معلومات چھیتی وکھاؤ

مضموناں دی لسٹ وکھاؤ

 سوال 1

مَیں کیہو جہی شخصیت دا مالک آں؟‏

مَیں کیہو جہی شخصیت دا مالک آں؟‏

یاد رکھو

جے توانوں پتہ اے کہ تُسی کیہو جہی شخصیت دے مالک او تے کیہڑے اصولاں تے چلنا چاہندے او تے فیر تُسی مشکل گھڑیاں وچ وی چنگے فیصلے کرو گے۔‏

تُسی کیہہ کر دے؟‏

فرض کرو کیرن نُوں پارٹی چ آیاں حالے دس منٹ ای ہوئے نیں کہ اوہنوں پچھوں اِک جانی پچھانی آواز آؤندی اے۔‏

‏”‏تُوں ایتھے کلّی کھلوتی کیہہ کر رہی ایں؟‏“‏

جیویں ای کیرن مُڑ دی اے،‏ اوہنوں اوہدی سہیلی ماریہ نظر آؤندی اے۔‏ ماریہ دے ہتھ وچ دو بیئر دیاں کھلیاں بوتلا‌ں نیں۔‏ کیرن بوتلا‌ں نُوں ویکھدیاں سار ای سمجھ جاندی اے کہ ایس ڈرنک وچ کجھ الکوحل ہونی اے۔‏ ماریہ اِک بوتل کیرن نُوں دیندے ہویاں کہندی اے:‏ ”‏یار پی تے موج کر۔‏ تُوں ہُن کوئی بچی تے نئیں۔‏“‏

کیرن اِنکا‌ر تے کرنا چاہندی اے پر اوہدا دل نئیں من دا کہ اوہ اپنی سہیلی نُوں ناراض کرے۔‏ تے اوہ ایہہ وی نئیں چاہندی کہ اوہدی سہیلی سوچے کہ اوہ بڑی بورنگ اے۔‏ نالے کیرن سوچدی اے کہ ماریہ تے بڑی چنگی کُڑی اے۔‏ جے اوہ پی رہی اے تے فیر ایہہ کوئی بھیڑی گل نئیں۔‏ کیرن اپنے آپ نُوں کہندی اے:‏ ”‏ایہہ کیہڑا کوئی نشہ اے۔‏ صرف معمولی جیہا ڈرنک ای تے ہے۔‏“‏

جے تُسی کیرن دی تھاں ہوندے تے کیہہ کر دے؟‏

ذرا ٹھہرو تے سوچو!‏

ایہو جہے موقعے تے چنگا فیصلہ کرن لئی توانوں پتہ ہونا چاہیدا اے کہ تُسی کیہو جہی شخصیت دے مالک او تے کیہڑے اصولاں تے چلنا چاہندے او۔‏ ایس طرحاں تُسی اپنے لئی آپ فیصلے کرو گے نہ کے دُوجے۔‏—‏1-‏کُرنتھیوں 9:‏26،‏ 27‏۔‏

تُسی اپنے فیصلے آپ کرن لئی دلیر کیویں بن سکدے او؟‏ ایہدے لئی آؤ چار سوالاں تے غور کرئیے۔‏

 1 میرے چ کیہڑے گُن نیں؟‏

جے توانوں اپنیاں قابلیتاں تے خوبیاں دا پتہ اے تے فیر تواڈا اعتماد ودھے گا۔‏

پاک کلام وچوں مثال:‏ پولس رسول نے لکھیا کہ مَیں اناڑیاں وانگوں بولنا واں پر فیر وی علم دے لحاظ نال اناڑی نئیں آں۔‏ (‏2-‏کُرنتھیوں 11:‏6‏)‏ پولس رسول پاک صحیفیاں نُوں بڑی چنگی طرحاں سمجھ دے سن ایس لئی جدوں لوکاں نے اوہناں دے خلا‌ف گلاں کیتیاں تے اوہ دل نئیں ہارے۔‏ اوہناں نے لوکاں دیاں گلاں دی وجہ توں اپنا اعتماد گھٹن نہ دِتا۔‏—‏2-‏کُرنتھیوں 10:‏10؛‏ 11:‏5‏۔‏

اپنے آپ نُوں پرکھو: تھلے اپنی کوئی قابلیت لکھو۔‏

ہُن اپنی کوئی خوبی لکھو۔‏ (‏مثال لئی،‏ کیہہ تُسی کھلے دل والے او؟‏ بھروسےمند او؟‏ وقت دے پابند او؟‏)‏

2 میرے چ کیہڑیاں کمیاں نیں؟‏

جے کسے زنجیر دی اِک کڑی کمزور ہووے تے اوہ ساری زنجیر نُوں کمزور بنا سکدی اے۔‏ ایسے طرحاں تواڈی کوئی کمی تواڈی ساری شخصیت نُوں کمزور بنا سکدی اے۔‏

