Luslahng audepe kan

luslahng audepe kan

 IREN ONOP 26

Sewese Meteikan en Dadaur Pahn Arail Kapwunod kan

Sewese Meteikan en Dadaur Pahn Arail Kapwunod kan

“Kumwail koaros en ahneki madamadau teieu, iang iangamwail kan nan arail lokolok, ahneki limpoak en pirien, poakeirailla oh kin aktikitik.”​—1 PIT. 3:8.

KOUL 107 Sapwellimen Koht Mehn Kahlemeng en Limpoak

AUDEPEN ONOP *

1. Ia duwen atail kak kahlemengih Samatail limpoako, Siohwa?

SIOHWA uhdahn ketin poakohng kitail. (Sohn 3:16) Kitail men kahlemengih Samatail limpoako. Eri kitail kin song en ‘iang iangatail kan nan arail lokolok, ahneki limpoak en pirien, poakeirailla’ koaros ahpw mehlel irail kan me “kisehn atail pwoson.” (1 Pit. 3:8; Kal. 6:10) Ni riatail Kristian kan ar lelohng kapwunod laud, kitail kin men sewese irail.

2. Dahme kitail pahn koasoiapene nan iren onop wet?

2 Koaros me men wia kisehn sapwellimen Siohwa peneinei pahn lelohng irair kapwunod kan. (Mark 10:29, 30) Kitail pahn uhdahn lelohng kahpwal tohto ni imwin koasoandi wet eh kereniong imwisekla. Ia duwen atail kak sawaspene? Kitail pahn koasoiapene dahme kitail kak sukuhlkihsang koasoipen Lohd, Sohp, oh Naomi nan Paipel. Kitail pil pahn koasoiapene ekei kahpwal kan me riatail Kristian kan kin lelohng rahnpwukat oh kilang ia duwen atail kak sewese irail en dadaur pahn kahpwal pwukat.

KANENGAMAHIONG IRAIL

3. Pilipil sapwung dahieu me Lohd wiahda me kitail wadek nan 2 Piter 2:7, 8, oh ia imwilahn pilipilo?

3 Lohd wiahda pilipil sapwung ehu ni eh pilada en kousoan nanpwungen mehn Sodom kan me kin wia tiahk samin. (Wadek 2 Piter 2:7, 8.) Sahpw wet me kepwehpwe, ahpw Lohd lelohng kahpwal tohto pwehki e keseula wasao. (Sen. 13:8-13; 14:12) Mwein eh pwoudo uhdahn mwahuki kahnimwo de pil ekei aramas en wasao kahrehda e sapeikiong Siohwa. E mehla ahnsou me Koht ketin kamwerehdi kisiniei oh suwepel wasao.  Pil medewehla nein Lohd serepein riemeno. Ohl riemen ko me ira inou en pwopwoud ong pil mehla nan Sodom. Lohd luhssang imweo, eh kepwe kan oh, keieu kamedek, eh pwoudo iang mehla. (Sen. 19:12-14, 17, 26) Ia duwe, Siohwa sohla ketin kanengamahiong Lohd erein ahnsou kapwunodo? Soh.

Ni limpoak, Siohwa ketin poaronehla tohnleng kan en kapitala Lohd oh eh peneineio (Menlau kilang parakrap 4)

