Luslahng audepe kan

luslahng audepe kan

 OARALAP | KISAKIS DAHIEU ME KEIEU MWAHUSANG KOAROS?

Rapahki Kisakis me Keieu Mwahu

Rapahki Kisakis me Keieu Mwahu

E sohte mengei en rapahkihda kisakis me pahn keieu mwahu ong emen. Pwehki me ale kisakiso me pahn ese kesempwalpen kisakiso. Oh dahme emen kin medewe me keieu mwahu kin weksang dahme emen tohrohr kin medewe.

Karasepe, me pwulopwul men ele pahn medewe me soahng kan me keieu kapw, duwehte cellphone, computer ape, iei kisakis me keieu mwahu. Aramas laud men ele pahn perenki ale dipwisou kesempwal ehu me peneinei ehu nekinekid erein sounpar tohto. Nan ekei sahpw, kisakis me me pwulopwul oh me mah kan kin mwahuki ale iei mwohni pwehki re kak doadoahngkihong sohte lipilipil dahme re mwahuki.

Mendahki met, me tohto kin nsenohki rapahki kisakis me pahn keieu mwahu ong emen me re kesempwalki. Mwein ekei pak ke sohte kak diarada soangen kisakiso, ahpw omw medemedewe soangen irair me aramaso ahneki ele pahn seweseiuk laud pwe ken pweida. Kitail pahn koasoiapene irair pahieu me kak seweseiuk en ese dahme aramaso pahn perenki ale.

Dahme aramaso uhdahn inengieng: Emen ohl sang Belfast, Paliepeng en Ireland, nda me pwaisikel me e alehdi ni ahnsou me e sounpar 10 de 11 iei kisakis me keieu mwahu. Dahme kahrehda? E nda: “Pwehki I uhdahn men waraneki.” Dahme e ndao kasalehda me dahme emen kin inengieng kin pidada laud ma e pahn kesempwalki kisakiso de soh. Eri medemedewe mwahu duwen aramas me ke pahn kisikiseo. Song en kasawihada dahme e kin kesempwalki, pwehki dahme emen kin kesempwalki kin kalapw kamwakid eh ineng kan. Karasepe, pahpa nohno kahlap kan kin kalapw kesempwalki ahnsou me re kin mi rehn arail peneinei. Ele re kin men kilang nein neirail kan ahnsou koaros me re kak. En mweidohng irail en iang amwail peneinei mwemweit (vacation) pahn kakete wia kisakis ehu me re pahn keieu kalahnganki sang kisakis teikan.

Ehu ahl me kak seweseiuk en ese dahme emen kin uhdahn inengieng iei en rong mwahu. Paipel kangoange kitail en kin “mwadang ong rong, ahpw dehr . . . karuaru en lokaia.” (Seims 1:19) Ni omw kin koasoakoasoiong kompoakepahmw kan  de kisehmw kan, rong kanahieng duwen soahng kan me kak kasalehda dahme re kin mwahuki de sohte mwahuki. Eri ke pahn kak ese soangen kisakis dah me re pahn perenki ale.

Dahme aramaso anahne. Aramas ele kin uhdahn kesempwalki kisakis tikitik de pweitikitik ehu ma kisakiso kin uhdahn katapan ong ih. Ahpw ia duwen omw kak ese dahme emen kin anahne?

Mwein e pahn keieu mengei ma ke pein idek rehn aramaso dahme e anahne, de dahme e mwahuki. Ahpw ong ekei, met kin kihsang peren en kihwei, pwehki re kin men kisikisehki aramaso dahme keieu mwahu ni ahnsou me re sohte kasik. Patehng met, mendahki ekei kin perenki kasalehda dahme re mwahuki de sohte mwahuki, re sohte pahn ahnsou koaros padahkihong uhk dahme re anahne.

Eri ke anahne kilang oh tehk mwahu irair en aramaso. Ia duwe, e pwulopwul de mah, kiripw de pwopwoud, mweisang eh pwoud de eh pwoudo mehla? Mie eh doadoahk de e kommoal sangehr doadoahk pwehki e mahlahr? Eri, medewehda soangen kisakis dah me pahn mwahu ong anahn en aramaso.

Pwehn wehwehki anahn en aramas me ke men kisikiseo, koasoiong irail me lelohngehr soangen irair me aramaso ahneki. Ele re pahn padahkihong uhk soangen anahn tohrohr kan me pali laud sohte ese duwe. Ni omw alehdi ire pwukat, ele ke kakehr kihda kisakis ehu me pahn kaitarala anahn ehu, oh me ekei sohte pahn medewehda.

