معلومات چھیتی وکھاؤ

مینیو چھیتی وکھاؤ

یہوواہ دے گواہ

پنجابی (شاہ مُکھی)

کیہہ تُسی سچائی جاننا چاہندے او؟‏

کیہہ تُسی سچائی جاننا چاہندے او؟‏

صدیاں توں لوک زندگی نال جُڑے ضروری سوال پچھدے آئے نیں،‏ پر کئی لوکاں نوں ایہناں دے صحی جواب نئیں ملے۔‏ کیہہ تُسی ایہناں سوالاں بارے کدی سوچیا اے:‏

  • کیہہ خدا نوں ساڈی فکر اے؟‏

  • کیہہ جنگا‌ں تے دُکھ تکلیفاں کدی ختم ہون گیاں؟‏

  • مرن توں بعد کیہہ ہوندا اے؟‏

  • کیہہ ساڈے فوت ہو چکے عزیز دبارہ زندہ ہون گے؟‏

  • میں کیویں دعا کراں کہ خدا میری سنے؟‏

  • مینوں خوشی کیویں مل سکدی اے؟‏

توانوں ایہناں سوالاں دے جواب کتھوں مل سکدے نیں؟‏ جے تُسی عالماں کولوں پچھو یاں کتاباں وچوں ویکھو تے توانوں فرق فرق جواب ملن گے۔‏ ایہدے علا‌وہ کتاباں دی صلا‌ح پرانی ہو جاندی اے تے لوک جیس گل نوں اج سچ من دے نیں،‏ کل اوسے گل نوں رد کر کے کوئی ہور خیال پیش کر دیندےنیں۔‏

پر اِک کتاب وچ سانوں زندگی دے ضروری سوالاں دے صحی صحی جواب مل سکدے نیں۔‏ یسوع مسیح نے خدا دے حضور ایہہ دُعا کیتی کہ تیرا کلام سچائی اے۔‏ (‏یوحنا 17:‏17‏)‏ بےشک خدا دا ایہہ کلام بائبل اے تے اَسی ایہدی رہنمائی تے پورا بھروسہ کر سکنے آں۔‏ آؤ اَسی ویکھنے آں کہ خدا پاک کلام وچ اُتے دِتے گئے سوالاں دے کیہہ جواب دیندا اے۔‏

 کیہہ خدا نوں ساڈی فکر اے؟‏

لوک ایہہ سوال کیوں پچھدے نیں:‏ اَسی ظلم تے بےانصافی نال بھری دُنیا وچ رہنے آں۔‏ بوہت سارے مذہب سکھاندے نیں کہ ایہہ خدا دی مرضی اے کہ انسان دُکھ تکلیفاں سہن۔‏

پاک کلام دی سچائی:‏ خدا کدی وی بُرائی لئی ذمےوار نئیں ہوندا۔‏ پاک کلام وچ لکھیا اے کہ ایہہ ہو نئیں سکدا کہ خدا بُرائی کرے تے قادرمطلق کوئی غلط کم کرے۔‏ (‏ایوب 34:‏10‏)‏ خدا چاہندا اے کہ انسان ہمیشاں خوش رہن۔‏ ایس لئی یسوع مسیح نے خدا نوں دُعا وچ کہیا کہ تیری بادشاہی آئے۔‏ تیری مرضی جیویں اسمان تے پوری ہوندی اے زمین تے وی پوری ہوئے۔‏ (‏متی 6:‏9،‏ 10‏)‏ خدا ساڈی اینی فکر کر دا اے کہ اوہنے اِک بوہت وڈی قربانی دا انتظام کیتا اے تاکہ ساڈا مستقبل شاندار ہوئے تے اوہدی مرضی پوری ہوئے۔‏—‏یوحنا 3:‏16‏۔‏

ہور سکھن لئی پیدایش 1:‏26-‏28؛‏ یعقوب 1:‏13 تے 1-‏پطرس 5:‏6،‏ 7 نوں وی ویکھو۔‏

کیہہ جنگا‌ں تے دُکھ تکلیفاں کدی ختم ہون گیاں؟‏

لوک ایہہ سوال کیوں پچھدے نیں:‏ لکھاں لوک جنگا‌ں وچ اپنیاں زندگیاں گنوا رہے نیں۔‏ ساڈے وچوں کوئی ایسا انسان نئیں جیہڑ‌ا کدی دُکھ تکلیفاں دا شکا‌ر نہ ہویا ہووے۔‏

