Luslahng audepe kan

luslahng audepe kan

Aramas Pwung kan Pahn Perenda Pwehki Siohwa

Aramas Pwung kan Pahn Perenda Pwehki Siohwa

DIANA sounpar 80 samwa. Eh pwoudo ahneki soumwahu en Alzheimer oh kin kousoan wasahn apwalih me mah kan erein sounpar kei mwohn eh mehla. Diana pil anahne dadaur pahn mehlahn nah pwutak riemeno oh pil dadaur pahn eh soumwahu en kanser en dihdi. Ahpw, ni ahnsou me tohn mwomwohdiso kin kilang ih ni Wasahn Kaudok de nan kalohk, re kin kilang me ahnsou koaros e kin peren.

John wia sounapwalih me kin seiloak men daulih sounpar 43. E kin perenki soangen wiepen doadoahk wet​—met kisehn eh mour! Ahpw, e sohla wia doadoahk en seiloak pwehn apwalih emen kiseh me soumwahu, oh ahnsou wet e kin papah nan eh mwomwohdiso. Ni irail ko me kin ese John mahs ar tuhwong ih ni mihting tohrohr kan, e mwomwen me John sohte wekila. E kin pereperente.

Ia duwen Diana oh John ara kak ahneki peren? Ia duwen emen me ahneki kahpwal en pepehm oh paliwar eh kak pereperen? Ia duwen emen me sohla ahneki pwukoa me e perenki eh kak pereperente? Paipel mahsanih: “Aramas pwung kan koaros ahpw pahn perenda pwehki wiepen nin limen KAUN-O.” (Mel. 64:10) Kitail kak kalaudehla atail wehwehki ire mehlel kesempwal wet ma kitail ese dahme kin kahrehda peren nan loalatail oh dahme sohte kin.

PEREN EN AHNSOU KIS

Ke uhdahn ese me mie soahng kei me kin kereniong ahnsou koaros wahdo peren. Medewehla ohl oh lih emen me poakpene oh pahn pwopwoudida. De wiahla pahpa nohno de ale pwais kaselel en wia sapwellimen Koht doadoahk. Soahng pwukat kin wahdo peren oh ni mehlel soahng kesempwal pwukat nan mour kohsang rehn Siohwa. Ih me ketin wiahda koasoandi en pwopwoud, ketin kahrehiong aramas en kak naineki seri, oh ketikihda pwukoa kan nan mwomwohdisohn Kristian.​—Sen. 2:18, 22; Mel. 127:3; 1 Tim. 3:1.

Ahpw, ekei soahng kan me kin kahrehda peren kak ongete ahnsou kis. E kansensuwed pwe emen kakete sohla lelepekiong eh pwoud de e mehsang eh pwoudo. (Esek. 24:18; Os. 3:1) Ekei seri kan solahr kin peikiong arail pahpa nohno kan oh Koht, ele irail pil piskenla. Nein Samuel pwutak ko sohte papah Siohwa ni ahl pwung, oh ahn Depit wiewia ko kahrehda kahpwal nan pein imweo. (1 Sam. 8:1-3; 2 Sam. 12:11) Soangen mwekid pwukat kin  kahrehda pahtou oh pwunod. Soahng pwukat sohte kin wahdohng kitail peren.

Duwehte met, pwais en papah nanpwungen sapwellimen Koht aramas akan kakete imwisekla, ele pwehki emen soumwahuda, pwukoahn peneinei, de wekidekla kan nan sapwellimen Koht doadoahk. Me tohto me kin lelohng soangen wekidekla pwukat nda me irail kin loaleidkihda pepehm en nsenamwahu me kohsang arail doadoahko.

E mengei ong kitail en kilang me soangen peren wet kakete wiawi erein ahnsou kis. Eri ia duwe, mie ehu soangen peren, ehu me kin mihmihte mehnda ma irair kan kin wekila ni atail sohte kasik? Uhdahn mie, pwehki Samuel, Depit, oh meteikan kin kolokolete arail peren erein arail kin lelohng kahpwal kan.

PEREN ME KIN POATOPOAT

Sises ketin mwahngih peren mehlel. Erein eh ketiket nanleng, ni ahnsou me soahng koaros mwahute nanleng, ‘e perenkihda eh patopato rehn Siohwa ahnsou koaros.’ (Lep. Pad. 8:30) Ahpw nin sampah, ekei pak e kin lelohng kahpwal laud kan. Ahpw, Sises kin ketin pereperenki eh wiewia kupwuren Semeo. (Sohn 4:34) Ia duwen weirek me e sapwellimanki awa kan mwohn eh pahn pwoula? Paipel mahsanih: “Pwehki peren me mi mwowe, e ketin dadaurete ni tuhkehn kalokoloko.” (Ipru 12:2) Eri mie kahrepe mwahu kitail en medemedewe soahng riau me Sises ketin mahsanihki duwen peren mehlel.

Ehu pak, tohnpadahk 70 ko pwurodo rehn Sises mwurin arail kalohk. Irail peren pwehki irail wiahda manaman tohto, pil kausasang ngehn suwed kan. Eri Sises mahsanihong irail: “Kumwail dehr perenkihda ngehn akan ar kin peikiong kumwail, ahpw perenkihda adamwail kan eh ntingdier nanleng.” (Luk 10:1-9, 17, 20) Ei, en kenikenla rehn Siohwa iei me keieu kesempwal sang en perenki pwais kaselel tohrohr ehu. E kin ketin tamanda lelepek me sapwellime tohnpadahk ko ahneki​—ehu kahrepe mwahu en ahneki peren laud.

