Luslahng audepe kan

luslahng audepe kan

 KOASOIPEN ARAIL MOUR

Sohso Ehu me Sewese Ie en Pweida

Sohso Ehu me Sewese Ie en Pweida

NI PWONG ehu, se mi pohn Pillap Niger me kereniong tehlapki mwail ehu oh ahd en pihlo kin kehlail. Mahwen nan Nigeria wiewiawi ahnsowo oh kahrehda e keper en kotehla pillapo. Ahpw se anahnehte wia met tohtohsang pak ehu. Ia duwen ei mihla nan soangen irairo? Kitail pwuralahng ahnsowo mwohn ei ipwidi.

Nan pahr 1913, ei pahpao, John Mills, papidaisla nan New York City ni eh sounpar 25. Brother Russell me wia padahk en papidaiso. Mwurinte mwo, Pahpa kohla Trinidad, wasa me e pwoudikihda Constance Farmer, Tohnsukuhl en Paipel ngoang men. Pahpa sewese kompoakepaho William R. Brown en kin kasalehda kasdohn “Photo-Drama of Creation.” Ira kin wia met lao Brother Brown oh eh pwoudo keseula Palikapi en Aperika nan 1923. Pahpa oh Nohno, me ahneki koapworopwor en mi nanleng, doula wia doadoahko nan Trinidad.

AT PAHPA NOHNO KIN POAKOHNG KIHT

Pahpa oh nohno naineki seri duwemen. Ira kihong eden neira me keieu laudo Rutherford, eden president en Watch Tower Bible oh Tract Society en ahnsowo. Ni ahnsou me I ipwidi nan December 30, 1922, ira kahdanekin ie Clayton J. Woodworth, eden brother me pwukoahki ntingihada kisin pwuhko The Golden Age (me met adaneki Awake!). Pahpa oh nohno kin kasukuhlih ong kiht soahng kan me se anahne esehla, ahpw keieu iei mehn akadei kan me pid at kaudok ong Koht. Nohno ahneki koahiek laud en kin padahngki oh kawehwehda iren Paipel kan. Pahpa kin perenki padahkihong kiht poadopoad kan en Paipel oh kin kamwomwada koasoipen poadopoado pwehn uhdahn mwomwen mehlel.

Ara nanti laud uhdahn pweida. Kiht meh silimen sang neira pwutak limmeno iang kohla Sukuhl en Kilead. Riat serepein silimen wia pioneer kei erein sounpar tohto nan Trinidad oh Tobago. Sang ara kasukuhl oh mehn kahlemeng mwahu, ira kahrehiong neira seri kan en poadidi nan “tehnpas en KAUN-O.” Ara mehn kangoang sewese kiht en mihmi mwo oh pweida “nan Tehnpas en atail Koht.”​—Mel. 92:13.

Imwato wiahla wasahn tuhpene ong doadoahk en kalohk. Pioneer kan kin kohpene wasao oh kalapw koasoia duwen Brother George Young, emen misineri sang Canada me mwemweitdo Trinidad. Ei pahpa nohno kin perenki koasoia duwen iangara  sounkalohk ko mahs, Brother oh Sister Brown, me ahnsowo mi Palikapi en Aperika. Mepwukat koaros kamwakid ie en tepida kalohk ni ei sounpar eisek.

DOADOAHK KAN NIN TAPIO

Nait makasihn kan kin uhdahn uk oh inen ni ahnsou ko oh kasansalehda pelien lamalam likamw kan, palien pesines noahrok kan, oh palien politik mwersuwed kan. Nan pahr 1936, kaunen pelien lamalam kan mwekidki met oh kahrehiong kepina en Trinidad ahnsowo en keinapwidi pwuhk kan koaros en Watch Tower. Se ekihla pwuhk ko ahpw pousehlahte doadoahngki lao koaros nekla. Se kin kapar alu oh pil dake pwaisikel nin duwen pwihn ehu oh wa sain kan oh kihseli kisin doaropwe. Ehu sidohsa en pakair sang kahnimw en Tunapuna pil iang kiht oh se kin kalohkla pil wasa kan me keieu doh nan Trinidad. E uhdahn kaperen! Ei kin ieiang sounkalohk pwukat kahrehiong ie en papidaisla ni ei sounpar 16.

