Luslahng audepe kan

luslahng audepe kan

 IREN ONOP 1

Kumwail Kohwei oh Katohnpadahk

Kumwail Kohwei oh Katohnpadahk

ATAIL IREN PAHR ONG 2020: “Kumwail eri kohwei oh padahkihong aramas . . . , ren wiahla nei tohnpadahk, papidaisihirailla.”​—MAD. 28:19.

KOUL 79 Komw Padahkihong Irail en Kesihnenda Teng

AUDEPEN ONOP *

1-2. Dahme tohnleng men ndaiong lih ako ni sapwellimen Sises sousowo, oh kaweid dahieu me Sises ketikihong irail?

AHNSOWO iei ni menseng en Nisan 16, pahr 33. Mie lih ekei me kin poakohng Koht oh me inenen pahtoula ni arail alialu kolahng ni sousou me kahlap en Sises Krais nekinekdi ie awa 36 mwowe. Irail men kihong mehn kapwohtik oh leh pwohmwahu kan ni kahlap en Siseso, ahpw ni arail lella ni sousowo, irail pwuriamweikihla eh sohte kanenge! Tohnleng men padahkihong lih ako me Sises ketin iasadahr sang me melahr kan, oh pil nda: “E pahn ketiket kolahng Kalili mwohmwail. Kumwail pahn kilang ih wasao.”​—Mad. 28:1-7; Luk 23:56; 24:10.

2 Mwurin lih ako kohkohla sang ni sousowo, Sises ketin pwarohng irail oh ketikihong irail kaweid wet: “Kohla kairehki riei ko me ren kohla Kalili oh ih wasao me re pahn kilang ie.” (Mad. 28:10) Ele mie kaweid uhdahn kesempwal kei me Sises pahn ketikihong sapwellime tohnpadahk ko, pwehki tuhpene wet iei tepin koasoandi me Sises ketin wiahda mwurin eh iasada!

KEHKEHLIK EHU ME KOHWONG IHS?

Ni Sises eh ketin tuhwong wahnpoaron ko oh meteikan nan Kalili mwurin eh ketin iasada, e ketin kehkehlikihong irail en “kohwei oh padahkihong aramas . . . ren wiahla nei tohnpadahk” (Menlau kilang parakrap 3-4)

3-4. Dahme kahrehda kitail kak nda me kehkehlik me kileldi nan Madiu 28:19, 20 sohte wiawihda ongete wahnpoaron ko? (Menlau kilang kilel ni kilin Kahn Iroir wet.)

3 Wadek Madiu 28:16-20. Ni mihting me Sises ketin koasoanehdio, e ketin padahkihong sapwellime tohnpadahk kan duwen doadoahk kesempwal me re pahn wia ahnsowo, me iei doadoahkohte me kitail kin wiewia rahnwet. Sises mahsanih: “Kumwail eri kohwei oh padahkihong aramas en wehi koaros pwe ren wiahla nei tohnpadahk, . . . padahkihong irail en kapwaiada mehkoaros me I kehkehlingkihong kumwail.”

4 Sises kupwurki sapwellime tohnpadahk kan koaros en kalohk. E sohte ketin wiahda kehkehlik wet ongete sapwellime  wahnpoaron lelepek 11 ko. Ia duwen atail kak uhdahn kamehlele met? Ni ahnsou me Sises ketikihda kehkehlik en katohnpadahk, wahnpoaron ko kelehpw me mi pohn nahnahn Kalili? Taman me tohnlengo ndaiong lih ako: “Kumwail pahn kilang ih [nan Kalili].” Eri lih lelepek kan ele pil iang mi wasao. Ahpw kaidehn ihte met. Wahnpoaron Pohl kasalehda me Sises “ketin pwarohng riatail kan me daulih meh 500 ni ahnsoutehkis.” (1 Kor. 15:6) Ia wasa?

5. Dahme kitail sukuhlkihsang 1 Korint 15:6?

5 Mie kahrepe mwahu kan me kitail en kamehlele me dahme Pohl koasoakoasoia nan 1 Korint 15:6 kin dokedoke Madiu irelaud 28. Kahrepe dah kan? Keieu, pali laud en sapwellimen Sises tohnpadahk kan wia mehn Kalili kei. Eri nahnahn Kalili pahn wia wasa mwahu ehu ong pokon laud ehu en pokonpene ie, a kaidehn nan ihmw ehu nan Serusalem. Keriau, Sises me ketin iasadahr tuhwongehr sapwellime wahnpoaron 11 ko nan ihmw ehu nan Serusalem. Ma Sises kupwurki kaweid wahnpoaron ko kelehpw me ren kalohk oh katohnpadahk, e kak ketin wia met nan Serusalem. E sohte anahne mahsanihong irail oh lih ako oh pil meteikan ren tuhwong ih nan Kalili.​—Luk 24:33, 36.