Ehu ahnsowo Sises ketin mahsanihong pokon ehu. Lih en Suhs men kasalehda sang eh pepehm kan me nohnohn sounpadahk lapalap menet Sises, ele kin uhdahn peren laud. Ahpw Sises ketin kapwungala liho oh mahsanih: “Soh, meid pai irail me kin rong mahsen en Koht oh kapwaiada!” (Luk 11:27, 28) En wia pahpa nohno me kin pohlki neira seri kan kak wia mehkot kaperen; ahpw laudsang met  iei en ahneki nanpwungmwahu rehn Siohwa pwehki peik.

Ni mehlel, en pehm me Siohwa ketin kupwurperenki kitail iei ahl en ahneki peren me kohsang loalatail. Kasongosong kan, mehnda ma sohte kaperen, sohte kin wekidala atail pohnese met. Weksang met, en dadaurete pahn kasongosong oh pil en lelepek powehdi mepwukat pahn imwikihla ahneki irair en mohngiong mwahu ehu. (Rom 5:3-5) Patehng met, Siohwa kin ketikihong sapwellime manaman irail kan me kin likih ih, oh peren kin wia ehu kisehn wahn sapwellimen Koht manaman. (Kal. 5:22) Met kin sewese kitail en wehwehki dahme kahrehda Melkahka 64:10 mahsanih: “Aramas pwung kan koaros ahpw pahn perenda pwehki wiepen nin limen KAUN-O.”

Dahme sewese John en pousehlahte pereperen?

Met kawehwehda ia kahrepen Diana oh John, me kitail koasoiapene mwoweo, ara kak ahneki peren me poatopoat ni ara powehdi ara kahpwal laud kan. Diana nda: “I kin wiahki Siohwa ei wasahn ruk, duwehte seri men ong eh pahpa nohno.” Ia duwen eh kehn me Koht ketin kupwurperenki ih? E nda: “I pehm me e kin ketin kapaiahda ie pwehn ahneki koahiek en pousehlahte doadoahk en kalohk ahnsou koaros ni peren.” John, me kin pwerisek nan doadoahk en kalohk mwurin eh sohla wia doadoahk en seiloak, kawehwehda dahme kin keieu sewese ih: “Sangete pahr 1998 ni ahnsou me I ale pwukoahn kasukuhlih Sukuhl en Brother kan ong Pwukoa Tohrohr kan, ei wia pein ei onop en Paipel kin laudsang mahs.” E pil ndahki duwen ih oh eh pwoudo: “At madamadau duwen papah Siohwa sounpar tohto ni uwen me se kak kahrehda wekidekla wet en mengei ong kiht. Se sohte koluhkihla at wia met.”

Me tohto pil kin pwungki dahme Melkahka 64:10 mahsanih. Karasepe, mie pwopwoud ehu me papahkiher sounpar 30 samwa nan Pedel nan Amerika. Ira pwuralahng ara doadoahk en kalohk nin duwen pioneer tohrohr kei. Ni mehlel, ira nda: “Aramas kin pahtoukihla arail sohla ahneki pwukoa ehu me re perenki,” ahpw ira pil nda: “Ke sohte kak pahtou kohkohlahte.” Ira mwadangete iang mwomwohdiso doadoahk en kalohk. Pwopwoudo pil nda: “Mie soahng pisetik kei me se kin kapakapki. Eri ni at kilang me at kapakap kan kin pasapengla, met kin kangoange kiht oh kahrehiong sen peren. Mwurinte at kohla nan mwomwohdiso, meteikan tepida pioneer, oh se paiekihda at onop rehn tohnsukuhl en Paipel riemen me kin kekeirda mwahu.”

‘PEREPEREN KOHKOHLAHTE’

Ni mehlel, e sohte kin mengei en ahneki peren ahnsou koaros, oh e pahn mie ahnsou kan me mwahu oh suwed. Ahpw, Siohwa ketikihda mahsen kangoang kan nan Melkahka 64:10. Pil ni ahnsou me kitail kin mworusala, kitail kak koapworopworki me irail kan me kin kadehdehda me irail ‘aramas pwung kei’ sang ni arail kolokolete arail lelepek mendahki arail irair kan wekila “pahn perenda pwehki wiepen nin limen KAUN-O.” Oh kitail pil kak kasikasik pweidahn sapwellimen Siohwa inou en “sampah kapw ehu oh lahng kapw ehu.” Eri, soh unsek sohla pahn mie douluhl. Sapwellimen Koht aramas akan koaros pahn “nsenamwahukihla oh pereperenki kohkohlahte” dahme e ketin kapikada oh ketikihda.​—Ais. 65:17, 18.

Medewehla ia pahn mwomwen met: nsenamwahuki roson mwahu oh tepikihda ehuehu rahn uhdahn kehlail. Sohte lipilipil soangen pepehm ohla me kitail ahneki mahs, kitail solahr pahn tamanda soahng kan me kin kamedekihala kitail. Kitail kak kamehlele me “mehkoaros me pweidahr nan ahnsou samwalahr ako pahn manokonokla douluhl.” Kitail pahn tuhwong irail me kitail poakohng ni ahnsoun kaiasada. Meh rar rar kei pahn ahneki soangen pepehmohte me pahpa nohno en serepeino me sounpar 12 me Sises ketin kaiasada ahneki: ‘Ira ahpw sohla kak koledi ara pepehm pwehki ara inenen peren kowahlap.’ (Mark 5:42) Kedekedeo, aramas koaros nin sampah pahn wiahla “aramas pwung kan” oh pahn “perenda pwehki wiepen nin limen KAUN-O” kohkohlahte.