معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

نوجواناں دے 10 سوال تے ایہناں دے جواب

 سوال 6

مَیں اپنے ساتھیاں دے دباؤ دا مقابلہ کیویں کر سکنا واں؟‏

مَیں اپنے ساتھیاں دے دباؤ دا مقابلہ کیویں کر سکنا واں؟‏

یاد رکھو

جے تُسی اپنے اصولاں دے پکے او تے فیر تُسی دُوجیاں نُوں اپنے تے حاوی نئیں ہون دوو گے تے اپنے فیصلیاں تے قائم رہوو گے۔‏

تُسی کیہہ کردے؟‏

فرض کرو برائن دے دو دوست اوہدے کول آؤندے نیں جنہاں نُوں ویکھ کے اوہ پریشان ہو جاندا اے۔‏ ایس ہفتے اوہناں نے دو واری برائن نُوں سگریٹ پِین لئی مجبور کیتا اے۔‏ تے ہُن اوہ تیجی واری ایہہ کرنا چاہ رہے نیں۔‏

پہلا منڈُا کہندا اے:‏

‏”‏جناب!‏ اَج فیر کلّے کھلوتے او؟‏ آؤ توانوں اِک بیلی نال ملا‌ئیے۔‏“‏

منڈُا اپنی جیب وچوں اِک سگریٹ کڈھدا اے تے اَکھ مار دیاں کہندا اے:‏ ”‏ایہہ ای بیلی۔‏“‏

برائن اوس منڈُے دے ہتھ وچ سگریٹ ویکھدا اے تے اوہدی پریشانی ہور ودھ جاندی اے۔‏

برائن کہندا اے:‏ ”‏سوری،‏ مَیں تینوں پہلا‌ں وی دسیا سی کہ مَیں سگریٹ نئیں پیندا۔‏“‏

دُوجا منڈُا کہندا اے:‏ ”‏اوئے،‏ تینوں کاہدا ڈر اے۔‏“‏

برائن تھوڑا حوصلہ کر کے کہندا اے:‏ ”‏مینوں تے کوئی ڈر نئیں!‏“‏

دُوجا منڈُا اپنی بانہہ برائن دے موڈھے تے رکھدا اے تے نرمی نال کہندا اے:‏ ”‏پھڑ وی لے۔‏“‏

پہلا منڈُا سگریٹ اوہدے مُنہ کول لیاندا اے تے ہولی جہی کہندا اے:‏ ”‏اَسی کسے نُوں نئیں دساں گے تے نہ ای کسے نُوں پتہ چلے گا۔‏“‏

جے تُسی برائن دی تھاں ہوندے تے کیہہ کر دے؟‏

 ذرا ٹھہرو تے سوچو!‏

کیہہ برائن دے ساتھیاں نُوں سمجھ اے کہ اوہ کیہہ کر رہے نیں؟‏ کیہہ اوہناں نے اپنی زندگی دے فیصلے آپ کیتے نیں؟‏ بالکل نئیں۔‏ اوہ دُوجیاں دے دباؤ وچ آ گئے کیونکہ اوہ چاہندے سن کہ اوہناں دے ساتھی اوہناں نُوں پسند کرن۔‏ ایس لئی اوہ اپنے ساتھیاں ورگے بن گئے۔‏

جے تُسی ایہو جہی حالت چ ہوندے تے تُسی اپنے ساتھیاں دے دباؤ دا مقابلہ کیویں کر دے؟‏

  1. خطرے دی گھنٹی سُن لوَو

    پاک کلام چ لکھیا اے کہ ہوشیار بلا نُوں ویکھ کے چھپ جاندا اے پر بیوقوف اَگے ودھی جاندا اے تے نقصان اُٹھاؤندا اے۔‏—‏امثال 22:‏3‏۔‏

    تُسی اکثر خطرے دی گھنٹی پہلے ای سُن لیندے او۔‏ مثال لئی تُسی ویکھدے او کہ تواڈے سکول دے کجھ بچے تھوڑی دُور کھلوتے سگریٹ پی رہے نیں۔‏ خطرے توں خبردار ہون دی وجہ توں تُسی ایہدا سامنا کرن لئی تیار ہو جاؤ گے۔‏

  2. انجام بارے سوچو

    پاک کلام چ لکھیا اے کہ اپنے ضمیر نُوں صاف رکھو۔‏—‏1-‏پطرس 3:‏16‏۔‏

    خود نُوں پچھو:‏ ”‏جے مَیں اپنے ساتھیاں دے پچھے چلا‌ں گا تے ایہدا میری زندگی تے کیہہ اثر پوے گا؟‏“‏ ایہہ سچ اے کہ وقتی طور تے تواڈے ساتھی توانوں پسند کرن گے۔‏ پر اَگے چل کے ایہدا تواڈی زندگی تے کیہہ اثر ہووے گا؟‏ کیہہ تُسی صرف اپنے ساتھیاں نُوں خوش کرن لئی اپنی پچھان قربان کرن لئی راضی ہو جاؤ گے؟‏—‏خروج 23:‏2‏۔‏

