شادی تے طلاق بارے ساڈا نظریہ اوہی اے جیہڑا خدا دا اے۔ ایہہ خدا دا بندوبست اے کہ اِک مرد تے عورت شادی کرن تے ایس بندھن نُوں ساری عمر نبھان۔ پاک کلام دے مطابق طلاق دی اِک ای وجہ اے تے اوہ اے حرام‌کاری۔—‏متی 19:‏5، 6،‏ 9‏۔‏

کیہہ یہوواہ دے گواہ اوہناں جوڑیاں دی مدد کردے نیں جنہاں دی شادی‌شُدہ زندگی چ مسئلے چل رہے ہوندے نیں؟‏

 جی، اَسی بوہت سارے طریقیاں نال اِنج کرنے آں۔‏

•   کتاباں تے رسالے۔‏ ساڈیاں کتاباں تے رسالیاں چ باقاعدگی نال ایہو جہے مضمون آندے نیں جیہڑے شادی‌شُدہ لوکاں دی مدد کردے نیں کہ اوہ اپنے شادی دے بندھن نُوں مضبوط بنان۔ ایہہ اوہناں لوکاں دی وی مدد کردے نیں جنہاں نُوں لگدا اے کہ ہُن اوہناں دی شادی‌شُدہ زندگی کدی بہتر نئیں ہو سکے گی۔ مثال لئی، ذرا ایہناں مضموناں تے غور کرو:‏ ”‏اپنے جیون ساتھی کو معاف کرنا سیکھیں‏“‏ تے ”‏کیا آپ اپنے ازدواجی رشتے سے مایوس ہو گئے ہیں؟‏‏“‏

•   عبادتاں۔‏ ساڈیاں عبادتاں تے کنونشناں تے وی شادی‌شُدہ زندگی نُوں بہتر بنان لئی پاک کلام چوں مشورے دِتے جاندے نیں۔‏

•   کلیسیا دے بزرگ۔‏ ساڈیاں کلیسیاواں دے بزرگ شادی‌شُدہ جوڑیاں دی مدد کرن لئی اوہناں دی توجہ پاک کلام دِیاں ایتاں تے دَواندے نیں جیویں کہ اِفسیوں 5:‏22-‏25‏۔‏

کیہہ کلیسیا دے بزرگ کسے مسیحی نُوں طلاق لین دی اجازت دے سکدے نیں؟‏

 نئیں۔ بھانویں کہ شادی‌شُدہ جوڑے اپنی شادی چ آن والے مسئلیاں بارے بزرگاں کولوں مدد لے سکدے نیں پر بزرگاں کول ایہہ اِختیار نئیں کہ اوہ اوہناں لئی فیصلے کرن۔ (‏گلتیوں 6:‏5‏)‏ پر جے یہوواہ دا اِک گواہ حرام‌کاری دے علاوہ کسے ہور وجہ توں طلاق لیندا اے تے اوہ پاک کلام دے مطابق دُبارہ شادی نئیں کر سکدا۔—‏متی 19:‏9‏۔‏

یہوواہ دے گواہ علیٰحدگی بارے کیہو جہی سوچ رکھدے نیں؟‏

 پاک کلام چ شادی‌شُدہ جوڑیاں دی حوصلہ‌افزائی کیتی گئی اے کہ اوہ مسئلیاں دے باوجود وی اِک دُوجے نُوں نہ چھڈن۔ (‏1-‏کُرنتھیوں 7:‏10-‏16‏)‏ بوہت سارے مسئلے دِلوں دُعا کرن، پاک کلام دے اصولاں تے عمل کرن تے اِک دُوجے لئی محبت ظاہر کرن نال حل ہو جاندے نیں۔—‏1-‏کُرنتھیوں 13:‏4-‏8؛‏ گلتیوں 5:‏22‏۔‏

 پر کجھ حالاتاں چ کجھ مسیحی اپنے جیون ساتھی توں علیٰحدگی دا فیصلہ کردے نیں۔ مثال لئی اوس ویلے:‏

•   جدوں اِک مسیحی شوہر جان بجھُ کے اپنے بیوی بچیاں دِیاں ضرورتاں پوریاں نئیں کردا۔—‏1-‏تیمُتھیُس 5:‏8‏۔‏

•   جدوں اِک مسیحی دا جیون ساتھی اوہنوں بوہت زیادہ ماردا کُٹ دا اے۔—‏زبور 11:‏5‏۔‏

•   جدوں اِک مسیحی دا جیون ساتھی اوہنوں خدا دی عبادت کرن توں روکدا اے یاں اوہنوں خدا دے حکم توڑن تے مجبور کردا اے۔ ایس صورت چ شاید اوہ مسیحی سوچے کہ ”‏انساناں دی بجائے خدا دا حکم“‏ منن لئی علیٰحدگی لینا بہتر اے۔—‏اعمال 5:‏29‏۔‏