Luslahng audepe kan

luslahng audepe kan

Ia Duwen Atail Kak Pere Kitail Sang Ehu Ahn Sehdan Lidip

Ia Duwen Atail Kak Pere Kitail Sang Ehu Ahn Sehdan Lidip

NI MEHN Israel ko kaukaunop en kotehla Pillap Sordan oh pedolong nan sahpwo me Koht ketin inoukihong irail, aramas kei mwemweitdo rehrail. Aramas ko iei lih kei me kaidehn mehn Israel oh irail luke ohl en Israel ko ong kamadipw ehu. Luhk wet ele wia ahnsou tohrohr oh kapwuriamwei ehu. Wiahda kompoakepah kapw kan, kahkahlek, oh nsenamwahuki mwenge iou kak kamwakid aramas. Tiahk oh wiewia kan en lih ako sohte duwehte me mehn Israel ko sukuhlki nan Kosonned en Koht ahpw, ekei ohlen Israel ko ele pahn medewe: ‘Se kak powehdi met. Se pahn kanahieng.’

 Dahme wiawi? Paipel mahsanih: “Ohl ako ahpw tapihada neneke lih en Mohap kan.” Ni mehlel, lih ako men ohlen Israel kan en kaudokiong koht likamw kan. Ih met me ohl ko wia! Pwehki met, “KAUN-O eri ketin engiengda pahn mehn Israel” ko.​—Nemp. 25:1-3.

Mehn Israel ko kauwehla Kosonned en Koht ni ahl riau: Irail poaridi mwohn dikedik kan, oh re pil wia dipen tiahk samin me pid wia nsenen pwopwoud. Aramas kidkid kei mehla pwehki arail sapeikiong Koht. (Eks. 20:4, 5, 14; Deud. 13:6-9) Dahme kahrehda arail wiewia kan imwila suwed? Pwehki irair en ahnsou me irail mi loale. Ma ohl ako sohte kauwehla Kosonned en Koht, mehn Israel kidkid ko pahn onopadahr en kotehla Sordan lella nan Sapwen Inowo.​—Nemp. 25:5, 9.

Me pid dahme wiawi, wahnpoaron Pohl ntingihedi: “Mepwukat wiawihong irail nin duwen karasaras kei, oh ntingdier en wia mehn kataman ehu ong kitail me momour ni imwin koasoandi en mwehi wet.” (1 Kor. 10:7-11) Sansal me Sehdan uhdahn perenkihda me ekei mehn Israel ko pwupwudiong nan dihp laud oh sohla warohng pedolong nan Sapwen Inowo. Kitail anahne sukuhlki sang arail sapwung kan pwehki kitail ese me Sehdan uhdahn pahn perenda ma e kak irekitaildihsang pedolong nan sapwellimen Koht sampah kapwo!

LIDIP KEPER EHU

Sehdan men lidipihedi Kristian kan rahnwet oh pwehn wia met, e kin doadoahngki soangen wiepe kohte me e doadoahngki mwoweo pwehn pitihedi aramas tohto. Nin duwen me Sehdan wiahiongehr mehn Israel ko, e doadoahngki tiahk samin me pid wia nsenen pwopwoud. Nan atail ahnsou, tiahk samin kin pousehlahte wia lidip keper ehu. Ehu ahl me kak kamwakid kitail laud iei kilang kasdo de kilel suwed.

Rahnwet, aramas kak kilang kasdo de kilel suwed ni meteikan ar sohte ese. Sounpar tohto samwalahro, aramas emen me men kilang kasdo de kilel suwed ele anahne kohla wasahn kasdo kan pwehn kilang kasdo suwed de kohla ni sidohwahn pwuhk kan me kin netikihla pwuhk en kilel suwed. Aramas tohto ele sohte men kohla soangen wasa pwukat pwehki irail kin namenengki ma aramas teikan pahn kilang irail. Ahpw ahnsou wet, aramas men me kak doadoahngki Internet kak kilang kasdo de kilel suwed ni wasahn doadoahk de pil nan sidohsa ehu me peidi. Oh nan sahpw tohto, ohl de lih emen kak kilang kasdo de kilel suwed nan Internet nan imwarail.

Kaidehn ihte mepwukat. Sehlpwohn de tablet ape kin kamangaiala ong emen en kilang kasdo de kilel suwed. Ni aramas akan ar alu nan ahl akan de iang bus de kisa kan, irail kak kilang kilel suwed nan neirail sehlpwohn de tablet kan.