6. Ia duwen Madiu 28:20 eh kasalehda me kehkehlik en katohnpadahk pil kadoadoahk rahnwet, oh ia duwen aramas akan ahnsou wet ar peikiong kehkehlik wet?

6 Tehk kahrepe kesiluh. Sapwellimen Sises kehkehlik en katohnpadahk sohte kowohngete Kristian kan ni mwehin wahnpoaron ako. Ia duwen atail ese met? Sises ketin kaimwisengkihla sapwellime kehkehliko ong sapwellime tohnpadahk ko mahsen pwukat: “I pahn ieiang kumwail rahn koaros lao lel ni kaimwiseklahn koasoandi en mwehio.” (Mad. 28:20) Duwehte dahme Sises mahsanih, rahnwet aramas tohto kin wiewia doadoahk en katohnpadahk. Nna medewehla! Nan sounpar koaros, kereniong aramas 300,000 kin papidaisla nin duwen Sounkadehdehn Siohwa kan oh wiahla sapwellimen Sises Krais tohnpadahk!

7. Dahme kitail pahn koasoiapene, oh dahme kahrehda?

7 Me tohto me onop Paipel kin kekeirda oh papidaisla. Ahpw ekei me kin kaukaule onop Paipel rehtail mwomwen pweiek en wiahla tohnpadahk kan. Re perenki arail onop, ahpw re sohte kin kekeirda pwehn papidaisla. Ma ke kin onop Paipel rehn emen, se kamehlele me ke men sewese noumw tohnsukuhlo en kapwaiada dahme e sukuhlki oh wiahla sapwellimen Krais tohnpadahk. Iren onop wet pahn koasoia ia duwen atail kak kamwakid mohngiong en tohnsukuhlo oh ia duwen atail kak sewese ih en poakohng Siohwa oh kekeirda. Dahme kahrehda kitail anahne koasoiapene ire wet? Pwehki ekei pak ele kitail anahne pilada ma kitail en pousehlahte onopo de soh.

SONG EN KAMWAKID ARAIL MOHNGIONG

8. Dahme kahrehda e kak apwal en kamwakid mohngiong en aramas akan?

8 Siohwa ketin kupwurki aramas akan en papah ih pwehki re poakohng ih. Eri atail mehn akadei iei en sewese neitail tohnsukuhl kan en wehwehki me Siohwa ketin nsenohki emenemen irail oh me e uhdahn ketin poakohng irail. Kitail men sewese irail en kilangwohng Siohwa nin duwen “pahpa men ong me sepwoupwou kan oh silepen liohdi kan.” (Mel. 68:5NW) Ni noumw tohnsukuhl kan ar esehda ia uwen Koht eh ketin poakohng irail, arail mohngiong pahn mwekidki oh re pil pahn tepida poakohngala ih. Ekei tohnsukuhl pahn apwalki kilangwohng Siohwa nin duwen Pahpa limpoak men pwehki pein arail pahpao sohte kin kasalehda limpoak oh kadek ong irail. (2 Tim. 3:1, 3) Eri ni omw kin wia onop rehrail, kawehwehda mwahu sapwellimen Siohwa  irair kaselel kan. Sewese noumw tohnsukuhl ko en wehwehki me atail Koht limpoako ketin kupwurki irail en ale mour soutuk, oh e pahn ketin kupwurperenki sewese irail en lel mehn akadei wet. Dahme kitail pil kak wia?

9-10. Mehnia pwuhk kan me kitail en doadoahngki ni atail wia onop en Paipel rehn emen, oh dahme kahrehda kitail en doadoahngki pwuhk pwukat?

9 Doadoahngki pwuhken “Dahme Paipel Kak Padahkihong Kitail?” oh pil “Dadaurete ni Limpoak en Koht.” Pwuhk pwukat wiawihda pwehn sewese kitail en kamwakid mohngiong en neitail tohnsukuhl kan. Karasepe, irelaud 1 en pwuhken Padahkihong Kitail sapengala peidek pwukat: Ia duwe, Koht ketin nsenohkin kitail de ih Koht lemei men?, Ia sapwellimen Koht pepehm ong lokolok en aramas?, oh Ke kak wia kompoakepahn Siohwa? A ia duwen pwuhken “Limpoak en Koht”? Pwuhk wet pahn sewese tohnsukuhlo en wehwehki ia duwen doadoahngki kaweid oh ire mehlel kan en Paipel eh kak kamwahwihala eh mour oh kahrehiong en karanihala Siohwa. Mehnda ma ke onopkiher pwuhk pwukat rehn meteikan, kaunopada  mwahu ong ehuehu omw onop en Paipel, pwe ken kak sewesehki dahme noumw tohnsukuhlo anahne.

