Luslahng audepe kan

luslahng audepe kan

Paipel oh Omw Mour en Ahnsou Kohkohdo

Paipel oh Omw Mour en Ahnsou Kohkohdo

MEDEWEHLA me ke alialu kohla nan ahl rotorot ehu ni soutik ehu. Mendahki ketipino kihrla wereilahr, miehte omw koapworopwor, pwe mie dengki kehlail ehu nan pehmwen. Ni omw kin seridi pah, ke kin mwadangete kilangada ni sansal dahme mi mwohmw. Oh ni omw kin serla mwowe, lingen dengkio kin serehda omw ahlo lella wasa doh.

Ni soangen ahl ekei, Paipel duwehte soangen dengkio. Nin duwen me kitail tehkpeneier nan iren mwowe ko, Mahsen en Koht kak sewese kitail en apwalihala dahme kin wiawihong kitail, kahpwal en ehuehu rahn me kitail koaros kin lelohng nan sampah keper wet. Ahpw Paipel pil kin wia laudsang met. E pil kin kihda kamarainpen ni ahnsou kohkohdo, e kak kahrehiong kitail en kilang oh idawehn ahl ehu me kohlahng nsenamwahu me pahn poatopoat oh popohl. (Melkahka 119:105) Ia duwen?

Kitail tehkpene ahl riau me Paipel kin kihong kitail koapworopwor kaselel ong ahnsou kohkohdo: 1 E kin sewese kitail en diarada kahrepen mour, oh 2 e kin padahkihong kitail ia duwen atail kak kompoakepahnkihla Sounkapikpatailo kohkohlahte.

1 KAHREPEN MOUR

Paipel kin kihda kaweid likilik ong apwalih atail kahpwal kan, ahpw e wia laudsang pwuhken sawas ehu. E sohte kin kangoange kitail en kilangwohngete pein atail pwunod kan, Paipel kin padahkihong kitail en kilang me mie emen tohrohr me pil kin iang atail mour. Eri ih met me pahn kasalehda me mie katepen atail mour.

Karasepe, song tehk ire mehlel en Paipel wet: “Kihwei kaperen sang ale.” (Wiewia 20:35) Ke kak medewehla ahnsou ehu me ke sewese aramas emen me ahneki kahpwal en mwohni? De ele ni omw kin toukihda pein kowe ni omw rong kompoakepahmw men eh kasalehda eh pepehm loal kan? Ke sou nsenamwahuki ni omw sewesehda emen en nsenamwahula?

Kitail kin diar nsenamwahu laud ni atail kin kihwei oh  sohte kasik dupukpe. Emen sounnting ntingihedi: “E uhdahn sohte kak wiawi ni omw toukihda pein kowe oh sohte alehdi laudsang dahme ke kihwei—ma ke sohte kihla mehkot ni omw sohte medewe me ke pahn alehdi pweine.” Ahpw, ma kitail kin toukihda pein kitail, ahpw mehlel ong irail kan me sohte ahl ehu irail kak wia pwehn kapwungohng kitail, kitail kin uhdahn alehdi ketingpe. Emen tohrohr pil iang atail mour. Ni mehlel, kitail kin iang Sounkapikpatailo doadoahk, me kin ketin medewehki soangen wiewia kadek wet duwehte pweipwand ong ih. (Lepin Padahk 19:17) E uhdahn ketin kupwurperenki dahme kitail kin wiahiong irail kan me anahne sawas, oh e ketin inoukihda en kasapahldohng kitail mour soutuk nan paradais nin sampah, met uhdahn wia koapworopwor kaselel ehu ong ahnsou kohkohdo!​—Melkahka 37:29; Luk 14:12-14. *

