Wiewia 28:1-31

  • Lel ni oaroahr en Malda (1-6)

  • En Puplius eh pahpa mwahula (7-10)

  • Kolahng Rom (11-16)

  • Pohl koasoiong mehn Suhs akan nan Rom (17-29)

  • Pohl kalohk ni eimah erein sounpar riau (30, 31)

28  Mwurin at pitlahr lel ni oaroahr, se esehda me dekeo adaneki Malda.  Oh tohn deke* wet inenen kadek ong kiht. Re ahpw saunda kisiniei ehu oh kasamwo kiht koaros pwehki eh keteu oh kopou.  Ahpw ni Pohl eh kihpene tuwi kei oh kihdiong pohn kisinieio, sineik men ahpw pwediei pwehki karakaro oh pidpene peho.  Ni tohn dekeo ar kilangada sineiko eh wie mwotomwotou ni peh, re ahpw tepida ndapene nanpwungarail: “Uhdahn ohl menet sounkam aramas emen, mendahki eh pitsangehr nan madau, ahpw Pwung Pahrek* sohte mweidohng en wie momour.”  Ahpw e sipedalahng sineiko nan kisinieio oh sohte mwahn ohla.  Irail ahpw kasikasik me e pahn mpwospeseng de pwupwudihte mehla. Mwurin arail awiawihkier ahnsou reirei oh kilang me sohte mehkot suwed wiawihong ih, irail ahpw wekidala arail madamadau oh tepida nda me ih koht emen.  Eri, mie pelien sahpw kei limwahn wasao me sapwen ohl kesempwal men nan dekeo, me ede Puplius, oh e kasamwo kiht oh apwalih kiht mwahu erein rahn siluh.  Eri, en Puplius eh pahpao wonohn nan peht pwehki soumwahu karakar oh mwesen ntahkereker, Pohl eri kohla reh, kapakap oh pwil peh ko powe oh kamwahwihala ih.  Mwurin met eh wiawiher, aramas teikan me soumwahu nan dekeo pil tepida kohdo reh, e ahpw kamwahwihirailla. 10  Re pil waunekin kiht ni ar kihong kiht kisakis tohto, oh ni at pahn mweselda, re kihong kiht soahng koaros me se anahne oh kidahng pohn sohpo. 11  Mwurin sounpwong siluh, se ahpw mwesel, iangada sohp pwoat me sansal en “Nein Seus Pwutak ko” mi ie. Sohp wet kohsang Aleksandria oh mihmiher ni dekeo erein ahnsoun kopou. 12  Ni at lel Sirakus, se mihmi wasao erein rahn siluh; 13  sang wasao se kohla oh lel Reikium. Rahn ehu mwuri, kisinieng sang palieir ahpw ipido oh se lella Puteoli ni keriaun rahn. 14  Se ahpw diarada riatail kan wasao oh re peki reht sen mihmi rehrail rahn isuh, oh mwurin mwo se ahpw mwesellahng Rom. 15  Ni riatail kan nan Rom ar rongada duwen kiht, re ahpw kohdo tuhwong kiht ni Wasahn Netinet en Appius oh ni Wasahn Pweidi Siluh ko.* Ni Pohl eh kilangirailda, e ahpw kalahngankihong Koht oh kehlailda. 16  Eri, ni at lelehr Rom, e ahpw mweimweida Pohl en kelekelehpw pahn epwelpen sounpei men. 17  Mwurin rahn siluh, e ahpw ekerpene ohl kesempwal kan en mehn Suhs. Ni arail pokonpenehr, e ahpw ndaiong irail: “Ohl ako, riei ko, mendahki ei sohte wia mehkot me uhwong aramas de tiahk kan en samatail mehn mahs ako, I selidi nan Serusalem oh pengpenglahng rehn mehn Rom kan. 18  Mwurin arail kapeidakih ie, re men lapwaiehda, pwehki sohte kahrepen ren kemeiehla. 19  Ahpw ni mehn Suhs ako arail uhwong, I ahpw itoitehng I en peki kopwung sapahl rehn Sihsar, kaidehn pwehki mie ei mehn kedip me I en uhkihong ei wehi. 20  Eri, pwehki kahrepe wet I peki I en tuhwong kumwail oh koasoiong kumwail, pwe I selkihdi selmete pwoatet pwehki dahme Israel kin koapworopworki.” 21  Irail ahpw ndaiong ih: “Se saikinte alehdi kisinlikou sang Sudia me koasoia duwen kowe oh pil sohte riat emen me kohdo sang wasao me pakairki de koasoia mehkot suwed duwen kowe. 22  Ahpw se medemedewe me e konehng sen rong sang uhk omw madamadau, pwe ni mehlel, se ese me aramas akan kin uhwong pwihn wet wasa koaros.” 23  Irail eri koasoanehdi rahn ehu me re pahn tuhwong ih, oh me tohtohie kohdo wasa me e mi ie. Oh sang ni menseng lel ni soutik, e kin kawehwehiong irail ireo ni eh kin kadehdehda ni unsek duwen Wehin Koht pwe en kamwakid irail en kamehlele Sises sang ni Kosonned en Moses oh mahsen en Soukohp ako. 24  Ekei tepida kamehlele dahme e koasoia; a ekei sohte kamehlele. 25  Eri, pwehki arail sohte pwungpene nanpwungarail, irail tepida kohkohla, Pohl eri wia koasoi pwoatet: “Mehlelete me sapwellimen Koht manaman* koasoiaiong samamwail mehn mahs ako sang rehn soukohp Aiseia, 26  me nda, ‘Kohla rehn aramas pwukat oh nda: “Kumwail uhdahn pahn rongorong ahpw sohte douluhl wehwehki, oh kumwail uhdahn pahn kilikilang ahpw sohte douluhl kilang. 27  Pwe mohngiong en aramas pwukat keptakailahr, oh re rongki salengarail ahpw sohte mwekid, oh re meirpene, pwe re dehpa kilangki masarail oh rongki salengarail oh wehwehki sang mohngiongirail oh wekidekiong ie pwe I en kamwahwihirailla.”’ 28  Eri, kumwail en ese me komour wet me kohsang rehn Koht pekederlahngehr mehn liki kan; re uhdahn pahn rong.” 29  *—— 30  Eri e mihmi wasao erein sounpar riau nan ihmw me e kin iseise, oh e kin kasamwo irail koaros me kin pwarodo reh ni kadek, 31  oh kin kalohkihong irail Wehin Koht oh padahngki duwen Kaun Sises Krais ni saledek laud en koasoi* oh sohte mehkot me kerempwa.

Footnote kan

Aramas akan me sohte kin lokaiahki lokaiahn Krihs.
LK, Diʹke, lokaia wet kakete dokedoke koht lih me kin doadoahngki pwung pahrek.
“Wasahn Pweidi” wehwehki me wasahn mwenge oh kommoal.
LK, pneuʹma. Kilang KLL.
Kilang Madiu 17:21, ntp.
De “ni eimah.”