10 Dahme ke pahn wia ma noumw tohnsukuhlo men koasoia duwen ehu oaralap me mi nan ehu sawasepen Paipel me sohte iang mi nan Koakon en Kasukuhl? Ele ke kak kangoange ih en pein wadek sawasepen Paipelo ni ahnsou me e kak pwe kumwa en kak pousehlahte onopki pwuhk kan en Padahkihong Kitail de Limpoak en Koht.

Tepikihda onopo kapakap (Kilang parakrap 11)

11. Iahd me kitail en tepida kapakap ni ahnsoun onop Paipel, oh ia duwen atail kak sewese tohnsukuhlo en ese dahme kahrehda met kesempwal?

11 Tepikihda onopo kapakap. E kin keieu mwahu en tepikihda oh kaimwisengkihla onop kan kapakap, ni ahnsou mwadang ma kak, ahpw mehlel erein tepin wihk ko mwurin omw tepidahr kaukaule onop rehn aramaso. Kitail anahne sewese tohnsukuhlo en ese me kitail kak wehwehki Mahsen en Koht ihte pwehki sawas sang sapwellimen Koht manaman. Ekei sounpadahk kan kin kawehwehda dahme kahrehda kitail en kapakap ni ahnsoun onop ni arail kin wadek Seims 1:5, me mahsanih: “Ma emen rehmwail sohte ahneki erpit, a en usehlahte pekipeki rehn Koht.” Sounpadahko eri idek rehn tohnsukuhlo, “Ia duwen atail kak peki erpit sang rehn Koht?” Tohnsukuhlo ele pahn pwungki me kitail anahne kapakap ong Koht.

12. Ia duwen omw pahn doadoahngki Melkahka 139:2-4 pwehn sewese tohnsukuhlo en kapakap ong Siohwa ni saledek?

12 Padahkihong noumw tohnsukuhlo mwomwen kapakap. Kamehlelehiong me Siohwa ketin kupwurki karonge eh kapakap sang nan mohngiong. Kawehwehiong me nan atail kapakap, kitail kak uhdahn patohwanohng Siohwa audepen mohngiongitail—kasalehda atail pepehm kan me ele kitail sohte kak koasoiaiong meteikan. Tamataman me Siohwa ketin mwahngiher atail madamadau loal kan. (Wadek Melkahka 139:2-4.) Kitail pil kak kangoange neitail tohnsukuhlo en peki Sapwellimen Koht sawas en kapwungala eh madamadau sapwung oh wiewia sapwung kan. Karasepe, tohnsukuhl en Paipel men ele kin perenki wia kasarawi kan me kohsang kaudok likamw. E ese me e sapwung, ahpw e kin perenki soahng kei me pidada kasarawio. Kangoange ih en patohwanohng Siohwa ia uhdahn eh pepehm oh peki sawas pwehn poakohngete dahme Koht kin ketin poakohng.​—Mel. 97:10.

Luke noumw tohnsukuhl en Paipelo en iang towehda mihting kan (Kilang parakrap 13)

13. (a) Dahme kahrehda kitail en luke neitail tohnsukuhl kan en iang towehda mihting kan ni ahnsou karuwaru? (b) Ia duwen atail kak sewese tohnsukuhl men en ahnla atail Wasahn Kaudok?

13 Luke noumw tohnsukuhl en Paipelo en iang towehda mihting ni ahnsou karuwaru. Dahme noumw tohnsukuhlo rong oh doadoahngki ni mihting en Kristian kak kamwakid eh mohngiong oh sewese ih en kekeirda. Kasalehiong kisin kasdo Dahme Kin Wiawi nan Atail Wasahn Kaudok? oh ni kadek luke en iang uhk. Sewesehki mehn peidaid ma kak. E mwahu en luke soangsoangen sounkalohk kan en iang uhk kohla rehn tohnsukuhlo. Ni ahl wet, noumw tohnsukuhlo pahn esehla meteikan nan mwomwohdiso, oh ele e pahn ahnla iang towehda atail mihting kan.