پاک کلام دی سچائی:‏ خدا نے وعدہ کیتا اے کہ اوہ ساری زمین اُتے امن تے سلا‌متی لیائے گا۔‏ خدا دی بادشاہی وچ کوئی وی جنگ کرنا نئیں سکھے گا۔‏ سگوں اوہدی حکومت وچ لوک اپنیاں تلواراں نوں توڑ کے داتریاں بنا دین گے۔‏ (‏یسعیاہ 2:‏4‏)‏ خدا ہر طرحاں دی بےانصافی تے دُکھ تکلیفاں نوں مٹا دوے گا۔‏ پاک کلام وعدہ کر دا اے کہ خدا اوہناں دیاں اکھاں توں ہر اِک آنسو پونجھ دوے گا تے فیر کوئی نئیں مرے گا۔‏ نہ ای سوگ منایا جائے گا،‏ نہ ای کوئی روئے گا تے کسے نوں کوئی دُکھ درد نئیں ہوئے گا۔‏ پہلیاں چیزاں جیویں کہ اج دیاں تکلیفاں تے بےانصافی ختم ہو جان گیاں۔‏—‏مکا‌شفہ 21:‏3،‏ 4‏۔‏

ہور سکھن لئی زبور 37:‏10،‏ 11؛‏ 46:‏9 تے میکا‌ہ 4:‏1-‏4 نوں وی ویکھو۔‏

مرن توں بعد کیہہ ہوندا اے؟‏

لوک ایہہ سوال کیوں پچھدے نیں:‏ زیادہ تر مذہباں وچ ایہہ سکھایا جاندا اے کہ مرن توں بعد انسان دی رُوح جسم وچوں نکل کے زندہ رہندی اے۔‏ کجھ لوک من دے نیں کہ مُردے سانوں نقصان پہنچا سکدے نیں یاں خدا بُرے لوکاں نوں دوزخ دی اَگ وچ ہمیشاں لئی تڑپاندا اے۔‏

پاک کلام دی سچائی:‏ مرن توں بعد انسان پوری طرحاں ختم ہو جاندا اے تے اوہدے وچ کوئی شے زندہ نئیں رہندی۔‏ خدا دا کلام دسدا اے کہ مُردے کجھ وی نئیں جان دے۔‏ (‏واعظ 9:‏5‏)‏ اوہ نہ سن سکدے،‏ نہ بول سکدے،‏ نہ ویکھ سکدے تے نہ ای سوچ سکدے نیں۔‏ ایس لئی اوہ نہ تے سانوں نقصان پہنچا سکدے تے نہ ای ساڈی مدد کر سکدے نیں—‏زبور 146:‏3،‏ 4‏۔‏

ہور سکھن لئی پیدایش 3:‏19 تے واعظ 9:‏6،‏ 10 نوں وی ویکھو۔‏

 کیہہ ساڈے فوت ہو چکے عزیز دبارہ زندہ ہون گے؟‏

لوک ایہہ سوال کیوں پچھدے نیں:‏ اَسی نہ صرف آپ زندہ رہنا چاہنے آں سگوں ساڈی ایہہ وی خواہش اے کہ اَسی اپنے عزیزاں نال خوشیاں بھری زندگی گزارئیے۔‏ ایس لئی سانوں موت دی نیندر سُتے اپنے عزیزاں دی بوہت یاد آؤندی اے تے اَسی اوہناں نوں ویکھن لئی ترسنے آں۔‏

پاک کلام دی سچائی:‏ یسوع مسیح نے وعدہ کیتا سی کہ جیہڑ‌ے قبراں وچ نیں اوہ زندہ کیتے جان گے۔‏ (‏یوحنا 5:‏28،‏ 29‏)‏ ایس لئی اَسی یقین کر سکنے آں کہ بوہت سارے مُردے جی اُٹھن گے۔‏ خدا دے مقصد دے مطابق ایہناں نوں زمین تے فردوس وچ ہمیشاں زندہ رہن دا موقع ملے گا۔‏ (‏یسعیاہ 65:‏21-‏25‏)‏ خدا وعدہ کردا اے کہ اوس ویلے اوہدے حکم منن والے لوکاں اُتے بیماری تے موت دا سایہ نئیں ہوئے گا۔‏ پاک کلام وچ لکھیا اے کہ نیک لوک زمین دے وارث ہون گے تے ایہدے اُتے ہمیشاں تک وسدے رہن گے۔‏—‏زبور 37:‏29‏۔‏

ہور سکھن لئی ایوب 14:‏14،‏ 15؛‏ لوقا 7:‏11-‏17 تے اعمال 24:‏15 نوں وی ویکھو۔‏

میں کیویں دعا کراں کہ خدا میری سنے؟‏

لوک ایہہ سوال کیوں پچھدے نیں:‏ ہر مذہب دے لوک دُعا کردے نیں۔‏ پر کئی لوکاں نوں لگدا اے کہ اوہناں نوں اپنیاں دُعاواں دا جواب نئیں ملدا۔‏

پاک کلام دی سچائی:‏ یسوع مسیح نے آکھیا سی کہ سانوں رٹیاں رٹائیاں دُعاواں نئیں کرنیاں چاہیدیاں۔‏ اوہناں نے کہیا کہ دُعا کر دے ویلے اِکو ای گل بار بار نہ کہوو۔‏ (‏متی 6:‏7‏)‏ جے اَسی چاہنے آں کہ خدا ساڈیاں دُعاواں قبول کرے تے سانوں کیہہ کرن دی ضرورت اے؟‏ ساڈے لئی ایہہ جاننا ضروری اے کہ اوہدی مرضی کیہہ اے تے فیر سانوں اوہدی مرضی دے مطابق دُعا کرنی چاہیدی اے۔‏ پاک کلام صاف صاف دسدا اے کہ جے اَسی اوہدی مرضی دے مطابق کجھ منگنے آں تے اوہ ساڈی سُن دا اے۔‏—‏1-‏یوحنا 5:‏14‏۔‏

