Luslahng audepe kan

luslahng audepe kan

Ke Kin Ese Duwen Met?

Ke Kin Ese Duwen Met?

Sinakoke ni Mwehin Tepin Kristian ko: Kilel wet kasalehda soahng kei me mi nan ehu sinakoke ni mwehin tepin Kristian ko nan Gamla, me mi mpen mwail weneu sang palieir en palimese en Sehd en Kalili. Kilel wet kasalehda duwen mwomwen sinakoke en mahs kan

Ia wasa sinakoke kan tepisang ie?

LEPIN lokaiao “sinakoke” kohsang lepin lokaiahn Krihs me wehwehki “kapokon” de “pokonpene.” Met konehng pwehki sangete mahs, sinakoke kan kin wia wasahn pokonpene ong mehn Suhs kan pwehn ale kaweid oh pil ong kaudok. Palien Paipel ni Lokaiahn Ipru sohte koasoia duwen sinakoke kan, ahpw e sansal nan Nting Sarawi kan en Kristian ni Lokaiahn Krihs me soangen wasahn pokonpene pwukat mieier ni mwehin tepin Kristian ko.

Pali laud en me saman kan kamehlele me sinakoke kan tepin miehla ni ahnsou me mehn Suhs ko wie sensel nan Papilon. Ehu pwuhken dikseneri (Encyclopaedia Judaica) koasoia: “Pwehki solahr arail Tehnpas sarawio oh re mihmi sahpw tohrohr ehu, oh re pil kin men diar nsenamwahu sang arail kapwunod kan, irail me kalipilipala ko pahn kin tuhpene ahnsou kan, ele ni rahn en Sapad kan, oh wadekpene Nting Sarawi kan.” Mwurin arail saledekla sang arail sensel, e mwomwen me mehn Suhs kan kin pousehlahte tuhpene ong kapakap oh wadek Nting Sarawi kan, oh re kin wiahda sinakoke kan sohte lipilipil wasa me re kousoandi ie.

Ni mwehin tepin Kristian ko, sinakoke kan mihmihselier nan Mediterranean, Middle East oh pil nan Israel oh kin wia wasa me mehn Suhs kan kin keieu pokonpene ie ong kaudok de pil ong wiewia teikan. Professor Lee Levine sang sukuhl laud ehu nan Serusalem (The Hebrew University of Jerusalem), koasoia: “[Sinakokeo] kin wia wasahn onop, wia tiahk en mwengepene ni rahnen Sapad de kasarawi kan, wia kopwung, nekinek mwohni ong pwihn kan, oh wasahn mihting en politik de aramas akan.” E pil nda: “Ahpw keieu kesempwal, e kin wia wasahn arail kaudok.” Eri kitail wehwehki dahme kahrehda Sises kin kalapw ketila iang tuhpene nan sinakoke kan. (Mark 1:21; 6:2; Luk 4:16) E kin ketin padahki, kaweid, oh kangoange irail kan me mi wasao. Mwurin mwomwohdiso en Kristian wiawihda, wahnpoaron Pohl pil kin wia padahk nan sinakoke kan. Irail kan me men karanihala Koht kin kohla nan sinakoke kan, eri ni Pohl eh kin pedolong nan kahnimw ehu, e kin kohla mahs ni sinakoke kan oh wia padahk.​—Wiewia 17:1, 2; 18:4.