Luslahng audepe kan

luslahng audepe kan

“Amwail Marain en Sansal” Pwehn Kalinganahda Siohwa

“Amwail Marain en Sansal” Pwehn Kalinganahda Siohwa

“Amwail marain en sansal mwohn aramas akan pwe ren . . . kalinganahda Samamwail.”​—MAD. 5:16.

KOUL KAN: 77, 59

1. Kahrepe tohrohr dahieu me kitail ahneki pwehn peren?

KITAIL kin uhdahn perenki me marain en sapwellimen Koht aramas akan kin wie lingaling nin sampah pwon. Pahr nekiero, sapwellimen Siohwa aramas akan kin wia onop en Paipel rehn tohnsukuhl en Paipel tohtohsang meh dep (10,000,000). Oh me kapw tohto me men rong kin iang towehda Katamano oh sukuhlki duwen sapwellimen Siohwa kisakis en pweinen pweipwei sapahlo.​—1 Sohn 4:9.

2, 3. (a) Dahme sohte kin kauhdi kitail sang atail en “wie lingaling . . . duwehte marain”? (b) Me pid mahsen kan en Sises me kileldi nan Madiu 5:14-16, dahme kitail pahn koasoiapene?

2 Nin sampah pwon, Sounkadehdehn Siohwa kan kin lokaiahki lokaia tohto. Ahpw met sohte kin kauhdi kitail sang en kapinga Siohwa nin duwen peneinei minimin ehu. (Kaud. 7:9) Sohte lipilipil lokaia me kitail kin lokaiahki de wasa kitail kohsang ie, kitail kak lingaling “duwehte marain nin sampah.”​—Pil. 2:15.

3 Atail doadoahk en kalohk, atail miniminpenehn Kristian, oh atail ahneki madamadau en karuwaru kin wahdo kaping ong Siohwa.  Ia duwen atail marain eh kak sansalda nan irair siluh pwukat?​—Wadek Madiu 5:14-16.

SEWESE METEIKAN EN KAUDOKIONG SIOHWA

4, 5. (a) Patehng doadoahk en kalohk, ia duwen atail marain eh kak sansalda? (b) Ia imwilahn atail kin kasalehda kadek? (Menlau kilang tepin kilel.)

4 Kalohk oh katohnpadahk iei ehu ahl kesempwal kitail en kasalehda atail marain. (Mad. 28:19, 20) Oaralapo “Marain nan Rotorot,” me mi nan neitail Kahn Iroir (lokaiahn wai) en June 1, 1925, nda me erein imwin rahn akan, sohte emen kak loalopwoatohng Kauno ma e sohte isaneki “ahnsou mwahu en kasalehda eh marain.” Oaralapo pil nda: “E anahne wia met sang ni eh padahkihong aramas nin sampah rongamwahwo, oh sang ni eh kawekiong eh mour ong elen marain.” Pil kapatahiong atail doadoahk en kalohk, atail wiewia kan kin wahdo kaping ong Siohwa. Aramas tohto kin tetehk kitail ni atail kin kalohk. Ni atail kin sirei oh rahnmwahwih irail, met kin sewese irail en pwungki kitail oh Kohto me kitail kin kaudokiong.

5 Sises mahsanihong sapwellime tohnpadahk kan: “Ni amwail pahn pedolong nan ihmwo, rahnmwahwih tohnihmwo.” (Mad. 10:12) Nan wasa me Sises ketin kalohk ie, e wia tiahk ehu ong aramas ako en kasamwolong mehn keiru kan nan imwarail. Nan wasa tohto rahnwet, met solahr kin wiawi. Aramas akan kin kalapw salohda de lingeringerda ni aramas emen me re sehse eh kohla imwarailo. Ahpw ma kitail kin kadek, ele irail sohte pahn saloh. Ni omw wia doadoahk en kalohk ong wehipokon doadoahngki mehn kadahr me pwuhk kan mi loale, ke seu kin tehk me ma ke sirei oh rahnmwahwih aramas akan ni kadek, re sohte pahn soansuwedki en kohdo oh ale sawasepen Paipel kan? Ele irail pahn men tepida koasoiong uhk!