4. Ia duwen Siohwa eh ketin kanengamahiong Lohd? (Menlau kilang kilel ni kilin Kahn Iroir wet.)

4 Mendahki Lohd pilada en kousoan Sodom, Siohwa ketin poakehla ih ni eh ketin poaronehla tohnleng riemen en kapitala ih oh eh peneineio. Lohd sohte mwadang peikiong kaweid en tohnleng riemeno, ahpw e “peikasalda.” Tohnleng ko anahne koledi peho oh sewese ih oh eh peneineio tangasang kahnimwo. (Sen. 19:15, 16) Tohnleng ko eri ndaiong ih en tangalahng nin nahna ko. Lohd sohte peikiong Siohwa ahpw e pekihda me ren kohla nan kahnimw ehu me karanih irail. (Sen. 19:17-20) Ni kanengamah, Siohwa ketin karonge Lohd oh mweidohng ih en kohla ni kahnimwo. Mwuhr Lohd masakada mihmi wasao oh kohdahla nin nahna ko, wasaohte me Siohwa ketin padahkihong ih en kohla ie nin tapio. (Sen. 19:30) Ia uwen laud en kanengamah me Siohwa ketin kasalehda! Ia duwen atail kak kahlemengih ih?

5-6. Ia duwen atail kak kapwaiada 1 Deselonika 5:14 ni atail kahlemengih Koht?

5 Duwehte Lohd, riatail Kristian men ele kak wiahda pilipil sapwung kan oh kahrehda kahpwal laud ong ih. Ma met wiawi, dahme kitail pahn wia? Ele kitail pahn men ndaiong ih me e wie dondolung dahme e padokedi, oh met mehlel. (Kal. 6:7) Ahpw kitail kak wia mwahusang met. Kitail kak alasang mwomwen Siohwa eh ketin sewese Lohd. Ia duwen?

6 Siohwa ketin poaronehla tohnleng ko kaidehn ihte pwehn padahkihong Lohd dahme pahn wiawi ahpw en pil sewese ih pitsang kasohrlahn Sodom. Pil duwehte met, ele kitail anahne koasoiong riatail Kristiano ma kitail kilang me e wiewia mehkot me pahn kahrehiong ih nan apwal. Ahpw kitail pil kak sewese ih. Mehnda ma e pwand en kapwaiada kaweid en Paipel me e alehdi, kitail anahne kanengamahiong. Song en duwehte tohnleng riemeno. Kitail en dehr soikala de uhdihsang sewese riatail Kristiano, ahpw kitail en rapahki ahl mwahu kan pwehn sewese ih. (1 Sohn 3:18) Ele kitail anahne koledi peho, ni karasaras, oh sewese ih en doadoahngki kaweid mwahu me e alehdi.​—Wadek 1 Deselonika 5:14.

7. Ia duwen atail kak alasang mwomwen Siohwa eh ketin kilangwohng Lohd?

7 Siohwa kakete ketin mahmahsenihte soh unsek en Lohd. Ahpw soh pwehki mwuhr, e ketin kamwakid wahnpoaron Piter en nda me Lohd ohl pwung men. Ia uwen atail kalahnganki me Siohwa kin ketin mahkohng atail sapwung kan! (Mel. 130:3) Ia duwe, kitail kak alasang mwomwen Siohwa eh ketin kilangwohng Lohd? Ma kitail kin kilangwohngete irair mwahu en riatail Kristian kan, met pahn kalaudehla atail kanengamahiong irail. Oh e pahn mengei ong irail en ale sawas sang kitail.

POAKEHLA IRAIL

8. Dahme pepehm en poakehla emen pahn kamwakid kitail en wia?

8 Weksang Lohd, Sohp sohte lokolongki pilipil sapwung ehu me e wiahda. Ahpw, e lelohng kahpwal laud. E luhssang eh kepwe kan, eh roson mwahu, oh tohn eh wasao sohla wiahki ih aramas kesempwal men. Suwed sang met, nein ih oh eh pwoudo seri kan koaros mehla. Kompoakepahn Sohp meh silimen likamw ko pil karaunlikamwih ih. Ia ehu kahrepe me irail meh silimeno sohte kasalehda arail  poakehla Sohp? Re sohte song en wehwehki dahme uhdahn wiewiawihong Sohp. Pwehki met, re ahneki madamadau sapwung oh kadeikada Sohp ni lemei. Ia duwen atail en dehr wiahda soangen sapwungohte? Pohnese me Siohwa kelehpw me mwahngih ire mehlel koaros duwen irair en aramaso. Rong kanahieng dahme aramas me ahneki kahpwalo nda. Wia laudsang en ihte rong ih; pil song en kehn eh weikeklahr. Ihte ni ahl wet me ke pahn kak uhdahn wehwehki pepehm en riomw Kristiano.