SEWESE TOHNSUKUHLO EN KEKEIRDA

14. Dahme kak kamwakid tohnsukuhl men en kekeirda?

14 Atail mehn akadei iei en sewese neitail tohnsukuhl en Paipel kan en kekeirda. (Ep. 4:13) Ni emen eh kin pwungki en onopki Paipel, ele e mente ese ia duwen eh onopo eh pahn sewese ih. Ahpw ni ahnsou me eh limpoak ong Siohwa kin kekeirda, ele e pahn tepida medewe ia duwen eh pahn kak sewese meteikan, iangahki irail kan me iang mwomwohdiso. (Mad. 22:37-39) Ni ahnsou me konehng, ke dehr suwedki en padahkihong tohnsukuhlo duwen pwais  kaselel en iang utung doadoahk en Wehio ni atail toukihda mwohni.

Padahkihong noumw tohnsukuhlo dahme e pahn wia ni kahpwal ehu eh pwarada (Kilang parakrap 15)

15. Ia duwen atail kak sewese tohnsukuhl en Paipel men ni kahpwal kan ar pwarada?

15 Padahkihong noumw tohnsukuhl en Paipelo dahme e pahn wia ni kahpwal ehu eh pwarada. Karasepe, ia duwen ma noumw tohnsukuhlo wia sounkalohk men me saikinte papidais ndaiong uhk me e nsensuwed pahn emen nan mwomwohdiso. Ke dehr ndahng ma ihs me pwung de sapwung, ahpw kawehwehiong dahme Paipel mahsanih me e anahne wia. E kak mahkohng rie Kristiano oh manokehla dahme wiawio. De ma e sohte kak wia met, eri e anahne koasoiong ih ni kadek oh limpoak pwehn kak ‘kasapahldo rieo.’ (Pil kilang Madiu 18:15.) Sewese noumw tohnsukuhlo en kaunopada dahme e pahn nda. Kasalehiong ia mwomwen doadoahngki JW Library® app, Sawas en Wia Roporop en Sounkadehdehn Siohwa kan, oh jw.org® pwehn sukuhlki wiepe kan en kapwungala kahpwalo. Ma e sukuhlki ia duwen eh pahn kapwungala kahpwal ehu rehn meteikan mwohn eh papidaisla, ele e pahn uhdahn kak ahneki nanpwungmwahu rehn meteikan nan mwomwohdiso mwurin e papidaisla.

16. Ia kamwahupen en luke sounkalohk teikan en iang uhk kohla rehn omw onop en Paipel?

16 Luke meteikan nan mwomwohdiso oh sounapwalih me kin seiloak en iang uhk kohla rehn omw onop. Dahme kahrehda? Patehng kahrepe kan me kitail koasoiapene mwowe, ekei sounkalohk kan ele kak sewese noumw tohnsukuhlo ni ahl kan me ke sohte kak. Karasepe, ia duwen ma noumw tohnsukuhlo nannanti en uhdihsang simwok sika ahpw sohte pweida ekei pak. Luke Sounkadehde men en iang uhk me powehdier kahpwal wet, ele mwurin eh song en powehdi ahpw sohte pweida ekei pak. Iengomw Sounkadehdeo ele kakete kihda kaweid mwahu me tohnsukuhlo anahne rong. Ma ke soansuwedki en wia onop mwohn brother de sister koahiek men, peki en wia onopo. Ni omw kin luke meteikan en iang uhk kohla ni omw onop en Paipelo, noumw tohnsukuhlo kak paiekihda arail koahiek. Tamataman me atail mehn akadei iei en sewese tohnsukuhlo en kekeirda.

I ANAHNE UHDIHSANG EI ONOP REH?

17-18. Dahme ken medewe ni ahnsou me ke pahn pilada ma ke pahn uhdihsang onop rehn emen?

17 Ma noumw tohnsukuhl en Paipelo sohte kin kekeirda mwahu, ni soangen ahnsowo ke pahn anahne pein idek rehmw, ‘I anahne uhdihsang onop reh?’ Mwohn omw pahn wiahda pilipil, ke anahne medewe en aramaso irair. Ekei kin kekeirda mwadang sang ekei. Pein idek rehmw: ‘Nei tohnsukuhlo kin kekeirda ni ahl me konehng eh irairo?’ ‘E kin tepidahr “kapwaiada” soahng kan me e kin sukuhlki?’ (Mad. 28:20) Tohnsukuhl men ele pahn pwand en kekeirda, ahpw e anahne ekisekis wiahda wekidekla kan.

