Luslahng audepe kan

luslahng audepe kan

 IREN ONOP 6

Samatail Siohwa Uhdahn Ketin Poakohng Kitail

Samatail Siohwa Uhdahn Ketin Poakohng Kitail

“Eri, iet duwen amwail pahn kin kapakap: ‘Samat me ketiket nanleng.’”​—MAD. 6:9.

KOUL 135 Pekipek Limpoak Ehu Sang Rehn Siohwa: “Samwa, Ke en Loalokongla”

AUDEPEN ONOP *

1. Dahme emen anahne wia ma e men koasoiong nanmwarki en Persia?

MEDEWEHLA me ke momour nan Persia mpen sounpar 2,500 samwalahro. Ke men koasoiaiong nanmwarki en sahpwo duwen ire ehu, eri ke seiloakla ni kahnimw en Susa wasa me nanmwarkio kin kousoan ie. Ahpw mwohn omw pahn koasoiong nanmwarkio, ke anahne ale mweimwei sang reh. Ma ke sohte wia met, ke pahn kakete kamakamala!​—Ester 4:11.

2. Soangen pepehm dah me Siohwa ketin kupwurki kitail en ahneki ni atail patohong ih?

2 Ia uwen atail kalahnganki me Siohwa sohte ketin duwehte nanmwarki en Persiao! Siohwa uhdahn ketin kehlailsang oh kesempwalsang kaun koaros nin sampah, ahpw e kin ketin mweidohng kitail en patohong ih ahnsou koaros. E ketin kupwurki kitail en ni saledek patohong ih. Karasepe, mendahki Siohwa ketin mwarenki lengileng lapalap pwukat duwehte Sounkapikpatail Lapalap, me Keieu Manaman, oh Kaun Wasa Lapalahpie, e ketin luke kitail en likweriong ih ni atail doadoahngki mwaro, “Samat,” me kitail ahnlahr. (Mad. 6:9) Ia uwen atail kin perenki me Siohwa ketin kupwurki kitail en uhdahn karanihala ih!

3. Dahme kahrehda kitail kak ekerki Siohwa “Samat,” oh dahme iren onop wet pahn koasoia?

3 E konehng kitail en ekerki Siohwa “Samat”​—ih me ketin wia Utupen atail mour. (Mel. 36:9) Pwehki ih me Samatail, kitail pwukoahki en peikiong ih. Ma kitail kapwaiada dahme e kupwurki kitail en wia, kitail pahn paiekihda pai kaselel kan. (Ipru 12:9) Kapai pwukat kin iangahki mour soutuk, mehnda ma nanleng de nin sampah. Kitail pil kin paiekihda kamwahu kan ahnsou wet. Iren onop wet pahn koasoia ia duwen Siohwa eh ketin wia Sahm limpoak men ahnsou wet oh dahme kahrehda kitail kak kamehlele me e sohte pahn ketin likidmelieikitailla ni ahnsou kohkohdo. Ahpw keieu, kitail pahn koasoiapene dahme kahrehda kitail kak  kamehlele me Samatailo nanleng uhdahn ketin poakohng kitail oh kupwurki sewesei kitail.

SIOHWA KETIN WIA SAMATAIL LIMPOAK OH NSENOH

Siohwa ketin kupwurki karanihala kitail, duwehte pahpa limpoak men eh kin men karanihala nah seri kan (Menlau kilang parakrap 4)

4. Dahme kahrehda ekei kin apwalki kilangwohng Siohwa nin duwen Samarail?

4 Ke kin apwalki medewehiong Koht nin duwen Semomw? Ele ekei kin medewe me irail sohte kesempwal mwohn silangin Siohwa. Irail kin peikasalki me Koht me Keieu Manaman ketin nsenohkin emenemen irail. Ahpw, Samatail limpoako sohte ketin kupwurki kitail en ahneki soangen pepehmo. E ketikihong kitail mour oh ketin kupwurki kitail en ahneki nanpwungmwahu keren reh. Mwurin eh kasalehda ire mehlel wet, wahnpoaron Pohl kawehwehiong sounrongorong ko nan Adens me Siohwa “sohte ketin dohsang emenemen kitail.” (Wiewia 17:24-29) Koht ketin kupwurki emenemen kitail en patohong ih duwehte seri men eh kin kalapw koasoiong eh pahpa nohno me limpoak oh nsenoh.

