Madiu 1:1-25

  • Irekidien dih kan en Sises Krais (1-17)

  • Ipwidien Sises (18-25)

1  Iet pwuhk en poadopoad* en Sises Krais,* kadaudok en Depit, kadaudok en Eipraam:   Eipraam iei semen* Aisek;Aisek iei semen Seikop;Seikop iei semen Suda oh rie pwutak ko;   Suda iei semen Peres oh Sera oh inara iei Damar;Peres iei semen Esron;Esron iei semen Ram;   Ram iei semen Aminadap;Aminadap iei semen Nahson;Nahson iei semen Salmon;   Salmon iei semen Pohas me ine Reap;Pohas iei semen Oped me ine Rud;Oped iei semen Sehsi;   Sehsi iei semen nanmwarki Depit.Depit iei semen Solomon sang en Uraia eh pwoud;   Solomon iei semen Reopoham;Reopoham iei semen Apaisa;Apaisa iei semen Asa;   Asa iei semen Seosopat;Seosopat iei semen Sehoram;Sehoram iei semen Usaia;   Usaia iei semen Sodam;Sodam iei semen Ahas;Ahas iei semen Esekaia; 10  Esekaia iei semen Manase;Manase iei semen Amon;Amon iei semen Sosaia; 11  Sosaia iei semen Sekonaia oh rie pwutak ko ni ahnsou me mehn Suhs ako kalipilipala Papilon. 12  Erein arail mihmi Papilon, Sekonaia wiahla semen Sealtiel;Sealtiel wiahla semen Serupapel; 13  Serupapel iei semen Apiud;Apiud iei semen Elaiakim;Elaiakim iei semen Asor; 14  Asor iei semen Sadok;Sadok iei semen Akim;Akim iei semen Eliud; 15  Eliud iei semen Eliesar;Eliesar iei semen Madan;Madan iei semen Seikop; 16  Seikop iei semen Sosep me pwoudiki Mery me kaipwiedi Sises me mwarenki Krais. 17  Eri, dih koaros sang Eipraam lel Depit iei dih 14; sang Depit lel ni ahnsou me mehn Suhs akan kalipilipala Papilon, dih 14; sang ahnsou me re kalipilipala Papilon lel Krais, dih 14. 18  Ahpw iet duwen ipwidien Sises Krais. Erein ahnsou me eh nohno Mery inoun pwopwoudiong Sosep, e liseianda sang ni sapwellimen Koht manaman* mwohn ara pwopwoudida. 19  Ahpw pwehki eh pwoud* Sosep aramas pwung men, oh e sohte men kahdsuwedihala Mery mwohn aramas akan, e lemehda en mweisang ih ni rir. 20  Ahpw mwurin eh medemedewe mepwukat, kilang! sapwellimen Siohwa* tohnleng pwarohng ih nan ouraman ehu oh nda: “Sosep, kadaudok en Depit, dehr masak pwoudiki Mery,* pwehki dahme mi nan kapehde e ahpikihda sapwellimen Koht manaman.* 21  E pahn naitikihada pwutak emen, oh ke pahn kihong ede Sises,* pwe e pahn ketin doarehsang sapwellime aramas akan nan diparail kan.” 22  Mepwukat koaros pweidahier pwe en kapwaiada dahme Siohwa* ketin mahsanih sang rehn sapwellime soukohp me mahsanih: 23  “Kilang! Meipwono pahn liseianda oh naitikihada nah pwutak emen, oh re pahn kihong ede Emanuel,” me kawehwehdi “Koht Kin Ketiket Rehtail.” 24  Sosep eri pirida sang eh meir oh wia dahme sapwellimen Siohwa* tohnlengo kaweidki, oh e pwoudikihda Mery.* 25  Ahpw e sohte wia nsenen pwopwoud rehn Mery lao e naitikihada pwutak emen oh Sosep kihong eden serio Sises.

Footnote kan

De “irekidi en dih kan.”
De “Mesaia; me Keidi Men.”
“Semen” kak dokedoke uhdahn seme de seme mehn mahs ako.
LK, pneuʹma. Kilang KLL.
Nin duwen tiahk en mehn Suhs, emen me ke inoun pwopwoudiong kin duwehte omw pwoud.
Mwaren Koht Siohwa pwarada nan Nting Sarawi kan en Kristian ni Lokaiahn Krihs pak 237, met iei tepin wasa me e pwarada nan kawehwehn Paipel wet. Kilang KLL.
LK, “dehr masak wahla omw pwoud Mery ni imwomwo.”
LK, pneuʹma. Kilang KLL.
Me pahrekiong ahd en Ipru Sesua, de Sosua, me wehwehki “Siohwa iei Komour.”
Kilang KLL.
Kilang KLL.
LK, “e wahla eh pwoud ni imweo.”