Wiewia 12:1-25

  • Seims kamakamala; Piter selidi (1-5)

  • Piter saledekla ni manaman (6-19)

  • Tohnleng men kemehla Erod (20-25)

12  Ni ahnsowo nanmwarki Erod tepida kaloke ekei irail nan mwomwohdiso.  E kemehkihla kedlahs Seims, rien Sohn.  Ni eh kilangada me mehn Suhs ako perenki met, e ahpw pil salihedi Piter. (Met iei erein kasarawien Pilawa me Sohte Doal Ihs.)  E parokedi ih oh kesehlong nan imweteng, e ahpw kihong rehn pwihnen sounpei pahieu me wad pahmen ehu pwihn pwe ren kin sinsile ih, oh e koasoakoasoane en wahieila ih* mwohn aramas akan mwurin Pahsohpa.  Piter eri mihmihte nan imweteng, ahpw mwomwohdiso kin poaden kapakapki ih ong Koht.  Eri, pwohngo mwohn Erod eh pahn wahieila ih, Piter wie memeir nanpwungen sounpei riemen ni eh selkihdi selmete riapwoat, oh silepe kan me mi mwohn wenihmwo kin wie sinsile imwetengo.  A kilang! sapwellimen Siohwa* tohnleng men ahpw kesikesihnen mwo, oh marain ehu ahpw dakerada nan imwetengo. Ni eh poakih Piter ni pengepengeo, e pangenda ih oh nda: “Mwadang uhda!” Oh selmete ko ahpw pwupwusang ni peh ko.  Tohnlengo ahpw ndaiong: “Likouda* oh kihong omw suht kan.” E ahpw wia met. Ih eri ndaiong: “Likawihada omw likou puhp, oh idawehn ie.”  E ahpw kin idawehnte ih ni ara pedoila, ahpw e sohte ese me dahme tohnlengo wia uhdahn wiawi. Ni mehlel, e medewe me e kilikilang kaudiahl ehu. 10  Ni ara daulih silepe keieu oh pil keriau, ira ahpw lel ni wenihmw mete me kohlahng nan kahnimwo, oh e pein ritidahng ira. Mwurin ara pedoi, ira ahpw aluhdihla pohn ahl apwoat, a ni ahnsowohte tohnlengo ahpw sohrasang ih. 11  Piter ahpw wehwehkihda dahme wiewiawi oh nda: “Met I ese ni mehlel me Siohwa* ketin poaronehdo sapwellime tohnleng oh ketin doareiehsang nan pehn Erod oh pil sang mehkoaros me mehn Suhs ako kasikasik en wiawi.” 12  Mwurin eh wehwehkihda met, e ahpw kohla imwen Mery, inen Sohn me adaneki Mark, wasa me tohnpadahk tohto pokonpene ie oh wie kapakap. 13  Ni eh letelet ni wenihmw en kehlo, lidu serepein men me adaneki Rohda ahpw kohdo pwe en sapeng. 14  Ni eh kasawihada ngilen Pitero, e inenen perenkihda kahrehda e sohte ritingada wenihmwo, ahpw e tangolongala nan ihmwo oh pakairki me Piter kesikesihnen ni ewen kehlo. 15  Irail ahpw ndaiong ih: “Ke sahliellahr.” Ahpw e ngihtehtehki me e mehlel. Irail ahpw tepida nda: “Eri iei eh tohnleng mwo.” 16  Piter ahpw mihmihte mwo, wie letelet. Ni arail ritingada wenihmwo, irail kilangada ih oh pwuriamweikihla. 17  E ahpw oaleiraildi pwe ren nennenla oh ndaiong irail ni oaritik duwen Siohwa* eh ketikihieisang ih nan imwetengo, oh e nda: “Kairehki mepwukat Seims oh riatail kan.” Ih eri kohieila oh seiloakla ehu wasa tohrohr. 18  Eri, ni eh rahnpeseng, moromor ehu ahpw wiawi nanpwungen sounpei ko duwen dahme wiawihong Piter. 19  Erod eri koasoanehdi en rapahkihda ih, ahpw ni eh sohte diar, e kapeidek silepe ko oh ruwese me ren wisiklahng kalokolok; e ahpw kohdihla Sesaria sang Sudia oh mihmihki wasao ahnsou kis. 20  E ahpw lingeringerda pahn* mehn Dair oh Saidon. Aramas en sahpw pwukat kin pwainda mwenge sang wasa me Erod kin kakaun, eri irail wiahki ehu kohdo oh peki rehn Plastus me kin pwukoahki apwalih imwen nanmwarki,* pwe en sewese irail, irail eri koasoiong nanmwarkio pwe ren wiahda popohl reh. 21  Ni rahn me kileldio, Erod ahpw likoukihda likoun nanmwarki oh mwohndi nan mwoalen kadeik oh tepida kapahrekiong aramas akan. 22  Eri aramas akan me pokonpene ahpw tepida weriwer ndinda: “Kapitien koht emen, kaidehn ngilen aramas emen!” 23  Ni ahnsowohte sapwellimen Siohwa* tohnleng men ahpw kihong ih soumwahu ehu pwehki e sohte kalinganahda Koht, mwahs eri kangala ih oh e ahpw mehla. 24  Ahpw mahsen en Siohwa* kin lolohkseli oh aramas tohto kamehlele. 25  A duwen Parnapas oh Sohl, mwurin ara kanekehla doadoahk en sawas nan Serusalem, ira ahpw pwurala Andiok oh Sohn me pil adaneki Mark iangirahda.

Footnote kan

De “wahlahng ih pwehn kadeik.”
Kilang KLL.
De “katengehdi pein uhk.”
Kilang KLL.
Kilang KLL.
De “men peiong.”
LK, “perehn meir en nanmwarki.”
Kilang KLL.
Kilang KLL.