6. Dahme sewese pwopwoud mah ehu en pousehlahte kalokalohk?

6 Pwopwoud mah ehu nan England solahr kak kalohk ihmw lel ihmw nin duwen me ira kin wia mahso pwehki ara roson en paliwar sohte uhdahn mwahu. Eri ira kihdi tehpel ehu likin imwarao oh kihong sawaspen Paipel kan powe. Ira kousoan karanih imwen sukuhl ehu, eri ira kin kasalehda sawasepen Paipel kan me pahn mwahu ong pahpa nohno kan me kin kohla pwekada neirail seri ko. Ekei pahpa nohno ko aleier sawaspen Paipel pwukat, iangahki pwuhken Questions Young People Ask​—Answers That Work (lokaiahn wai), Volume 1 oh 2. Emen pioneer sister kin kalapw iang pwopwoudo. Pahpa nohno ko kilang me sistero kin kadek oh me pwopwoudo uhdahn men sewese meteikan. Pahpa men pil tepidahier onop Paipel.

7. Ia duwen omw kak sewese irail kan me tangasang sapwarail oh mihla nan omw wasa?

7 Me keren, me tohto anahne tangasang sapwarail kan pwehki mahwen de kahrepe teikan oh met re mihla nan ekei sapw tohrohr. Dahme ke kak wia pwehn sewese irail pwukat me keseudo oh mihla nan omw wasa en sukuhlki duwen Siohwa? Keieu, ke kak sukuhlki ia duwen omw pahn nda “kaselel” ni arail lokaia. Patehng met, ni omw doadoahngki JW Language app, ke kak sukuhlki ekei lepin lokaia kan me ele pahn kahrehiong irail en men uhdi oh koasoiong uhk. Mwuhr, ke kak kasalehiong irail kisin kasdo kan oh sawaspen Paipel kan me mi ni arail lokaia nan jw.org.​—Deud. 10:19.

8, 9. (a) Ia duwen atail mihting en nan wihk kan ar kin sewese kitail? (b) Ia duwen pahpa nohno kan ar kak sewese neirail seri kan en kamwahwihala arail kin pasapeng nan mihting kan?

8 Siohwa kin ketikihong kitail dahme kitail uhdahn anahne pwehn pweida nan kalohk.  Karasepe, dahme kitail sukuhlki nan Mihting en Atail Mour en Kristian oh Kalohk kin sewese kalaudehla atail eimah ni atail kin pwurala rehn aramas akan oh tepida onop en Paipel.

9 Ni irail me kapw kan ar iang towehda atail mihting kan, irail kin pwuriamweikihla neitail seri kan ar ese pasapeng. Ke kak padahkihong noumw seri kan en pasapeng ni pein arail lokaia. Ekei aramas kin iangala padahk mehlel ni ar rong seri kan kasalehda ar pwoson ni lokaia mengei oh mehlel.​—1 Kor. 14:25.

KAKEHLAKAHDA ATAIL MINIMINPENE

10. Ia duwen kaudok en peneinei eh kak sewese kalaudehla miniminpenehn atail peneinei?

10 Ni atail wia uwen atail kak en kaiahnehda atail peneinei en doadoahkpene ni minimin oh popohl, kitail kin wahdo kaping ong Siohwa. Karasepe, ma kowe pahpa de nohno men, koasoanehdi koasoandi en kaukaule wia amwail Kaudok en Peneinei ni soutik kan. Peneinei tohto kin ehupene kilang JW Broadcasting, oh mwurin mwo irail kin koasoiapene ia duwen arail kak doadoahngki dahme re sukuhlki. Ni ahnsou me pahpa de nohno men kin wia kaudok en peneinei, e anahne tamataman me kaweid me seri kan anahne kin weksang kaweid me me pwulopwul kan anahne. Wia uwen omw kak koaros pwehn sewese emenemen tohn peneinei en uhdahn paiekihda kaudok en peneinei.​—Mel. 148:12, 13.