Pwehki e mengeila ong aramas en kilang kasdo de kilel suwed oh en ekihla me ni mehlel aramas kin wia met, kasdo de kilel suwed kin uhdahn keper ong aramas tohto ahnsou wet laudsang mahso. Aramas tohto me kin kilang kasdo de kilel suwed kin kauwehla arail mouren pwopwoud, kihsang wahu en emen, oh kasaminehla ahn emen eh nsenmwakelekel. Pil suwedsang met, irail kak kauwehla arail nanpwungmwahu rehn Koht. Ke kak kamehlele me kilang kasdo de kilel suwed kin keper ong irail kan me kilang. Pali laud en ahnsou e kin uhdahn kamedekihala aramas akan. Oh imwilahn pepehm pwukat kin mi rehn aramaso ahnsou werei, oh ekei pak re sohte kak kihsang pepehm suwed pwukat rehrail.

Kitail anahne pohnese, me Siohwa ketikihda perepatail sang ahn Sehdan lidip wet. Pwe kitail en ale perepatail sang Siohwa, kitail anahne wia dahme ohlen Israel en mahso sohte wia​—“peikiong” ih. (Eks. 19:5) Kitail anahne pohnese me Koht kalahdeki kasdo de kilel suwed. Dahme kahrehda kitail ndahki met?

TATEKI​—DUWEHTE ME SIOHWA KETIN WIA

Medewehla ire mehlel wet: Kosonned kan me Koht ketikihong wehin Israel weksang kosonned kan en wehi teikan ni ahnsowo. Duwehte kehl ehu, kosonned pwukat kak katohrehsang mehn Israel kan sang aramas akan me kapilpene irail oh arail wiewia suwed kan. (Deud. 4:6-8) Kosonned pwukat kasalehda ire mehlel kesempwal ehu: Siohwa kalahdeki tiahk samin me pid wia nsenen pwopwoud.

 Siohwa ketin mahsanihong mehn Israel ko duwen tiahk samin kan me wehi kan me kapilpene irail kin wia: “Kumwail dehr idawehn tiahk en . . . mehn Kenan kan, wasa I kahkahreikumwaillahng ie. . . . Ar tiahk kan kasaminelahr sapwarailo, iei me KAUN-O ketin kalokalokehki sahpwo.” Ong Koht sarawien Israel, mour en mehn Kenan kan uhdahn kasaut me kahrehda sapw me irail kousoan ie pil samin.​—Lip. 18:3, 25.

Mendahki Siohwa ketin kaloke mehn Kenan kan, aramas teikan kin pousehlahte wia tiahk samin me pid wia nsenen pwopwoud. Daulih sounpar 1, 500 mwuri, Pohl kawehwehda duwen wehi kan me Kristian kan mi ie me “solahr arail pepehm en namenek.” Ni mehlel, “re kin mweidala pein irail en wia me suwed ni ngidingid pwe ren kin wia soangsoangen samin koaros ni mehwo.” (Ep. 4:17-19) Pil rahnwet, aramas tohto kin wia tiahk samin laud oh sohte namenengki. Tohnkaudok mehlel kan anahne wia ni uwen me re kak en soikala kilang wiewia samin kan en irail pwukat nin sampah wet.

Kilang kasdo de kilel suwed uhdahn kasohwauwihala Koht. E ketin kapikada aramas akan rasehng ih oh ketin kapikada kitail en ahneki koahiek en pehm me mehkot pwung de sapwung. Koht sapwellimanki erpit ni eh ketikihda kosonned kan duwen wia nsenen pwopwoud. E kupwurki me wia nsenen pwopwoud en wia mehkot me pwopwoud kan en perenki ehukihpene. (Sen. 1:26-28; Lep. Pad. 5:18, 19) Ahpw dahme irail kan me kin wiahda oh kangoange meteikan en kilang kasdo de kilel suwed wiewia? Irail kin pohnsehsehla douluhl sapwellimen Koht koasoandi kan ong tiahk. Ei, aramas me kin kangoange meteikan en kilang kasdo de kilel suwed sohte wauneki Siohwa. Koht pahn ketin kadeikada irail kan me kin pohnsehsehla sapwellime koasoandi kan ni arail kin wiahda de kangoange meteikan en kilang soahng kan me pid tiahk samin.​—Rom 1:24-27.

