معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

خدا وَلوّں خوشخبری

 سبق 14

خدا نے اِک تنظیم کیوں بنائی اے؟‏

خدا نے اِک تنظیم کیوں بنائی اے؟‏

1.‏ خدا نے اسرائیلیاں نوں اپنی قوم کیوں بنایا؟‏

خدا نے ابراہام نبی دی اولاد نوں اِک قوم بنایا تے اوہناں نوں قانون دِتے۔‏ خدا نے اوس قوم دا ناں اسرائیل رکھیا تے اوہناں نوں سچی عبادت دے نال نال اپنے کلام دی رکھوالی کرن دی ذمے واری دِتی۔‏ (‏زبور 147:‏19،‏ 20‏)‏ اسرائیلی قوم دے ذریعے ساریاں قوماں دے لوک برکتاں پا سکدے سن۔‏‏—‏پیدایش 22:‏18 نوں پڑھو۔‏

خدا نے اسرائیلیاں نوں اپنے گواہواں دے طور تے چُنیا۔‏ اوہناں دی تاریخ توں پتہ چلدا اے کہ خدا دے حکماں تے چلن دے کِنّے فائدے ہوندے نیں۔‏ (‏اِستثنا 4:‏6‏)‏ ایہو ای وجہ اے کہ اسرائیلیاں راہیں دُوسرے لوک سچے خدا نوں جان سکدے سن۔‏‏—‏یسعیاہ 43:‏10،‏ 12 نوں پڑھو۔‏

2.‏ سچے مسیحیاں نوں اِک تنظیم وچ کیوں کٹھا کیتا گیا اے؟‏

اِک وقت ایسا آیا کہ اسرائیلی خدا دی راہ توں بھٹک گئے۔‏ ایس لئی یہوواہ خدا نے اسرائیلی قوم نوں رد کر کے مسیحی کلیسیا قائم کیتی۔‏ (‏متی 21:‏43؛‏ 23:‏37،‏ 38‏)‏ ایس طرحاں اسرائیلیاں دی بجائے سچے مسیحی یہوواہ دے گواہ بن گئے۔‏‏—‏اعمال 15:‏14،‏ 17 نوں پڑھو۔‏

یسوع مسیح نے اپنے پیروکاراں نوں بادشاہی دی منادی کرن تے ساریاں قوماں دے لوکاں نوں شاگرد بناؤن دی ذمے واری سونپی۔‏ (‏متی 10:‏7،‏ 11؛‏ 24:‏14؛‏ 28:‏19،‏ 20‏)‏ اَج ایس بُری دُنیا دے آخری زمانے دوران ایہہ کم بڑے زور و شور نال ہو رہیا اے۔‏ تاریخ وچ پہلی وار یہوواہ خدا نے ساریاں قوماں دے لکھاں لوکاں نوں سچی عبادت کرن لئی کٹھا کیتا اے۔‏ (‏مکا‌شفہ 7:‏9،‏ 10‏)‏ سچے مسیحی اِک ایسی تنظیم دا حصہ نیں جدے وچ سارے اِک دُوجے دی ہمت ودھاندے تے مدد کردے نیں۔‏ بھاویں اوہ دُنیا دے کسے وی کونے وچ رہندے ہون،‏ اوہناں نوں اپنیاں عبادتاں تے اِکو جہی تلیم مِلدی اے۔‏‏—‏عبرانیوں 10:‏24،‏ 25 نوں پڑھو۔‏

 3.‏ ساڈے زمانے وچ یہوواہ دے گواہواں دی تنظیم کیویں شروع ہوئی؟‏

کجھ نیک دل مسیحیاں نے 1870 دی دہائی وچ پاک کلام دیاں سچائیاں دی کھوج کرنی شروع کیتی۔‏ ایہہ چھوٹا جیہا گروہ اوہناں سچائیاں نوں ہولی ہولی سمجھن لگ پیا جنہاں تے کافی عرصے توں پردہ پیا ہویا سی۔‏ ایہہ مسیحی جان دے سن کہ یسوع نے مسیحی کلیسیا نوں ایس لئی قائم کیتا تاکہ اوہناں دے پیروکار بادشاہی دی منادی کرن۔‏ ایس لئی اوہ وی دُنیا بھر وچ بادشاہی دی منادی کرن لگ پئے۔‏ اوہناں نے 1931 وچ ناں یہوواہ دے گواہ اپنا لیا۔‏‏—‏اعمال 1:‏8؛‏ 2:‏1،‏ 4؛‏ 5:‏42 نوں پڑھو۔‏

4.‏ یہوواہ دے گواہواں دی رہنمائی کیویں کیتی جاندی اے؟‏

پہلی صدی عیسوی وچ بزرگاں دی اِکو جماعت بوہت سارے مُلکا‌ں وچ مسیحی کلیسیاواں دی رہنمائی کردی سی۔‏ ایہہ جماعت یسوع مسیح نوں کلیسیا دا سردار من دی سی۔‏ (‏اعمال 16:‏4،‏ 5‏)‏ ایسے طرحاں اَج وی تجربہ کار بزرگاں دی اِکو جماعت دُنیا بھر وچ یہوواہ دے گواہواں دی رہنمائی کردی اے۔‏ ایس جماعت نوں گورننگ باڈی کہیا جاندا اے۔‏ ایہہ جماعت پوری دُنیا وچ یہوواہ دے گواہواں دے دفتراں دی نگرانی کردی اے۔‏ ایہناں دفتراں وچ بائبل تے مبنی رسالے تے کتاباں دا ترجمہ تقریباً 700 زباناں وچ کیتا جاندا اے تے ایہناں نوں چھاپ کے ونڈیا جاندا اے۔‏ ایس طرحاں گورننگ باڈی پوری دُنیا وچ اِک لکھ توں زیادہ کلیسیاواں نوں خدا دے کلام وچوں رہنمائی دیندی تے اوہناں دی حوصلہ افزائی کردی اے۔‏ ہر کلیسیا وچ قابل بھرا بزرگاں یاں نگہباناں دے طور تے خدمت کردے نیں تے خدا دے لوکاں دی بڑے پیار نال دیکھ بھال کر دے نیں۔‏‏—‏1-‏پطرس 5:‏2،‏ 3 نوں پڑھو۔‏

یہوواہ دے گواہواں دی تنظیم دا خاص مقصد دُنیا بھر وچ خوشخبری دی منادی کرنا تے شاگرد بنانا اے۔‏ یسوع مسیح دے رسولاں وانگوں اَسی وی گھر گھر جا کے منادی کرنے آں۔‏ (‏اعمال 20:‏20‏)‏ نالے اَسی نیک دل لوکاں نوں پاک کلام وچوں سکھن دی دعوت دینے آں۔‏ پر یہوواہ دے گواہ صرف اِک مذہبی تنظیم ای نئیں سگوں اَسی اِک وَڈّا خاندان آں۔‏ خدا ساڈا پیارا باپ اے تے اَسی سارے بھین بھراواں وانگوں اِک دُوجے نوں دِلوں پیار کرنے آں۔‏ (‏2-‏تھسلُنیکیوں 1:‏3‏)‏ ساڈا خاندان زمین تے سب توں زیادہ خوشحال اے کیونکہ اَسی خدا نوں خوش کرن تے دُوسریاں دی مدد کرن لئی اِک مُٹھ آں۔‏‏—‏زبور 33:‏12؛‏ اعمال 20:‏35 نوں پڑھو۔‏