Luslahng audepe kan

luslahng audepe kan

 IREN ONOP 5

Se Pahn Iang Kumwailla

Se Pahn Iang Kumwailla

“Se men iang kumwailla, pwe se rong me Koht kin ketin ieiang kumwail.”​—SEK. 8:23, NW.

KOUL 26 Ke Wiahiong Ie

AUDEPEN ONOP *

Sihpw teikan (“aramas ehk”) ahneki pai kaselel en iang me keidi kan (“mehn Suhs men”) kaudokiong Siohwa (Menlau kilang parakrap 1-2)

1. Dahme Siohwa ketin mahsanih me pahn wiawi ni atail ahnsou?

SIOHWA ketin kohpada duwen atail ahnsou: “Aramas ehk sang ni lokaia koaros en wehi kan pahn koledi, ei, re pahn koledi teng en mehn Suhs men eh likowo, ndinda: ‘Se men iang kumwailla, pwe se rong me Koht kin ketin ieiang kumwail.’” (Sek. 8:23NW) Nan ire wet, mehn “Suhs” kin karasaraskihong irail kan me Koht ketin keiekihdi sapwellime manaman. Irail pil adaneki “Israel en Koht.” (Kal. 6:16) “Aramas ehk” ko karasaraskihong irail kan me ahneki koapworopwor en mour kohkohlahte nin sampah. Irail ese me Siohwa ketin kapaiahda pwihn en me keidi kan oh medewe me e wia pai kaselel ehu en iang irail kaudokiong Siohwa.

2. Ia duwen “aramas ehk” ar “iang” me keidi kan?

2 Mendahki kitail sohte kak ese eden emenemen me keidi kan nin sampah rahnwet, * irail me ahneki koapworopwor en mour nin sampah kak “iang” me keidi kan. Ia duwen? Paipel mahsanih me “aramas ehk” pahn “koledi teng en mehn Suhs men eh likowo, ndinda: ‘Se men iang kumwailla, pwe se rong me Koht kin ketin ieiang kumwail.’” Iren Paipel wet mahsanih duwen mehn Suhs emente. Ahpw lepin lokaia “kumwail” kin dokedoke tohtohsang emen aramas. Met wehwehki me mehn Suhs menet sohte wia aramas emente ahpw e karasaraskihong pwihnen me keidi kan pwon. Irail me sohte wia me keidi kin iangete me keidi kan papah Siohwa. Ahpw, irail sohte kin kilangwohng me keidi kan nin duwen arail kaun, ahpw irail kin pohnese me Sises me ketin wia arail Kaun.​—Mad. 23:10.

3. Peidek dah kan me pahn pasapengla nan iren onop wet?

3 Pwehki miehte Kristian keidi kan nanpwungen sapwellimen Koht aramas akan rahnwet, ele ekei kin medewe: (1) Ia  duwen me keidi kan ar pahn kilangwohng pein irail? (2) Ia pahn atail wiewia ong irail kan me tungoale pilawao oh waino ni Katamano? (3) Kitail anahne pwunodki ma nempehn irail pwukat wie tohtohla? Iren onop wet pahn sapengala peidek pwukat.

IA DUWEN ME KEIDI KAN AR PAHN KILANGWOHNG PEIN IRAIL?

4. Kehkehlik dahieu nan 1 Korint 11:27-29 me irail me keidi kan anahne medemedewe mwahu, oh dahme kahrehda?

4 Me keidi kan anahne medemedewe mwahu duwen kehkehlik me dierek nan 1 Korint 11:27-29. (Wadek.) Ia duwen me keidi men me “sohte warohng” tungoale pilawao oh waino ni Katamano? E pahn wia met ma e tungoale pilawao oh waino ahpw sohte kin mour pahrekiong sapwellimen Koht koasoandi pwung kan. (Ipru 6:4-6; 10:26-29) Me keidi kan pohnese me irail anahne kolokolete arail lelepek ma irail men ale “kisakis en malipilip ong nanleng me Koht ketikihda pwehki Krais Sises.”​—Pil. 3:13-16.

