Luslahng audepe kan

luslahng audepe kan

 IREN ONOP 14

Ke Kin Kapwaiada Omw Doadoahk ong Koht ni Unsek?

Ke Kin Kapwaiada Omw Doadoahk ong Koht ni Unsek?

“Pousehlahte kalohki rongamwahu, kapwaiada omw doadoahk ni unsek.”​—2 TIM. 4:5, ntp.

KOUL 57 Kalohk ong Soangen Aramas Koaros

AUDEPEN ONOP *

Mwurin eh ketin iasada, Sises ketin tuhwong sapwellime tohnpadahk kan oh padahkihong irail en ‘kohwei oh padahkihong aramas en wehi koaros pwe ren wiahla nah tohnpadahk’ (Menlau kilang parakrap 1)

1. Dahme sapwellimen Koht ladu kan koaros men wia, oh dahme kahrehda? (Menlau kilang kilel ni kilin Kahn Iroir wet.)

KRAIS SISES ketin kehkehlingkihong sapwellime tohnpadahk kan ren ‘kohwei oh padahkihong aramas en wehi koaros pwe ren wiahla nah tohnpadahk.’ (Mad. 28:19) Sapwellimen Koht ladu lelepek kan koaros men sukuhlki ia duwen arail kak “kapwaiada . . . ni unsek” doadoahk wet me e ketikihong irail en wia. (2 Tim. 4:5) Met pwehki doadoahk wet kin kesempwalsang, katapan sang, oh karuwaru sang doadoahk teikan koaros nan atail mour. Ahpw, e kak apwal en kihong atail ahnsou laud ong doadoahk en kalohk ni uwen me kitail mwahuki.

2. Soangen kahpwal dah kan me kitail kin ahneki ni atail nantihong en kapwaiada atail doadoahk en kalohk?

2 Mie doadoahk kesempwal teikan me anahne atail ahnsou oh kehl. Ele kitail anahne doadoahngki awa tohto nan rahn ehu pwehn wiahda mwohni me itar ong soahng kan me kitail oh atail peneinei anahne. Mwein kitail pil kin nannanti apwalihala pwukoa teikan en peneinei, ahneki soumwahu, pwunod laud, de pehm luwetalahn paliwar pwehki atail mahlahr. Ia duwen atail kak kapwaiada atail doadoahk en kalohk ni unsek ni atail kin ahneki soangen kahpwal pwukat?

3. Dahme kitail kak ndahki sapwellimen Sises mahsen kan nan Madiu 13:23?

3 Ma atail irairo sohte mweidohng kitail ahnsou laud pwe kitail en kak wia sapwellimen Siohwa doadoahk, kitail en dehr mwoarosala. Sises mwahngih me kitail koaros sohte kin duwepenehte ni atail pahn kapwarehda wahn Wehio. (Wadek Madiu 13:23.) Siohwa kin ketin kesempwalki laud soahng koaros me kitail kin wia nan sapwellime doadoahk erein atail kin wiewia ni uwen me kitail kak. (Ipru 6:10-12) Weksang met, ele kitail medewe me atail irair kan  pahn mweidohng kitail en wia laudsang. Nan iren onop wet, kitail pahn tehkpene ia duwen atail kak mwohneki mahs doadoahk en kalohk nan atail mour, dehr mweidohng mehkot en kerempwakitailla, oh kamwahwihala atail koahiek en kalohk oh padahk. Ahpw keieu, ia wehwehn atail en kapwaiada atail doadoahk en kalohk ni unsek?

4. Ia wehwehn en kapwaiada atail doadoahk en kalohk ni unsek?

4 Pwehn kapwaiada atail doadoahk en kalohk ni unsek, kitail anahne iang kalohk oh padahk ni uwen me kitail kak. Ahpw en kapwaiada atail doadoahk en kalohk ni unsek sohte kin dokedokehte uwen ahnsou me kitail kin kalohk. Kahrepen atail kalohk kin kesempwal ong Siohwa. Pwehki kitail poakohng Siohwa oh mehn mpatail kan, kitail kin wia doadoahk wet sang ni atail mour unsek. * (Mark 12:30, 31; Kol. 3:23) En papah Koht sang ni atail mour unsek kin wehwehki en doadoahngki atail kehl ni uwen me kitail kak nan sapwellime doadoahk. Ni atail wehwehkihla me kalohk kin wia pwais kaselel ehu, kitail kin song en ehukihong rongamwahwo aramas tohto ni uwen me kitail kak.

