معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

خدا وَلوّں خوشخبری

 سبق 9

تُسی اپنے گھرانے وچ خوشیاں کیویں لیا سکدے او؟‏

تُسی اپنے گھرانے وچ خوشیاں کیویں لیا سکدے او؟‏

1.‏ قانونی طور تے شادی شدہ ہونا کیوں ضروری اے؟‏

پاک کلام دی خوشخبری،‏ خوش دل خدا یہوواہ وَلّوں اے تے اوہ چاہندا اے کہ سارے خاندان خوش رہن۔‏ (‏1-‏تیمُتھیُس 1:‏11‏)‏ اوہنے ای شادی دے بندھن دی شروعات کیتی اے۔‏ قانونی طور تے شادی شدہ ہونا گھرانے دیاں خوشیاں لئی بوہت ضروری اے۔‏ ایس طرحاں میاں بیوی دا آپسی رشتہ مضبوط ہووے گا تے اوہ اِک چنگے ماحول وچ اپنے بچیاں دی پرورش کر پاؤن گے۔‏ خدا دے خادماں نوں اپنے ملک دے قانون دے مطابق اپنی شادی رجسٹر کرانی چاہیدی اے۔‏‏—‏لُوقا 2:‏1،‏ 4،‏ 5 نوں پڑھو۔‏

شادی دے بندھن بارے خدا دا نظریہ کیہہ اے؟‏ یہوواہ خدا چاہندا اے کہ میاں بیوی شادی دا بندھن زندگی بھر نبھاؤن تے اِک دُوجے دے وفادار رہن۔‏ (‏عبرانیوں 13:‏4‏)‏ اوہنوں طلا‌ق توں سخت نفرت اے۔‏ (‏ملا‌کی 2:‏16‏)‏ پر جے کسے مسیحی دا ساتھی حرامکا‌ری کرے تے خدا اوس مسیحی نوں طلا‌ق دین تے دُبارہ شادی کرن دی اجازت دیندا اے۔‏‏—‏متی 19:‏3-‏6،‏ 9 نوں پڑھو۔‏

2.‏ میاں بیوی نوں اِک دُوجے نال کیویں پیش آنا چاہیدا اے؟‏

یہوواہ خدا نے مرد تے عورت نوں شادی دے بندھن وچ اِک دُوجے دا مددگار بنایا اے۔‏ (‏پیدایش 2:‏18‏)‏ خاندان دے سربراہ دے طور تے اِک شوہر دی ذمے واری اے کہ اوہ اپنے گھرانے لئی روزی روٹی کمائے تے اوہناں نوں خدا بارے وی سکھائے۔‏ اوہنوں اپنی بیوی نال اپنے توں ودھ پیار کرنا چاہیدا اے۔‏ میاں بیوی نوں اِک دُوجے نال پیار تے عزت نال پیش آنا چاہیدا اے۔‏ بے شک میاں بیوی غلطیاں کردے نیں،‏ ایس لئی شادی دے بندھن وچ خوشیاں لیاؤن لئی ضروری اے کہ اوہ اِک دُوجے نوں معاف کرنا سکھن۔‏‏—‏اِفسیوں 4:‏31،‏ 32؛‏ 5:‏22-‏25؛‏ 1-‏پطرس 3:‏7 نوں پڑھو۔‏

 3.‏ کیہہ اِک دُوجے نوں چھڈ دینا ای مسئلیاں دا حل اے؟‏

جے تُسی شادی وچ مسئلیاں دا سامنا کر رہے او تے توانوں دونواں نوں اِک دُوجے نال پیار نال پیش آؤن لئی ہور محنت کرن دی لوڑ اے۔‏ (‏1-‏کُرنتھیوں 13:‏4،‏ 5‏)‏ ایہہ سچ اے کہ ہر شادی وچ مسئلے ہوندے نیں،‏ پر خدا دا کلام صلا‌ح دیندا اے کہ اِک دُوجے نوں چھڈن دی بجائے تُسی ایہناں نوں حل کرن دی پوری کوشش کرو۔‏‏—‏1-‏کُرنتھیوں 7:‏10-‏13 نوں پڑھو۔‏

4.‏ بچیو،‏ خدا تواڈے لئی کیہو جہی زندگی چاہندا اے؟‏

یہوواہ خدا چاہندا اے کہ تُسی خوش رہوو۔‏ اوہ توانوں سب توں چنگی صلا‌ح دیندا اے تاکہ تُسی اپنی جوانی وچ ہسدے وسدے رہوو۔‏ خدا چاہندا اے کہ تُسی اپنے ماں باپ توں سکھو کیونکہ اوہ سمجھدار نیں تے اوہناں کول زندگی دا تجربہ اے۔‏ (‏کُلسّیوں 3:‏20‏)‏ تواڈا خالق یہوواہ ایہہ وی چاہندا اے کہ تُسی اوہدا تے یسوع مسیح دا کہنا منو تاکہ تواڈی جھولی خوشیاں نال بھر جائے۔‏‏—‏واعظ 11:‏9–‏12:‏1؛‏ متی 19:‏13-‏15؛‏ 21:‏15،‏ 16 نوں پڑھو۔‏

5.‏ ماپیو،‏ تُسی اپنے بچیاں نوں خوشیاں دین لئی کیہہ کجھ کر سکدے او؟‏

توانوں سخت محنت کرنی چاہیدی اے تاکہ تُسی اپنے بچیاں لئی روٹی،‏ کپڑے تے رہائش دا انتظام کر سکو۔‏ (‏1-‏تیمُتھیُس 5:‏8‏)‏ پر جے تُسی چاہندے او کہ بچے دِلوں خوش ہون تے فیر ضروری اے کہ تُسی اوہناں نوں خدا نال پیار کرنا تے اوہدیاں راہواں تے چلنا سکھاؤ۔‏ (‏اِفسیوں 6:‏4‏)‏ خدا نال تواڈا پیار ویکھ کے بچے وی خدا نوں پیار کرنا سکھن گے۔‏ جدوں تُسی خدا دے کلام دے مطابق اوہناں دی تربیت کرو گے تے تُسی اوہناں دی سوچ نوں صحی رُخ وَل موڑ سکو گے۔‏‏—‏اِستثنا 6:‏4-‏7؛‏ امثال 22:‏6 نوں پڑھو۔‏

بچیاں نوں بڑا فائدہ ہووے گا جدوں تُسی اوہناں دی تعریف کرو گے تے اوہناں دا حوصلہ ودھاؤ گے۔‏ ایہدے علا‌وہ ضروری اے کہ تُسی اوہناں دیاں غلطیاں سدھارو تے پاک کلام دے ذریعے اوہناں دی تربیت کرو۔‏ ایس طرحاں دی تربیت اوہناں دی حفاظت کرے گی تاکہ اوہ غلط راہواں تے چل کے اپنی خوشی نہ گنوا بیٹھن۔‏ (‏امثال 22:‏15‏)‏ پر اوہناں نوں سختی تے مار کٹائی نال کدی نہ سدھارو۔‏‏—‏کُلسّیوں 3:‏21 نوں پڑھو۔‏

یہوواہ دے گواہواں نے ماپیاں تے بچیاں لئی کئی کتاباں چھاپیاں نیں۔‏ ایہناں کتاباں وچ پاک کلام وچوں صلا‌ح دِتی گئی اے جیہڑ‌ی تواڈے بڑے کم آوے گی۔‏‏—‏زبور 19:‏7،‏ 11 نوں پڑھو۔‏