معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

اَج کون یہوواہ خدا دی مرضی تے چل رہے نیں؟‏

 سبق 18

اَسی مشکل گھڑیاں وچ اپنے بھین بھراواں دا ساتھ کیویں دینے آں؟‏

اَسی مشکل گھڑیاں وچ اپنے بھین بھراواں دا ساتھ کیویں دینے آں؟‏

ڈومینیکن ریپبلک

جاپان

ہیٹی

جدوں وی کوئی آفت اپنا قہر ڈھاؤندی اے تے اَسی اپنے مسیحی بھین بھراواں دی مدد لئی فوراً انتظام کرنے آں۔‏ ایس طرحاں ظاہر ہوندا اے کہ اَسی اِک دُوجے نُوں سچا پیار کرنے آں۔‏ (‏یوحنا 13:‏34،‏ 35؛‏ 1-‏یوحنا 3:‏17،‏ 18‏)‏ اَسی کیہڑے طریقیاں نال اپنے بھین بھراواں دا سہارابننے آں؟‏

اَسی مالی مدد کرنے آں۔‏ پہلی صدی وچ اِک سخت کال نے یہودیہ دے علاقے وچ بڑی تباہی مچائی۔‏ اوس ویلے انطاکیہ شہر دے مسیحیاں نے یہودیہ دے مسیحیاں دی مدد لئی پیسے گھلے۔‏ (‏اعمال 11:‏27-‏30‏)‏ ایسے طرحاں جدوں دُنیا وچ ساڈے بھین بھراواں تے کوئی آفت آؤندی اے تے اَسی اپنی کلیسیا دے ذریعے اوہناں دی مالی مدد کرنے آں۔‏—‏2-‏کُرنتھیوں 8:‏13-‏15‏۔‏

اَسی اوہناں دیاں ضرورتاں پُوریاں کرنے آں۔‏ جیس علاقے وچ آفت آؤندی اے،‏ اوتھوں دی کلیسیا دے بزرگ ہر بھین بھرا دی خیر خریت دا پتہ لاؤندے نیں۔‏ اِک ریلیف کمیٹی بنائی جاندی اے تاکہ خوراک،‏ صاف پانی،‏ دوائیاں،‏ رہائش تے کپڑیاں دا انتظام کیتا جائے۔‏ فرق فرق کماں وچ مہارت رکھن والے بوہت سارے یہوواہ دے گواہ اپنے خرچے تے جا کے ٹُٹے بھجے گھراں تے عبادت گاہواں دی مرمت کردے نیں۔‏ ساڈی تنظیم دے بھین بھراواں وچ ایکا اے تے سانوں رَل مِل کے کم کرن دا تجربہ اے۔‏ ایس لئی اَسی اوکھیاں گھڑیاں وچ اپنے بھین بھراواں دی خوشی خوشی مدد کرنے آں۔‏ اَسی خاص طور تے اپنے گواہ بھین بھراواں نُوں سہارا دینے آں،‏ پر جتھوں تک ہو سکے اَسی دُوجیاں دی مدد وی کرنے آں،‏ فیر بھانویں اوہ کسے وی مذہب دے کیوں نہ ہون۔‏—‏گلتیوں 6:‏10‏۔‏

اَسی پاک کلام وچوں تسلی دینے آں۔‏ آفتاں دے شکار لوکاں نُوں خاص طور تے تسلی دی لوڑ ہوندی اے۔‏ ایسیاں گھڑیاں وچ سانوں عظیم رحمتاں دے باپ یہوواہ توں ای تسلی مِلدی اے۔‏ (‏2-‏کُرنتھیوں 1:‏3،‏ 4‏)‏ مایوسی دے ہنیریاں وچ ڈُبے لوکاں نُوں اَسی پاک کلام دے ایس وعدے بارے دسنے آں کہ بڑی چھیتی خدا دی بادشاہی ہر دُکھ تکلیف نُوں جڑوں ختم کر دوے گی۔‏‏—‏مکاشفہ 21:‏4‏۔‏

  • اَسی آفتاں دوران اپنے مسیحی بھین بھراواں دی فٹافٹ مدد کیوں کر پاؤنے آں؟‏

  • اَسی مشکل گھڑیاں وچ لوکاں نُوں تسلی کیویں دے سکنے آں؟‏