5-6. Menlau kihda ehu karasaras duwen emen eh kak mwohneki mahs doadoahk en kalohk mehnda ma e sohte ahneki ahnsou laud en wia met.

5 Medewehla mwahnakapw men me perenki kesengki kida. E kin perenki keseng ahnsou koaros me e kak. Kedekedeo, e diarada doadoahk en kesengki nah kidao nan wasahn mwenge ehu ni imwin wihk kan. Ahpw pweinen doadoahko sohte kak pwainla eh anahn kan. Eri e kohla doadoahk nan ehu sidohwa nin duwen cashier men sang Niehd lel Nialem. Mendahki e kin doadoahngki pali laud en eh ahnsou ong sidohwao, e kin keieu perenki keseng. E kin uhdahn men kamwahwihala eh koahiek en keseng oh doadoahngki pali laud en eh ahnsou pwehn wia sounkeseng men. E pil kin rapahki ahnsou mwahu koaros, mehnda ma pil ahnsou mwotomwot, pwehn keseng.

6 Pil duwehte met, ele ke sohte kak kihong uwen ahnsou laud me ke mwahuki ong doadoahk en kalohk. Ahpw doadoahk en kalohk iei me ke keieu perenki wia. Ke kin nantihong kamwahwihala omw koahiek en kalohki rongamwahwo oh  sair mohngiong en aramas akan. Pwehki ke anahne wia de apwalihala soahng tohto, ele ke kin medewe ia duwen omw kak mwohneki mahs doadoahk en kalohk.

IA DUWEN OMW KAK MWOHNEKI MAHS OMW DOADOAHK EN KALOHK

7-8. Ia duwen atail kak alasang mwomwen Sises eh kin ketin kilangwohng doadoahk en kalohk?

7 Sises ketikihda mehn kahlemeng uhdahn mwahu duwen mwomwen eh kin ketin kilangwohng doadoahk en kalohk. Dahme keieu kesempwal nan sapwellime mour iei en padahngki duwen Wehin Koht. (Sohn 4:34, 35) E ketin sapalki mwail epwiki kei pwehn ketin kalohk ong aramas tohtohie ni uwen me e kak. E kin ahnsou koaros ketin rapahki ahl kan pwehn kak padahk ong aramas akan ni imwarail de wasa sohte lipilipil. Soahng koaros me Sises ketin wia nan sapwellime mour kin utungada doadoahk en kalohk.

8 Kitail kak alasang Krais sang ni atail rapahki ahnsou mwahu koaros en kalohki duwen rongamwahwo sohte lipilipil ia wasa oh iahd me kitail kak. Kitail kin men tounmeteikihla soahng kan me kitail mwahuki pwehn iang kalohk. (Mark 6:31-34; 1 Pit. 2:21) Ekei nan mwomwohdiso kin kak wia pioneer tohrohr, pioneer, de wia sawaspen pioneer kei. Ekei pil sukuhlki ehu lokaia tohrohr de keseula wasa kan me anahn laud mie ong sounkalohk. Ahpw pali laud en doadoahk en kalohk kin wiawi sang sounkalohk kan me sohte kak wia soahng pwukat ahpw kin kaukaule kalohk ni uwen arail kak. Sohte lipilipil uwen laud de uwen tikitik me kitail kak wia nan kalohk, Siohwa sohte ketin kasik kitail en wia laudsang me kitail kakohng. E ketin kupwurki kitail koaros en perenki atail doadoahk ong ih ni atail kalohki “rongamwahu lingan en Koht me peren.”​—1 Tim. 1:11; Deud. 30:11.

9. (a) Ia duwen Pohl eh mwohneki mahs doadoahk en kalohko mehnda ma e anahne wia doadoahk en mwohni? (b) Dahme Wiewia 28:16, 30, 31 kasalehda duwen madamadau en Pohl ong doadoahk en kalohk?