Ahpw ia duwen aramas akan me kin pein men wadek de kilang kasdo de kilel suwed? Ele ekei kin medewe me e wia mehn kamweit ehu me sohte keper. Ahpw, ni mehlel, irail kin utung irail kan me kin pohnsehsehla sapwellimen Siohwa koasoandi kan. Ele met kaidehn dahme irail men wia ni arail tepida kilang kasdo de kilel suwed kan. Ahpw, Paipel kasalehda ni sansal me sapwellimen Koht tohnkaudok mehlel kan anahne uhdahn tateki kasdo de kilel suwed. Paipel kangoange kitail oh mahsanih:  “Kumwail me kin poakohng Siohwa, kailongki dahme suwed.”​—Mel. 97:10, NW.

Pil irail kan me men soikala kilang kasdo de kilel suwed kak diarada me met apwal en wia. Kitail sohte unsek, ele kitail anahne pei pwehn pelianda ineng suwed me pid wia nsenen pwopwoud. Pil ehu, pwehki kitail sohte unsek, ele kitail kin pein nda me e sohte sapwung en kilang kasdo de kilel suwed. (Ser. 17:9) Ahpw tohto me wiahla Kristian kei kanahier ni arail powehdi kahpwal wet. Omw ese met kak kamehlelehiong uhk me ke pil kak pelianda kilang kasdo de kilel suwed. Tehk ia duwen Mahsen en Koht eh kak seweseiuk en soikala ahn Sehdan lidip en kilang kasdo de kilel suwed.

DEHR KIN MEDEMEDEWEHTE INENG SUWED ME PID TIAHK SAMIN

Nin duwen me kitail koasoiapene mwoweo, mehn Israel tohto mweidohng ineng sapwung kan en laudla me kahrehiong irail en mihla nan kahpwal laud. Soahngohte kak wiawi rahnwet. Rien Sises ohlo Seims kawehwehda duwen keper wet ni eh nda: “Emenemen . . . ni pein eh ineng me kin kainangiong pein ih oh pitihedi. Eri inengo, ni ahnsou me e ahpada, e kin kanaitikihada dihp.” (Seims 1:14, 15) Ma aramas men mweidohng ineng suwed en kakairada reh, kedekedeo aramaso pahn kakete wiahda dihp. Eri kitail anahne kesehla madamadau samin​—dehr kin medemedewe soahng pwukat.

Ma ke diarada me ke kin medemedewehte duwen tiahk samin, ken mwadang wia mehkot. Sises mahsanih: “Ma apali pehmwen de apali nehmwen kin kahrehiong uhk ken dipekelekel, lupukasang oh kesehweisang uhk. . . . Oh ma apali pwoaren mesomwen kin kahrehiong uhk ken dipekelekel, pwadikasang oh kesehweisang uhk.” (Mad. 18:8, 9) Sises sohte mahsanih me kitail en kauwehla paliwaratail. E ketin doadoahngki karasaras ehu pwehn sewese kitail en wehwehki me kitail anahne rapahkihda dahme kin kahrehiong kitail en medemedewe soahng suwed kan oh wiahda wekidekla kan me anahn. Ia duwen atail kak kapwaiada kaweid pwukat me pid kilang kasdo de kilel suwed?

Ma kasdo de kilel suwed pwarada, dehr medewe, ‘I kak powehdi met.’ Mwadang sohpeisang. Mwadangete kakunla TVo. Mwadangete kakunla computero de sehlpwohno. Pwurehng medewe mehkot mwakelekel. Omw wia met kak seweseiuk en kaunda omw madamadau sang omw pahn mweidohng ineng suwed en kaunuhkada.

 IA DUWEN MA KITAIL TAMANDA KASDO DE KILEL SUWED KAN ME KITAIL KILANG MAHSO?

Ia duwen ma ke pweida ni omw sohla kin kilang kasdo de kilel suwed kan, ahpw ekei pak ke kin tamanda? Kasdo de kilel suwed kan kin kak mihmihte nan madamadau en aramas emen ahnsou werei. Madamadau pwukat kak pwurehng pwarada ni soh kasikpe. Ma met wiawi, ele ke kakete ahneki ineng en wia mehkot samin, duwehte dukula pahn ineng en wia tiahk en mwadongki dipwisoun kaparapar. Eri ken kanahieng pwe soangen madamadau wet kakete pwarada, oh ken kaunopada peiong ineng pwukat.