5. Dahme kitail sukuhlkihsang dahme wiawihong emen sister?

5 Ekei ele kin apwalki kilangwohng Siohwa nin duwen Samarail pwehki pein arail pahpa sohte kin kasalehiong irail limpoak de kadek. Tehk dahme emen sister nda: “Ei pahpao uhdahn lemei.” E pil nda: “Ni ahnsou me I tepida onopki Paipel, e kin uhdahn apwal ong ie en karanihala Sahmo nanleng. Ahpw mwurin ei tepida esehla Siohwa, ei madamadau wekila.” Ia duwe, ke kin ahneki soangen pepehmohte? Ma ei, ken kamehlele me ke pil kak kilangwohng Siohwa nin duwen Sahm men me keieu mwahu.

6. Nin duwen me Madiu 11:27 mahsanih, ia ehu ahl me Siohwa ketin sewese kitail en kilangwohng ih nin duwen Samatail limpoak?

6 Ehu ahl me Siohwa kin ketin sewese kitail en kilangwohng ih nin duwen Samatail limpoak iei sang ni eh ketin mweidohng dahme Sises koasoia oh wia en kileldi nan Paipel. (Wadek Madiu 11:27.) Sises ketin kahlemengih ni unsek Semeo me kahrehda e kak mahsanih: “Mehmen me kilangieier pil kilangehr Sahmo.” (Sohn 14:9) Sises kalapw mahsanih duwen Siohwa nin duwen Sahm men. Nan Rongamwahu pahieu ko kelehpw, Sises ketin doadoahngki mwar wet ‘Sahm’ mpen pak 165. Dahme kahrehda Sises kalapw mahsanih duwen Siohwa nin duwen Sahm men? Ehu kahrepe iei en kamehlelehiong aramas akan me Siohwa ketin wia Sahm limpoak men.​—Sohn 17:25, 26.

7. Dahme kitail sukuhlki duwen Siohwa sang mwomwen sapwellime wiewia ong sapwellime Ohlo?

7 Tehk dahme kitail kak sukuhlki duwen Siohwa sang mwomwen sapwellime wiewia ong sapwellime Ohlo, Sises. Siohwa kin ahnsou koaros ketin karonge ahn Sises kapakap kan. E sohte kin ketin karongehte eh kapakap kan, ahpw e kin ketin sapengala. (Sohn 11:41, 42) Sohte lipilipil kasongosong dah me Sises ketin lelohng, e kin ahnsou koaros pehm limpoak oh sawas sang rehn Semeo.​—Luk 22:42, 43.

8. Ni ahl dah kan me Siohwa kin ketikihong Sises dahme e anahne?

8 Sises pohnese me Semeo me Utupen eh Mour ni eh mahsanih: “I kin mour pwehki Sahmo.” (Sohn 6:57) Sises uhdahn likih Semeo, oh Siohwa ketikihong ih dahme e anahne pwehn kak mour. Me keieu kesempwal, Siohwa kin ketin sewese Sises en lelepekohngete ih.​—Mad. 4:4.

9. Ia duwen Siohwa eh ketin kasalehda me Ih Sahm men me kin uhdahn ketin poakohng oh nsenohki Sises?

9 Nin duwen Sahm limpoak men, Siohwa kin ketin tehk mwahu me Sises pohnese me Semeo pahn ketin sewese ih. (Mad. 26:53; Sohn 8:16) Mendahki Siohwa sohte ketin pere Sises sang soahng koaros me kak kamedekihala, E ketin sewese ih en dadaur pahn kahpwal kan. Sises mwahngih me lokolok kan me e pahn ketin lelohng pahn ongete ahnsou kis. (Ipru 12:2) Siohwa ketin kadehdehda me e ketin nsenohki Sises sang ni eh ketin karonge ih, ketikihong dahme e anahne, kasukuhlih ih, oh sewese ih. (Sohn  5:20; 8:28) Ahnsou wet, kitail pahn kilang ia duwen Samatailo nanleng eh kin ketin sewese kitail ni ahl akan me duwehte met.