9 Wahnpoaron Pohl wiahda mehn kahlemeng mwahu ni eh wiahkihla doadoahk en kalohk me keieu kesempwal nan eh mour. Ni ahnsou me e mihmi Korint erein keriapak en eh seiloak en misineri, nah mwohni tikitikla oh e anahne wia doadoahk en wiahda ihmw likou. Ahpw Pohl sohte wiahki eh doadoahk en wiahda ihmw likowo me keieu kesempwal ong ih. E wia doadoahk wet pwehn apwalih pein ih nan eh doadoahk en kalohk pwe en kak kalohki rongamwahwo “ni sohte pweipwei” ong mehn Korint ko. (2 Kor. 11:7) Mendahki Pohl anahne wia doadoahk en mwohni, e kin pousehlahte mwohneki doadoahk en kalohk oh e pil kin kalohk ni rahnen Sapad koaros. Mwurin eh irair kan mwahula, Pohl kakehr ahneki ahnsou laud en kalohk. E “tepida soupisengkihla kalohki mahseno, kadekadehdehiong mehn Suhs akan me Sises iei Krais.” (Wiewia 18:3-5; 2 Kor. 11:9) Mwuhr, ni eh wie sensel nan pein imweo nan Rom erein sounpar riau, Pohl kin kalohk ong irail kan me mwemweitdo reh oh e pil kin ntingihada kisinlikou kan. (Wadek Wiewia 28:16, 30, 31.) Pohl kin koasoanehdi teng en dehr mweidohng mehkot en kerempwahla eh doadoahk en kalohk. E ntingihedi: “Pwehki se ahneki doadoahk wet . . . , se sohte kin uhdi.” (2 Kor. 4:1) Duwehte Pohl, mehnda ma kitail kin doadoahngki ahnsou laud ong doadoahk en mwohni, kitail pil kak wiahki doadoahk en Wehio me keieu kesempwal nan atail mour.

Mie ahl tohto me kitail kak kapwaiada atail doadoahk en kalohk ni unsek (Menlau kilang parakrap 10-11)

10-11. Ia duwen atail kak kapwaiada atail doadoahk en kalohk ni unsek mehnda ma kitail kohwahki soumwahu?

10 Ma kitail sohte kak kalohk ihmw lel ihmw ni uwen me kitail mwahuki pwehki kitail wie mahmahlahr de kitail kohwahki soumwahu, kitail kak wia ekei wiepen kalohk teikan. Tepin Kristian kan kin kalohk ong aramas akan sohte lipilipil wasa me re mi ie. Re kin isaneki ahnsou mwahu koaros en koasoia duwen padahk mehlel​—sang ihmw lel ihmw, ong wehi pokon, ahnsou sohte lipilipil—​wasa me aramas akan “kin alialu.” (Wiewia 17:17; 20:20) Ma kitail sohte kak alialu ahnsou reirei, kitail kak mwohndi wasa  ehu me mie aramas tohto oh kalohk ong irail kan me alu wasao. De kitail kak kalohk ahnsou sohte lipilipil, ntingihada kisinlikou kan, de doadoahngki delepwohn. Sounkalohk tohto me sohte kak kalohk ihmw lel ihmw pwehki re soumwahu de ahneki kahpwal teikan pil kak ahneki peren laud ni arail wia wiepen kalohk pwukat.

11 Mehnda ma ke kohwahki soumwahu, ke kak kapwaiada omw doadoahk en kalohk ni unsek. Pwurehng medewehla mehn kahlemeng en wahnpoaron Pohl. E nda: “I kakohng mehkoaros pwehki I ahneki kehl sang rehn me ketikihong ie manaman.” (Pil. 4:13) Pohl anahne manaman wet ni ahnsou me e soumwahuda erein ehu eh seiloak en misineri ko. E kawehwehiong mehn Kalesia ko: “Pwehki ei soumwahu, I ahneki tepin ahnsou mwahu en kalohkihong kumwail rongamwahwo.” (Kal. 4:13) Pil duwehte, omw kahpwal en soumwahu ele kak kihong uhk ahnsou mwahu en kalohki rongamwahwo ong meteikan, duwehte ong toahkte kan, sawaspen toahkte kan, oh pil meteikan me kin iang apwalihiuk. Tohtohn irail pwukat kin doadoahk ahnsou me sounkalohk kan kin kalohkla imwarail ko.