18 Ahpw dahme kitail anahne wia ma kitail onopkiher rehn emen ahnsou werei oh e sohte kin kasalehda me dahme e onopkio kesempwal ong ih? Medewehla ma mie noumw tohnsukuhl  men me kumwa kanekelahr amwa onopki pwuhken Padahkihong Kitail oh pil tepida onopki pwuhken Limpoak en Koht ahpw e saikinte iang towehda mihting pak ehu​—de pil Katamano! Oh e kin kalapw kauwehla amwa koasoandi en onop ong mehkot sohte kesempwal. Ma noumw tohnsukuhlo kin wia met, ke anahne koasoi mehlel ong ih. *

19. Dahme ke pahn kak ndaiong emen me mwomwen sohte kesempwalki eh onop en Paipel, oh dahme ke pahn anahne medewe?

19 Ke kak tepikihda ni omw idek reh, ‘Dahme pahn keieu apwal ong uhk en wia pwehn wiahla emen Sounkadehdehn Siohwa kan?’ Tohnsukuhlo kakete sapengki, ‘I perenki onop Paipel, ahpw I sohte douluhl pahn wiahla emen Sounkadehdehn Siohwa kan!’ Ma ih met me e kin medewe mwurin eh onopkiher ahnsou werei, ia duwe, mie kahrepen en pousehlahte onop reh? De mwein noumw tohnsukuhlo ehdin eh ndawei dahme kahrehda e sohte kekeirda. Karasepe, ele mwein e pehm me e sohte douluhl kak iang kalohk ihmw lel ihmw. Ni omw esehda ia eh pepehm, ke pahn kak ese mwahu ia duwen omw pahn sewese ih.

Dehr doadoahngkihla ahnsou ong tohnsukuhl men me sohte kin kekeirda (Kilang parakrap 20)

20. Ia duwen atail wehwehki Wiewia 13:48 eh sewese kitail en pilada ihs me kitail en pousehlahte onop reh?

20 E kansensuwed me ekei tohnsukuhl kan duwehte mehn Israel ko ni mwehin Esekielo. Siohwa ketin mahsanihong Esekiel duwen irail: “Re kin wiahkin uhk sounkamweit men me kin wiewia koulen limpoak de kesekesengki arp. Re kin rong omw lokaia kan, re ahpw sohte kin kapwaiada.” (Esek. 33:32) Ele e pahn apwal ong kitail en ndaiong emen me kitail pahn uhdihsang onop reh. Ahpw “ahnsou me luhwehdi mwotomwotalahr.” (1 Kor. 7:29) E pahn mwahu en dehr doadoahngki ahnsou ong tohnsukuhl men me sohte kin kekeirda, ahpw kitail anahne diarada emen me kin kasalehda me ih emen “me ahneki mohngiong mwahu en ale mour soutuk.”​—Wadek Wiewia 13:48.

Ele mie ekei nan omw wasahn kalohk me kin kapakapki sawas (Kilang parakrap 20)

21. Ia atail iren pahr en 2020, oh dahme met pahn sewese kitail en wia?

21 Erein 2020, atail iren pahr pahn sewese kitail en medewe ia duwen atail kak koahiekla nan doadoahk en katohnpadahk. E kin pidada soahng kei me Sises mahsanih erein ahnsou kesempwalo me re pokonpene ie ni nahnahn Kalili: “Kumwail eri kohwei oh padahkihong aramas . . . , ren wiahla nei tohnpadahk, papidaisihirailla.”​Mad. 28:19.

Kitail men koahiekla ni atail wia doadoahk en katohnpadahk oh sewese neitail tohnsukuhl kan en papidaisla (Menlau kilang parakrap 21)

KOUL 70 Rapahki me Warohng kan

^ par. 5 Atail iren pahr en 2020 kangoange kitail en katohnpadahk. Sapwellimen Siohwa ladu kan koaros anahne peikiong kehkehlik wet. Ia duwen atail kak kamwakid mohngiong en neitail tohnsukuhl en Paipel kan pwe ren wiahla sapwellimen Krais tohnpadahk kan? Iren onop wet pahn kasalehda ia duwen atail kak sewese neitail tohnsukuhl en Paipel kan en karanihala Siohwa. Kitail pil pahn koasoiapene ia duwen atail en pilada ma kitail en pousehlahte onop rehn aramaso de soh.

^ par. 18 Kilang kisin kasdo Discontinuing Unproductive Bible Studies on JW Broadcasting®.