معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

تواڈے گھر وچ خوشیاں آ سکدیاں نیں

 سبق 3

تُسی مسئلیاں نُوں کیویں حل کر سکدے او؟‏

تُسی مسئلیاں نُوں کیویں حل کر سکدے او؟‏

اِک دُوجے نال گُوڑھی محبت رکھو کیونکہ محبت بوہت سارے گناہواں تے پردہ پا دیندی اے۔‏—‏1-‏پطرس 4:‏8‏۔‏

ویاہ توں بعد میاں بیوی دی زندگی وچ کئی مسئلے کھڑے ہو سکدے نیں۔‏ ایہدی وجہ ایہہ وے کہ اوہناں دی سوچ،‏ جذبات تے عادتاں اِک دُوجے توں فرق ہوندیاں نیں۔‏ کدی کدی دُوسرے لوکاں یاں اچانک حالات بدلن دی وجہ توں وی مسئلے کھڑے ہو سکدے نیں۔‏

مسئلیاں توں دُور نسنا خورے توانوں اسان لگے پر بائبل صلا‌ح دیندی اے کہ اَسی ایہناں دا سامنا کرئیے۔‏ (‏متی 5:‏23،‏ 24‏)‏ مسئلیاں نُوں حل کرن دا سب توں ودھیا طریقہ بائبل دیاں ہدیتاں مطابق چلنا اے۔‏

 1 مسئلے بارے گل بات کرو

پاک کلام دسدا اے:‏ بولن دا اِک وقت اے۔‏ (‏واعظ 3:‏1،‏ 7‏)‏ ایہہ بوہت ضروری اے کہ تُسی مسئلے بارے گل کرن لئی وقت کڈھو۔‏ اپنے ساتھی نُوں دل کھول کے دسو کہ تُسی کسے مسئلے بارے کیہہ محسوس کردے او تے ایس بارے تواڈی رائے کیہہ اے۔‏ اپنے ساتھی نال ہمیشاں سچ بولو۔‏ (‏اِفسیوں 4:‏25‏)‏ جے کِتے تواڈا پارہ ہائی ہو وی جائے تاں وی لڑائی جھگڑے توں بچو۔‏ ٹھنڈے دماغ توں کم لوَو تے ماڑی جہی گل نُوں رائی دا پہاڑ نہ بناؤ۔‏—‏امثال 15:‏4؛‏ 26:‏20‏۔‏

بھانویں توانوں اپنے ساتھی دی رائے چنگی نہ وی لگے فیر وی اوہدے نال نرمی نال گل کرو تے ہمیشاں عزت تے پیار نال پیش آؤ۔‏ (‏کُلسّیوں 4:‏6‏)‏ جنی چھیتی ہو سکے مسئلہ حل کرن دی کوشش کرو تے اِک دُوجے نال مُنہ پھلا کے بیٹھے نہ رہوو۔‏—‏اِفسیوں 4:‏26‏۔‏

تُسی کیہہ کر سکدے او؟‏

  • مسئلے بارے گل بات کرن لئی وقت طے کرو۔‏

  • اپنے ساتھی دی گل دھیان نال سنوُ تے اوہنوں نہ ٹوکو۔‏ اوہدی گل پُوری ہون توں بعد اپنی رائے دَوو۔‏

 2 گل نُوں سنوُ تے سمجھو

پاک کلام دسدا اے:‏ اِک دُوجے نُوں پیار کرو۔‏ اِک دُوجے دی عزت کرن چ پہل کرو۔‏ (‏رومیوں 12:‏10‏)‏ اپنے ساتھی دی گل دھیان نال سُننا بوہت ضروری اے۔‏ غصے دی اَگ وچ بلدے نہ رہوو سگوں ہمدردی نال پیش آؤ تے اوہدی گل نُوں سمجھن دی کوشش کرو۔‏ (‏1-‏پطرس 3:‏8؛‏ یعقوب 1:‏19‏)‏ اوہدی گل سُنن دا دکھاوا نہ کرو۔‏ جے ہو سکے تے اپنا کم روک کے اپنے ساتھی دی گل دھیان نال سنوُ یاں اوہنوں پچھو کہ کیہہ اَسی بعد وچ گل کر سکنے آں۔‏ جے تُسی اپنے جیون ساتھی نُوں دشمن دی بجائے دوست من دے او تے فیر تُسی اوہدے نال گل گل تے ناراض نئیں ہووو گے۔‏—‏واعظ 7:‏9‏۔‏

تُسی کیہہ کر سکدے او؟‏

  • جے توانوں اپنے ساتھی دی گل چنگی نہ وی لگے فیر وی اوہدی گل دھیان نال سُن دے رہوو۔‏

  • اپنے ساتھی دی گل نُوں سنوُ تے اوہدے دل نُوں پڑھن دی کوشش کرو۔‏ اوہدے لہجے تے جذباتاں نُوں وی سمجھو۔‏

3 اپنے فیصلیاں تے قائم رہوو

پاک کلام دسدا اے:‏ ہر طرحاں دی محنت دا فائدہ ہوندا اے پر نریاں گلاں کرن دا کوئی فائدہ نئیں ہوندا۔‏ (‏امثال 14:‏23‏)‏ جدوں تُسی کسے مسئلے نُوں حل کرن لئی کوئی فیصلہ لے لیندے او تے فیر اوس فیصلے تے قائم رہوو۔‏ ہو سکدا اے ایہدے لئی توانوں بڑی محنت کرنی پوے پر توانوں ایہدا فائدہ ضرور ہوئے گا۔‏ (‏امثال 10:‏4‏)‏ جے تُسی اِک ہو کے اپنے فیصلیاں مطابق چلو گے تے تواڈی محنت ضرور رنگ لیائے گی۔‏—‏واعظ 4:‏9‏۔‏

تُسی کیہہ کر سکدے او؟‏

  • طے کرو کہ مسئلے نُوں حل کرن لئی تُسی دونویں کیہہ کجھ کرو گے۔‏

  • ایس گل دا جائزہ لیندے رہوو کہ مسئلہ کیس حد تک حل ہو گیا اے۔‏