اوہدی عبادت کرو جنہے اسمان تے زمین نُوں بنایا اے۔‏—‏مکا‌شفہ 14:‏7‏۔‏

تُسی ایس کتاب وچوں سکھ لیا اے کہ تواڈی تے تواڈے خاندان دی مدد لئی پاک کلام وچ بوہت سارے اصول دِتے گئے نیں۔‏ یہوواہ چاہندا اے کہ تواڈا خاندان ہسدا وسدا رہوے۔‏ اوہ وعدہ کردا اے کہ جے تُسی اوہدی عبادت نُوں اپنی زندگی چ پہلی تھاں دَوو گے تے باقی ساریاں چیزاں وی توانوں دِتیاں جان گیاں۔‏ (‏متی 6:‏33‏)‏ اوہ تواڈے وَل دوستی دا ہتھ ودھاؤندا اے۔‏ ایس دوستی نُوں پکا کرن دا کوئی وی موقع ہتھوں نہ گنواؤ۔‏ تواڈے لئی خدا نال دوستی توں ودھ ہور کیہڑی برکت ہو سکدی اے۔‏—‏متی 22:‏37،‏ 38‏۔‏

 1 یہوواہ خدا نال اپنی دوستی پکی کرو

پاک کلام دسدا اے:‏ مَیں تواڈا باپ ہوواں گا تے تُسی میرے دھیاں پترُ ہووو گے۔‏ (‏2-‏کُرنتھیوں 6:‏18‏)‏ خدا چاہندا اے کہ تُسی اوہدے دوست بنو تے دُعا دے ذریعے تُسی اوہدے پکے دوست بن سکدے او۔‏ ایس لئی اوہ سانوں کہندا اے کہ ہر ویلے دُعا کرو۔‏ (‏1-‏تھسلُنیکیوں 5:‏17‏)‏ اوہ تواڈے دل دیاں گلاں تے پریشانیاں نُوں سُنن لئی ہر ویلے تیار رہندا اے۔‏ (‏فِلپّیوں 4:‏6‏)‏ جدوں تُسی اپنے گھر دے جیاں نال رَل کے دُعا کرو گے تے اوہناں نُوں محسوس ہووے گا کہ خدا نال تواڈی دوستی کِنّی پکی اے۔‏

خدا توں دُعا کرن دے نال نال توانوں اوہدی گل سُنن دی وی لوڑ اے۔‏ ایہدے لئی تُسی اوہدا کلام تے مسیحی کتاباں تے رسالے پڑھ سکدے او۔‏ (‏زبور 1:‏1،‏ 2‏)‏ سکھیاں گلاں تے گہرائی نال سوچ وچار کرو۔‏ (‏زبور 77:‏11،‏ 12‏)‏ خدا دی گل سُنن لئی ایہہ وی ضروری اے کہ تُسی لگا‌تار مسیحی عبادتاں تے جاؤ۔‏—‏زبور 122:‏1-‏4‏۔‏

یہوواہ نال دوستی پکی کرن دا اِک ہور چنگا طریقہ ایہہ وے کہ تُسی دُوجیاں نُوں اوہدے بارے دسو۔‏ جِنّاں زیادہ تُسی ایس طرحاں کرو گے اوناں ای زیادہ تُسی اوہدے نیڑے ہووو گے۔‏—‏متی 28:‏19،‏ 20‏۔‏

تُسی کیہہ کر سکدے او؟‏

  • ہر روز بائبل پڑھن تے دُعا کرن لئی وقت کڈھو۔‏

  • حد توں زیادہ تفریح تے آرام کرن دی بجائے خاندان دے طور تے خدا دی خدمت نُوں اپنی زندگی وچ پہلی تھاں دَوو۔‏

2 خاندانی عبادت دا مزہ لوَو

پاک کلام دسدا اے:‏ خدا دے نیڑے جاؤ تے اوہ تواڈے نیڑے آئے گا۔‏ (‏یعقوب 4:‏8‏)‏ اِک شیڈول بناؤ تے فیر ایہدے مطابق لگا‌تار خاندانی عبادت کردے رہوو۔‏ (‏پیدایش 18:‏19‏)‏ پر ایناں ای کافی نئیں سگوں خدا دی عبادت نُوں اپنی زندگی دا حصہ بناؤ۔‏ جے اَسی گھر بیٹھیاں،‏ راہ ٹرُ دیاں،‏ لیٹ دیاں تے اُٹھ دیاں اوہدی وڈیائی کراں گے تے ساڈے خاندان دی دوستی خدا نال دن‌بہ‌دن پکی ہوندی جاوے گی۔‏ (‏اِستثنا 6:‏6،‏ 7‏)‏ خدا دے بندے یشوع ورگا ایمان رکھو جنہاں کہیا کہ ہُن رہی میری تے میرے گھرانے دی گل اَسی تے صرف یہوواہ دی عبادت کراں گے۔‏—‏یشوع 24:‏15‏۔‏

تُسی کیہہ کر سکدے او؟‏

  • خاندانی عبادت کرن دا پروگرام اِنج بناؤ کہ گھر دے ہر جی دی لوڑ پُوری ہووے۔‏