E mwahu kitail en werekiong me mah kan (Menlau kilang parakrap 11)

11-13. Ia duwen atail kak sewese kalaudehla miniminpenehn atail mwomwohdiso?

11 Mendahki ma ke pwulopwul, ke kak sewese koaros en pehm me irail anahn nan mwomwohdiso. Ehu ahl me ke kak wia met iei en kompoakepahkihla Kristian mah kan. Idek rehrail dahme sewese irail en pousehlahte papah Siohwa erein sounpar tohto. Irail kak padahkihong uhk mehn kasukuhl kan me uhdahn kesempwal. Met pahn uhdahn kangoange irail oh kowe! Pil kitail koaros, mehnda ma kitail pwulopwul de mah, kitail kak kahrehiong irail me kapw kan me kohdo ni atail Wasahn Kaudok en pehm me kitail kasamwo irail. Ihte me ke pahn wia iei nda kaselel, sirei ong irail, sewese irail en diar dewerail, oh kapehseiong irail meteikan. Sewese irail en nsenamwahu.

12 Ma ke ahneki pwukoa en kihpeseng pwihn en kalohk, ke kak sewese me mah kan en kolokolete arail marain en linganla. Tehk mwahu  me mie arail wasahn kalohk mwahu. Koasoanehdi pwe me pwulopwul kan en iang irail kalohk. Kristian mah oh me kin kohwahki soumwahu kan kin kalapw mworusala pwehki re sohte kak wia uwen arail kak nan kalohk duwehte me re kin wia mahso. Ahpw re pahn nsenamwahula ma re ese me ke kin nsenohkin irail oh wehwehki arail irairo. Sohte lipilipil irail sounpar depe de uwen werei me re mi nan padahk mehlel, omw kadek kak kangoange irail en pousehlahte kalokalohk ni ngoang.​—Lip. 19:32.

13 Mehn Israel kan kin perenki arail ehupene kaudokiong Siohwa. Sounmelkahkao nda: “Ia uwen lingan, ia uwen kansenamwahu en sapwellimen Koht aramas akan ar kin miniminpene!” (Wadek Melkahka 133:1, 2.) E kapahrekiong miniminpene wet lehn kei, me kin kansenamwahwihala kilin aramas oh pil pwohmwahu. Pil duwehte met, kitail kak kansenamwahwihala riatail Kristian kan sang ni atail kin kadek oh mwahu ong irail. Met kin kalaudehla miniminpenehn mwomwohdiso. Ia duwe, ke kak kalaudehla omw esehla riomw Kristian kan nan mwomwohdiso?​—2 Kor. 6:11-13.

14. Ia duwen omw marain eh kak lingaling ni omw wasahn kousoan?

14 Omw marain kak lingaling sohte lipilipil wasa ke mi ie. Omw kadek kak kahrehiong mehn mpomw kan en men kalaudehla arail sukuhlki duwen Siohwa. Pein idek rehmw: ‘Dahme mehn mpei kan kin medewehkin ie? Imweio kin soandi mwahu oh mwakelekel oh sewese kamwomwahuwihala ei wasahn kousoan? I kin men sewese mehn mpei kan?’ Idek rehn Sounkadehde teikan ia duwen arail kadek oh mehn kahlemeng mwahu eh kamwakid kisehrail kan, mehn mparail kan, iengarail tohndoadoahk de tohnsukuhl kan.​—Ep. 5:9.

MWASAMWASAHN

15. Dahme kahrehda kitail anahne mwasamwasahn?

15 Ma kitail men atail marain en wie lingaling, kitail anahne pohnese duwen ahnsou wet. Pak tohto, Sises mahsanihong sapwellime tohnpadahk ko: “Kumwail pousehlahte mwasamwasahn.” (Mad. 24:42; 25:13; 26:41) Ma kitail pehm me “kahn kamakam kowahlap” saikinte keren, kitail sohte pahn mwasamwasahn oh isaneki ahnsou mwahu koaros pwehn sewese meteikan en sukuhlki duwen Siohwa. (Mad. 24:21) Atail maraino sohla pahn lingaling, ahpw e pahn ekisekis luwetala oh pil kakete sohla mie.