5. Ia duwen Kristian keidi kan ar pahn kilangwohng pein irail?

5 Sapwellimen Siohwa manaman kin sewese sapwellime ladu kan en aktikitik, kaidehn en aklapalap. (Ep. 4:1-3; Kol. 3:10, 12) Eri me keidi kan sohte kin medewe me irail mwahusang meteikan. Re ese me Siohwa sohte  ketikihong irail sapwellime manaman laudsang eh ketikihong sapwellime ladu teikan. Irail sohte kin medewe me re wehwehki Paipel laudsang meteikan. Oh irail sohte pahn ndaiong emen me e pil wia me keidi oh e anahne tungoale pilawao oh waino ni Katamano. Ahpw ni aktikitik, re pohnese me Siohwa kelehpw me ketin luke aramas akan en kohdahla nanleng.

6. Nin duwen me 1 Korint 4:7, 8 mahsanih, ia pahn mwomwen ahn Kristian keidi men eh wiewia?

6 Mendahki me keidi kan medewe me e wia pai kaselel ehu en ale luhk en kohdahla nanleng, re sohte kin kasik meteikan en wiahki me irail tohrohr sang koaros. (Pil. 2:2, 3) Re pil ese me ni Siohwa eh ketin keiehdi irail, e sohte kin ketin mweidohng aramas koaros en ese duwen met. Eri me keidi men sohte pahn pwuriamwei ma ekei sohte mwadangete kamehlele me ih emen me keidi. E pohnese me Paipel mahsanihong kitail en dehr mwadangete kamehlele emen me nda me Koht ketikihong ih pwukoa tohrohr ehu. (Kaud. 2:2) Kristian keidi men sohte men aramas akan en nohn tehk ih daulihla. Eri e sohte pahn ndaiong emen me e ahpwtehn tuhwong me ih emen me keidi. Oh e uhdahn sohte pahn suweikihong meteikan duwen met.​—Wadek 1 Korint 4:7, 8.

7. Dahme irail me keidi kan sohte pahn wia, oh dahme kahrehda?

7 Kristian keidi kan sohte kin medewe me irail anahne patehngete me keidi teikan, mwomwen me irail wia kisehn pwihn ehu. Re sohte kin song rapahki me keidi teikan pwe ren kak koasoiapene duwen arail keikihdi sapwellimen Koht manaman de tuhpene nin duwen pwihn tohrohr kan pwehn onopki Paipel. (Kal. 1:15-17) Mwomwohdiso sohte pahn miniminpene ma me keidi kan wia soahng pwukat. Ma irail wia met, irail pahn pelianda sapwellimen Koht manaman, me kin sewese sapwellimen Koht aramas akan en ahneki popohl oh minimin.​—Rom 16:17, 18.

IA PAHN ATAIL WIEWIA ONG ME KEIDI KAN?

Kitail en dehr wiahki me keidi kan de emen sohte lipilipil me kin tiengla mwowe me dene irail ndand (Menlau kilang parakrap 8) *

8. Dahme kahrehda ke anahne kanahieng mwomwen omw wiewia ong irail kan me pahn tungoale pilawao oh waino ni Katamano? (Pil kilang nting tikitik kan pah.)

8 Ia pahn atail wiewia ong riatail Kristian keidi kan? E pahn sapwung en nohn kapinga emen daulihala, mehnda ma ih emen rien Krais me keidi. (Mad. 23:8-12) Ni Paipel eh mahsanih duwen elder kan, e kangoange kitail en “kahlemengih ar pwoson,” ahpw e sohte padahkihong kitail me kitail kak wiahki aramas emen atail kaun. (Ipru 13:7) Mehlel me Paipel mahsanih me ekei “warohng wahu  laud.” Ahpw met pwehki irail kin “apwalih mwahu” mwomwohdiso oh ‘doadoahk laud ni arail kin koasoi oh padahk,’ kaidehn pwehki re wia emen me keidi. (1 Tim. 5:17) Ma kitail kin nohn kapinga oh tehk daulihala emen me keidi, irail pahn soansuwedkihda. * De suwedsang met, kitail kak kahrehiong irail en pohnmwahsohla. (Rom 12:3) Sohte emen rehtail pahn men wia soahng ehu me kakete kahrehiong emen rien Krais me keidi en wiahda sapwung laud wet.​—Luk 17:2.

