Luslahng audepe kan

luslahng audepe kan

Padahk en Paipel kan—Erpit me Sohte Imwi

Padahk en Paipel kan—Erpit me Sohte Imwi

MEDEWEHLA MET: Ke mwemweitla nan museum ehu me tohto dipwisoun kataman en mahs kan loale. Pali tohtohn dipwisou pwukat pwoarpwoarinla, wereilahr, oh ohlahr. Ekei wasa ni dipwisou pwukat mweresangehr. Ahpw, ehu me kapwuriamwei ni eh mwamwahute; e wiawihda ni mwohmw kaselel ehu me sansal ni soangen oaritik koaros. Kowe eri idek rehn me kahreiuko, “Met kapw sang meteiko koaros?” E sapeng, “Soh, ih me keieu mering, oh saikinte pak ehu e pwurehng kamwahula.” Kowe eri idek, “E kin perperla sang soahng kan me kapilpene?” Me kin kahreiuko nda, “Soh, kisinieng me keieu suwediong oh keteu. Oh me tohto songehr ren kauwehla.” Ele ke pahn pwuriamweikihla oh medewe, ‘Dahme e wiawihdahsang?’

Ni ahlohte, Paipel duwehte dipwisoun kataman kapwuriamweio. E wia pwuhken mahs ehu, mering sang pwuhk tohto. Uhdahn mie ekei pwuhken mahs kan. Ahpw duwehte dipwisoun kataman en mahs ohlahr kan, pali laud en nting en mahs ko uhdahn ohlahr pwehki re wereilahr. Karasepe, loalokong kapw kan kin kasalehda me arail koasoia duwen sains me sapwung. Arail kaweid me pid duwen pali en wini kin kalapw mwomwen keper sang sawas. Oh tohto nting en mahs kan me mie rahnwet iei kisin wasa kante sang dahme mie nin tapio, oh pali laud salongala de uhdahn ohla.

Ahpw, Paipel weksang koaros. E tepida ntingdi daulih sounpar 3,500 samwalahr ko, ahpw Paipel mwamwahute. Oh mendahki erein sounpar epwiki kei aramas akan kin pwurepwurehng kauwehla, isikala, keinapwihdi, oh kauwe, ahpw mahsen en Paipel kan kin mihmihte. Loalokong kapw kan sohte kin kasalehda me audepen Paipel solahr katepe. Ahpw ni pali teio, Paipel mahsanih soahng tohto me aramas kan sohte ese mahs, oh met uhdahn kapwuriamwei.​—Kilang kisin koakon  E Solahr Doadoahk De Audaudki Soahng kan me Aramas Sohte Ese Mahs?

KAWEID KAN ME KITAIL ANAHNE RAHNWET

Ahpw, ele ke pahn medewe, ‘Ia duwe, padahk en Paipel kan uhdahn katapan ong atail ahnsou?’ Pwehn sapengala, pein idek rehmw: ‘Soangen kahpwal dah kan me keieu suwed me kin wiawihong aramas akan rahnwet? Mehnia rehrail me keieu kamasepwehk?’ Ele ke pahn medewe duwen mahwen, ohlahn nan wehwe, kauwehla kosonned, de tiahk mwersuwed. Met kitail pahn koasoiapene ekei kaweid kan me Paipel kin padahngki. Ni omw pahn tehk met, pein idek rehmw, ‘Ma aramas akan kin mourki kaweid pwukat, ia duwe, sampah wet pahn wia wasa mwahu ehu?’

PERENKI WIAHDA POPOHL

“Meid pai me kin wia doadoahk en kamwahu nanpwungen aramas akan; pwe Koht pahn ketin wiahkinirailla uhdahn sapwellime!” (Madiu 5:9) “Kumwail wia uwen amwail kak pwe kumwail en ahneki popohl rehn aramas koaros.”​—Rom 12:18.

MAHK OH KALAHNGAN

“Meid pai me kin kalahngan ong meteikan; pwe re pahn diar kalahngan rehn Koht!” (Madiu 5:7) “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen [“Siohwa, *NW] eh ketin mahkohngkumwailehr.”​—Kolose 3:13.

SOANGSOANGEN KEINEK KAN MINIMINPENE

Koht “ketin wiahda kadaudok koaros sang rehn ohltehmen, oh ketikihong irail en koukousoan pohn sampah pwon.” (Wiewia 17:26) “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”​—Wiewia 10:34, 35.

KESEMPWALKI SAMPAH

Siohwa “Koht eri ketikihdiong aramaso nan mwetuwel en Ihden pwe en kin apwahpwalih oh sinsile.” (Senesis 2:15) Koht pahn ketin “kauwehla irail kan me kin kauwehla sampah!”​—Kaudiahl 11:18.

TATEKI NOAHROK OH TIAHK SAMIN

“Kumwail kalekeikumwailsang noahrok suwed koaros, pwe mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.” (Luk 12:15) “Pwehki amwail wialahr sapwellimen Koht aramas pilipil kei, e sohte konehng mahsenpen mehkot me pidada nenek de soangen samin teikan de noahrok, en kin wiawi nanpwungamwail.”​—Episos 5:3.