پاک کلام وچوں مثال:‏ پولس رسول نُوں اپنیاں کمیاں دا پتہ سی۔‏ اوہناں لکھیا کہ مَیں دلوں تے خدا دی شریعت نُوں بڑا پسند کرنا واں پر میرے جسم وچ اِک ہور شریعت اے جیہڑ‌ی میرے ذہن دی شریعت نال جنگ کر دی اے تے مینوں اوس گُناہ دی شریعت دا غلا‌م بنا دیندی اے جیہڑ‌ی میرے جسم وچ اے۔‏—‏رومیوں 7:‏22،‏ 23‏۔‏

اپنے آپ نُوں پرکھو: توانوں کیہڑیاں کمیاں نُوں دُور کرن دی لوڑ اے؟‏

 3 میرے منصوبے کیہہ نیں؟‏

کیہہ تُسی کسے ٹیکسی وچ بیٹھ کے ڈرائیور نُوں ایہہ کہوو گے کہ اوہ اوہدوں تک اِکو ای تھاں تے گھم دا رہوے جدوں تک پٹرول ختم نہ ہو جاوے؟‏ ایہہ تے بیوقوفی ہوئے گی تے پیسے وی اُجڑن گے۔‏ تے تُسی اپنی منزل تے وی نئیں پہنچو گے۔‏

سبق؟‏ جے تُسی منصوبے بناؤ گے تے فیر تُسی ایدھر اودھر نئیں بھٹکو گے۔‏ سگوں تواڈے سامنے اِک منزل ہووے گی تے توانوں پتہ ہووے گا کہ تُسی اوتھوں تک کیویں پہنچنا اے۔‏

پاک کلام وچوں مثال:‏ پولس نے لکھیا کہ مَیں انھے وا نئیں نس دا۔‏ (‏1-‏کُرنتھیوں 9:‏26‏)‏ ایدھر اودھر بھٹکن دی بجائے پولس نے منصوبے بنائے تے فیر اوہناں نُوں پورا کرن لئی محنت کیتی۔‏—‏فِلپّیوں 3:‏12-‏14‏۔‏

اپنے آپ نُوں پرکھو: تھلے تِن منصوبے لکھو جیہڑ‌ے تُسی اگلے سال وچ پُورے کرنا چاہندے او۔‏

4 مَیں کنہاں گلاں تے ایمان رکھنا واں؟‏

جے تُسی اِک مضبوط شخصیت دے مالک او تے فیر تُسی اِک مضبوط جڑاں والے درخت وانگوں او جیہڑ‌ا وڈے توں وڈے طوفان وچ وی نئیں ڈولدا۔‏

ایمان توں بغیر تُسی ڈانوانڈول رہوو گے۔‏ جیویں گِرگٹ رنگ بدلدا رہندا اے تُسی وی اپنے ساتھیاں دے رنگ وچ رنگن لئی اپنے فیصلے بدل دے رہوو گے۔‏ ایس توں صاف پتہ چلے گا کہ تواڈی اپنی کوئی پچھان نئیں۔‏

ایہدی بجائے جے تُسی اپنے ایمان مطابق چلدے او تے فیر بھانویں دُوجے جو مرضی کرن تواڈی اپنی پچھان بنی رہوے گی۔‏

پاک کلام وچوں مثال:‏ دانی‌ایل نبی حالے جوان ای سن کہ اوہ اپنے ماپیاں تو وِچھڑ گئے پر فیر وی اوہناں نے اپنے دل وچ پکا ارادہ کیتا ہویا سی کہ اوہ خدا دے حکم من دے رہن گے۔‏ (‏دانی‌ایل 1:‏8‏)‏ ایس طرحاں اوہ اپنے ایمان تے قائم رہے تے وکھایا کہ اوہ اصولاں دے پکے نیں۔‏

اپنے آپ نُوں پرکھو:‏ تُسی کیہڑیاں گلاں تے ایمان رکھ دے او؟‏ مثال لئی،‏ کیہہ تُسی خدا نُوں من دے او؟‏ جے ہاں تے کیوں؟‏ تواڈے کول کیہڑا ثبوت اے کہ اوہ موجود اے؟‏

کیہہ توانوں یقین اے کہ خدا دے اصولاں تے چلن وچ تواڈا ای بھلا اے؟‏ جے ہاں تے کیوں؟‏

تے فیر تُسی کیہہ سکھیا؟‏ کیہہ تُسی اِک سُکے پتے وانگوں بننا چاہندے او جیہڑ‌ا ذرا جہی ہوا چلن تے ایدھر اودھر اُڈدا پھر دا اے یاں فیر اِک مضبوط درخت وانگوں بننا چاہندے او جیہڑ‌ا زوردار طوفان وچ وی کھلوتا رہندا اے۔‏ ایس لئی اپنی اِک پچھان بنائی رکھو۔‏ ایس طرحاں توانوں ایس سوال دا جواب مِل جاوے گا کہ مَیں کیہو جہی شخصیت دا مالک آں؟‏