16, 17. Dahme ke kak wia pwehn kolokolte omw madamadau en karuwaru?

16 Kitail anahne mwasamwasahn ahnsou wet laudsang mahs. Irair en sampah kin wie susuwedla. Ahpw kitail ese me imwio pahn kohdo ni ahnsou me Siohwa ketin koasoanehdi. (Mad. 24:42-44) Ahnsou wet, kitail anahne kanengamah oh medemedewehte ahnsou kohkohdo. Wadek Paipel rahn koaros, oh dehr uhdi kapakapohng Siohwa. (1 Pit. 4:7) Sukuhlkihsang riatail kan me kin papah Siohwa erein sounpar tohto. Karasepe, ke kak wadek koasoipen arail mour nan oaralapo “Koledi Teng en Mehn Suhs Men Eh Likowo Erein Sounpar Isihsek,” nan Kahn Iroir (lokaiahn wai) en April 15, 2012, pali 18-21.

17 Ken soupisengki papah Siohwa. Kadek ong meteikan oh werekiong riomw Kristian kan. Eri ke pahn nsenamwahu oh ahnsou pahn mwomwen mwadangala. (Ep. 5:16) Erein sounpar epwiki douwehr powe, sapwellimen Siohwa ladu kan wiadahr soahng tohto. Ahpw rahnwet kin laudla atail soupisek. Sapwellimen Siohwa doadoahk kin kekeirda laudsang atail kin medewe. Atail marain kin wie lingaling!

Ni elder kan ar mwemweitdo rehtail, kitail kak paiekihda sapwellimen Koht erpit (Menlau kilang parakrap 18, 19)

18, 19. Ia duwen elder kan ar kak sewese kitail en papah Siohwa ni ngoang? Menlau kihda ehu karasaras.

 18 Mendahki atail kin wiahda sapwung tohto, Siohwa ketin mweidohng kitail en papah ih. Pwehn sewese kitail, e ketikihda “aramas akan nin duwen kisakis kei” me iei elder kan nan mwomwohdiso. (Wadek Episos 4:8, 11, 12.) Eri ni elder kan ar mwemweitdo rehmw, isaneki ahnsou mwahu me ke ahneki rehrail en sukuhlkihsang arail erpit oh kaweid.

19 Karasepe, pwopwoud ehu nan England ahneki kahpwal nan ara mouren pwopwoud, oh ira peki sawas sang rehn elder riemen. Liho medewe me eh pwoudo sohte kin tiengla mwowe ni eh papah Siohwa. Ohlo medewe me e sohte wia sounpadahk mwahu men oh wehkada me e sohte kin koasoanehdi kaudok en peneinei en kaukaule wiawi. Elder ko sewese pwopwoudo en medewe duwen sapwellimen Sises mehn kahlemeng. Ira kangoange ohlo en kahlemengih mwomwen Sises eh kin ketin apwalih sapwellime tohnpadahk kan. Ira kangoange liho en kanengamahiong eh pwoudo. Ira pil kihda ekei iren sawas ong ia duwen pwopwoudo ara kak wia kaudok en peneinei rehn neira seri riemeno. (Ep. 5:21-29) Ohlo eri doadoahk laud pwehn wiahla tapwin peneinei mwahu men. Elder ko kangoange ih en dehr uhdi ahpw en pousehlahte likih sapwellimen Siohwa manaman. Limpoak oh kadek me elder ko kasalehda uhdahn sewese peneineio!

20. Ia imwilahn omw marain eh kin sansalda?

20 “Meid pai irail kan me kin peikiong KAUN-O, oh kin momourki sapwellime kosonned akan.” (Mel. 128:1) Ke pahn nsenamwahu ni omw marain eh kin sansalda. Eri padahkihong meteikan duwen Koht, wia uwen omw kak koaros en sewese omw peneinei oh mwomwohdiso en miniminpene, oh ken mwasamwasahn. Meteikan pahn kilang omw mehn kahlemeng mwahu oh pahn pil men kapinga Samatailo, Siohwa.​—Mad. 5:16.