Luslahng audepe kan

luslahng audepe kan

 KOASOIPEN ARAIL MOUR

Se Diarada “Perl me Kesempwahlie”

Se Diarada “Perl me Kesempwahlie”

WINSTON oh Pamela (Pam) Payne kin papah nan ohpis en Sounkadehdehn Siohwa kan en Australasia. Ira ahneki mour nsenamwahu ahpw ira pil lelohng kahpwal kan. Ekei kahpwal pwukat iangete ara anahne ahnla soangsoangen tiahk kan oh ira pil anahne dadaur pwehki Pamela iohla. Ahpw, mendahki mepwukat koaros, ira kolokolete ara limpoak ong Siohwa oh sapwellime aramas akan iangahki ara peren nan doadoahk en kalohk. Kitail pahn kilang duwen ara pahn koasoiahda soahng kan me ira lelohng.

Winston, padahkihong kiht duwen omw rapahki Koht.

I tikida rehn peneinei ehu me sohte mie arail pelien lamalam. Se mi nan wasahn mwaht ehu me inenen doh nan Queensland, Australia. Pwehki at wasao inenen doh, I sohte kalapw tuhwong aramas akan likin ei peneineio. Sangete ei mpen sounpar 12, I tepida rapahki Koht. I kapakapohng oh peki reh I en esehla dahme mehlel duwen ih. Kedekedeo I kohkohsang at wasao oh diar doadoahk nan Adelaide, Palieir en Australia. Ni ei sounpar 21, I tuhwong Pam ni ahnsou me I mwemweitla Sydney, oh e ndaiong ie duwen pwihn en pelien lamalam British-Israel, me kose me mehn Britain kan wia kadaudok en keinek kan en Israel me salongalahr. Pwihn wet koasoia me keinek pwukat iei keinek eiseko en paliepeng en wehin Israel me kalipilipala nan mpen pahr 700 samwa mwohn Krais. Eri ni ahnsou me I pwurala Adelaide, I koasoia duwen ire wet ong emen ei tohndoadoahk me tepida onop Paipel rehn Sounkadehdehn Siohwa kan. Mwurin ei koasoiong ih erein awa keite​—ahpw pali laud se koasoia duwen dahme Sounkadehde kan kin kamehlele—​I esehda me dahme I kin kapakapki ni ei tikitiko pasapenglahr. I sukusukuhlki dahme mehlel duwen ei Sounkapikadao oh sapwellime Wehio! I diaradahr “perl me kesempwahlie.”​—Mad. 13:45, 46.

Pam, ke pil iang tepida raparapahki perl wet ni omw tikitiko. Ia duwen omw diarada?

I tikida rehn peneinei ehu me kin poadidiong arail pelien lamalam nan kahnimw en Coffs Harbour, New South Wales. Ei pahpa nohno oh en ei nohno eh pahpa nohno kamehlele padahk kan en pwihn en pelien lamalam en British-Israel. Ngehi, riei pwutako me tikitiksang ie, oh riei serepein laudo, iangahki tohto nein rien ei pahpa  nohno, sukuhlki sangete at tikitik me Koht kin kupwurki irail kan me wia kadaudoken mehn Britain kan. Ahpw, I sohte pwungki padahk pwukat oh I sohte pehm me I karanih Koht. Ni ahnsou me I sounpar 14, I kin kohla ni soangsoangen imwen sarawi kan en ei wasao, iangahki pelien lamalam en Anglican, Baptist, oh Seventh-day Adventist. Ahpw re sohte sewese ie esehla Koht.

Mwuhr, ei peneineio keseula Sydney, wasa me I tuhwong Winston, me mwemweitdo wasao. Nin duwen me e koasoiaier mwoweo, at koasoakoasoipene duwen pelien lamalam kan imwikihla eh tepida onop rehn Sounkadehde kan. Mwurin mwo, kisinlikou kan me e kadarodo rehi kin audaudki iren Paipel kan! I pahn ndahla ni mehlel me nin tapio I kin pwunodki oh pil sohte perenki met. Ahpw kedekedeo I esehda me met iei padahk mehlel duwen Koht.

Nan pahr 1962, I keseula Adelaide pwehn karanih Winston. E koasoanehdi ien kousoan rehn pwopwoud ehu me wia Sounkadehde kei​—Thomas oh Janice Sloman—​me mahso wia misineri kei nan Papua New Guinea. Ira kasalehiong ie kadek mehlel; ni ahnsowo I sounparte 18, oh ira sewese ie kalaudehla ei esehla duwen Siohwa. Eri I pil tepida onopki Mahsen en Koht, oh mwuhr I uhdahn kamehlele me I diaradahr padahk mehlel. Mwurin ngehi oh Winston pwopwoudida, se mwadangete tepida ahneki mour ehu me keieu kaperen me iei en papah Siohwa​—mour ehu me ahpwte kalaudehla at kalahnganki perl kaselel me se diarada mendahki kahpwal kan.

