معلومات چھیتی وکھاؤ

مضموناں دی لسٹ وکھاؤ

 سبق 27

اَسی عبادت‌گاہ دی لائبریری توں کیویں فائدہ اُٹھا سکنے آں؟‏

اَسی عبادت‌گاہ دی لائبریری توں کیویں فائدہ اُٹھا سکنے آں؟‏

اِسرائیل

چیک ریپبلک

بینن

کیمن دے جزیرے

کیہہ تُسی بائبل بارے اپنا علم ودھاؤن لئی کجھ تحقیق کرنی چاہندے او؟‏ کیہہ توانوں کسے ایسے شخص،‏ جگہ یاں چیز بارے جانن دا شوق اے جدا بائبل چ ذکر کیتا گیا اے؟‏ کیہہ تُسی بائبل دی کسے ایت نُوں سمجھنا چاہندے او؟‏ یاں کیہہ تُسی کدی سوچیا اے کہ تواڈی کسے پریشانی بارے پاک کلام کیہہ صلاح دیندا اے؟‏ کیوں نہ فیر عبادت‌گاہ دی لائبریری توں پُورا پُورا فائدہ چُکیا جائے۔‏

اَسی پاک کلام وچوں تحقیق کر سکنے آں۔‏ شاید تواڈے کول اپنی زبان وچ یہوواہ دے گواہواں دیاں ساریاں کتاباں نہ ہون،‏ پر عبادت‌گاہ دی لائبریری وچ تُسی تقریباً ساریاں کتاباں تے رسالے پڑھ سکدے او۔‏ ایہدے وچ کئی بائبل ترجمے،‏ اِک چنگی ڈکشنری تے تحقیق کرن لئی کئی ہور کتاباں وی مِل سکدیاں نیں۔‏ تُسی عبادت توں پہلے یاں بعد چ لائبریری استمال کر سکدے او۔‏ جے اوتھے کمپیوٹر ہے وے تے ہو سکدا اے اوہدے وچ ‏”‏واچ‌ٹاور لائبریری“‏ پروگرام وی ہووے۔‏ ایس پروگرام وچ توانوں بوہت ساریاں کتاباں مِلن گیاں تے تُسی کسے موضوع،‏ لفظ یاں ایت بارے آسانی نال تحقیق کر سکو گے۔‏

اَسی ہفتے دوران ہون والی عبادت مسیحی زندگی تے خدمت دی تیاری کر سکنے آں۔‏ جے توانوں ایس عبادت چ کوئی حصہ پیش کرن لئی مِلدا اے تے تُسی اوہدی تیاری کرن لئی لائبریری توں مدد لے سکدے او۔‏ ایس عبادت دا نگہبان لائبریری دی دیکھ بھال کردا اے۔‏ اوہ ایس گل دا دھیان رکھدا اے کہ لائبریری وچ ساریاں نویاں کتاباں موجود نیں تے سلیقے نال رکھیاں گئیاں نیں۔‏ ایہہ نگہبان یاں توانوں بائبل کورس کراؤن والا گواہ دسے گا کہ تُسی کیویں تحقیق کر سکدے او۔‏ پر لائبریری دی کوئی وی کتاب عبادت‌گاہ توں باہر نہ کھڑو۔‏ نالے کتاباں نُوں بڑے دھیان نال ورتو تے ایہناں تے کوئی نشان نہ لاؤ۔‏

پاک کلام وچ دسیا گیا اے کہ خدا دا علم اِک خزانے وانگوں اے۔‏ جیس طرحاں لوک چھپے ہوئے خزانے نُوں لبھن لئی جی توڑ کوشش کردے نیں،‏ اوسے طرحاں سانوں خدا بارے علم حاصل کرن لئی پُوری کوشش کرنی چاہی دی اے۔‏ (‏امثال 2:‏1-‏5‏)‏ عبادت‌گاہ دی لائبریری بائبل وچ چھپے خزانے نُوں لبھن لئی تواڈے بڑے کم آئے گی۔‏

  • ساڈی عبادت‌گاہ دی لائبریری وچ کیہہ کجھ رکھیا جاندا اے؟‏

  • لائبریری وچوں تحقیق کرن لئی تواڈی مدد کون کر سکدا اے؟‏