9. Dahme kitail pahn soikala wia ma kitail kin poakehla emen, oh dahme kahrehda?

9 Poakehla emen pahn kauhdi kitail sang en kihpeseng koasoi kamedek kan duwen kahpwal en meteikan. Sounlipahned men sohte kin kakehlakahda mwomwohdiso; e kin kaluwetehla. (Lep. Pad. 20:19; Rom 14:19) E sohte kin kadek oh e salamalam, oh eh koasoi kan kak kamedekihala emen me kin wie lokolok. (Lep. Pad. 12:18; Ep. 4:31, 32) Ia uwen eh pahn mwahu ni atail kin kilang irair kaselel kan en aramaso oh medewe ia duwen atail kak sewese ih en dadaur pahn kahpwal kan!

Rong ni kanengamah ma emen riomw Kristian tepida lokaia mwahl, oh doadoahngki lokaia kansenamwahu ni ahnsou me konehng (Menlau kilang parakrap 10-11) *

10. Dahme Sohp 6:2, 3 padahkihong kitail?

10 Wadek Sohp 6:2, 3Ekei pak, Sohp kin wia “pato mwahl akan.” Ahpw mwuhr, e koluhkihla ekei lokaia ko me e nda. (Sohp 42:6) Duwehte Sohp, rahnpwukat emen me kin dadaur pahn kapwunod laud ele kak tepida lokaia mwahl oh nda soahng kan me e pahn koluhkihla mwuhr. Dahme kitail pahn wia? Kitail en dehr kauwe ih, ahpw kitail en poakehla. Tamataman me Siohwa sohte ketin kupwurki emen kitail en ahneki soangen kahpwal oh pwunod kan me kitail ahneki rahnwet. Eri kitail kak wehwehki ma emen sapwellimen Siohwa ladu lelepek kin lokaia ni soh lamalam ni  eh mi pahn kapwunod laud. Mehnda ma e nda soahng sapwung kan duwen Siohwa de pil kitail, kitail en dehr mwadang lingeringerda pah de kadeik ih pwehki dahme e ndao.​—Lep. Pad. 19:11.

11. Ia duwen elder kan ar kak alasang Elihu ni arail kihda kaweid?

11 Ekei pak, emen me dadaur pahn kapwunod laud ehu pil anahne ale kaweid de peneu. (Kal. 6:1) Ia duwen elder kan ar kak wia met? Irail anahne alasang Elihu, me rong Sohp ni ahl kadek. (Sohp 33:6, 7) Elihu kihda kaweid mwahu ihte mwurin eh wehwehkihla ahn Sohp madamadau. Elder kan me idawehn mehn kahlemeng en Elihu pahn rong kanahieng oh song en wehwehki irair en aramaso. Mwuhr, ni ahnsou me irail kihda kaweid, irail pahn kak sair mohngiong en me rongorong irailo.

KALOALAMWAHWIH IRAIL

12. Ia duwen Naomi eh mwekidki mehlahn eh pwoudo oh nah pwutak riemeno?

12 Naomi wia lih loalopwoat men me kin poakohng Siohwa. Ahpw mwurin eh pwoudo oh nah pwutak riemeno mehla, e men kawekila edeo sang Naomi ong “Mara,” me wehwehki “Pahtou.” (Rud 1:3, 5, 20, ntp., 21) Rud, me pwoudiki nein Naomi pwutako, kin mi rehn Naomi erein eh kahpwal kan. Rud sohte kin ihte sewesehki Naomi soahng kan me e anahne ahpw e pil kin kaloalamwahwih Naomi. Rud kin kasalehda eh poakohng oh utung Naomi sang ni eh koasoi kadek kan.​—Rud 1:16, 17.

