Luslahng audepe kan

luslahng audepe kan

“I Patohwan Ese me E Pahn Pwurehng Mourda”

“I Patohwan Ese me E Pahn Pwurehng Mourda”

“Kompoakepatail Lasarus meirlahr. A I pahn kolahng pangenda.”​—SOHN 11:11.

KOUL KAN: 142, 129

1. Dahme Marda kamehlele me pahn wiawihong rie ohlo? (Menlau kilang tepin kilel.)

MARDA, me wia sapwellimen Sises tohnpadahk oh kompoakepah keren men, uhdahn pahtoula. Rie ohlo Lasarus mehla. Mie mehkot me kak kamweitala ih? Ei. Sises ketin inoukihong ih: “Riomw ohlo pahn pwurehng mourda.” Ni mehlel, mahsen pwukat sohte kak kihsang eh pahtou koaros. Ahpw Marda likih sapwellimen Sises inou, oh e nda: “I patohwan ese me e pahn pwurehng mourda ni rahnen neko.” (Sohn 11:20-24) E kamehlele me e pahn mie kaiasada ni ahnsou kohkohdo. Ahpw mwuhr, Sises ketin wiahda manaman ehu. E ketin kaiasada Lasarus ni rahnohte.

2. Dahme kahrehda ke men ahneki pwoson laud duwehte Marda?

2 Ahnsou wet, sohte kahrepen kitail en kasik me Sises oh Semeo pahn ketin kaiasada irail kan me kitail poakohng. Ahpw ia duwe, ke kin duwehte Marda me kin kamehlele me irail kan me ke poakohng pahn iasada ni ahnsou kohkohdo? Ele omw pwoud, omw nohno, omw pahpa, omw pahpa oh nohno kahlap, de pil noumw seri men me ke poakohng mehla. Ke pwandkidahr ken pwoalehdi, koasoiong,  de iang irail pereperen. Duwehte Marda, mie kahrepe mwahu ken nda ni peren: ‘I ese me irail kan me I poakohng pahn iasada.’ Ahpw, e pil mwahu emenemen Kristian en medemedewe ia kahrepen kitail uhdahn kamehlele met.

3, 4. Ia duwen dahme Sises ahpwtehn ketin wia eh kalaudehla dahme Marda kamehlele?

3 Marda kin kousoan karanih Serusalem, eri e sohte kilang Sises eh ketin kaiasada nein liohdi men nah pwutako wasa me karanih Nain nan Kalili. Ahpw, mwein e rong. Oh Sises pil ketin kaiasada nein Sairus nah serepeino. Koaros me mi ni imwen serepeino “ese me serepeino uhdahn melahr.” Ahpw Sises eri ketikihda pehn serepeino oh kapitie laudida, mahsanih: “Serepein, pwourda!” Ni ahnsowohte serepeino iasada. (Luk 7:11-17; 8:41, 42, 49-55) Marda oh rie serepeino Mery ese me Sises kak ketin kamwahwihala me soumwahu kan. Ihme kahrehda ira kamehlele me ma Sises ketiket rehrail ahnsowo, Lasarus sohte pahn mehla. Ahpw kompoakepahn Siseso melahr, eri dahme Marda kasikasik? Tehk me e nda me Lasarus pahn pwurehng mourda ni ahnsou kohkohdo, “ni rahnen neko.” Dahme kahrehda e uhdahn kamehlele met? Oh dahme kahrehda ke kak kamehlele me ni ahnsou kohkohdo, e pahn mie kaiasada oh ele irail kan me ke poakohng pahn iang iasada?

4 Mie kahrepe mwahu kan en pwoson kaiasada. Kitail pahn koasoiapene ekei soahng pwukat. Ni mehlel, ele ke pahn diarada ekei ire nan Mahsen en Koht duwen kaiasada me ke sohte kin medewe nin tapio. Ire pwukat pahn kakehlakahda omw pwoson me ke pahn pwurehng tuhwong irail kan me ke poakohng.

MWEKID KAN ME KIHONG KITAIL KOAPWOROPWOR!

5. Dahme kahrehda Marda kamehlele me Lasarus pahn kaiasada?

5 Tehk me Marda sohte nda: ‘I koapworopworki me e pahn mourda.’ E nda: “I patohwan ese me e pahn pwurehng mourda.” Dahme kahrehda Marda kamehlele met? Pwehki e ese duwen kaiasada kan me wiawi mahso. Ele e sukuhlki duwen mepwukat ni imweo oh ni sinakokeo ni ahnsou me e seri. Kitail pahn koasoiapene kaiasada siluh me mi nan Paipel.