Ahnsou me konehng. Paipel mahsanih: “Meid kaperen diar mahsen pwung ni ahnsou me konehng!” (Lepin Padahk 15:23) Ire wet kasalehda me en nda mehkot ni ahnsou me konehng kin uhdahn kesempwal. Met pil duwehte atail wiewia kan. Duwehte emen eh kin perenki rong omw nda mehkot ni ahnsou me konehng, ih pil duwen emen eh pahn uhdahn perenki kisakis ehu ni ahnsou me konehng.

Kompoakepahmw men pahn kapwopwoud. Emen me pwulopwul pahn kereniong kesepwil sang sukuhl. Pwopwoud ehu pahn naineki seri. Ahnsou pwukat wia soangen ahnsou kei me aramas kin kalapw men kihda kisakis. Ekei kin diarada me e mwahu en kilelehdi soangen ahnsou tohrohr pwukat nan neirail kalendar kan. Ni ahl wet, re kak pilahnehda soangen kisakis dah me keieu mwahu ong ehuehu ahnsou ko. *

Ahpw met sohte anahne kahrehiong uhk en sohla kihda kisakis ong ahnsou tohrohr kan. Peren en kisakis kak wiawi ahnsou koaros. Ahpw ke anahne mehn kataman wet. Karasepe, ma ohl emen pahn kisikise lih emen ni soh kahrepe, liho ele pahn medewe me kisakiso iei kasalepen en ohlo men esehla mwahu ih. Ma met iei uhdahn kahrepeo oh e wiawi ni ahl me konehng, soangen kisakiso sohte pahn kahrehda sawehwe. Met kasalehda ehu irair me kesempwal, me iei dahme kamwakid aramaso en kihda kisakis.

Dahme kamwakid aramaso. Nin duwen me karasaraso kasalehda, e mwahu en medewe ma me pahn ale kisakiso pahn wehwehki kahrepen kisakiso de soh. Ni pali teio, e pil mwahu ong me pahn kihda kisakiso en pein kasawih dahme kamwakid ih en wia kisakiso. Mendahte pali laud kin medewe me re kin mwekidki kadek oh wahun ni arail wia kisakis kan, me tohto kin toutoukihla arail pehm me re anahne kihda kisakis ni ahnsou tohrohr kan nan ehuehu pahr. Pil mie ekei me kin wia kisakis pwehki re kasik me irail kan me re kisikise pahn kesempwalkin irail de kasapahlkihong irail soahng ehu.

Dahme ke kak wia pwehn kasalehda me omw kisakis kan kin wiawi ni kahrepe mwahu? Paipel mahsanih: “Amwail doadoahk koaros en kin wiawi ni limpoak.” (1 Korint 16:14) Ma ke kin mwekidki limpoak mehlel oh nsenohki irail kan me ke pahn kisikise, irail pahn perenki ale omw kisakiso oh ke pahn ahneki soangen peren laud me kin kohsang wiewiahn kadek sapan. Ma ke kin wia kisakis sang omw mohngiong, ke pil kin kaperenda Samatailo nanleng. Wahnpoaron Pohl kapingahki Kristian kan mahso nan Korint ni arail kasalehda kadek sapan oh perenki sewese riarail Kristian ko me lelohng apwal nan Sudia. Pohl ndaiong irail: “Koht  kin ketin poakohng me kin perenki kihwei mehkot.”​—2 Korint 9:7.

Omw pahn tehk irair pahieu pwukat me kitail koasoiapene kak seweseiuk laud ni omw pahn kihda kisakis kan me pahn kin kaperenda meteikan. Irair pwukat, oh pil irair teikan, wia kisehn irair kan me kamwakid Koht en ketikihda koasoandi ehu ong aramas akan ren ale kisakis me keieu mwahusang koaros. Menlau wadek duwen kisakis kaselel wet nan oaralapo mwurin met.

^ par. 13 Aramas tohto pil kin kihda kisakis ni rahn en ipwidi oh rahn en kasarawi kan. Ahpw soangen kasarawi pwukat kin kalapw pidada wiewia kan me uhwong dahme Paipel padahngki. Menlau kilang oaralap me koasoia “Peidek kan Sang Sounwadawad kan​—Krismas Kin ong Kristian kan?” me mi nan Kahn Iroir wet.