9. Ia duwen atail kak kasalehda me kitail kin wauneki Kristian keidi kan?

9 Ia duwen atail kak kasalehda me kitail wauneki irail kan me Siohwa ketin keiehdi? Kitail sohte pahn idek rehrail ia mwomwen arail wiahla emen me keidi. Pein irail me ese duwen met, oh sohte atail pwuhng en ese. (1 Des. 4:11; 2 Des. 3:11) Oh kitail sohte kin wiahki arail pwoud, arail pahpa nohno, de tohn peneinei teikan en pil iang wia me keidi kan. Aramas emen sohte kin sohsohki sang eh peneinei eh koapworopwor en nanleng. E alehsang rehn Koht. (1 Des. 2:12) Kitail en pil soikala peidek kan me kak kamedekihala meteikan. Karasepe, kitail sohte pahn idek rehn sister men me pwoudiki brother keidi men ia eh pepehm duwen eh pahn kelehpwla mour nin sampah kohkohlahte. Kitail uhdahn kak kamehlele me nan sampah kapwo, Siohwa pahn ketin “kaitarala ar anahn akan koaros.”​—Mel. 145:16.

10. Ia duwen atail kin pere pein kitail ma kitail kin soikala “kapinga meteikan”?

10 Ma kitail sohte kin wiahki me keidi kan kesempwal sang meteikan, kitail kin pere pein kitail. Ia duwen? Paipel mahsanihong kitail me ekei me keidi kan ele sohte pahn kolokolete arail lelepek. (Mad. 25:10-12; 2 Pit. 2:20, 21) Ahpw ma kitail kin soikala “kapinga meteikan,” kitail sohte pahn idawehn meteikan, pil irail me keidi kan de irail me me tohto kin ese, de irail me kin papah Siohwa sounpar tohto. (Sud 16) Eri ma irail sohla lelepek de kohkohsang mwomwohdiso, kitail sohte pahn sohla pwoson Siohwa de uhdihsang papah ih.

KITAIL EN PWUNODKI NEMPEHN IRAIL ME TUNGOALE PILAWAO OH WAINO?

11. Dahme wiawihong nempehn irail kan me tungoale pilawao oh waino ni Katamano?

11 Erein sounpar tohto, nempehn irail kan me kin tungoale pilawao oh waino ni Katamano kin wie malaulaula. Ahpw me keren, nempehn irail pwukat wie tohtohla sounpar koaros. Ia duwe, kitail anahne pwunodki met? Soh. Kitail kilang dahme kahrehda.

12. Dahme kahrehda kitail sohte anahne pwunodki nempehn irail kan me tungoale pilawao oh waino ni Katamano?

12 “Siohwa ketin mwahngih irail kan me e ketin sapwellimanki.” (2 Tim. 2:19) Weksang Siohwa, brother kan me wadek nempehn irail kan me tungoale pilawao oh waino ni Katamano sohte ese ihs me uhdahn wia me keidi men. Eri irail kan me medewe me re keidi ahpw soh, iangete nempe me wadawadedi. Karasepe, ekei me kin tungoale pilawao oh waino uhdi wia met. Ekei irail ele ahneki soumwahu en madamadau oh pepehm me kahrehiong irail en kamehlele me re pahn iang Krais ketin kaunda sang nanleng. E sansal me kitail sohte uhdahn ese meh depe me keidi me mihmihte nin sampah ahnsou wet.

13. Ia duwe, Paipel mahsanih meh depe me keidi pahn mihmi nin sampah ni ahnsou me kahn kamakam kowahlap tepida wiawi?

13 E pahn mie me keidi kan wasa tohto nin  sampah ni Sises eh pahn ketido oh ketikihiraildahla nanleng. (Mad. 24:31) Paipel mahsanih me erein imwin rahn akan, e pahn mie me keidi malaulau kei me luwehdi pohn sampah. (Kaud. 12:17) Ahpw e sohte mahsanih me meh depe me pahn luhwehdi ni ahnsou me kahn kamakam kowahlap pahn tepida wiawi.

Ia pahn atail wiewia ma emen tungoale pilawao oh waino ni Katamano? (Menlau kilang parakrap 14)