ہور سکھن لئی زبور 65:‏2؛‏ یوحنا 14:‏6،‏ 14؛‏ 1-‏یوحنا 3:‏22 نوں وی ویکھو۔‏

مینوں خوشی کیویں مل سکدی اے؟‏

لوک ایہہ سوال کیوں پچھدے نیں:‏ بوہت سارے لوک من دے نیں کہ دولت،‏ شہرت تے خوبصورتی نال ای خوشی ملدی اے۔‏ ایسے لئی اوہ ہر ویلے ایہناں چیزاں نوں حاصل کرن دے چکراں وچ رہندے نیں۔‏ جے اوہ ایہہ چیزاں حاصل کر وی لین تے فیر وی اوہناں نوں خوشی نئیں ملدی۔‏

پاک کلام دی سچائی:‏ یسوع نے خوشی دا راز دسدیاں کہیا کہ خوش نیں اوہ جیہڑ‌ے خدا دا کلام سُن دے تے اوہدے تے عمل کردے نیں۔‏ (‏لوقا 11:‏28‏)‏ سانوں دلی خوشی صرف اوہدوں ملے گی جدوں اَسی خدا تے اوہدے کماں بارے سچائی سکھاں گے۔‏ ایہہ سچائی پاک کلام بائبل وچ پائی جاندی اے۔‏ پاک کلام پڑھ کے سانوں پتہ چلے گا کہ سانوں زندگی وچ کیہڑیاں چیزاں نوں اہمیت دینی چاہیدی اے تے کیہڑیاں نوں نئیں۔‏ ایہدی رہنمائی تے چل کے اَسی اوہ فیصلے کراں گے جیہڑ‌ے سانوں تے خدا نوں خوش کرن گے۔‏

ہور سکھن لئی امثال 3:‏5،‏ 6،‏ 13-‏18؛‏ 1-‏تیمتھیس 6:‏9،‏ 10 نوں وی ویکھو۔‏

 ایس پرچے وچ اَسی بائبل وچوں صرف چھے سوالاں دے جواب ویکھے نیں۔‏ کیہہ تُسی ہور سوالاں دے جواب وی جاننا چاہندے او؟‏ شاید تُسی سوچیا ہووے:‏ ”‏جے خدا نوں ساڈی فکر اے تے اوہنے بُرائی تے دُکھ تکلیفاں نوں حالے تک ختم کیوں نئیں کیتا؟‏ یاں میں اپنے گھر دے ماحول نوں خوشحال کیویں بنا سکنا واں؟‏‏“‏ توانوں پاک کلام وچوں ایہناں تے بوہت سارے ہور سوالاں دے صحی جواب ملن گے۔‏

کئی لوک بائبل پڑھن توں ہچکچاندے نیں کیونکہ اوہناں نوں لگدا اے کہ ایہنوں سمجھنا بوہت مشکل اے یاں ایہنوں بدل دِتا گیا اے۔‏ پر جے تُسی بائبل وچوں اپنے سوالاں دے جواب پانا چاہندے او تے یہوواہ دے گواہ تواڈی مدد کرن لئی تیار نیں۔‏

یہوواہ دے گواہواں نے کتاب ”‏خدا دی گل سنو تے ہمیشاں دی زندگی پاؤ‏“‏ تیار کیتی اے۔‏ ایہدی مدد نال تُسی خدا دے کلام وچوں اپنے سوالاں دے صحی جواب جان سکو گے۔‏ یہوواہ دا اِک گواہ ہر ہفتے تواڈے گھر یاں فیر کسے ہور مناسب جگہ تے آ کے توانوں پاک کلام وچوں مفت سکھا سکدا اے‏۔‏ دُنیا بھر وچ لکھاں لوک ایس انتظام توں فائدہ حاصل کر رہے نیں۔‏ کئی لوکاں نے تے خوشی نال ایہہ کہیا اے:‏ ”‏مینوں سچائی مل گئی اے!‏“‏

پاک کلام دی سچائی اِک خزانے وانگوں اے کیونکہ ایہہ ساڈی زندگی نوں خوشیاں نال بھر دی اے تے سانوں سنہرے کل دی امید وی دیندی اے۔‏ ایہہ سچائی سانوں وہم،‏ جھوٹ تے ہر طرحاں دے خوف توں آزاد کردی اے۔‏ ایسے لئی یسوع نے کہیا سی کہ تُسی سچائی جانو گے تے سچائی توانوں آزاد کرے گی۔‏—‏یوحنا 8:‏32‏۔‏