Keieu kesempwal, Paipel kin padahkihong kitail me kitail kak diarada kahrepen mour ni atail kin kaudokiong Koht mehlelo, Siohwa. Sapwellime Mahsen kin kangoange kitail en kin patohwanohng ih kaping, wahu, oh peik me e warohng. (Eklesiasdes 12:13; Kaudiahl 4:11) Ni atail kin wia met, kitail kin wiahda mehkot kaselel ehu me kitail kak medemedewe: Kitail kin kamwakid Sounkapikpatailo ni ahl mwahu ehu. Ni mehlel e kin ketin kangoangehkin kitail: “Ke en loalokongla, I ahpw pahn kin pereperen.” (Lepin Padahk 27:11) Medewehla, ma kitail kin wiahda pilipil kan ni elen loalokong me poahsoankihda kaweid kan nan Paipel, kitail kin kaperenda kupwuren Samatail limpoak me ketiket nanleng. Dahme kahrehda? Pwehki e ketin nsenohkin kitail oh kupwurki kitail en pein paiekihda atail pahn idawehn sapwellime kaweid kan. (Aiseia 48:17, 18) Ia duwe, mie kahrepe ehu me mwahusang en kaudokiong Kaunepen lahng oh sampah oh mour ni ahl me kin kaperenda kupwure?

2 KOMPOAKEPAHNKIHLA SOUNKAPIKPATAILO KOHKOHLAHTE

Paipel pil kin padahkihong kitail en ahneki nanpwungmwahu rehn Sounkapikpatailo. Paipel mahsanih: “Kumwail keido mpen Koht, oh e pahn ketin keiong mpamwail.” (Seims 4:8) Ekei pak ele kitail pahn peikasalki ma mehlel kitail kak uhdahn kompoakepahnki Sounkapikadao me keieu manaman. Ahpw Paipel kamehlelehiong kitail ma kitail pahn rapahki Koht, kitail uhdahn pahn diarada ih, pwe e “sohte dohsang emenemen kitail.” (Wiewia 17:27) Kaweid en Paipel me kasalehda en wiahla kompoakepahn Koht uhdahn kesempwal ong atail ahnsou kohkohdo. Ni soangen ahl dah?

Tehk met: Mehnda ma kitail song wia uwen atail kak koaros, sohte emen rehtail kak pitsang imwintihti kehlail, mehla. (1 Korint 15:26) Ahpw, Koht iei Koht poatopoat men. E sohte kak pwoula, oh e kupwurki kompoakepah kan ren pil mour kohkohlahte. Paipel doadoahngki mahsen kaselel pwukat pwehn kasalehda dahme Siohwa kupwurki ong irail kan me kin rapahki ih: “Re en paiamwahu kohkohlahte!”​—Melkahka 22:26.

Ia duwen omw kak kakairada soangen nanpwungmwahu poatopoat wet rehn Koht? Pousehlahte sukusukuhlki duwen ih sang nan sapwellime Mahsen, Paipel. (Sohn 17:3; 2 Timoty 3:16) Rapahki sapwellime sawas pwehn wehwehki Paipel. Paipel kamehlelehiong kitail me ma kitail poadidiong “peki rehn Koht” erpit, e pahn ketikihong kitail. * (Seims 1:5) Mwuri, nantihong kapwaiada dahme ke sukuhlki, mweidohng Mahsen en Koht en kamarainih omw ahl akan sang met oh kohkohlahte.​—Melkahka 119:105.

^ par. 8 Pwehn kalaudehla omw wehwehki duwen sapwellimen Koht inou ong mour soutuk nan Paradais, menlau kilang irelaud 3 en pwuhken Dahme Paipel Kak Padahkihong Kitail? me Sounkadehdehn Siohwa kan wiahda.

^ par. 13 Sounkadehdehn Siohwa kan kin kihda onop en Paipel ni soh isepe me kak seweseiuk en kalaudehla omw wehwehkihla Paipel. Pwehn wehwehki ia mwomwen met, menlau kilang kisin kasdo Dahme Kin Wiawi ni Ahnsoun Onop Paipel? Ke kak diarada met ni omw pahn kohla nan jw.org, padik wasa me nda Search, oh daipihdi oaralapo.

Koht iei Koht poatopoat men oh e kupwurki kompoakepah kan ren pil mour kohkohlahte