MEHLEL, PWERISEK

“Se pepehm me nan kapehdit me uhdahn mwakelekel, pwehki at kin men wia dahme pwung ahnsou koaros.” (Ipru 13:18) “Aramas me kin epwehnki pirap, en tokedihsang eh pirap, oh en tapihada wia ehu soangen doadoahk me e kak momourki.”​—Episos 4:28.

KESEMPWALPEN SEWESE IRAIL KAN ME ANAHNE SAWAS

“Kumwail kakehlaka irail kan me nan kapehd tikitik, kumwail sewese me luwet akan, oh kanengamahiong aramas koaros.” (1 Deselonika 5:14) “Apwalih me sepwoupwou kan oh liohdi kan nan ar apwal akan.”​—Seims 1:27.

Paipel sohte ketikihdahte kaweid pwukat. Ni ahl me pahn sawas, e kin padahkihong kitail en kesempwalki soangen kaweid pwukat oh en kapwaiada nan atail mour en ehuehu rahn. Ma aramas tohto kin kapwaiada  padahk pwukat, kahpwal akan en rahnpwukat pahn malaulau. Eri, mehlel, kaweid en Paipel kan uhdahn kesempwal oh anahn laud rahnwet sang mahs! Ahpw, dahme padahk en Paipel kan kak wiahiong uhk ahnsou wet?

IA DUWEN OMW KAK PAIEKIHDA PADAHK EN PAIPEL KAN AHNSOU WET

Ohl keieu loalokong men mahsanih: “Kupwurokong en Koht kin dehdehda sang ni wahn sapwellime doadoahk kan.” (Madiu 11:19) Ke sou pahn pwungki met? Erpit pahn sansalda ni omw kin kapwaiada oh kilang ia duwen eh pahn sawas. Eri, ele ke pahn medewe, ‘Ma Paipel uhdahn katapan, e sou pahn kahrehda imwila mwahu kan nan ei mour? Ia duwen eh katapan ong kahpwal kan me I kin lelohng ahnsou wet?’ Tehk karasepe wet.

Delphine * pehm me eh mour kin kedirepw ahpw kansenamwahu. Ahpw, e wiahkintehieu lelohng soahng kansensuwed tohto. Nah serepein me sounpar eisek samwa mehla. Eh mouren pwopwoud ohla. E mwadangete ahnekihda kahpwal en mwohni. E tamanda oh koasoia: “I uhdahn sehsehla ihs ngehi, sohte nei serepein, sohte ei pwoud, sohte imwei. I pehm me sohte ngehi mehkot, sohte ei kehl, sohte ei koapworopwor ong ahnsou kohkohdo.”

Delphine saikinte kilang pak ehu ni sansal mehlelpen mahsen pwukat: “Sounpar 70, ihte werein at mour​—a ma se kehlail, e pahn lel 80; ahpw pahr pwukat kin kahrehiong kiht pwunodte oh apwal; mour kin  mwadang imwisekla, oh se solahr mie.”​—Melkahka 90:10.

Delphine diarada sawas nan Paipel erein ahnsoun apwal wet. Dahme Paipel wiahiong ih uhdahn kaselel. Nin duwen me ire siluh ko pahn kasalehda, pil me tohto diarada me Paipel sewese irail ni arail doadoahngki kaweid kan loale pwehn powehkihdi arail kahpwal kan. Irail pehmada me Paipel duwehte dipwisoun katamano me sansalda nin tapio. E weksang pwuhk tohto me kin wereila oh sohla kadoadoahk. Ia duwe, met pwehki audepen Paipel weksang pwuhk teikan? E audaudki sapwellimen Koht madamadau, a kaidehn en aramas?​—1 Deselonika 2:13.

Ele mwein ke pil diarada me mour mwotomwot oh diren kahpwal kan. Ma kahpwal kan kin kipeiukedi oh kahrehiong uhk ken masepwehk, ia wasa ke pahn sohpeiong pwehn ale kamweit, utuht, oh kaweid likilik?

Kitail tehkpene ahl kesempwal siluh me kadehdehda me Paipel katapan ong omw mour. E kak padahkihong uhk ia duwen omw kak

  1. soikala kahpwal kan ni uwen omw kak.

  2. kamwahwihala kahpwal kan ni ahnsou me re pwarada.

  3. powehdi ni omw dadaurete pahn irair kan me ke sohte kak wekidala.

Ire kan mwurin met pahn koasoia soahng siluh pwukat.

^ par. 10 Siohwa iei mwaren Koht me pwarada nan Paipel.​—Eksodus 3:14, menlau kilang kisin nting tikitik me mi pah.

^ par. 24 Nan ire wet oh ire siluh mwurin met, ekei eden aramas akan nan ire pwukat weksang uhdahn adarail.