معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

نوجواناں دے 10 سوال تے ایہناں دے جواب

 سوال 2

مینوں ہر ویلے سوہنا دِسن دی فکر کیوں رہندی اے؟‏

مینوں ہر ویلے سوہنا دِسن دی فکر کیوں رہندی اے؟‏

یاد رکھو

اِنسان دے رنگ روپ نالوں اوہدا دل سوہنا ہونا چاہیدا اے۔‏

تُسی کیہہ کر دے؟‏

فرض کرو جولیا نُوں شیشہ ویکھ کے لگدا اے کہ اوہ بڑی موٹی اے۔‏ اوہ خود نُوں کہندی اے کہ ”‏مینوں اپنا وزن گھٹاؤن دی لوڑ اے۔‏“‏ پر اوہدے ماں پیو تے دوست کہندے نیں کہ اوہ تے سُکی تیلی اے۔‏

جولیا نے سوچیا اے کہ اوہ صرف دو کلو وزن گھٹاؤن لئی دن رات اِک کر دوے گی،‏ ایہدے لئی اوہنوں بھانویں کجھ دن بُھکھیاں ای کیوں نہ رہنا پوے۔‏

جے تُسی جولیا دی تھاں ہوندے تے کیہہ کر دے؟‏

ذرا ٹھہرو تے سوچو!‏

اپنے بارے تواڈی سوچ اِک خراب شیشے وچ خراب پرچھائی وانگوں ہو سکدی اے۔‏

سوہنا دِسن دی فکر کرنا غلط نئیں اے۔‏ پاک کلام وچ کئی آدمیاں تے عورتاں بارے دسیا گیا اے جیہڑ‌ے بڑے سوہنے سن جیویں کہ سارہ،‏ راخل،‏ ابیجیل،‏ یوسف تے داؤد۔‏ خدا دے کلام چ ابی‌شاگ ناں دی عورت بارے وی دسیا گیا اے کہ اوہ بوہت ای خوب‌صورت سی۔‏—‏1-‏سلا‌طین 1:‏4‏۔‏

پر کئی منڈُے کُڑیاں اُتے سوہنا دِسن دا بھوت سوار ہو جاندا اے جدی وجہ توں اوہ کئی مسئلیاں وچ پھس جاندے نیں۔‏

  • اِک رپورٹ مطابق 58 فیصد کُڑیاں نے کہیا کہ اوہناں دا وزن بوہت زیادہ اے پر اصل وچ صرف 17 فیصد کُڑیاں دا وزن زیادہ سی۔‏

  • اِک ہور رپورٹ مطابق 45 فیصد عورتاں نُوں لگدا سی کہ اوہ موٹیاں نیں پر اصل وچ اوہ پتلیاں سن۔‏

  • کجھ منڈُے کُڑیاں اپنا وزن گھٹاؤن دے چکر چ اِک بیماری دا شکا‌ر ہو گئے نیں جنہوں اینوریکسیا کہیا جاندا اے۔‏ ایس بیماری وچ اِک بندہ کھانا پینا ایس حد تک گھٹ کر دیندا اے کہ اوہ مر وی سکدا اے۔‏

 جے توانوں ایہہ بیماری اے یاں فیر کھان پِین بارے کوئی ہور مسئلہ اے تے کسے توں مدد ضرور لوَو۔‏ تُسی اپنے ماں پیو یاں کسے بھروسےمند دوست نال گل بات کر سکدے او۔‏ پاک کلام وچ لکھیا اے کہ دوست ہر ویلے پیار وکھاؤندا اے تے بھرا مصیبت دے دن واسطے پیدا ہویا اے۔‏—‏امثال 17:‏17‏۔‏

رنگ روپ دی بجائے دل نُوں سوہنا بناؤ

جے دل سوہنا ہووے تے اِنسان سوہنا لگدا اے پر جے دل ای بھیڑا ہووے تے اِنسان سوہنا کیویں لگ سکدا اے۔‏ مثال لئی داؤد بادشاہ دے پترُ ابی‌سلوم بارے سوچو۔‏ پاک کلام وچ دسیا گیا اے:‏

ابی‌سلوم ورگا خوب صورت ہور کوئی نئیں سی۔‏ اوہدے وچ سِر توں لے کے پیراں تک کوئی نقص نئیں سی۔‏—‏2-‏سموئیل 14:‏25‏۔‏

پر فیر وی ایس جوان دا دل گھمنڈ،‏ لالچ تے فریب نال بھریا ہویا سی۔‏ پاک کلام چ دسیا گیا اے کہ اوہدا دل صاف نئیں سی۔‏ اوہ اِک دھوکھےباز تے قاتل سی۔‏

ایس لئی خدا دے کلام وچ سانوں ایہہ نصیحت کیتی گئی اے:‏

نویں شخصیت نُوں پا لوَو—‏کُلسّیوں 3:‏10‏۔‏

تواڈی خوب‌صورتی صرف باہروں نہ ہووے سگوں تواڈی خوب‌صورتی اندروں ہووے یعنی دل چ چھپے انسان توں۔‏—‏1-‏پطرس 3:‏3،‏ 4‏۔‏

سوہنا دِسن دی خواہش رکھنا کوئی بُری گل نئیں۔‏ پر تواڈی شخصیت تواڈے رنگ روپ نالوں بوہتی اہم اے۔‏ لوکاں نُوں تواڈے مضبوط یاں خوب‌صورت جسم نالوں تواڈیاں صفتاں دیر تک یاد رہن گیاں۔‏ فلیشیا ناں دی کُڑی دسدی اے:‏ ”‏انسان دی خوب‌صورتی بےشک دُوجیاں دیاں اکھاں چ کھب جاندی اے پر اوہدیاں صفتاں تے چنگا چال‌چلن اوہناں دے دلاں وچ سدا رہندا اے۔‏“‏

اپنے رنگ روپ بارے اپنی سوچ نُوں پرکھو

کیہہ تُسی اکثر اپنے رنگ روپ بارے مایوس رہندے او؟‏

کیہہ کدی تُسی اپنے نین نقش سنوارن لئی پلا‌سٹک سرجری کراؤن بارے یاں اپنی جسامت نُوں سوہنا بناؤن لئی سخت ڈائٹنگ کرن بارے سوچیا اے؟‏

جے توانوں موقع ملے تے تُسی ایہناں وچوں کیہہ بدلنا چاہوو گے؟‏ (‏دائرہ لاؤ)‏

  • اپنا قد

  • اپنا وزن

  • اپنے وال

  • اپنی جسامت

  • اپنا چہرہ

  • اپنی رنگت

جے تُسی پہلے دو سوالاں دا جواب ”‏ہاں“‏ دِتا اے تے تیجے سوال وچ تِن یاں ایس توں بوہتیاں چیزاں تے دائرہ لایا اے تے ایہدا مطلب اے کہ شاید دُوجے توانوں ایناں کوجھا نئیں سمجھدے جِناں تُسی اپنے آپ نُوں سمجھ دے او۔‏ تُسی بڑی اسانی نال سوہنا دِسن دی فکر وچ پھس سکدے او۔‏—‏1-‏سموئیل 16:‏7‏۔‏