Luslahng audepe kan

luslahng audepe kan

Sapwellimen Koht kisakis en pweinen pweipwei sapahlo me kahrehda en kak mie mour soutuk ong aramas, iei kisakis me keieu mwahusang koaros

 OARALAP | KISAKIS DAHIEU ME KEIEU MWAHUSANG KOAROS?

Kisakis Dahieu me Keieu Mwahusang Koaros?

Kisakis Dahieu me Keieu Mwahusang Koaros?

“Soangen wiawi sapan koaros oh kisakis mwahu koaros kin kohdihdo sang nanleng; re kin kohdihdo sang rehn Koht, Sounwiepen marain koaros en nanleng kan.” (Seims 1:17) Iren Paipel wet kin koasoakoasoia duwen kadek sapan en Samatailo nanleng, Siohwa Koht. Ahpw nanpwungen kisakis mwahu tohto me Koht ketikidahier ong aramas akan, mie ehu me keieu mwahu sang koaros. Kisakis dahieu met? Sises ketin padahkihong kitail duwen met nan Sohn 3:16: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”

Koht eh ketikihda sapwellime Iehroso nin duwen kisakis ehu wia kisakis me keieu mwahu me kitail kak alehdi, pwehki met kak kahrehda kitail en saledek sang dihp, mahla oh mehla. (Melkahka 51:5; Sohn 8:34) Sohte lipilipil uwen laud en atail nanti, pein kitail sohte kak wia mehkot pwehn kasaledekihala kitail sang mepwukat. Ahpw pwehki sapwellime limpoak laud, Koht ketikihda dahme anahn pwehn kasaledekihala kitail. Ni eh ketikihda sapwellime Iehroso, Sises Krais, nin duwen pweinen pweipwei sapahl ehu, Siohwa Koht ketikihong aramas peik kan koapworopwor en ahneki mour soutuk. Ahpw ia duwen meirong en sapwellimen Sises mour eh pwainla atail en maiaudahsang dihp oh mehla? Dahme kahrehda e anahn? Oh ia duwen atail kak paiekihda?

Sises eh ketin meirongkihla sapwellime mour kin rasehng uwen pweipwei ehu me pwainla mehkot me salongala de kasaledekihala emen. Paipel kawehwehda me tepin atail pahpa nohno, Adam oh Ihp, kapikipikda sohte dipan, oh ira ahneki koapworopwor en mour kohkohlahte nan paradais nin sampah, iangahki kadaudokara kan me ira pahn nainekihda. (Senesis 1:26-28) Ahpw ira kesehla mepwukat koaros ni ara pilada en sapeikiong Koht​—ira eri wiahla aramas dipan kei. Ia imwilahn met? Paipel sapeng mahsanih: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Adam sohte kadaurohng kadaudoke kan mour unsek, ahpw e kadaurohng irail dihp oh pil imwilahn dihp, me iei mehla.

Pweinen pweipwei sapahlo me kamaiaukitailada sang dihp oh mehla anahne pahrekiong uwen pweinen dahme salongala. Ni Adam eh pilada en sapeikiong Koht, e wiahda dihp oh met imwikihla eh luhssang mour unsek. Paipel mahsanih me met kahrehda kadaudoken Adam kan en wiahla lidun dihp oh mehla. Eri, pwe aramas akan en kak maiaudahsang dihp oh mehla, mour en aramas unsek men, me iei mour en Sises, anahne meirongala. (Rom 5:19; Episos 1:7) Ihte pwehki Koht eh ketin pwainla pweipwei sapahl wet ni limpoak, aramas akan ahnekiher koapworopwor ong soangen mour me Adam oh Ihp kesehla, me iei mour soutuk nan paradais nin sampah.​—Kaudiahl 21:3-5.