6. Manaman dahieu me Marda ese duwe?

6 Keieun kaiasada wiawi ni ahnsou me Koht ketikihong soukohp Elaisa kehl en wiahda manaman kan. Ni paliepeng en Israel, nan kisin kahnimw en Penisia ehu me adaneki Sarepad, mie liohdi semwehmwe men me kasalehda kadek ong soukohpo. Eri, Siohwa ketin wiahda manaman ehu. E ketin kahrehiong kenen liho pilawa oh kisin leh kis en dehr nekla pwe liho oh nah pwutako en kak wie momour. (1 Nan. 17:8-16) Mwuhr, nein liho pwutako soumwahuda oh mehla. Ahpw Elaisa sewese liho. Ni eh doahke pwutako, e kapakap ong Siohwa patohwan: “Maing KAUN, ei Koht, komw ketin kapwuredohng mouren pwutaket.” Oh met pweida! Koht ketin karonge Elaisa, oh serio pwurehng mourda. Iei met me keieun kaiasada me ntingdi nan Paipel. (Wadek 1 Nanmwarki 17:17-24.) Uhdahn Marda ese duwen mwekid kapwuriamwei wet.

7, 8. (a) Ia duwen Elisa eh kihsang ahn lih emen eh pahtou? (b) Dahme manaman me Elisa wiahdao kadehdehda duwen Siohwa?

7 Keriaun kaiasada me kileldi nan Paipel iei me soukohp Elisa wiahda. Nan kahnimw ehu me adaneki Sunem, mie lihen Israel men me sohte nah seri. Pwehki e kasalehda kadek ong Elisa, Siohwa ketikihong lih menet oh eh pwoud mahlahro pwutak men. Sounpar kei mwuhr, neira pwutako mehla. Nna medewehla ia uwen lih menet eh pahtoula. E uhdahn pahtoula me kahrehiong en seiloangki mwail 19 kohla rehn Elisa ni nahna Karmel. Elisa kadarala nah liduwo Keasi Sunem pwehn kaiasada pwutako. Ahpw Keasi sohte kak kamourada pwutako. Eri Elisa iangala liho ni imweo.​—2 Nan. 4:8-31.

 8 Elisa pedolong nan ihmwo wasa me pwutak mehlao mi ie, oh e kapakap. Siohwa ketin sapengala ahn Elisa kapakapo oh ketin kamourada pwutako. Ni liho eh kilang nah pwutako mourda, e uhdahn perenda! (Wadek 2 Nanmwarki 4:32-37.) Ele liho kin tamataman dahme Ana koasoia nan eh kapakapo. Ana sohte kak naineki seri lao Siohwa ketin kapaiahkihda ih pwutak men me ede Samuel. Ana eri kapinga Siohwa pwehki ih “me kin ketin kadaralahng aramas akan nan wasahn me melahr akan, oh ih me kin ketin kapwureiraildo.” (1 Sam. 2:6) Ni eh ketin kaiasada pwutako nan Sunem, Koht ketin kadehdehda me E sapwellimanki manaman en kaiasada me melahr kan.

9. Menlau kawehwehda kesiluh en kaiasada me kileldi nan Paipel.

9 Manaman kapwuriamwei ehu pil wiawi mwurin Elisa mehla. Elisa kin papah nin duwen soukohp men daulih sounpar 50, ih eri “soumwahuda” oh “kapilsalehdala oh seridi.” Mwurin ahnsou reirei, tih kante me luhwe ni paliweren Elisa. Ehu rahn, mehn Israel kei kolahng sarepedi ohl mehla men. Ahpw, re kilangada arail imwintihti kan kohkohdo. Mehn Israel ko song en mwadang tangasang wasao, eri re kesehdiongete paliweren ohl mehlao nan en Elisa sousowo. Paipel mahsanih: “Ni paliweren aramas mehlao eh sairada tihn Elisa ko, aramas mehlao ahpw pwurehng mourda oh kesihnenda.” (2 Nan. 13:14, 20, 21) Koasoipen mepwukat kadehdehiong Marda me Koht sapwellimanki manaman pohn me melahr kan. Mepwukat pil anahne kadehdehiong uhk me sapwellimen Koht manaman uhdahn laud oh sohte irepe.

MWEKID KAN NI MWEHIN WAHNPOARON KO

10. Ia duwen Piter eh sewese rie lih Kristian men me melahr?

10 Palien Paipel ni Lokaiahn Krihk pil audaudki koasoipen kaiasada kan me sapwellimen Koht ladu lelepek kan wiahda. Kitail koasoiapeneier kaiasada kan me Sises ketin wiahda karanih kahnimw en Nain oh ni imwen Sairus. Ahnsou ehu mwuhr, wahnpoaron Piter kaiasada Dorkas, me pil adaneki Dapida. Piter pedolong nan pere me paliweren liho mi ie, kapakap, oh eri nda: “Dapida, pwourda!” Liho mwadangete mourda, oh Piter eri “kasalehiong” Kristian teikan me mi wasao “me liho mourdahr.” Mwekid en manaman wet uhdahn kamwakid me tohto nan kahnimwo ren “pwosonla Kaun-o.” Tohnpadahk kapw pwukat kakehr padahkihong meteikan rongamwahwo duwen Sises oh pil padahkihong koaros duwen sapwellimen Siohwa kehl en kaiasada me melahr kan.​—Wiewia 9:36-42.