SAMATAIL LIMPOAKO KETIN SEWESE KITAIL

Pahpa limpoak men kin (1) rong, (2) kihda anahn en, (3) kaiahne, oh (4) pere nah seri kan. Samatail limpoako nanleng ketin apwalih kitail ni soangen ahl pwukat (Menlau kilang parakrap 10-15) *

10. Nin duwen me Melkahka 66:19, 20 mahsanih, ia duwen Siohwa eh ketin kasalehda me e ketin poakohng kitail?

10 Siohwa kin ketin karonge atail kapakap kan. (Wadek Melkahka 66:19, 20.) E sohte ketin kupwurki kitail en irehdi uwen ahnsou me kitail kin kapakap, ahpw e ketin kupwurki kitail en kapakapohng ih ahnsou koaros. (1 Des. 5:17) Ni wahu, kitail kak kapakapohng Koht ahnsou koaros, sohte lipilipil wasa kitail mi ie. E sohte kin ketin nohn kedirepwla pwehn karonge kitail, ahpw e kin ahnsou koaros ketin karonge atail kapakap kan. Ni atail kin esehda me Siohwa ketin karonge atail kapakap kan, kitail kin karanihala ih. Sounmelkahkao nda: “I kin poakohng KAUN-O, pwehki eh kin ketin karonge ie.”​—Mel. 116:1.

11. Ia duwen Siohwa eh kin ketin sapengala atail kapakap kan?

11 Samatailo sohte kin ketin karongehte atail kapakap kan ahpw e pil kin ketin sapengala. Wahnpoaron Sohn kamehlelehiong kitail: “Sohte lipilipil dahme kitail kin peki nin duwen kupwure, e pahn ketin karonge kitail.” (1 Sohn 5:14, 15) Ei mehlel, Siohwa ele sohte pahn ketin sapengala atail kapakap kan ni ahl me kitail kin kasik. E ketin mwahngih dahme keieu mwahu ong kitail, eri ekei pak sapwellime pasapeng iei soh, de kupwure iei kitail en awih.​—2 Kor. 12:7-9.

12-13. Ni ahl dah kan me Samatailo nanleng kin ketin apwalih kitail?

12 Siohwa kin ketikihong kitail atail anahn akan. E kin ketin wia dahme e kupwurki pahpa kan en wia. (1 Tim. 5:8) E kin ketikihong sapwellime seri kan arail anahn akan. E sohte ketin kupwurki kitail en pwunodki dahme kitail pahn kang, likawih, de wasa kitail en kousoan ie. (Mad. 6:32, 33; 7:11) Nin duwen sahm limpoak men, Siohwa pil ketin wiahda koasoandi kan pwehn kaitarala atail anahn akan koaros ni ahnsou kohkohdo.

13 Keieu kesempwal, Siohwa ketikihong kitail dahme kitail anahne pwe kitail en ahneki nanpwungmwahu keren reh. Nan sapwellime Mahsen, e ketin kasalehda dahme mehlel duwen ih, kupwure, kahrepen atail mour, oh duwen ahnsou kohkohdo. E ketin kasalehda sapwellime nsenoh ni ahnsou me kitail tepin esehla padahk mehlel, sang ni eh ketin doadoahngki atail pahpa nohno de emen sounpadahk pwehn sewese kitail en esehla ih. Oh kitail kin pousehlahte alehdi sawas sang elder kan oh Kristian koahiek teikan nan mwomwohdiso. Patehng met, Siohwa kin ketin kasukuhlih kitail nan mihting en mwomwohdiso kan, wasa me kitail kin iang iengatail Kristian teikan ale kasukuhl. Ni ahl pwukat oh pil ahl teikan, Siohwa kin ketin kasalehda me e kin ketin nsenohkin kitail koaros nin duwen sahm limpoak men.​—Mel. 32:8.