Pwihnen kalohk sang Tunapuna oh wararail sidohsahn pakair

Ei tikida nan padahk mehlel me rasehng sohso ehu oh ei iang soangen doadoahk pwukat nin tapio kahrehiong ie en men wiahla emen misineri. I ahnekihte ineng wet ni ahnsou me I kohla Aruba nan pahr 1944 oh iang Brother Edmund W. Cummings doadoahk. Se inenen perenkihda at lukehdo aramas ehk en iang towehda Katamano nan pahr 1945. Pahro mwuri, tepin mwomwohdiso pohn dekeo wiawihda.

Rehn Oris, ei mour uhdahn pweida mwahu

Mwurinte mwo, I ehukihong emen iengei tohndoadoahk, Oris Williams, duwen padahk mehlel. Oris uhdahn kehlailki eh uhki padahk kan me e sukuhlkihsang eh pelien lamalamo. Ahpw sang eh onopki Paipel, e sukuhlki dahme Mahsen en Koht uhdahn padahngki oh eri papidaisla nan January 5, 1947. Kedekedeo, se mwahukihda emenemen oh pwopwoudida. E tepida pioneer nan November 1950. Rehn Oris, ei mour uhdahn pweida mwahu.

DOADOAHK EN KALOHK KAPEREN NAN NIGERIA

Nan pahr 1955, se ale luhk en iang Sukuhl en Kilead. Pwehn kaunopadahng pwais kaselel wet, ngehi oh Oris uhdihsang at doadoahko, netikihla imwato oh pil at kepwe teikan, oh kamwurala Aruba. Nan July 29, 1956, se iang tohnsukuhl kan en Kilead nempe 27 kesepwilla oh se pekederla Nigeria.

Rehn at peneinei en Pedel nan Lagos, Nigeria, 1957

Ni eh kin medewehla ahnsowo, Oris nda: “Sapwellimen Siohwa manaman kak sewese emen en wiahda wekidekla kan pwehn kakohng ahnsou mwahu oh apwal kan nan mour en misineri. I sohte men wiahla misineri duwehte ei pwoudo. I men mi nan ihmw oh naineki seri kan. I wekidala ei madamadau ni ei esehda uwen karuwaru en doadoahk en kalohki rongamwahwo. Ni ahnsou me se kesepwil sang Kilead, I uhdahn kaunopadahier en kalohk nin duwen misineri men. Ni at douda pohn sohp laudo Queen Mary, Worth Thornton me kin doadoahk nan ahn Brother Knorr eh ohpiso, kamwurkitala ni eh nda ‘Bon voyage!’ E ndaiong kiht me se pahn kohla papah nan Pedel. I ndahla, ‘Soh!’ Ahpw I mwadangete wiahda wekidekla kan oh perenkihla Pedel, wasa me I ahneki doadoahk tohto. Doadoahk me I keieu perenki iei en wia receptionist. I kin perenki aramas, oh doadoahk wet kahrehda I en tuhwong riat Kristian tohto sang Nigeria. Me tohto rehrail kin leledo pwelpar ni arail likou ko, pwangada, men nimpil, oh men mwenge. E wia pai kaselel ehu en apwalihala dahme re anahne pwe ren nsenamwahu. Doadoahk pwukat koaros wia kisehn kaudok ong Siohwa, oh e kin wadohng ie peren oh nsenamwahu.” Ei uhdahn, doadoahk koaros me kitail alehdi kin kahrehiong kitail en kekeirda.

