1 Korint 13:1-13

  • Limpoak​—ahl apwoat me uhdahn siklahsang soahng teikan (1-13)

13  Ma I pahn lokaiahki lokaiahn aramas akan oh tohnleng kan ahpw sohte ahneki limpoak, I pahn duwehla ngilen pehl ehu de simpal ehu* me kin sekesek.  Oh ma I pahn ahneki kisakis en kokohp oh wehwehki rir sarawi kan koaros oh loalokong koaros, oh ma I ahneki pwoson koaros pwe I en kamwakid nahna kan, ahpw sohte ahneki limpoak, kaidehk ngehi mehkot.*  Oh ma I pahn netikihla ei kepwe koaros pwe I en kamwenge meteikan, oh ma I pangala paliwereiet pwe I en suwei, ahpw sohte ahneki limpoak, I sohte pahn paiekihda douluhl.  Limpoak kin kanengamah oh kadek. Limpoak sohte kin peirin. E sohte kin suwei oh sohte kin aklapalapala,  sohte kin wia soahng kan me kanamenek, sohte kin rapahki pein kamwahupe, sohte kin mwadang lingeringerda. E sohte kin kolokol lingeringer.*  E sohte kin perenkihda me suwed ahpw kin perenkihda me mehlel.  E kin wa katoutou koaros,* kamehlele soahng koaros, koapworopworki soahng koaros, oh dadaur ni soahng koaros.  Limpoak me poatopoat.* Ahpw ma mie kisakis kan en kokohp, re pahn sohrala; ma mie kisakis en lokaia tohrohr,* re pahn tokedi; ma mie loalokong, e pahn sohrala.  Pwe atail loalokong sohte unsek oh atail kokohp sohte unsek, 10  ahpw ni ahnsou me dahme unsek pahn kohdo, dahme sohte unsek pahn sohrala. 11  Ni ei seri, I kin koasoi duwehte seri, madamadau duwehte seri, kasawih wehwehn mehkot duwehte seri; ahpw met I wialahr ohl emen, I solahr kin wia mwomwen seri. 12  Pwe met kitail kin kilang ni soh sansal rasehng atail ireirong nan mehn irongen mete ehu, ahpw mwuhr kitail pahn kilang mwahu, rasehng atail mi rehn emen oh kin sohpeipene. Ahnsou wet, I sohte ese ni unsek, ahpw mwuhr I pahn ese ni unsek, duwehte Koht eh ketin mwahngih ie ni unsek. 13  Eri ahpw, soahng siluh pwukat pahn mihmihte: pwoson, koapworopwor oh limpoak; ahpw me keieu kesempwal rehrail iei limpoak.

Footnote kan

Mehn keseng ehu, mwomwe pwonopwon oh e kin wiahda ngihl ni omw kin sekerpene.
De “ngehi sohte katepe.”
De “sohte kin kilelehdi sapwung kan.”
LK, “pwaindi soahng koaros.”
De “sohte mwahn pahn nekila.”
Me iei, lokaiahki lokaia teikan sang ni manaman.