Luslahng audepe kan

luslahng audepe kan

Ia Duwen Omw Kak Ahneki Mour me Mwahusang Mouren Met?

Ia Duwen Omw Kak Ahneki Mour me Mwahusang Mouren Met?

MWOMWEN aramas ar kin momour rahnpwukat weksang dahme Koht ketin kupwurki. Sampah uhdahn pahn audaudki aramas akan me men Sounkapikpatail en kaunkitailda, paiekihda sapwellime kaweid kan, oh kin kahlemengih sapwellime limpoak oh irair kaselel teikan. Koht ketin kupwurki kitail en kin peren ni atail kin ehupene wiahda peneinei kan, sukuhlki soahng kapw kan, oh wiahiong sampah pwon en paradaisla.

KOHT KETIN INOUKIHDA EN WEKIDALA MOUR NIN SAMPAH NIN DUWEN ME E KETIN KUPWURKI

  • “E kin ketin katokehdi mahwen wasa koaros nin sampah.”​Melkahka 46:9.

  • “E lelehr ahnsoun . . . kauwehla irail kan me kin kauwehla sampah!”​Kaudiahl 11:18.

  • “Sohte emen me kin kousoan nan sahpwo pahn kaulimkihla eh soumwahu.”​Aiseia 33:24.

  • “Re pahn nsenamwahuki mehlel dipwisou kan me re koadoahkihada.”​Aiseia 65:22.

Ia duwen kokohp pwukat ar pahn pweida? Koht ketin idihadahr sapwellime Ohlo, Sises, nin duwen Nanmwarki en koperment unsek ehu me pahn kakaun sampah sang nanleng. Paipel kahdaneki kaunda wet Wehin Koht. (Daniel 2:44) Paipel mahsanihki duwen Sises: “Koht pahn ketikihong ih mwoalen . . . , oh e pahn ketin kaunda . . .  nin duwen Nanmwarki men.”​—Luk 1:32, 33.

Ni eh ketiket sampah, Sises ketin wiahda doadoahk kapwuriamwei tohto pwehn kasalehda me nin duwen Kaun emen, e pahn ketin wiahda mouren aramas en uhdahn mwahusang mour me kitail aiahniki rahnpwukat.

SISES KETIN KASALEHDA SOAHNG MWAHU ME E PAHN KETIN WIAHIONG ARAMAS PEIK KAN

  • E ketin kamwahwihala soangen soumwahu koaros, kasalehda ia duwen eh pahn ketikihsang luwet kan me aramas akan ahneki.​Madiu 9:35.

  • E ketin kameleileidi sehdo, kasalehda ia duwen eh pahn pere aramas akan sang ni eh pahn kaunda mwekimwekid en pahnlahng.​Mark 4:36-39.

  • E ketin kamwengehda meh kid kei, kasalehda me e pahn ketikihda dahme aramas kin anahne nan arail mour.​Mark 6:41-44.

  • E ketin kawekiong pihlo en wiahla wain ni kapwopwoud ehu, kadehdehda me e pahn ketin sewese aramas akan ren perenki mour.​Sohn 2:7-11.

Ia duwen omw kak ahneki mour me Koht ketin kupwurki ong aramas akan me poakohng ih? Mie mehkot me ke anahne wia. Paipel mahsanih me ke anahne rapahkihda “ahl me kohlahng mour me tehtik, oh malaulau me kin diar.”​—Madiu 7:14.

RAPAHKIHDA AHL EN KOLAHNG MOUR ME MWAHUSANG MOUREN MET

Dahkot ahl en kolahng mour? Koht ketin mahsanih: “Ngehi me KAUN-O omw Koht, me kupwurki  padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.” (Aiseia 48:17) Ma ke pahn idawehn kaweid wet, omw mour pahn mwahula.

Sises ketin mahsanih: “Ngehi me ahl oh ngehi me mehlel oh ngehi me mour.” (Sohn 14:6) Ma kitail kin wia dahme Sises mahsanih oh alasang sapwellime mehn kahlemeng, kitail pahn karanihala Koht oh atail mour pahn mwahula.

Ia duwen omw kak rapahkihda ahl en kolahng mour? Mie pelien lamalam tohto, ahpw Sises ketin kehkehlingki: “Kaidehn aramas koaros me kin likwerih ie, ndinda, ‘Maing ei Kaun, Maing ei Kaun,’ me pahn pedolong nan Wehin Koht, pwe irail kan me kin kapwaiada kupwur en Semei me ketiket nanleng.” (Madiu 7:21) E pil mahsanih: “Kumwail pahn esehkin irail wahrail.” (Madiu 7:16) Paipel kak seweseiuk ken kasawihada mehnia pelien lamalam me mehlel.​—Sohn 17:17.

Ia duwen omw kak idawehn ahl en kolahng mour? Ke pahn anahne sukuhlki duwen meno me ketikihong aramas koaros mour. Ihs ih? Ia ede? Soangen aramas dahmen ih? Dahme e ketin wiewia ong kitail? Dahme e ketin kupwurki kitail en wia? *

Koht ketin kupwurki aramas ren wia laudsang ihte doadoahk, mwenge, mwadong, oh wiahda peneinei ehu. Kitail kak esehla Sounkapikpatailo oh kompoakepahnkihla. Kitail kak kasalehda me kitail poakohng ih sang ni atail kin wia kupwure. Sises mahsanih: “Met wehwehki mour soutuk, arail pahn eseikomwihla, me komwihte me Koht mehlel.”​—Sohn 17:3.

SANG NAN PAIPEL KOHT KETIN PADAHKIHIUK “PWE EN WIA KAMWAHU EHU ONG UHK.”​—AISEIA 48:17

WIA TEPIN KAHK NAN OMW SEILOAK

Ni atail kin ese dahme Koht ketin kupwurki kitail en wia, ele kitail anahne wiahda ekei wekidekla kan. Met mwomwen apwal. Ahpw met wehwehki me atail mour pahn mwahula ni atail pahn tepida keid nan ahl en kolahng mour. Pwehn seweseiuk diarada pasapengpen peidek kan duwen Koht, Sounkadehdehn Siohwa kan kin wia onop en Paipel ni soh isepe ni ahnsou oh wasa me pahn mwahu ong uhk. Ke kak peki onop en Paipel reht ni omw pahn doadoahngki nait website ni www.jw.org.