معلومات چھیتی وکھاؤ

مضموناں دی لسٹ وکھاؤ

 سوال 4

مَیں اپنیاں غلطیاں کیویں سدُھار سکنا واں؟‏

مَیں اپنیاں غلطیاں کیویں سدُھار سکنا واں؟‏

یاد رکھو

جے تُسی اپنیاں غلطیاں نوں مننا سکھو گے تے تُسی زیادہ ذمےدار تے بھروسےمند بن جاؤ گے۔‏

تُسی کیہہ کر دے؟‏

فرض کرو ایرک اپنے دوستاں نال کھیڈ رہیا اے۔‏ اوہ اپنے دوست ول گیند سُٹ دا اے تے اوہدے کولوں گوانڈیاں دی کار دا شیشہ ٹُٹ جاندا اے۔‏

جے تُسی ایرک دی تھاں ہوندے تے کیہہ کر دے؟‏

ذرا ٹھہرو تے سوچو!‏

تواڈے کول تِن آپشن نیں:‏

  1. نس جاندے۔‏

  2. کسے ہور دا ناں لا دیندے۔‏

  3. گوانڈی نوں سچ سچ دس دیندے تے نقصان بھرن لئی کہندے۔‏

آپشن A نوں چُننا شاید توانوں اسان لگے۔‏ پر اپنیاں غلطیاں نوں مننا ہمیشاں تواڈے بھلے لئی ہوندا اے بھانویں معاملہ شیشہ ٹُٹن دا ہووے یاں کوئی ہور۔‏

 اپنیاں غلطیاں نُوں منن دے فائدے

  1. اپنیاں غلطیاں منن نال اَسی ایمانداری دی راہ تے چلنے آں۔‏

    پاک کلام وچ لکھیا اے کہ اَسی ہر گل چ ایمانداری نال کم لینا چاہنے آں۔‏—‏عبرانیوں 13:‏18‏۔‏

  2. اپنیاں غلطیاں منن والیاں نُوں اکثر لوک معاف کر دیندے نیں۔‏

    پاک کلام وچ لکھیا اے کہ جیہڑ‌ا اپنے گناہ لکاؤندا اے کامیاب نئیں ہوئے گا پر جیہڑ‌ا اوہناں نُوں من کے چھڈ دیندا اے اوہدے تے رحمت ہووے گی۔‏—‏امثال 28:‏13‏۔‏

  3. سب توں ودھ کے خدا خوش ہووے گا۔‏

    پاک کلام وچ لکھیا اے کہ بُری راہ تے چلن والیاں توں رب نفرت کردا اے پر سدھی راہ تے چلن والیاں نُوں اوہ اپنے راز دسدا اے۔‏—‏امثال 3:‏32‏،‏ اُردو جیو ورشن۔‏

20 سال دی کرینہ دا تیز گڈی چلاؤندیاں چلا‌ن ہو گیا تے اوہنے ایہہ گل اپنے ڈیڈی نُوں نہ دسی۔‏ پر اوہ بوہتی دیر ایس گل تے پردہ نہ پا سکی۔‏ اوہ دسدی اے:‏ ”‏سال بعد ای میرے ڈیڈی نُوں پتہ چل گیا کہ میرا چلا‌ن ہویا سی،‏ فیر تے میری شامت ای آ گئی۔‏“‏

ایہدے توں کیہہ سبق مِلدا اے؟‏ کرینہ دسدی اے:‏ ”‏اپنیاں غلطیاں تے پردہ پاؤن نال کم ہمیشاں وِگڑ جاندے نیں۔‏ کدی نہ کدی سانوں اپنیاں غلطیاں دا نتیجہ بھگتنا پیندا اے۔‏“‏

اپنیاں غلطیاں توں سکھو

پاک کلام وچ لکھیا اے کہ اَسی سارے بار بار غلطی کرنے آں۔‏ (‏یعقوب 3:‏2‏)‏ پر اَسی سکھ لیا اے کہ اپنیاں غلطیاں نُوں مننا ای کافی نئیں سگوں سانوں ایہناں دا فوراً اِقرار کرنا چاہیدا اے۔‏ ایہہ فروتنی تے سمجھ‌داری دی نشانی ہووے گی۔‏