11. Dahme toahkteo Luk ripohtki duwen mwahnakapw men, oh ia duwen met eh kamwakidada meteikan?

11 Mie aramas ekei me pil kilang duwen ehu kaiasada. Ehu ahnsou, wahnpoaron Pohl iang mihting ehu nan pere ehu powe nan ehu ihmw nan Troas, me met mi nanpwungen paliepeng oh palikapi en Turkey. Pohl koasoakoasoiong irail lao lel ni lukepen pwong. Mwahnakapw emen me ede Eutikus mwomwohd ni wenihmwtok ehu wie rongorong. Ahpw e meirla oh pwupwudihsang poasoake kesiluh ong nanpwel. Ele Luk me tepin lella rehn Eutikus. Nin duwen toahkte men, Luk esehda me mwahnakapwo sohte ohla oh sohte kehn wasa. Mwahnakapwo melahr! Pohl pil iang kohdihla. E lukupoardiong oh pwoalehdi Eutikus oh koaros eri pwuriamweikihla ni eh nda: “E momourte.” Mwekid en manaman wet uhdahn sair koaros me kilang dahme wiawio. Ni arail ese me mwahnakapwo mehla oh mwuhr iasada, re “nsenamwahula mehlel.”​—Wiewia 20:7-12.

KOAPWOROPWOR TENG EHU

12, 13. Nin duwen mwekid en kaiasada kan me kitail koasoiapeneier, peidek dah kei me kitail ele kak idek?

12 Kaiasada kan me kitail koasoiapeneier  anahne kahrehiong uhk en ahneki koapworopworohte me Marda ahneki. Kitail kak kamehlele me atail Koht, me ketikihong kitail mour, kak ketin kamourada emen me mehla. E mwahu en ese me sapwellimen Koht ladu lelepek kan me duwehte Elaisa, Sises oh Piter, mi ni ehuehu mwekid en kaiasada pwukat. Oh e wiawi ni ahnsou ehu me Siohwa kin ketin wia manaman kan. Eri ia duwen irail kan me mehla ahnsou teikan, ni ahnsou me manaman kan sohte wiawi? Ia duwe, ohl oh lih lelepek kan kak kasik me Koht pahn ketin kaiasada me melahr kan ni ahnsou kohkohdo? Irail kak ahneki pwoson duwehte Marda ni eh koasoiahki rie ohlo: “I patohwan ese me e pahn pwurehng mourda ni rahnen neko”? Dahme kahrehda e kak kamehlele me mie kaiasada, oh dahme kahrehda ke kak kamehlele met?

13 Mie ekei koasoiepen soahng pwukat nan Mahsen en Koht me kasalehda me sapwellimen Siohwa ladu loalopwoat kan ese me e pahn mie kaiasada ni ahnsou kohkohdo. Kitail pahn koasoiapene ekei soahng pwukat.

14. Dahme koasoipen Eipraam padahkihong kitail duwen kaiasada?

14 Medewehla dahme Siohwa ketin mahsanihong Eipraam en wiahiong Aisek, nah pwutako me e awiawihki ahnsou reirei. Siohwa mahsanih: “Ale Aisek, noumw pwutak iehrosen, me ke kin kesempwalki, oh kohla nan wehin Moria. Kowe kohla meirongkihong ie nin duwen meirong isihs ehu.” (Sen. 22:2) Ia omw madamadau, ia ahn Eipraam pepehm ni eh rong duwen kehkehlik wet? Siohwa ketin inoukihda me wehi kan koaros pahn ale kapai, pwehki kadaudok en Eipraam kan. (Sen. 13:14-16; 18:18; Rom 4:17, 18) Siohwa pil mahsanih me kapai pwukat pahn “tepisang Aisek.” (Sen. 21:12) Ahpw ia duwen met eh kak wiawi ma Eipraam meirongkihla nah pwutako? Koht ketin kamwakid Pohl en kawehwehda me Eipraam kamehlele me Koht kak ketin kaiasada Aisek. (Wadek Ipru 11:17-19.) Ahpw Paipel sohte mahsanih me Eipraam medewe me Aisek pahn mourda ahnsowohte, ele mwurin awa kei, rahn ehu, de pil wihk ehu mwuhr. Eipraam sohte kak ese iahd me nah pwutako pahn iasada. Ahpw e likih me Siohwa pahn ketin kamourada Aisek.