Winston, ndaiong kiht duwen ahnsou me ke tepida papah Siohwa.

A. Map en wasa kan me se wia doadoahk en sounapwalih me kin seiloak

B. Sidamp en pwohsdo sang ekei deke kan. Kiribati oh Tuvalu me mahso adaneki dekehn Gilbert oh Ellice

C. Deke kaselel en Funafuti me mi nan wehin Tuvalu. Ehu rehn deke tohto me se mwemweitla ie mwohn misineri kan pekederlahng ie

Sohte werei mwurin ngehi oh Pam pwopwoudida, Siohwa ketin ritidahng kiht “wenihmw laud” tohto pwehn kalaudehla at doadoahk en papah ih. (1 Kor. 16:9) Brother Jack Porter, me kin papah mwomwohdiso tikitik ehu nin duwen sounapwalih me kin seiloak men, me ritingadahng kiht tepin wenihmwo. (Met e wia kisehn Pwihn me Kin Apwalih Ohpis en Sounkadehdehn Siohwa kan en Australasia.) Jack oh eh pwoudo, Roslyn, kangoange kiht en wia pioneer kei​—pai kaselel ehu me se ahneki erein sounpar limau. Ni ahnsou me I sounpar 29, ngehi oh Pam alehdi pwukoa en papah nin duwen sounapwalih me kin seiloak nan deke kan en South Pacific, me mwuhr mi pahn epwelpen ohpis en Sounkadehdehn Siohwa kan en Fiji. Deke pwukat iei American Samoa, Samoa, Kiribati, Nauru, Niue, Tokelau, Tonga, Tuvalu, oh Vanuatu.

Ni ahnsowo, aramas akan nan ekei deke kan me inenen doh kin perki Sounkadehdehn Siohwa kan, eri se kin anahne kanahieng. (Mad. 10:16) Mwomwohdiso kan tikitik, oh ekei me kak sewesehkin kiht wasa me se kak meir. Eri se rapahki wasa ehu me se kak mi ie rehn aramas akan nan kousapw ko, oh re kin ahnsou koaros uhdahn kadek ong kiht.

Winston, ke kin uhdahn nsenohki oh men ese duwen doadoahk en kawehwe. Dahme kamwakid uhk en ahneki pepehm wet?

Nan Samoa, wia kasukuhl nan sukuhl en elder kan

Ni ahnsowo, riat Kristian kan nan dekehn Tonga naineki ekeite kisin doaropwe oh pwuhk kan ni lokaiahn Tonga​—ehu lokaiahn Polynesia. Nan kalohk, re kin onop ong aramas akan doadoahngki pwuhko Padahk Mehlel me Kahluwalahng Mour Soutuk ni lokaiahn wai. Eri erein sukuhl ong elder kan me wiawi wihk pahieu, elder silimen sang wasao pwungki ren kawehwehdi pwuhk wet ni lokaiahn Tonga mehnda ma re sohte nohn ese mwahu lokaiahn wai. Pam daipihada kawehwe wet, oh se kadarala ni ohpis en Sounkadehdehn Siohwa kan nan Wehin Amerika pwehn wiawihda. Doadoahk wet wiawi erein mpen wihk waluh. Mehnda kawehweo sohte nohn mwahu, pwuhk wet sewese me tohto me kin lokaiahki lokaiahn Tonga en esehla padahk mehlel. Ngehi oh Pam kaidehn sounkawehwe kei, ahpw dahme wiawio kahrehiong sen uhdahn nsenohki oh men esehla duwen doadoahk wet.

Pam, ia duwen mour nan deke kan eh weksang mour nan Australia?

Ehu wasa me se mi loale erein at wia doadoahk nin duwen sounapwalih me kin seiloak

E uhdahn wekpeseng! Ekei wasa me se mi ie, mie amwise tohto, kitik kan oh se kin anahne dadaur pahn ahnsoun karakar, soumwahu, oh ekei  pak sohte kin itar kanat mwenge. Ahpw, ni imwilahn ehuehu rahn, e kin kansenamwahu en kilangdihwei nansed sang ni imwat ihmw oahs me adaneki fale​—lokaiahn Samoa ong kisin ihmw oahs en Polynesia me sohte dihd. Ekei pwohng, marain en maramo kin laud kahrehda se kak kilang tehn nih kan, oh lingen maramo kin lingaling pohn sehdo. Soangen ahnsou kaselel pwukat kin kamwakid kiht en doudouloale oh kapakap, met kin sewese kiht en medewe soahng mwahu kan a kaidehn soahng suwed kan.