IA DUWEN OMW KAK DEHR MWEIDOHNG MEHKOT EN KEREMPWAIUKALA

12. Ia wehwehn en “kilenglahte mwowe”?

12 Sises mahsanih: “Lamp en paliwar iei pwoaren mas. Eri ma pwoaren mesomwen kin kilenglahte mwowe [de “sohte mehkot kedirepwe pwoaren mesomwen,” ntp.], paliweromw unsek pahn kin marain.” (Mad. 6:22) Ia wehwehn sapwellime mahsen? Met wehwehki me kitail anahne kilangwohngete mehn akadei ehu oh sohte mweidohng mehkot en kerempwakitailla. Sises ketikihda mehn kahlemeng mwahu sang ni  eh ketin kilangwohngete doadoahk en kalohk, oh e ketin padahkihong sapwellime tohnpadahk kan en kin kilangwohngete arail papah Siohwa oh Sapwellime Wehio. Kitail kin alasang Sises ni atail wiahkihla doadoahk en kalohk me keieu kesempwal nan atail mour, oh “pousehlahte rapahki mahs Wehio oh sapwellime [Koht] pwung.”​—Mad. 6:33.

13. Dahme kak sewese kitail en kilangwohngete atail doadoahk en kalohk?

13 Ehu ahl en kilangwohngete atail doadoahk en kalohk iei en dehr kihong ahnsou laud ong soahng kan me sohte nohn kesempwal nan atail mour. Met pahn kahrehiong kitail en kak ahneki ahnsou laud en sewese meteikan en esehla oh poakohngala Siohwa. * Karasepe, ia duwe, kitail kak wekidala atail awahn doadoahk kan pwehn kak kihong ahnsou laud ong kalohk erein wihk kan? Kitail kak katikala mehn kamweit de ahnsoun mwadong kan me kin doadoahngkihla laud atail ahnsou?

14. Wekidekla dah kan me pwopwoud ehu wiahda pwe ira en kihong ahnsou laud oh tehk mwahu ara doadoahk en kalohk?

14 Iei met me emen elder me adaneki Elias, oh eh pwoudo wia. E nda: “Se sohte kak mwadangete tepida pioneer, ahpw mie soahng kan me se kak wia pwehn kihong ahnsou laud ong doadoahk en kalohk. Se kin ekisekis wia soahng kan pwe sen kak kalaudehla at ahnsou nan kalohk. Karasepe, se katikala at kin doadoahngki nait mwohni. Se pil esehda me se kin doadoahngki ahnsou laud ong mehn kamweit kan, eri se katikala at wia soahng pwukat. Se pil peki at kaunen doadoahk ko en wekidala at koasoandi en doadoahk pwe sen kak kihong ahnsou laud ong kalohk. Imwilahn met, se kak iang kalohk ni soutik, wia onop en Paipel tohto, oh pil iang kalohk pak riau nan wihk kan nan sounpwong ehu. Met uhdahn kaperen!”

 IA DUWEN OMW PAHN KAMWAHWIHALA OMW KOAHIEK EN KALOHK OH PADAHK

Doadoahngki dahme kitail sukuhlki nan mihting en nan wihk pahn sewese kitail en pousehlahte kamwahwihala atail kin kalohk oh padahk (Menlau kilang parakrap 15-16) *

15-16. Pwehn pahrekiong 1 Timoty 4:13, 15, ia duwen atail kak pousehlahte kamwahwihala atail koahiek nin duwen sounkalohk kei? (Pil kilang koakon me oaralape “ Mehn Akadei kan me Pahn Sewese Ie Kapwaiada Ei Doadoahk en Kalohk ni Unsek.”)

15 Pil ehu ahl me kitail kak kapwaiada atail doadoahk en kalohk ni unsek iei sang ni atail kamwahwihala atail koahiek nan kalohk. Aramas me kin wia soangen doadoahk ehu kin anahne kaukaule ale kaiahn pwehn kamwahwihala arail koahiek oh loalokong. Met pil mehlel rehn sounkalohki Wehio kan. Kitail anahne pousehlahte sukuhlki ia duwen atail en uhdahn koahiekla nan atail doadoahk en kalohk.​—Lep. Pad. 15:22; wadek 1 Timoty 4:13, 15.