14. Dahme kahrehda Siohwa ketin kaiahne kitail, oh ia duwen eh kin ketin wia met?

14 Siohwa kin ketin kaiahne kitail. Weksang Sises, kitail soh unsek. Eri kisehn atail kaiahn, Samatail limpoako kin ketin panawih kitail ni ahnsou me anahn. Sapwellime Mahsen katamankihong kitail: “Siohwa kin ketin panawih irail kan me e kin ketin poakohng.” (Ipru 12:6, 7) Siohwa kin ketin panawih kitail ni ahl tohto. Karasepe, ele kitail wadek ire ehu nan Paipel de rong mehkot nan atail mihting oh tehkada me kitail anahne wekidala mwomwen atail madamadau de wiewia. De mwein sawas me kitail anahne kin kohsang rehn elder kan. Sohte lipilipil ia mwomwen Siohwa kin ketin panawih kitail, e ketin wia met pwehki e poakohng kitail.​—Ser. 30:11.

15. Ni ahl dah kan me Siohwa kin ketin pere kitail?

15 Siohwa kin ketin sewese kitail en dadaurete pahn kahpwal kan. Duwehte pahpa limpoak men eh kin sewese nah seri kan erein ahnsou apwal kan, Samatailo nanleng pil kin ketin wia soahngohte. E ketikihong kitail sapwellime  manaman. Met kin pere kitail sang soahng sohte lipilipil me kakete kauwehla atail nanpwungmwahu reh. (Luk 11:13) Siohwa pil kin ketin sewese kitail ni atail kin mworusala. Karasepe, e ketikihong kitail koapworopwor kaselel ehu. Koapworopwor kaselel wet ong ahnsou kohkohdo kin sewese kitail en dadaurete pahn kahpwal kan. Medewehla met: Sohte lipilipil soahng suwed dah me kitail kin lelohng, Samatail limpoako pahn ketin kamwahwihala ni unsek kahpwal koaros me kitail kin lokolongki. Sohte lipilipil kahpwal dah me kitail kin lelohng, kahpwal pwukat pahn ongete ahnsou kis, ahpw kapai kan me Siohwa kin ketikihda pahn mihmi kohkohlahte.​—2 Kor. 4:16-18.

SAMATAILO SOHTE PAHN KETIN LIKIDMELIEIKITAILLA

16. Dahme wiawi ni Adam eh sapeikiong Semeo nanleng?

16 Kitail kilang mehn kadehde duwen sapwellimen Siohwa limpoak ong kitail ni atail medewehla dahme e ketin wia ni ahnsou me Adam sapeikiong ih. Ni ahnsou me Adam sapeikiong Semeo nanleng, e sohla wia kisehn sapwellimen Siohwa peneinei, ih oh pil iangahki kadaudoke kan. (Rom 5:12; 7:14) Ahpw Siohwa ketin wia mehkot pwehn sewese kadaudoken Adam kan.

17. Dahme Siohwa mwadangete ketin wia mwurin Adam uhwongada ih?

17 Siohwa ketin kaloke Adam, ahpw e ketin inoukihda me e pahn ketin sewese kadaudoken Adam kan. E mwadangete ketin inoukihda me aramas peik kan pahn pwurehng wiahla kisehn sapwellime peneinei. (Sen. 3:15; Rom 8:20, 21) Siohwa ketin koasoanehdi met sang ni meirong en pweinen pweipwei sapahlo en sapwellime Ohlo, Sises. Sang ni eh ketikihda sapwellime Ohlo ong kitail, Siohwa ketin kadehdehda me e uhdahn ketin poakohng kitail.​—Sohn 3:16.

Ma kitail sohpeisang Koht ahpw koluhla, Samatail limpoako, Siohwa, pahn ketin kupwurperenki kasamwo kitail (Menlau kilang parakrap 18)

18. Dahme kahrehda kitail kak kamehlele me Siohwa ketin kupwurki kitail en wia sapwellime seri kan, mehnda ma kitail pil sohpeisang ih?