اپنیاں غلطیاں نُوں منن دے نال نال سانوں ایہناں توں سبق وی سکھنا چاہیدا اے۔‏ وِیرا ناں دی اِک کُڑی دسدی اے:‏ ”‏مَیں اپنی ہر غلطی توں کجھ نہ کجھ سکھنی آں۔‏ ایس طرحاں میرے اندر بہتری آؤندی اے تے مَیں اگلی وار ایہو جہی غلطی کرن توں بچنی آں۔‏“‏ آؤ ویکھئے کہ تُسی اِنج کیویں کر سکدے او۔‏

تُسی اپنے ڈیڈی دی موٹر سائیکل لے کے گئے تے راہ وچ کِتے ٹھوک دِتی۔‏ ہُن تُسی کیہہ کرو گے؟‏

  • چپ وٹ لوَو گے تے سوچو گے کہ ڈیڈی نُوں پتہ نئیں چلے گا۔‏

  • اپنے ڈیڈی نُوں سچ سچ دس دوو گے۔‏

  • اپنے ڈیڈی نُوں دس دوو گے پر ناں کسے ہور دا لا دوو گے۔‏

تُسی ٹیسٹ وچ فیل ہو گئے کیونکہ تُسی چنگی تیاری نئیں سی کیتی۔‏ ہُن تُسی کیہہ کرو گے؟‏

  • کہوو گے کہ پیپر ای بڑا مشکل سی۔‏

  • من لوَو گے کہ تُسی محنت نئیں کیتی۔‏

  • کہوو گے کہ ٹیچر نے بےاِنصافی کیتی۔‏

اپنیاں غلطیاں بارے سوچدے رہنا اِنج ای اے جیویں گڈی چلاؤندیاں شیشے وچ پچھے ویکھدے رہنا۔‏

 ذرا ایہناں دونواں مثالاں تے فیر غور کرو۔‏ ہُن فرض کرو کہ تُسی اپنے ڈیڈی تے ٹیچر دی تھاں او۔‏ جے تواڈا بیٹا یاں سٹوڈنٹ اپنی غلطی فوراً من لیندا تے تُسی کیہہ محسوس کردے؟‏ جے اوہ اپنی غلطی لکا لیندے تے فیر تُسی کیہہ سوچدے؟‏

ہُن ذرا اوس غلطی بارے سوچو جیہڑ‌ی تُسی پچھلے سال کیتی سی تے تھلے دِتے سوالاں دے جواب دوو۔‏

تُسی کیہڑی غلطی کیتی سی؟‏ ایس غلطی بارے تُسی کیہہ کیتا؟‏

  • ایہنوں چھپا لیا۔‏

  • کسے ہور تے پا دِتی۔‏

  • ایہنوں فٹافٹ من لیا۔‏

جے تُسی غلطی نئیں منی تے فیر تُسی کیہہ محسوس کیتا؟‏

  • مینوں چنگا لگا کیونکہ میری غلطی دا کسے نُوں پتہ نئیں چلیا۔‏

  • مینوں پچھتاوا ہویا کیونکہ مینوں سچ سچ دسنا چاہیدا سی۔‏

تُسی اوس مسئلے نُوں ہور چنگی طرحاں کیویں حل کر سکدے سو؟‏

تُسی اپنی غلطی توں کیہہ سبق سکھیا؟‏

تواڈے خیال وچ

کجھ لوک اپنیاں غلطیاں کیوں نئیں من دے؟‏

جے تُسی ہمیشاں اپنیاں غلطیاں تے پردہ پاؤندے او تے لوک تواڈے بارے کیہہ سوچن گے پر جے تُسی اپنیاں غلطیاں من لیندے او تے فیر اوہ تواڈے بارے کیہہ محسوس کرن گے؟‏—‏لُوقا 16:‏10‏۔‏