Ni ehu ahnsou me se mwengepene nin duwen peneinei ehu nan Trinidad nan 1961, Brother Brown koasoiahda ekei soahng kan me e lelohng nan Aperika. Mwuhr I koasoiahda duwen at kekeirda nan Nigeria. Brother Brown pwoaleiehdi oh ndalahng Pahpa: “Johnny, ke sohte lella Aperika, ahpw Woodworth lella!” Pahpa sapengki: “Doulahte, Worth! Doula!” Soangen mehn kangoang pwukat sang sounkalohk kei me wereilahr nan doadoahko uhdahn kalaudehla ei ineng en kapwaiada ei doadoahk en kalohk ni unsek.

William “Paipel” Brown oh eh pwoudo, Antonia, kin kangoange kiht laud

Nan 1962, I alehdi pwais kaselel en kalaudehla ei kaiahn nan sukuhl en Kilead nempe 37, me reireiki sounpwong eisek. Brother Wilfred Gooch, me ahnsowo wia sounapwalih en ohpis en Sounkadehdehn Siohwa kan nan Nigeria, iang sukuhl en Kilead nempe 38 oh pekederla England. Ngehi eri uhd alehdi pwukoahn apwalih ohpis en Sounkadehdehn  Siohwa kan nan Nigeria. I idawehn mehn kahlemeng en Brother Brown oh seiloakla wasa tohto, oh esehla oh poakohngala riatail Kristian kan nan Nigeria. Mendahki re sohte ahneki kepwe tohto me aramas sang sahpw mwahu teikan kin ahneki, arail peren oh nsenamwahu kin uhdahn kasalehda me mour me mie katepe sohte kin kohsang naineki mwohni de kepwe tohto. Ni omw medewehla arail irairo, e uhdahn kaselel en kilang arail mwakelekel, soandi mwahu oh ahneki wahu ni mihting kan. Ni arail kin pokondohng mihting tohrohr kan, me tohto kin iangodo sidohsa pick-up laud kan oh bolekajas * (bus kan me sohte pereperla pwon). Mie sain kaselel kan me kin kalapw mi ni bus pwukat. Ehu sain ko koasoia: “Kisin dingiding en pihl kan kin wiahda lapalahn madau.”

Lepin lokaia ko uhdahn mehlel! Mie katepen nanti laud en emenemen aramas; se pil iangete sawas. Ni pahr 1974, Nigeria wiahla keieun sahpw likin Wehin Amerika me sounkalohk kan lel meh 100,000. Doadoahko uhdahn kekeirda!

Ahpw ni mepwukat eh wiewiawi, Mahwen en Nigeria pil wiawi sang pahr 1967 lel 1970. Erein sounpwong tohto, ohpis en Sounkadehdehn Siohwa kan wasao sohla kak ehuong riatail Kristian kan me mi Biafran apali Pillap en Niger. Ahpw se anahnehte wahlahng irail padahk mehlel me rasehng kisin mwenge. Nin duwen me I koasoia ni tapio, se kin kapakap oh likih Siohwa, oh kotehla pillapo pak tohto.

I uhdahn tamataman at kin kotehla Pillap Niger, mendahkihla ma se kamakamala rehn sounpei saloh kan me kin mwadang en kasikih aramas, de sang soumwahu oh keper teikan. E uhdahn apwal en kotehla sounpei en koperment ko, ahpw en kotehla wasa me mehn Biafran ko mi ie apali pillapo uhdahn kamasepwehk sang. Ehu pak, I kotehla Pillap Niger ni pwong sang ni ei iang dake wahr sang Asaba lel Onitsha oh kohla kangoange sounapwalih en mwomwohdiso kan nan Enugu. Pil ehu ahnsou, I kohla oh kakehlakahda elder kan nan Aba ahnsou me sohte mweimwei ihmw kan en doadoahngki dengki ni pwong pwe imwintihti kan en sohte kak kilang irail. Nan Port Harcourt, se mwadang kanekehla at mihtingo ni kapakap ni sounpei en koperment ko ar kauwehla ahn Biafran arail kehl ko likin kahnimwo.

