Wiewia 14:1-28

  • Tohtohla oh uhwong nan Aikoniomw (1-7)

  • Wiahkihla ira koht kei ni sapwung nan Listra (8-18)

  • Pohl kostakaidi, ahpw e sohte mehla (19, 20)

  • Kakehlailih mwomwohdiso kan (21-23)

  • Pwuralahng Andiok en Siria (24-28)

14  Eri nan Aikoniomw, ira koaros pedolong nan sinakoke en mehn Suhs akan oh padahk ni mwohmw ehu me kahrehda me tohtohie, mehn Suhs oh mehn Krihs, ren pwosonla.  Ahpw mehn Suhs ako me sohte kin kamehlele ahpw kamwoarongehda mehn liki kan oh kahrehiong irail en uhwong riatail ko.  Ira eri doadoahngki ahnsou laud en eimah padahk pwehki ara alehdi manaman sang rehn Siohwa,* me ketin kadehdehda mahsen en sapwellime kadek sapan sang ni eh ketin mweidohng ira en wiahda kilel kan oh soahng kapwuriamwei kan.  Aramas tohto nan kahnimwo ahpw pwalpeseng, ekei iangala mehn Suhs ako, a ekei iangala wahnpoaron ko.  Ni ahnsou me irail koaros, mehn liki kan oh mehn Suhs akan iangahki arail kaun akan koasoanehdi ren wiakauwe ira oh kate ira,  ira ahpw esehda met oh tangalahng ni kahnimw kan en Likaonia​—Listra oh Derpe​—oh wasa kan me kapilpene.  Ira eri kin doulahte kalohki rongamwahu wasa pwuko.  Eri nan Listra, mie ohl emen me neh ko mwoator. E ipwidihte mwoator oh sohte kak alu.  Ohl menet wie mwomwohd oh rongorong Pohl ni eh wia padapadahk. Ni Pohl eh kangkakil ih oh kilangada me e ahneki pwoson oh kamehlele me e kak mwahula, 10  e ahpw ngihl laudida nda: “Uhkihda nehmw kan.” Ohlo eri mesiekda oh tepida alialu. 11  Ni pokono ar kilangada dahme Pohl wiadahr, irail ahpw werkihda ni lokaiahn Likaonia: “Koht akan mwomwen aramasalahr oh kohdidohr rehtail!” 12  Irail eri tepida ekeriki Parnapas Seus, ahpw Pohl Erimihs pwehki ih me kin kalapw koasoakoasoi. 13  Oh samworo en Seus me eh imwen kaudoko mi ni wasahn pedolong nan kahnimwo ahpw wahdo kou kei oh mwaramwar kei ni ewen kehlo oh men iang pokono wia meirong. 14  Ahpw ni wahnpoaron Parnapas oh Pohl ara rongada met, ira ahpw tehrpeseng ara likou ko oh tangalahng nan pokono oh werkihda: 15  “Dahme kumwail wiewiahki soahng pwukat? Kiht pil aramas ekei me ahneki luwet akan me duwehte kumwail. Oh se kin kalohkihong kumwail rongamwahwo, pwe kumwail en sohpeisang soahng soh katepe pwukat oh sohpeiong Koht me ketin ieias, me ketin wiahda nanleng oh sampah oh nansed oh audepe kan koaros. 16  Mahso, e ketin mweidohng mehn liki koaros ren wia dahme re men wia, 17  ahpw e kin ketikihda kadehdepen pein ih sang ni eh ketin wia me mwahu, e ketikihong kumwail keteu sang nanleng oh ahnsoun rahk oh ketikihong kumwail diren mwenge oh audehkihda mohngiongimwail peren.” 18  Ahpw mendahki ara nda mepwukat, kereniong ira en sohte kak irehdihsang pokono en wia meirong ong ira. 19  Ahpw mehn Suhs ako leledo sang Andiok oh Aikoniomw. Irail eri kamwakid pokono en uhwong Pohl, irail eri kate oh wurahdekilahng likin kahnimwo, pwe irail kihkihong me e melahr. 20  Ahpw, ni ahnsou me tohnpadahk ko kapikapil ih, e pwourda oh pwuralahng nan kahnimwo. Mandahn rahno, e mwesellahng Derpe iangahki Parnapas. 21  Mwurin ara kalohkiseli rongamwahu nan kahnimwo oh katohnpadahkihala me tohto, ira ahpw pwuralahng Listra, Aikoniomw oh Andiok. 22  Ira ahpw kakehlakahda tohnpadahk ko wasao oh kangoange irail en kin kolokol arail pwoson oh nda: “Kitail uhdahn pahn lelohng kahpwal tohto pwe kitail en pedolong nan Wehin Koht.” 23  Ira pil idihada sounapwalih kei* ong irail nan ehuehu mwomwohdiso, wia kapakap iangahki kaisihsol, ira ahpw mweidala irail ong Siohwa,* me re pwosonlahr. 24  Ira eri kakahnseli nan Pisidia oh kohdo Pampilia, 25  oh mwurin ara lohki mahseno nan Perka, ira ahpw kohdihla Atalia. 26  Oh sang mwo, ira sereklahng Andiok, wasa me riatail ko kapakapki Koht en ketin kasalehiong ira sapwellime kadek sapan ong doadoahk me ira kanekelahro. 27  Ni ara lella oh kapokonepene tohn mwomwohdiso, ira ahpw koasoiahda soahng tohto me Koht ketin wiadahr ni eh ketin doadoahngki ira, oh duwen eh ketin ritingadahng mehn liki kan wenihmw ong pwoson. 28  Ira ahpw mihmi rehn tohnpadahk ko ahnsou reirei.

Footnote kan

Kilang KLL.
LK, “ohl mah kan.”
Kilang KLL.