13. Dahme kahrehda irail kan me arail pwoud mehla kin anahne atail sawas?

13 Ni emen tohn atail mwomwohdiso eh pwoudo mehla, e kin anahne atail sawas. Pwopwoud ehu kak rasehng tuhke riau me kekeirda limwahn emenemen. Sounpar dower powe, kalewen tuhke ko pinipinpene. Ni ehu tuhke ko kin usuhsda sang nanpwel oh mehla, met kak uhdahn suwed ong tuhke teio. Duwehte met, ni emen me eh pwoudo mehla, ele e pahn pahtoula laud erein ahnsou werei. Paula, * me eh pwoudo mehla ni soh kasikpe, nda: “Ei mour uhdahn wekila, oh I pehm me I sohte kak wia mehkot. Kompoakepahio me keieu keren mehsang ie. I kin koasoiaiong ei pwoudo duwen soahng koaros. E kin iang ie peren ahnsou me I peren oh pil sewese ie ni ahnsou apwal. E kin ahnsou koaros karonge ie ni ei kin koasoia ei kahpwal kan. I uhdahn pehm me apali paliwereiet lopsang.”

Ia duwen atail kak sewese irail kan me solahr arail pwoud? (Menlau kilang parakrap 14-15) *

14-15. Ia duwen atail kak kansenamwahwih emen me eh pwoudo mehla?

14 Ia duwen atail kak kansenamwahwih emen me eh pwoudo mehla? Dahme kitail keieu anahne wia iei en koasoiong ih, mehnda ma kitail soansuwedki de sehse dahme kitail pahn nda. Paula, me kitail koasoia mwoweo, nda: “I wehwehki me aramas kin soansuwedki koasoia duwen mehla. Irail kin pwunodki me dahme re pahn nda kakete sapwung. Ahpw en rong emen nda mehkot mehnda ma e soansuwedki kin uhdahn mwahusang en sohte rong mehkot douluhl.” Emen me pahtoulahr ele sohte kasik kitail en nda mehkot loal. Paula nda: “I kalahnganki ni kompoakepahi kan ar kin ndahte, ‘I nsensuwedkihla dahme wiawihong uhk.’”

15 William, me eh pwoudo mehla sounpar kei mwoweo, nda: “I kin kalahnganki ni meteikan ar ndaiong ie soahng mwahu kan me re taman duwen ei pwoudo; met kin kamehlelehiong ie me re poakohng oh wauneki ih. Arail wia met kin uhdahn sewese ie laud. Arail lokaia kin uhdahn kansenamwahwih ie, pwehki ei pwoudo uhdahn kesempwal ong ie oh  wia kisehn ei mour.” Emen liohdi me adaneki Bianca nda: “I kin diar nsenamwahu ni meteikan ar iang ie kapakap oh ehukihong ie iren Paipel ehu de riau. E kin sawas ni arail koasoia duwen ei pwoudo oh ni arail kin rong ie koasoia duwen ih.”

16. (a) Dahme kitail anahne sewesehki irail kan me emen me re poakohng mehla? (b) Nin duwen me Seims 1:27 kasalehda, pwukoa dahieu me kitail ahneki?

16 Duwehte Rud eh kin mihmihte rehn liohdio Naomi, kitail anahne pousehlahte sewese irail kan me emen me re poakohng mehla. Paula, me kitail koasoia mwoweo, nda: “Mwurinte ei pwoudo mehla, I alehdi soangen sawas tohto sang meteikan. Kedekedeo, irail tepida soupisekla oh wia dahme re kin wiewia rahn koaros. Ahpw, ei mour uhdahn wekila. E uhdahn wia sawas laud ehu ni meteikan ar pohnese me emen me pahtoula laud kin anahne sawas nan sounpwong kan, pil sounpar tohto, mwurin mehla ehu.” Ei mehlel, koaros wekpeseng. Ekei kin mwadang en ahnla wekideklahn arail irairo. Ahpw ong ekei, ehuehu ahnsou me irail wia mehkot me mahso me mehlao iang irail wia, e kin katamandohng irail me aramaso melahr. Mwomwen aramas ar pahtoula kin wekpeseng. Kitail en tamataman me Siohwa ketikihong kitail pwais ehu oh pil pwukoahn apwalih irail kan me arail pwoud melahr.​—Wadek Seims 1:27.