Mihting ko uhdahn kesempwal pwehn kangoangehki riat Kristian kan duwen sapwellimen Siohwa limpoak oh epwel mwahu oh pil kihong irail kaweid kan me uhdahn anahn duwen soupoupali oh miniminpene. Riatail Kristian kan nan Nigeria uhdahn pweida mwahu ni ahnsou apwalo. Re kasalehda limpoak me laudsang kailokpene en keinek kan, oh re kolokol arail soupoupali. E uhdahn wia pai kaselel ehu en iang mi rehrail ni ahnsou apwalo!

Nan 1969, Brother Milton G. Henschel wia chairman en Mihting Tohrohr Laud me wiawi ni wasahn mwadong Yankee Stadium, New York, me oaralape “Popohl nin Sampah,” oh I sukuhlki soahng tohto sang reh nin duwen eh sounsawas. Met inenen konehng ahnsowo pwehki nan pahr 1970, se wia Mihting Tohrohr Laud nan Lagos, Nigeria, me oaralape “Aramas me E Ketin Kupwurperenki.” Pwehki mihting tohrohro wiawi mwurinte mahwen en Nigeria, e pweida ihte pwehki Siohwa ketin kapaiahda. Ehdin mihting tohrohr ehu me wiawi ni lokaia 17 oh aramas 121,128 me iang towehda. Brother Knorr oh Henschel, oh pil meteikan me iang mwemweitdo dake sompihr sang Wehin Amerika oh England kilang mwekid en papidais me keieu laud likin me wiawi ni Pendekos mahso. Sounkalohk kapw meh 3,775 me papidaisla! Ei sewese kaunopada oh koasoanehdi mihting tohrohr wet ele wia ahnsou ehu me keieu kedirepw nan ei mour. Kekeirdahn sounkalohk kan uhdahn laud!

Mihting Tohrohr Laud me oaralape “Aramas me E Ketin Kupwurperenki” kahrehdo aramas 121,128, me kin lokaiahki lokaia 17, iangahki lokaiahn Ibo

Erein sounpar 30 samwa nan Nigeria, I perenki papah ekei ahnsou nin duwen sounapwalih me kin seiloak oh pil wia wiliepen poasen kaun nan Palikapi en Aperika. Ia uwen misineri kan ar kalahnganki arail alehdi sawas oh kangoang ong emenemen irail! E wia pai kaselel ehu en kamehlelehiong irail me sohte me pohnsehsehla irail! Doadoahk wet padahkihong ie me en kasalehda nsenohki meteikan iei ahl en sewese irail en kekeirda oh kolokol kehl oh miniminpene en sapwellimen Siohwa pwihn.

Ihte pwehki sapwellimen Siohwa sawas me kahrehda se kak dadaur kahpwal kan me wiawi pwehki  mahwen oh soumwahu. Sapwellimen Siohwa kapai kan kin ahnsou koaros sansalda. Oris nda:

“Se iangada soumwahu en malaria pak tohto. Ni ehu ahnsou ko, Worth lipwongmasla oh kapidelong ni imwen wini en Lagos. Toahkte ko padahkihong ie me e kakete mehla, ahpw kalahngan ehu me e sohte mehla. Ni eh pirida, e koasoiaiong tohndoadoahko (nurse) me apwalih ih duwen Wehin Koht. Mwuhr, I iang Worth mwemweitla rehn tohndoadoahko, Mr. Nwambiwe, pwehn kalaudehla eh men esehla Paipel. E alehda padahk mehlel oh mwuhr wiahla elder men nan Aba. I pil kin pweida ni ei sewese me tohto, pil mehn Muslim poadidi kan, pwe ren wiahla sapwellimen Siohwa ladu lelepek kei. Se uhdahn perenki en esehla oh poakohngala aramas akan nan Nigeria, arail tiahk kan, oh arail lokaia.”

