معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

تواڈے گھر وچ خوشیاں آ سکدیاں نیں

 سبق 2

اپنے جیون ساتھی دے وفادار رہوو

اپنے جیون ساتھی دے وفادار رہوو

ایس لئی جنہوں خدا نے جوڑیا اے،‏ اوہنوں کوئی انسان وَکھ نہ کرے۔‏—‏مرقس 10:‏9‏۔‏

یہوواہ خدا چاہندا اے کہ اَسی اپنے جیون ساتھی دے وفادار رہیے۔‏ (‏ملا‌کی 2:‏16‏)‏ شادی دے بندھن وچ وفاداری بوہت ضروری اے کیونکہ ایہدے بغیر میاں بیوی دا اِک دُوجے توں اعتبار اُٹھ جاندا اے۔‏ جد کہ اعتبار میاں بیوی وچ پیار دی ڈور نُوں مضبوط کردا اے۔‏

اَج کل بےوفائی دی وجہ توں بوہت ساریاں شادیاں ٹُٹ رہیاں نیں۔‏ تُسی اپنے شادی دے بندھن نُوں مضبوط رکھن لئی ایہناں مشوریاں تے عمل کر سکدے او:‏

 1 اپنے بندھن نُوں زندگی چ پہلی تھاں دَوو

پاک کلام دسدا اے:‏ تُسی ایہہ معلوم کردے رہوو کہ کیہڑیاں گلاں زیادہ ضروری نیں۔‏ (‏فِلپّیوں 1:‏10‏)‏ تواڈی زندگی وچ تواڈا شادی دا بندھن سب توں زیادہ ضروری اے۔‏ ایس لئی ایہنوں اپنی زندگی چ پہلی تھاں دَوو۔‏

یہوواہ خدا چاہندا اے کہ تُسی اپنے ساتھی نُوں پُوری توجہ دَوو تے کٹھے زندگی دا مزہ لوَو۔‏ (‏امثال 5:‏18‏)‏ اوہ دسدا اے کہ تُسی اپنے ساتھی نال بےپروائی نہ ورتو سگوں اِک دُوجے نُوں خوش رکھن دی پُوری کوشش کرو۔‏ (‏1-‏کُرنتھیوں 10:‏24‏)‏ تواڈے ساتھی نُوں محسوس ہونا چاہیدا اے کہ توانوں اوہدی لوڑ اے تے تُسی اوہدی بڑی قدر کردے او۔‏

تُسی کیہہ کر سکدے او؟‏

  • باقاعدگی نال کٹھے وقت گزارو تے اِک دُوجے دی گل دھیان نال سنوُ۔‏

  • اپنیاں خوشیاں تے ضرورتاں دی بجائے اپنے ساتھی دیاں خوشیاں تے ضرورتاں بارے سوچو۔‏

 2 اپنے دل دی راکھی کرو

پاک کلام دسدا اے:‏ جنہے میلی اَکھ نال کسے عورت نُوں ویکھیا اوہنے اپنے دل وچ اوہدے نال زنا کر لیا۔‏ (‏متی 5:‏28‏)‏ جیہڑ‌ا گندیاں گلاں بارے سوچ دا رہندا اے اوہ اِک طرحاں اپنے جیون ساتھی نال بےوفائی کر رہیا ہوندا اے۔‏

یہوواہ خدا نصیحت کردا اے کہ تُسی اپنے دل دی راکھی کرو۔‏ (‏امثال 4:‏23؛‏ یرمیاہ 17:‏9‏)‏ ایہدے لئی ضروری اے کہ تُسی اپنیاں اَکھاں نُوں قابو چ رکھو۔‏ (‏متی 5:‏29،‏ 30‏)‏ ایوب نبی دی مثال تے چلو جنہاں نے عہد کیتا سی کہ اوہ کدی کسے پرائی عورت نُوں گندی نظر نال نئیں ویکھن گے۔‏ (‏ایوب 31:‏1‏)‏ پکا ارادہ کرو کہ تُسی گندیاں فلماں تے تصویراں نئیں ویکھو گے۔‏ ایہہ وی ٹھان لوَو کہ تُسی صرف اپنے جیون ساتھی نُوں پیار کرو گے تے کسے ہور نال دل نئیں لاؤ گے۔‏

تُسی کیہہ کر سکدے او؟‏

  • دُوجیاں نُوں صاف صاف دسو کہ تُسی ویائے ورے او تے اپنے ساتھی دے وفادار او۔‏

  • اپنے ساتھی دے جذباتاں دا خیال رکھو۔‏ جے کسے نال تواڈی دوستی اوہنوں پسند نئیں تے اوہ دوستی فوراً توڑ دَوو۔‏