Pwehki dahme met kak kahrehda, sapwellimen Koht kisakis en pweinen pweipwei sapahlo, me kahrehda mour soutuk en kak mie ong aramas, wia kisakis me keieu mwahu sang kisakis koaros. Pwehn kasalehda ia uwen kaselel en “kisakis mwahu” wet, kitail pahn tehkpene ia duwen kisakis wet eh kadoadoahk nan irair pahieu ko me kin sewese kitail en kihda kisakis mwahu me sansalda nan oaralap en mwoweo.

E kaitarala atail ineng kan. Kitail ahneki ineng en wie momourte. (Eklesiasdes 3:11) Pein kitail sohte kak  kaitarala ineng wet, ahpw pwehki pweinen pweipwei sapahlo, kitail kak wia met. Paipel mahsanih: “Pwe pweinen dihp, iei mehla; ahpw sapwellimen Koht kisakis sapan, iei mour soutuk rehn Krais Sises atail Kaun.”—Rom 6:23.

E kaitarala atail anahn akan. Aramas sohte kak kihda pweinen pweipwei sapahlo. Paipel kawehwehda: “Pwe pweinen mour me nohn laud kowahlap. Me emen kak kihda sohte pahn itarohng.” (Melkahka 49:8) Eri, kitail uhdahn anahne sapwellimen Koht sawas pwe kitail en kak maiaudahsang dihp oh mehla. Koht ketikihda dahme uhdahn anahn sang ni “pweinen pweipwei sapahlo me Sises Krais ketin pwainlao.”​—Rom 3:23, 24, NW.

Ahnsou me keieu konehng. Paipel mahsanihong kitail: “Ni ahnsou me kitail mihmi nan dihp, Krais ketin pwoukinkitailla!” (Rom 5:8) Pwehki pweinen pweipwei sapahlo wiawihda “ni ahnsou me kitail mihmi nan dihp,” met kamehlelehiong kitail uwen laud en sapwellimen Koht limpoak ong kitail mendahki kitail aramas dipan kei. Oh met pil kihong kitail soahng tohto me kitail en kasikasik, mehnda ma kitail anahne dadaur pahn soahng kan me dihp kin kahrehda.

Kasalehda me kadek oh wahu me kamwakid. Paipel kasalehda dahme kamwakid Koht en ketikihda sapwellime Ohlo nin duwen pweinen pweipwei sapahl ehu. E mahsanih: “Iet duwen en Koht eh ketin kasalehda sapwellime limpoak ong kitail: pein ih ketin poaronedohng sampah Sapwellime Iehros, pwe kitail en kak mourkihla. Iet duwen mwomwen limpoak: kaidehn kitail me tepin poakohng Koht, ahpw ih me tepin poakohng kitail.”​—1 Sohn 4:9, 10.

Ia duwen omw kak kasalehda me ke kalahnganki kisakiso me keieu mwahusang koaros? Taman me sapwellimen Sises mahsen ko nan Sohn 3:16 kin kasalehda me ihte irail kan me kin “pwosonla” ih me pahn mourla. Nin duwen me Paipel kasalehda, pwoson “iei kamehlele mehkan me kitail kin koapworopworki de kasikasik.” (Ipru 11:1) Pwe kitail en ahneki koapworopwor wet, e kesempwal en ahneki loalokong pwung. Pwehki met, se kangoangeiuk ken kihong ahnsou en sukuhlki duwen Siohwa Koht, Meno me ketikihda “kisakis mwahu” wet, oh pil esehla dahme ke anahne wia pwe ken kak ahneki mour soutuk me kak wiawi pwehki sapwellimen Sises pweinen pweipwei sapahlo.

Ke kak sukuhlki soahng pwukat koaros sang ni omw tehk ire kan sang Paipel me mi nan www.jw.org. Sounkadehdehn Siohwa kan pahn perenki seweseiuk. Se uhdahn kamehlele me ni omw pahn sukuhlki duwen kisakis keieu mwahu wet oh paiekihda, e pahn kamwakid uhk en nda: “Kalahngan ong Koht, me kin ketin kapwaiada met rehn atail Kaun Sises Krais!”​—Rom 7:25.