime Mahsen, Paipel, pwehn kaweid kitail. Pil ehu, sapwellime Siohwa manaman kin kamwakid ‘sounapwalih lelepeko’ en pousehlahte kamwenge Sapwellime ladu kan. (Luk 12:42) Mie sawasepen Paipel tohto me wiawihda nan pwuhk, oh pil nan neitail website, iangahki kasdo tohto, oh sawaspen Paipel kan me wiawihda ong rongorong me kak sewese kitail en kolokolete atail pwoson en kehlail!

18. Ia duwen sapwellimen Siohwa mahsen kan eh kakehlakahda omw pwoson oh kihong uhk eimah?

18 Kitail en medemedewehte mahsen kan me Siohwa mahsanih ni ahnsou me sapwellime Ohlo patopato sampah! Mahsen en Koht, me kileldi nan Paipel, en kamehlelehiong kitail me Siohwa kak ketin wia soahng koaros oh me e pahn ketikihsang soahng suwed koaros me Sehdan oh sampah suwed wet wiahiong kitail. Oh kitail en koasoanehdi teng en rong sapwellimen Siohwa mahsen. Ma kitail wia met, kitail pahn pweida ni atail dadaur pahn kahpwal sohte lipilipil me kitail kin lelohng oh pil kahpwal kan me pahn kohdo. Paipel katamankihong kitail: “Kumwail en dadaurete, pwe mwurin amwail kapwaiada kupwuren Koht, kumwail en ale pweidahn inowo.”​—Ipru 10:36.

KOUL 4 ‘Siohwa Iei Silepei’

^ par. 5 Ni ahnsou me Sises ketiket sampah, Siohwa ketin mahsendihdo sang nanleng ni soangen ahnsou siluh. Ni ehu ahnsou ko, Siohwa ketin kehkehlingkihong tohnpadahk kan en Krais en rong sapwellime Ohlo. Rahnwet, Siohwa kin ketin mahseniong kitail sang sapwellime Mahsen, me iangahki sapwellimen Sises padahk kan, oh pil sang sapwellime pwihn. Iren onop wet pahn koasoia ia duwen atail en paiekihda atail kin rong Siohwa oh Sises.

^ par. 52 WEHWEHN KILEL: Elder men kilang sounsawas men eh sewese apwalih Wasahn Kaudok oh doadoahk ni wasahn kihla pwuhk kan. Eldero kapinga ih.

^ par. 54 WEHWEHN KILEL: Pwopwoud ehu nan Sierra Leone kihong sounlaid men doaropwehn luhk ong mihting.

^ par. 56 WEHWEHN KILEL: Sounkadehde kan nan sahpw ehu me atail doadoahk en kalohk keinapwidi tuhpene nan ihmw ehu. Irail sohte likouki likoun mihting de kalohk pwe aramas akan en dehr nohn tehk irail.