Met pil wia ehu kasukuhl ong kiht: Pwe sen pweida nan at doadoahko nan ehu sahpw tohrohr, se anahne sukuhlki en poakohng riat Kristian kan sohte lipilipil ma arail tiahk kan uhdahn weksang at.

PWUKOA KAPW KAN

Mwurin at papah Pedel nan Nigeria, se alehdi pwukoa kapw en wia misineri oh se pekederla pohn deke kaselelo St. Lucia nan Caribbean nan pahr 1987. Pwukoa wet uhdahn mwahu, ahpw mie kahpwal kapw. Wasao sohte duwehte Aperika me ohl akan kin pwoudikihda lih tohto. Ahpw nan St. Lucia, kahpwalo iei ohl oh lih kan kin mihpene nin duwen pwopwoud ehu ahpw sohte pwopwoudida nin duwen kosonned. Manaman en Mahsen en Koht kamwakid nait tohnsukuhl en Paipel tohto en wiahda wekidekla kan me anahn.

I uhdahn poakepoake Oris erein at pwopwoudki sounpar 68

Ni at roson en war eh luwetala pwehki at mahlahr, Pwihn me Kin Apwalih Mwomwohdiso nan Sampah Pwon wiahda sen keseula ni ohpis en poasen kauno nan Brooklyn, New York, Wehin Amerika nan 2005. Rahn koaros I kin kasalehdahte ei kalahnganki Oris ong Siohwa. E lohdi pahn imwintihtio mehla nan pahr 2015, oh I apwalki kawehwehda ei pahtoukihla eh solahr mie. E wia lih pwopwoud uhdahn mwahu oh limpoak men. I uhdahn poakepoake ih erein at pwopwoudki sounpar 68. Se diarada me elen sawas ong ahneki nsenamwahu nan mouren pwopwoud oh pil nan mwomwohdiso, iei en wauneki koasoandi en tapwi, mahkpene, kolokol aktikitik, oh kasalehda wahn sapwellimen Koht manaman.

Ni at kin nsensuwedla de mwoarosala, se kin kilangwohng Siohwa en ketin sewese kiht sen pousehlahte papah ih. Ni at doulahte wiahda wekidekla kan, se kilang me soahng kan kin mwamwahula ahnsou koaros​—ahpw dahme keieu mwahwo pahn kereniong wiawi!​—Ais. 60:17; 2 Kor. 13:11.

Nan Trinidad oh Tobago, Siohwa ketin kapaiahda doadoahk me ei pahpa nohno oh meteikan wiahda, kahrehda nin duwen ripoht me keieu kapwo kasalehda, meh 9,892 iangalahr padahk mehlel. Nan Aruba, me tohto kin doadoahk laud pwehn kakehlaka mwomwohdiso me I tepin iango. Nan dekeo ahnsou wet mie mwomwohdiso 14 me uhdahn kekeirda. Ahpw nan Nigeria, nempehn sounkalohk kan wialahr pwihn kalaimwun ehu me tohtohki meh 381,398. Oh nan dekehn St. Lucia, meh 783 me kin uhki Wehin Siohwa.

Met I sounparehr 90 samwa. Melkahka 92:14 mahsanih me irail kan me poadidi nan tehnpas en Siohwa “kin wah mwahu ni ar mahlahr oh kin mwomwen pwulopwulte oh kehlail ahnsou koaros.” I uhdahn kalahnganki ei mour en papah Siohwa. Mouren Kristian me I sohsohki kin kangoange ie en papah Siohwa ni unsek. Pwehki sapwellime limpoak loalopwoat, Siohwa ketin mweidohng ie en “pweida mwahu nan Tehnpas en [ei] Koht.”​—Mel. 92:13.

^ par. 18 Menlau kilang Awake! (lokaiahn wai) en March 8, 1972, pali 24-26.