17. Dahme kahrehda irail kan me arail pwoud kohkohsang irail kin anahne atail sawas?

17 Ekei anahne dadaur pahn kapwunod laud pwehki arail pwoud kohkohsang irail. Joyce, me eh pwoudo kohkohsang ih pwehki emen lih tohrohr, nda: “Medek me I ahneki sang at  mweipesengo uhdahn suwedsang ma ei pwoudo mehla. Ma e mehla nan aksident de pwehki soumwahu ehu, eri met kaidehn eh pilipil. Ahpw nan irair wet, ei pwoudo pilada en kohkohsang ie. Met uhdahn kanamenek ong ie oh kihsang ei wahu.”

18. Dahme kitail kak wia pwehn sewese irail kan me solahr arail pwoud?

18 Ma kitail kasalehda wiewiahn kadek ong irail kan me sohla arail pwoud, kitail kin kamehlelehiong irail me kitail uhdahn poakohng irail. Pwehki irail kelehpwlahr met, re uhdahn anahne kompoakepah mwahu kan. (Lep. Pad. 17:17) Ia duwen omw kak kamehlelehiong irail me ke wia kompoakparail? Ke kak luke irail en iang uhk mwenge. Oh ke pil kak peki ma ke kak iang irail kohla mwemweit de kohla kalohk. Ekei pak ke pil kak luke irail ren iang uhk wia kaudok en peneinei. Ma ke wia met, ke pahn kaperenda Siohwa, pwehki e kin “ketiket mpen irail me nan kapehd tikitiklahr” oh kin “ketin sinsile liohdi kan.”​—Mel. 34:18; 68:5.

19. Dahme 1 Piter 3:8 padahkihong kitail en wia?

19 Ahnsou keren, ni Wehin Koht eh pahn kaunda sampah, koaros “kahpwal akan . . . pahn sohrala oh manokonokla.” Ia uwen atail kasikasik ahnsowo me “mehkoaros me pweidahr nan ahnsou samwalahr ako pahn manokonokla douluhl.” (Ais. 65:16, 17) Lao lel ahnsowo, kitail en sawaspene oh kadehdehda sang ni atail koasoi oh wiewia kan me kitail kin poakohng riatail Kristian kan koaros.​—Wadek 1 Piter 3:8.

KOUL 111 Kahrepen At Peren

^ par. 5 Lohd, Sohp, oh Naomi papah Siohwa ni loalopwoat, ahpw re pil kin dadaur pahn irair apwal akan nan arail mour. Iren onop wet pahn koasoia dahme kitail kak sukuhlkihsang irail. E pil koasoia dahme kahrehda e kesempwal ong kitail en poakehla, kanengamahiong, oh koasoi ni kadek pwehn kaloalamwahwih riatail Kristian kan ni arail lelohng kahpwal kan.

^ par. 13 Ekei eden aramas akan nan iren onop wet kaidehn uhdahn adarail.

^ par. 57 WEHWEHN KILEL: Brother men uhdahn nsensuwed oh tepida lokolokaia mwahl ni elder men eh rongorong ih ni kanengamah. Mwuhr, ni brothero eh meleileidi, eldero kihda kaweid ni elen kadek.

^ par. 59 WEHWEHN KILEL: Pwopwoud pwulopwul ehu koasoakoasoiong brother men me eh pwoudo ahpwtehn mehla. Irail koasoakoasoia duwen soahng mwahu kan duwen eh pwoudo.