  3. فیصلہ کرن چ دیر نہ کرو

    پاک کلام وچ لکھیا اے کہ دانا خبردار رہندا اے۔‏—‏امثال 14:‏16‏۔‏

    اَج نئیں تے کل تواڈی زندگی وچ ایسا موڑ آئے گا جدوں توانوں اپنے فیصلے آپ کرنے پین گے جنہاں دا انجام چنگا یاں بھیڑا ہووے گا۔‏ پاک کلام وچ یوسف،‏ ایوب تے یسوع مسیح بارے دسیا گیا اے کہ اوہناں نے صحی فیصلے کیتے۔‏ پر قائن،‏ عیسو،‏ تے یہوداہ اِسکریوتی نے غلط فیصلے کیتے۔‏ تُسی کیہو جہے فیصلے کرو گے؟‏

پاک کلام وچ لکھیا اے کہ جیہڑ‌ا چھوٹے معاملیاں وچ وفادار اے اوہ وڈے معاملیاں وچ وی وفادار اے۔‏ (‏لُوقا 16:‏10‏)‏ جے تُسی کسے فیصلے دے انجام بارے پہلے توں سوچ لیندے او تے فیر تُسی اسانی نال دُوجیاں نُوں دس سکو گے کہ تُسی فلا‌ناں کم کیوں نئیں کردے۔‏ ایہدا توانوں فائدہ ہوئے گا،‏ نقصان نئیں۔‏

فکر نہ کرو،‏ توانوں اپنے ساتھیاں نُوں لیکچر دین دی لوڑ نئیں۔‏ کسے کم توں انکا‌ر کرنا ای کافی اے۔‏ تُسی صاف صاف کہہ سکدے او:‏

  • ‏”‏مینوں مجبور نہ کرو!‏“‏

  • ‏”‏مَیں ایہو جہے کم نئیں کردا!‏“‏

  • ‏”‏توانوں تے پتہ اے کہ مَیں ایہہ کم کیوں نئیں کردا!‏“‏

گل صرف اینی اے کہ فوراً جواب دوو تے پُورے یقین نال دوو۔‏ جے تُسی اِنج کرو گے تے اوہ بوہت چھیتی تواڈا پچھا چھڈ دین گے۔‏

 طعنے یاں مذاقاں ویلے تواڈا جواب

جے تُسی اپنے ساتھیاں دے دباؤ چ آ جاؤ گے تے تُسی اِک ایسے روبوٹ بن جاؤ گے جدا ریموٹ کنٹرول اوہناں دے ہتھ وچ ہووے گا۔‏

جے تواڈے ساتھی تواڈا مذاق اُڈاؤن تے تُسی کیہہ کرو گے؟‏ شاید اوہ کہن کہ ”‏تُوں تے بوہت ای ڈرپوک ایں۔‏“‏ ایہو جیہا مذاق کرکے یا طعنہ مار کے اوہ اصل وچ تواڈے تے دباؤ پانا چاہندے نیں۔‏ ایس موقعے تے تُسی کیہہ کرو گے؟‏ تواڈے کول دو آپشن نیں۔‏

  • طنز نُوں دل تے نہ لاؤ۔‏ (‏تُسی کہہ سکدے او:‏ ”‏تُسی صحی کہہ رہے او،‏ مَیں واقعی ڈرپوک آں۔‏“‏ فیر دسو کہ تُسی اوہ کم کیوں نئیں کرنا چاہندے جیہڑ‌ا اوہ تواڈے کولوں کراؤنا چاہندے نیں۔‏)‏

  • کوئی ایسی گل کہوو کہ اوہ سوچی پے جان۔‏ اپنے اِنکا‌ر دی وجہ دسو تے گل ایس طریقے نال کرو کہ اوہ سوچن تے مجبور ہو جان۔‏ (‏مثال لئی جے اوہ توانوں سگریٹ پِین لئی کہہ رہے نیں تے تُسی کہہ سکدے او:‏ ”‏نئیں یار،‏ مَیں حالے مرنا نئیں چاہندا۔‏“‏)‏

جے تواڈے ساتھی طعنے مارن توں باز نئیں آؤندے تے اوتھوں چلے جاؤ۔‏ یاد رکھو کہ جِناں چِر تُسی اوہناں کول کھلوتے رہوو گے،‏ تواڈے اُتے دباؤ ودھدا جاوے گا۔‏ اوتھوں چلے جان نال تُسی ظاہر کر دے او کہ تُسی اپنے اصولاں دے پکے او۔‏

اصل چ کسے حد تک توانوں اپنے ساتھیاں دے دباؤ دا سامنا کرنا پوے گا۔‏ پر فیصلہ تواڈے ہتھ وچ اے کہ تُسی اوہناں دی گل منو گے یاں نئیں۔‏ اوہناں نُوں ایہہ موقع نہ دوو کہ اوہ توانوں اپنیاں اُنگلا‌ں تے نچان۔‏ تے ایویں کسے دیاں گلاں چ وی نہ آؤ۔‏—‏یشوع 24:‏15‏۔‏