Se tepida poakepoake seri kan me uhdahn kaperen oh re kin uhdahn men ese duwen kiht mehn wai kan me kil pwetepwet. Ni at mwemweitla Niue, emen kisin pwutak doahke pehn Winstono me wunaun oh nda, “I perenki pehmwen eh wunen mahn.” E sansal me sohte pak ehu e kilang pehn aramas me uhdahn wunaun oh e sohte ese ia duwen eh pahn kawehwehda!

Se nsensuwedki at kilang uwen semwehmwe en aramas akan oh uwen apwal en arail mour. Wasa me re mi ie kaselel ahpw sohte itar sawas en wini oh nimarail pihl tikitik. Ahpw, riatail Kristian kan wasao sohte mwomwen pwunod. Re ahn soangen mour wet. Re peren pwehki arail peneinei mi rehrail, mie arail wasahn tuhpenehn kaudok, oh re ahneki pai kaselel en kapinga Siohwa. Arail mehn kahlemeng sewese kiht en medemedewehte dahme keieu kesempwal oh pousehlahte ahneki mour ehu me sohte kedirepwki soahng kan me sohte nohn kesempwal.

Pam, ekei pak ke kin anahne ale pein nimomwa pihl oh kaunopada konomwa mwenge ni ahl me uhdahn weksang dahme ke ahn. Ia duwen omw wia met?

Nan Tonga, Pam wie lopwolopw

I kalahnganki me ei pahpao kaiahnehda ie. E padahkihong ie soahng kesempwal tohto, duwehte ia duwen ei pahn saunda kisiniei oh kuk powe oh ia duwen ei pahn wiahda soahng kan ni ei doadoahngki kepwe malaulau. Ehu pak ni at mwemweitla Kiribati, se mi nan kisin ihmw oahs ehu me tahtki rakied, oh dihd ko wiawihkihda pehri. Pwehn kukihada kanat mwenge, I weirada pwoahr ehu nan tahto pwehn saunda kisiniei oh doadoahngki dipenihd ong tuwi. Ong pihl, I kin iang lih akan kesihnen nan lain ni pwarer ehu. Pwehn ale pihl, re kin doadoahngki lepin tuhke me reireiki piht weneu oh sahl kis mi ni imwin tuhkeo, e duwehte mwomwen tuhkehn epiep. Ahpw re sohte kihong kehs, re kihong dihn ehu ni imwin sahlo. Emenemen lih kin koskihdihla sahlo oh kamwakid peho me kahrehda dihno en wekidekdi oh audauda. I medewe me e mengei lao I wia. I koskihdihla sahlo pak tohto, ahpw dihno kin lelte pihlo oh wie peipei! Mwurin arail uhdi kouruhr, emen lih sewese ie. Re kin ahnsou koaros sawas laud oh pil kadek.

Kumwa koaros perenki amwa doadoahko nan deke kan. Kumwa kak ehukihong kiht soahng kaselel kan me kumwa tamataman?

Winston: Se sohte mwadang en esehla ekei tiahk kan. Karasepe, ni riat Kristian ko ar wahdo kanat mwenge, re kin kalapw kihdo mwenge ko koaros. Nin tapio, se sohte ese me se anahne kihdi ekis ong irail. Eri se kangala mwenge ko koaros! Ei mehlel, ni ahnsou me se esehda dahme se uhdahn anahne wia, se kihdi mwenge ong irail. Mendahki at wiahda sapwung wet, riat ko wehwehki. Oh re uhdahn kin perenki ar kak kilang kiht mwurin mpen sounpwong weneu koaros ni ahnsou me se kin mwemweitla rehrail nin duwen sounapwalih me kin seiloak. Mahso, kiht kelehpw likin riat Kristian kan wasao me Sounkadehde ko kin kilang.

Pohn dekehn Niue, iang pwihn en kalohk kan kohla kalohk

At mwemweitla pil kin wia kadehde mwahu ong tohn wasao. Me tohto wasao kin medewe me riat Kristian ko wiahda pein arail pelien lamalam. Eri ni ahnsou me re kilang ngehi oh ei pwoudo mwemweitdo rehn riat Kristian ko wasao sang ehu sahpw tohrohr, re uhdahn pwuriamweila.