18 Mendahki kitail soh unsek, Siohwa ketin kupwurki kitail en wia kisehn sapwellime peneinei,  oh e sohte kin ketin medewe me kitail wia kedirepw ehu ong ih. Ele kitail kin kansensuwedihada ih de sohpeisang ih, ahpw Siohwa kin ahnsou koaros ketin koapworopworki me kitail pahn pwurala reh. Sises karasahda uwen laud en sapwellimen Siohwa limpoak ong sapwellime seri kan sang ni eh kasalehda karasaras en pwutak me salongalao. (Luk 15:11-32) Pahpao nan karasaraso sohte uhdihsang eh koapworopworki me nah pwutako pahn pwurodo. Ni pwutako eh pwurala ni imweo, pahpao uhdahn perenki kasamwo ih. Ma kitail sohpeisang Siohwa ahpw koluhla, kitail kak kamehlele me Samatail limpoako pahn ketin kupwurperenki kasamwo kitail.

19. Ia duwen Siohwa eh pahn ketin kamwahwihala soahng kan me Adam kauwehla?

19 Samatailo pahn ketin kamwahwihala soahng koaros me Adam kauwehla. Mwurin Adam uhwongada Siohwa, Siohwa ketin pilada en pwekada meh 144,000 sang nin sampah pwe ren iang sapwellime Ohlo papah nin duwen nanmwarki oh samworo kei nanleng. Sises oh ienge kaun pwukat pahn sewese aramas peik kan en unsekla nan sampah kapwo. Mwurin arail pitsang kaimwiseklahn kasongosongo, Koht pahn ketikihong irail mour soutuk. Samatailo eri pahn ketin kupwurperenda ni eh ketin mahsanihada sampah eh direkihla sapwellime seri unsek kan. Ia uwen met eh pahn wia ahnsou kaselel ehu!

20. Ni ahl dah kan me Siohwa ketin kasalehdahr me e uhdahn ketin poakohng kitail, oh dahme iren onop en mwuhr pahn koasoia?

20 Siohwa ketin kasalehdahr me e uhdahn ketin poakohng kitail. Iei ih Samatail me keieu mwahu. E kin ketin karonge atail kapakap kan oh ketikihda dahme kitail anahne, anahn en war oh pil atail anahn en ahneki nanpwungmwahu reh. E ketin kaiahne oh sewese kitail. E pil pahn ketin wiahda soahng mwahu kan ong kitail ni ahnsou kohkohdo. Kitail kin perenkihda atail ese me Samatailo ketin poakohng oh nsenohkin kitail. Iren onop en mwuhr pahn koasoia ahl kan me kitail, nin duwen sapwellime seri kan, kak kasalehda me kitail kalahnganki sapwellime limpoak.

KOUL 108 Limpoak Loalopwoat en Koht

^ par. 5 Kitail kin kalapw medewehiong Siohwa nin duwen Sounkapikpatail oh Kaun Wasa Lapalahpie. Ahpw kitail pil ahneki kahrepe mwahu kan en kilangwohng ih nin duwen Sahm men me kin uhdahn ketin poakohng kitail. Iren onop wet pahn koasoia duwen kahrepe pwukat. Kitail pil pahn sukuhlki dahme kahrehda kitail kak kamehlele me Siohwa sohte pahn ketin likidmelieikitailla.

^ par. 59 WEHWEHN KILEL: Ehuehu kilel pahieu pwukat kasalehda pahpa men mi rehn nah serio: (1) Pahpa men rongorong mwahu nah pwutako. (2) Pahpa men kihda dahme nah serepeino anahne. (3) Pahpa men kaiahne nah pwutako. (4) Pahpa men kansenamwahwih nah pwutako. Mwomwen mahlen en limen Siohwa ni tihnsewen kilel pahieu ko katamankihong kitail me Siohwa kin ketin apwalih kitail ni soangen ahl pwukat.