معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

تواڈے گھر وچ خوشیاں آ سکدیاں نیں

 سبق 1

شادی‌شدہ زندگی چ خوشیاں لیاؤن لئی خدا دی صلا‌ح تے چلو

شادی‌شدہ زندگی چ خوشیاں لیاؤن لئی خدا دی صلا‌ح تے چلو

جنہے انساناں نُوں بنایا،‏ اوہنے شروع توں اوہناں نُوں آدمی تے عورت بنایا۔‏—‏متی 19:‏4‏۔‏

یہوواہ * خدا نے شادی دے بندھن دی بنیاد رکھی۔‏ بائبل دسدی اے کہ خدا پہلی عورت نُوں بنا کے آدم کول لیایا۔‏ آدم اپنی بیوی نُوں ویکھ کے ایناں خوش ہویا کہ اوہنے آکھیا کہ ایہہ تے میریاں ہڈیاں وچوں ہڈی تے میرے گوشت وچوں گوشت اے۔‏ (‏پیدایش 2:‏22،‏ 23‏)‏ یہوواہ خدا شروع توں ای چاہندا اے کہ میاں بیوی ہمیشاں ہسدے وسدے رہن۔‏

جدوں تواڈا ویاہ ہوندا اے تے توانوں لگدا اے کہ ہُن تواڈی زندگی پُھلا‌ں دی سیج ہووے گی۔‏ پر سچ تے ایہہ وے کہ میاں بیوی اِک دُوجے نُوں بھانویں جِنّاں مرضی پیار کردے ہون،‏ اوہناں دی زندگی وچ مشکلا‌ں ضرور آؤندیاں نیں۔‏ (‏1-‏کُرنتھیوں 7:‏28‏)‏ ایس کتاب وچ توانوں ایسے مشورے مِلن گے جیہڑ‌ے بائبل وچوں لئے گئے نیں۔‏ ایہناں تے عمل کر کے تُسی اپنے گھر نُوں خوشیاں نال بھر سکدے او۔‏—‏زبور 19:‏8-‏11‏۔‏

 1 یہوواہ وَلوں مِلن والی ذمےداری نبھاؤ

پاک کلام دسدا اے:‏ شوہر خاندان دا سربراہ اے۔‏—‏اِفسیوں 5:‏23‏۔‏

جے تُسی اِک شوہر او تے یہوواہ خدا تواڈے توں امید کردا اے کہ تُسی اپنی بیوی دا خیال رکھو تے اوہنوں سمجھن دی کوشش کرو۔‏ (‏1-‏پطرس 3:‏7‏)‏ خدا نے بیوی نُوں تواڈی مددگار بنایا اے تے اوہ چاہندا اے کہ تُسی اوہدے نال عزت تے پیار نال پیش آؤ۔‏ (‏پیدایش 2:‏18‏)‏ اوہنوں ایناں پیار کرو کہ اوہدی خوشی لئی اپنی خوشی وی قربان کر دَوو۔‏—‏اِفسیوں 5:‏25-‏29‏۔‏

جے تُسی اِک بیوی او تے یہوواہ خدا تواڈے توں امید کردا اے کہ تُسی اپنے شوہر دا احترام کرو تے اوہدی مدد کرو تاکہ اوہ اپنیاں ذمےداریاں چنگی طرحاں نبھا سکے۔‏ (‏1-‏کُرنتھیوں 11:‏3؛‏ اِفسیوں 5:‏33‏)‏ اوہدے فیصلیاں دی حمایت کرو تے اوہدے نال دِلوں تعاون کرو۔‏ (‏کُلسّیوں 3:‏18‏)‏ ایس طرحاں تُسی نہ صرف اپنے خاوند دیاں نظراں وچ سگوں یہوواہ خدا دیاں نظراں وچ وی انمول بن جاؤ گے۔‏—‏1-‏پطرس 3:‏1-‏6‏۔‏

تُسی کیہہ کر سکدے او؟‏

  • اپنے جیون ساتھی نُوں پچھو کہ تُسی چنگے شوہر یاں چنگی بیوی کیویں بن سکدے او۔‏ فیر اوہدی گل دھیان نال سنوُ تے اوہدے مشورے تے عمل کرو۔‏

  • صبر نال کم لوَو۔‏ توانوں ایہہ جانن چ وقت لگے گا کہ تُسی اِک دُوجے نُوں کیویں خوش رکھ سکدے او۔‏

2 اپنے ساتھی دے جذباتاں دا خیال رکھو

پاک کلام دسدا اے:‏ اپنے ای فائدے بارے نئیں سگوں اپنے جیون ساتھی دے فائدے بارے وی سوچو۔‏ (‏فِلپّیوں 2:‏3،‏ 4‏)‏ اپنے ساتھی نال دل دکھاؤن والیاں گلاں نہ کرو کیونکہ یہوواہ خدا چاہندا اے کہ اوہدے بندے ساریاں نال نرمی نال پیش آؤن۔‏ (‏2-‏تیمُتھیُس 2:‏24‏)‏ جیہڑ‌ا بغیر سوچے سمجھے بول دا اے،‏ اوہدیاں گلاں تلوار وانگوں زخم لاؤندیاں نیں پر عقل‌مند دیاں گلاں شفا دیندیاں نیں۔‏ ایس لئی سوچ سمجھ کے گل کرو۔‏ (‏امثال 12:‏18‏)‏ یہوواہ خدا دی پاک رُوح تواڈی مدد کرے گی تاکہ تُسی اپنے جیون ساتھی نال نرمی تے پیار نال گل کر سکو۔‏—‏گلتیوں 5:‏22،‏ 23؛‏ کُلسّیوں 4:‏6‏۔‏

تُسی کیہہ کر سکدے او؟‏

  • اپنے ساتھی نال نازک معاملیاں تے گل بات کرن توں پہلا‌ں دُعا کرو تاکہ تُسی غصے چ نہ آؤ تے اوہدی گل دھیان نال سُن سکو۔‏

  • پہلے توں سوچو کہ تُسی کیہہ کہوو گے تے کیویں کہوو گے۔‏

 3 اِک سوچ رکھو

پاک کلام دسدا اے:‏ ویاہ توں بعد میاں بیوی اِک جند اِک جان بن جاندے نیں۔‏ (‏متی 19:‏5‏)‏ پر اوہناں دی سوچ تے شخصیت اِک دُوجے توں فرق ہو سکدی اے۔‏ ایس لئی اوہناں نُوں پُوری کوشش کرنی چاہیدی اے کہ اوہناں دی سوچ اِک ہووے تے اوہناں دے دُکھ سُکھ سانجھے ہون۔‏ (‏فِلپّیوں 2:‏2‏)‏ ایہہ بوہت ضروری اے کہ اوہ مِل کے فیصلے کرن۔‏ خدا دا کلام دسدا اے کہ منصوبے صلا‌ح مشورے نال مضبوط ہوندے نیں۔‏ (‏امثال 20:‏18‏)‏ ایس لئی ضروری فیصلے کردے ہویاں بائبل دے اصولاں تے چلو‏۔‏—‏امثال 8:‏32،‏ 33‏۔‏

تُسی کیہہ کر سکدے او؟‏

  • اپنے ساتھی نُوں صرف معلومات یاں رائے نہ دَوو سگوں اوہنوں اپنے دل دی گل کُھل کے دسو۔‏

  • کوئی وعدہ کرن یاں کوئی ذمےداری لین توں پہلا‌ں اپنے ساتھی نال صلا‌ح مشورہ کرو۔‏

^ پیراگراف 4 بائبل دے مطابق خدا دا ناں یہوواہ اے۔‏