14. Nin duwen me sansalda nan Rom 9:11, 16, dahme kitail anahne wehwehki duwen pilipilda en irail me keidi kan?

14 Siohwa ketin koasoanehdi iahd me e pahn ketin pilada me keidi kan. (Rom 8:28-30) Siohwa ketin tapiada pilada me keidi kan mwurin Sises iasada. Mwomwen me ni mwehin tepin Kristian kan, Kristian mehlel koaros keidier. Erein sounpar kan mwuhr, pali laud en irail me dene irail Kristian kei sohte kin uhdahn idawehn Krais. Mendahki met, erein sounpar ko, Siohwa ketin keiehdi me malaulau kei me wia Kristian mehlel kan. Irail duwehte wihd ko me Sises mahsanih me pahn keirda nanpwungen dihpw suwed kan. (Mad. 13:24-30) Erein imwin rahn akan, Siohwa kin ketin pousehlahte pilada aramas akan me pahn iang kisehn meh 144,000 ko. * Eri ma Koht ketin koasoanehdi en pilada ekei irail pwukat mwohnte imwio, kitail en dehr peidengki sapwellime erpit. (Wadek Rom 9:11, 16.) * Kitail anahne kanahieng pwe kitail en dehr duwehte tohndoadoahk ko me Sises ketin kawehwehda nan ehu sapwellime karasaras ko. Irail kaulimki duwen mwomwen wiewiahn  arail soumaso ong tohndoadoahk ko me tepida doadoahk ni kaimwiseklahn awao.​—Mad. 20:8-15.

15. Koaros me keidi kan iang kisehn “ladu lelepek oh loalokong” me kileldi nan Madiu 24:45-47? Menlau kawehwehda.

15 Kaidehn koaros me ahneki koapworopwor en mour nanleng iang kisehn “ladu lelepek oh loalokong.” (Wadek Madiu 24:45-47.) Duwehte ni mwehin tepin Kristian ko, rahnwet Siohwa oh Sises ketin doadoahngki ekeite brother pwehn kamwenge, de padahki, me tohto. Kristian keidi malaulaukeite ni mwehin wahnpoaron ko me Koht ketin doadoahngki pwehn ntingihedi Palien Paipel ni Lokaiahn Krihs. Rahnwet, Kristian keidi malaulaukeite ahneki pwukoa en kihong sapwellimen Koht aramas akan “mwenge ni ahnsou me konehng.”

16. Dahme ke sukuhlkihsang iren onop wet?

16 Dahme iren onop wet padahkihong kitail? Siohwa ketin koasoanehdi en ketikihong pali laud en sapwellime aramas akan mour soutuk nin sampah oh mour nanleng ong ekeite me pahn iang Sises kaunda sang nanleng. Siohwa ketin katingih sapwellime ladu kan koaros—​mehn ‘Suhso’ oh pil “aramas ehk” ko​—oh e ketin kupwurki ren peikiong kosonned kohte oh kolokolete arail lelepek. Koaros anahne kolokolete aktikitik. Koaros anahne ehupene papah ih oh miniminpene. Oh koaros anahne doadoahk pwe popohl en mihmihte nan mwomwohdiso. Ni atail kerenlahngehr ni imwio, kitail koaros en pousehlahte papah Siohwa oh idawehn Krais nin duwen “pelin sihpw teieu.”​—Sohn 10:16.

^ par. 5 Sounpar wet, Kataman en pwoulahn Krais pahn wiawi Niare, April 7. Ia duwen atail en kilangwohng irail kan me tungoale pilawao oh waino ni Katamano? Kitail pahn pwunodki ma nempehn irail pwukat pahn wie tohtohla? Kitail pahn diar pasapengpen peidek pwukat nan iren onop wet, me poahsoankihda ehu iren onop sang nan Kahn Iroir en January 2016.

^ par. 2 Nin duwen me Melkahka 87:5, 6 mahsanih, ni ahnsou kohkohdo, ele Koht pahn ketin kasalehda eden irail kan koaros me pahn iang Sises kaunda sang nanleng.​—Rom 8:19.

^ par. 8 Menlau kilang kakon me oaralape “Limpoak ‘Sohte Kin Aklemei’” nan Kahn Iroir, January 2016.

^ par. 14 Mendahki Wiewia 2:33 mahsanih me Sises me kamwerehdi sapwellimen Koht manaman pohn me keidi kan, Siohwa iei me kin ketin luke emenemen irail.

^ par. 14 Pwehn kalaudehla omw wehwehki met, menlau kilang “Peidek kan Sang Sounwadawad kan” nan Kahn Iroir (lokaiahn wai) en May 1, 2007.

KOUL 34 Kekeid ni Lelepek

^ par. 56 WEHWEHN KILEL: Medewehla ma pokon en sounkilel kan kapilpene emen wiliepen poasen kaun en Sounkadehdehn Siohwa oh eh pwoudo pwehn kilele ira ni mihting tohrohr ehu. Ia uwen ar sohte kasalehda wahu!