Pam: Ehu me I taman me I keieu perenki iei me wiawi nan Kiribati, nan mwomwohdiso ehu me riat Kristian malaulau keite mi ie. Emente elder me mi wasao, Itinikai Matera, kin wia uwen eh kak en apwalih kiht. Ehu rahno e kohdo reht wa kopwou ehu me kutohr ehute mi loale. E nda: “Ong kumwa.” Ahnsowo, kutohr en malek wia mehkot me se sohte kin kalapw alehdi. Wiewiahn kadek wet, mendahki tikitik, uhdahn kamwakid kiht.

 Pam, sounpar kei mwuri ke liseianda ahpw iohla. Dahme seweseiuk en dadaurete?

I liseianda nan pahr 1973 ni ahnsou me ngehi oh Winston mi nan South Pacific. Se pilada sen pwurala Australia, ahpw mwurin sounpwong pahieu I iohla. Winston uhdahn nsensuwedkihla met; pil nah seri mwo. Weirek me I ahneki ekisekis tikitikla, ahpw e sohte uhdahn mwahula lao se alehdi Kahn Iroir (lokaiahn wai) en April 15, 2009. Oaralapo “Peidek kan Sang Sounwadawad kan” peidengki: “Mie koapworopwor ong kaiasadahn seri men me mehla nan kapehden eh nohno?” Oaralapo kamehlelehiong kiht me Siohwa pahn ketin pilada dahme pahn wiawi oh e kin ahnsou koaros ketin wia dahme pwung. E pahn ketikihsang weirek koaros me se ahneki pwehki at mihmi nan sampah suwed wet. E pahn ketin wia met ni eh ketin kaweid sapwellime Ohlo en ‘kauwehla doadoahk en Sehdan.’ (1 Sohn 3:8) Oaralapo pil sewese kiht en uhdahn kalahnganki ia uwen kaselel en “perl” me se ahneki nin duwen sapwellimen Siohwa aramas akan! Ia pahn mwomwen at mour ma se sohte ese duwen koapworopwor ong ahnsou kohkohdo?

Mwurin ei iohla, se pwurehng tepida doadoahngki pali laud en at ahnsou ong papah Siohwa. Se papah nan Pedel en Australia erein sounpwong kei oh mwuhr pousehla at doadoahk nin duwen sounapwalih me kin seiloak. Nan pahr 1981, mwurin at papah sounpar pahieu nan New South Wales oh Sydney, se ale luhk en kohla papah Pedel en Australia, oh se mihmi mwo leledo rahnwet. Met wasao adaneki ohpis en Sounkadehdehn Siohwa kan en Australasia.

Winston, dahme ke lelohng nan deke kan en South Pacific seweseiuk nan omw doadoahk nin duwen emen tohn Pwihn me Kin Apwalih Ohpis en Sounkadehdehn Siohwa kan en Australasia?

Ei, ni soangsoangen ahl tohto. Keieu, Australia me pwukoahki apwalih American Samoa oh Samoa. Mwuhr, ohpis en Sounkadehdehn Siohwa kan en New Zealand iangala ohpis en Australia. Ahnsou wet, ohpis en Sounkadehdehn Siohwa kan en Australasia iei me apwalih Australia, American Samoa oh Samoa, Cook Islands, New Zealand, Niue, Timor-Leste, Tokelau, oh Tonga. I ahneki pai kaselel en mwemweitla pali laud en wasa pwukat nin duwen wiliepen ohpis wet. Ei iang riei Kristian lelepek kan doadoahk nan deke pwukat wia sawas laud ehu ong ie pwehki met I kin papah irail sang ohpis en Sounkadehdehn Siohwa kan.

Winston oh Pam ni ohpis en Sounkadehdehn Siohwa kan en Australasia

Mwohn ei kaimwisekala ei koasoi, I men nda me erein sounpar tohto ngehi oh Pam pohnese me kaidehn aramas laudte me kin rapahki Koht. Se sukuhlki sang dahme se lelohng me me pwulopwul kan pil kin men rapahki “perl me kesempwahlie” mehnda ma ekei tohn arail peneinei sohte men. (2 Nan. 5:2, 3; 2 Kron. 34:1-3) Siohwa ketin wia Koht limpoak men me kupwurki koaros, me pwulopwul oh me mah, en ahneki mour soutuk!

Ni ahnsou me ngehi oh Pam tepida rapahki Koht daulih sounpar 50 samwalahro, se sohte ese ia pahn imwilahn met. Padahk mehlel duwen Wehio uhdahn wia perl ehu me inenen kesempwahlie! Se koasoanehdi teng en kolokolete perl kesempwal wet ni uwen at kehl koaros!