Kakehlakahda omw koasoanehdi teng en ahneki madamadau oh wiewia kan nin duwen me Koht kupwurki ken wia. Ken duwehte wahnpoaron Pohl, me kin uhdahn men ‘kaloke paliwere oh kaunda duwehte lidu men.’ (1 Kor. 9:27) Dehr mweidohng ineng suwed en kaunuhkada. Paipel mahsanih: “Wekidala pein kumwail sang ni amwail wekidala elen amwail madamadau, pwe kumwail en kadehdehiong pein kumwail kupwuren Koht.” (Rom 12:2) Tamataman: Ahneki madamadau oh mwekid pahrekiong kupwuren Koht kin wahdo nsenamwahu laud sang omw pahn peikiong omw ineng suwed kan.

Madamadau oh wiewia me pahrekiong kupwuren Koht pahn wahdo nsenamwahu laud sang omw pahn peikiong omw ineng suwed kan

Song en wadlikihala ekei iren Paipel kan. Eri ni madamadau sapwung kin pwarada nan omw madamadau, koasoanehdi teng ken medemedewe iren Paipel ko. Iren Paipel kan duwehte Melkahka 119:37; Aiseia 52:11; Madiu 5:28; Episos 5:3; Kolose 3:5; oh 1 Deselonika 4:4-8 pahn seweseiuk en ahneki sapwellimen Siohwa madamadau ong kilang kasdo de kilel suwed kan oh wehwehki dahme e kupwurki ken wia.

Dahme ke anahne wia ma ke pehm me ke sohte kak soikala kilikilang de medemedewehte duwen soahng samin kan? Idawehn kanahieng atail Sounkahlemengo, Sises. (1 Pit. 2:21) Mwurinte Sises ketin papidaisla, Sehdan kin kasonge ih. Dahme Sises ketin wia? E sohte ketin uhdi pelian. Sises ketin doadoahngki iren Paipel kei ni eh ketin soikala kasongosong ko me Sehdan kasalehda. E mahsanih: “Sehdan, kohkohweisang ie!” oh Sehdan eri kohkohsang ih. Duwehte Sises eh sohte ketin uhdihsang eh pelianda Tepilo, kitail en pil wia duwehte. (Mad. 4:1-11) Sehdan oh eh sampah pahn pousehlahte song en audehkihda omw madamadau soahng samin kan, ahpw dehr uhdihsang omw peiong. Ke kak kana oh pelianda kilang kasdo de kilel suwed. Siohwa kak ketin seweseiuk kalowehdi omw imwintihti.

KAPAKAPOHNG SIOHWA, OH PEIKIONG IH

Pousehlahte kapakapohng Siohwa oh peki sapwellime sawas. Pohl nda: “Peki rehn Koht sawas ni kapakap oh kapakap ni ngidingid iangahki kalahngan; oh sapwellimen Koht popohl me inenen siksang madamadau en aramas koaros pahn pere amwail mohngiong oh amwail kehl en madamadau pwehki Krais Sises.” (Pil. 4:6, 7) Koht pahn ketikihong uhk madamadau meleilei pwehn seweseiuk en dehr wia dahme sapwung. Ma ke karanihala Koht, ‘e pahn ketin karanihukala.’​—Seims 4:8.

Kitail pahn ale perepatail sang ahn Sehdan lidip kan ma kitail pahn kolokolete teng atail nanpwungmwahu rehn Sounkapikpen lahng oh sampah. Sises mahsanih: “Kaunen sampah wet [Sehdan] samwodohr. Sohte eh manaman pohi.” (Sohn 14:30) Ia duwen Sises eh ketin mwahngih met? Ehu pak e mahsanih: “Ih me ketin poaroneiehdo kin ketin ieiang ie; e sohte ketin likidmelieiehla, pwehki ahnsou koaros I kin wia mehkan me kin kaperenda ih.” (Sohn 8:29) Ni omw kin wia soahng kan me kin kaperenda kupwuren Siohwa, e sohte pahn ketin likidmelieiukala. Soikala lidip en kilang kasdo de kilel suwed, oh Sehdan sohte pahn kak lidipihedi uhk.