15. Koapworopwor dahieu me ohl lelepeko Sohp ahneki?

15 Ohl lelepeko Sohp pil ese me e pahn mie kaiasada ni ahnsou kohkohdo. E ese me ma tuhke pwoat paldi, e kak pwurehng keirda oh wiahla tuhke kapw pwoat. Ahpw met sohte kak wiawihong aramas akan. (Sohp 14:7-12; 19:25-27) Ma aramas emen mehla, e sohte kak pein  mourda. (2 Sam. 12:23; Mel. 89:48) Met sohte wehwehki me Koht sohte kak ketin kaiasada aramas. Ni mehlel, Sohp kamehlele me Koht pahn ketin tamataman ih. (Wadek Sohp 14:13-15.) Sohp sohte ese iahd ni ahnsou kohkohdo me met pahn wiawi. Ahpw, Sohp likih me Sounkapikpen aramas kak oh pahn ketin tamataman ih oh ketin kaiasada ih.

16. Ia duwen tohnleng men eh kangoange Daniel?

16 Medewehla pil emen ohl lelepek, Daniel. E kin wia sapwellimen Siohwa ladu lelepek men erein eh mour, oh Siohwa kin ketin sewese ih. Ehu ahnsou, tohnleng men ndahng ih me “Koht ketin poakohng” ih oh me en “dehpa pwunodkihda de masakada mehkot.”​—Dan. 9:22, 23; 10:11, 18, 19.

17, 18. Dahme Siohwa ketin inoukihong Daniel?

17 Daniel kereniongehr sounpar 100 oh e pahn kereniong mehla. Ele e kin medemedewe dahme pahn wiawihong ih ni ahnsou kohkohdo. Ia duwe, Daniel pahn pwurehng mourda? Uhdahn! Ni kaimwiseklahn pwuhken Daniel, kitail wadek dahme Koht ketin inoukihong ih: “Oh kowe, Daniel, ke en loalopwoat lel ni imwi. Eri, ke pahn mehla [“kommoal,” NW].” (Dan. 12:13) Daniel ese me irail me melahr kan kommoaldiher oh “sohte pahn mie wiewia, de lamalam, de loalokong, de erpit, nan wasahn me melahr akan,” oh iei wasa me e pahn kohla ie. (Ekl. 9:10) Ahpw, kaidehn met imwiseklahn soahng koaros ong Daniel. Siohwa ketikihong ih inou kaselel ehu ong ahnsou kohkohdo.

18 Sapwellimen Siohwa tohnleng men ndaiong Daniel: “Ke pahn pwurehng iasada pwe ke en ale ketingpomw ni imwilahn ahnsowo.” Daniel sohte ese iahd me met pahn wiawi. E wehwehki me e pahn mehla oh kommoaldi. Ahpw ni Daniel eh rong duwen inowo, “ke pahn pwurehng iasada pwe ke en ale ketingpomw,” e wehwehki me e pahn iasada ni ahnsou kohkohdo. Met pahn wiawi mwuhr mwurin eh pahn mehla, “ni imwilahn ahnsowo.” De, nin duwen me Jerusalem Bible mahsanih: “Ke pahn pwourda pwe ken ale ketingpomw ni imwilahn ahnsowo.”

Duwehte Marda, ke kak kamehlele me kaiasada pahn wiawi (Menlau kilang parakrap 19, 20)

19, 20. (a) Dahme mwekid kan me kitail koasoiapeneier eh kin pid dahme Marda ndaiong Sises? (b) Dahme kitail pahn koasoiapene nan iren onop en mwuhr?

19 E sansal me mie kahrepen Marda en kamehlele me rie ohl lelepeko, Lasarus, pahn “mourda ni rahnen neko.” Sapwellimen Siohwa inou ong Daniel, pil ahn Marda pwoson laud duwen kaiasada ni ahnsou kohkohdo, anahne kahrehiong kitail en pil kamehlele met rahnwet. Kaiasada uhdahn pahn wiawi.

20 Kitail sukuhlkiher duwen kaiasada kan me uhdahn wiawi mahso. Met kadehdehda me irail me melahr kan kak pwurehng mourda. Kitail pil kilang me ohl oh lih kan me papah Koht ni lelepek kin kasik kaiasada ni ahnsou kohkohdo. Ahpw ia duwe, mie mehn kadehde me kaiasada kak wiawi sounpar tohtohie mwurin inowo eh wiawihda? Ma ei, met pahn kihong kitail pil kahrepe mwahu en kasikasik kaiasada ni ahnsou kohkohdo. Iahd me met pahn wiawi? Kitail pahn koasoiapene ire pwukat nan iren onop en mwuhr.