16 Ahpw ia duwen atail kak pousehlahte kekeirda nan atail doadoahk en kalohk? Sang ni atail kin rong mwahu kaweid kan me kitail alehdi nan atail Mihting en Atail Mour oh Kalohk en nan wihk kan. Mihting wet kin kihda kaiahn kesempwal pwehn sewese kitail pousehlahte kamwahwihala atail koahiek nan kalohk. Karasepe, ni brother me wia chairman eh kihda kaweid ong irail kan me wia kamwomwada de padahk, kitail kak sukuhlki soahng kan me kak sewese kitail en kamwahwihala atail doadoahk en kalohk. Kitail kak doadoahngki kaweid pwukat mwuhr ni ahnsou me kitail koasoiong emen duwen rongamwahwo. Kitail kak peki sawas rehn sounapwalih en pwihn en kalohk de pil iang ih kalohk, de iang emen sounkalohk me koahiek, emen pioneer, de sounapwalih me kin seiloak. Ni atail kin koahiekla en doadoahngki ehuehu mehn doadoahk kan nan neitail Koakon en Kasukuhl, e pahn kalaudehla atail perenki kalohk oh padahk.

17. Dahme pahn wiawihong uhk ni omw kin kapwaiada omw doadoahk en kalohk ni unsek?

17 E uhdahn wia pai kaselel ehu me Siohwa ketin mweidohng kitail en wia ‘ienge tohndoadoahk kei’! (1 Kor. 3:9) Ni omw kin “pilada dahme keieu kesempwal” oh kilangwohngete omw doadoahk en kalohk, ke pahn “pereperen kaudokiong KAUN-O.” (Pil. 1:10; Mel. 100:2) Nin duwen emen sapwellimen Koht sounkalohk, ke kak kamehlele me e pahn ketikihong uhk manaman me ke anahne pwehn kapwaiada omw doadoahk ong ih sohte lipilipil soangen kahpwal dah de soh itar dah me ke ahneki. (2 Kor. 4:1, 7; 6:4) Sohte lipilipil ma omw irair kan mweidohng uhk en kihong ahnsou laud de tikitik ong kalohk, ke kak “perenkihda” ni omw kin kalohk sang ni omw mour unsek. (Kal. 6:4) Ni omw kapwaiada omw doadoahk en kalohk ni unsek, ke kasalehda omw limpoak ong Siohwa oh mehn mpomw kan. “Pwe ni omw pahn wia met, ke pahn doarehla pein kowe oh pil irail kan me kin rong uhk.”​—1 Tim. 4:16.

KOUL 58 Rapahki Kompoakepahn Popohl

^ par. 5 Sises ketin kehkehlingkihong kitail en kalohki rongamwahu en Wehio oh katohnpadahk. Iren onop wet pahn koasoia ia duwen atail kak kapwaiada atail doadoahk en kalohk ni unsek, mehnda ma kitail ahneki kahpwal tohto. Kitail pil pahn sukuhlki ia duwen atail kak kamwahwihala atail kin kalohk oh kalaudehla atail peren nan kalohk.

^ par. 4 WEHWEHN LEPIN LOKAIA KAN: Atail doadoahk en kalohk nin duwen Kristian kei kin pidada soangsoangen wiepen kalohk oh padahk, iang kauwada wasahn kaudok, wasahn mihting tohrohr laud kan, wasahn kawehwe kan oh pil apwalih wasa pwukat, oh pil iang sawas wasa kan me kahpwal en melimel, rerrer en sahpw de iloak laud ape kin wiawi.​—2 Kor. 5:18, 19; 8:4.

^ par. 13 Menlau kilang kahk isuh me kileldi nan koakon me oaralap “Ia Duwen Omw Kak Kihsang Soahng kan me Sohte Nohn Kesempwal nan Mour” nan Kahn Iroir en July 2016, pali 10.

^ par. 62 WEHWEHN KILEL: Sister men kamwomwada pwurehng pwurala rehn emen erein mihting en nan wihk. Mwurin mwo, ni chairmano eh kihda kaweid, sistero ntingihedi ire kan nan nah pwuhken Padahk. Mwuhr, ni imwin wihko, e doadoahngki nan kalohk dahme e sukuhlki nan mihtingo.