معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

خدا وَلوّں خوشخبری

 سبق 8

خدا نے حالے تک بُرائی تے دُکھ تکلیفاں نوں ختم کیوں نئیں کیتا؟‏

خدا نے حالے تک بُرائی تے دُکھ تکلیفاں نوں ختم کیوں نئیں کیتا؟‏

1.‏ بُرائی کیویں شروع ہوئی؟‏

خدا نے انساناں نوں حکومت کرن دا موقع دے کے ظاہر کیتا اے کہ اوہ دُنیا دیاں مشکلا‌ں حل نئیں کر سکدے۔‏

شیطان نے پہلا جھوٹ بول کے دُنیا وچ بُرائی دی شروعات کیتی۔‏ شیطان پہلے اِک نیک فرشتہ سی،‏ پر اوہ سچائی تے قائم نئیں رہیا۔‏ (‏یوحنا 8:‏44‏)‏ اوہ چاہندا سی کہ انسان اوہدی عبادت کرن،‏ حالانکہ عبادت دا حقدار صرف خدا اے۔‏ شیطان نے پہلی عورت حوا نال جھوٹ بول کے اوہنوں اپنیاں گلاں وچ پھسایا تاکہ اوہ خدا دی بجائے اوہدا کہنا منے۔‏ حوا دیاں گلاں وچ آ کے آدم وی خدا دا نافرمان بن گیا۔‏ اوہدے ایس غلط فیصلے دی وجہ توں دُنیا وچ دُکھ تکلیفاں تے موت دی شروعات ہوئی۔‏‏—‏پیدایش 3:‏1-‏6،‏ 19 نوں پڑھو۔‏

جدوں شیطان نے خدا دا حکم توڑن لئی حوا نوں اُکسایا تے اصل وچ اوہ خدا دے حکومت کرن دے حق تے اُنگلی چُک رہیا سی۔‏ ایس طرحاں اوہنے قادرِمطلق خدا دے خلا‌ف بغاوت شروع کر دِتی۔‏ اوہدوں توں زیادہ تر انسان خدا دی حکومت نوں ٹھکرا کے شیطان دا ساتھ دے رہے نیں۔‏ ایسے لئی پاک کلام وچ شیطان نوں دُنیا دا سردار یعنی حاکم کہیا گیا اے۔‏‏—‏یوحنا 14:‏30؛‏ 1-‏یوحنا 5:‏19 نوں پڑھو۔‏

2.‏ کیہہ خدا دی مخلوق وچ کوئی نُقص سی؟‏

بالکل نئیں،‏ خدا دے کماں وچ کدی کوئی نُقص نئیں ہوندا۔‏ خدا نے فرشتیاں تے انساناں نوں ایس طرحاں بنایا سی کہ اوہ پوری طرحاں اوہدے حکماں نوں منن دے قابل سن۔‏ (‏اِستثنا 32:‏4،‏ 5‏)‏ خدا نے سانوں زندگی وچ صحی یاں غلط راہ چُنن دی آزادی دِتی اے۔‏ صحی راہ چُن کے اَسی ثبوت دینے آں کہ اَسی خدا نوں دِلوں پیار کرنے آں۔‏‏—‏یعقوب 1:‏13-‏15؛‏ 1-‏یوحنا 5:‏3 نوں پڑھو۔‏

3.‏ خدا نے حالے تک دُکھ تکلیفاں نوں ختم کیوں نئیں کیتا؟‏

یہوواہ نے کجھ عرصے لئی باغیاں نوں زمین تے حکومت کرن دا موقع دِتا اے۔‏ کیوں؟‏ ایہہ ثابت کرن لئی کہ اوہدی رہنمائی توں بغیر کوئی وی حکومت کامیاب نئیں ہو سکدی۔‏ (‏واعظ 7:‏29؛‏ 8:‏9‏)‏ ایس گل نوں چھ ہزار سالاں  دی انسانی تاریخ نے سچ کر وکھایا اے۔‏ انسانی حکومتاں جنگ،‏ جُرم بے انصافی تے بیماری نوں ختم کرن وچ ناکام رہیاں نیں۔‏‏—‏یرمیاہ 10:‏23؛‏ رومیوں 9:‏17 نوں پڑھو۔‏

پر جیہڑ‌ے لوک انساناں دیاں حکومتاں دی بجائے خدا دی حکومت نوں قبول کر دے نیں،‏ اوہناں نوں فائدے مِلدے نیں۔‏ (‏یسعیاہ 48:‏17،‏ 18‏)‏ بوہت جلد یہوواہ خدا انساناں دیاں حکومتاں نوں ختم کر دوے گا۔‏ صرف اوہ لوک زمین دے وارث ہون گے جیہڑ‌ے خدا نوں اپنا بادشاہ من دے نیں۔‏—‏یسعیاہ 11:‏9؛‏ دانی‌ایل 2:‏44 نوں پڑھو۔‏

4.‏ خدا دا صبر سانوں کیہہ کرن دا موقع دیندا اے؟‏

شیطان نے دعویٰ کیتا سی کہ انسان صرف اپنے مطلب لئی یہوواہ دی خدمت کردے نیں۔‏ پر تُسی ایس دعوے نوں جھوٹا ثابت کر سکدے او۔‏ خدا دا صبر سانوں ایہہ ظاہر کرن دا موقع دیندا اے کہ اَسی اوہدی حکومت دی حمایت کرنے آں یاں انساناں دی۔‏ ایس گل دا ثبوت زندگی وچ ساڈے کماں تے فیصلیاں توں مِلدا اے۔‏‏—‏ایوب 1:‏8-‏12؛‏ امثال 27:‏11 نوں پڑھو۔‏

5.‏ اَسی کیویں وکھا سکنے آں کہ خدا ساڈا بادشاہ اے؟‏

ساڈے فیصلیاں توں پتہ چلدا اے کہ اَسی خدا نوں اپنا بادشاہ من دے آں یاں نئیں۔‏

جدوں اَسی خدا دے کلام وچوں سکھ کے ایہدے مطابق اوہدی عبادت کرنے آں تے اَسی وکھانے آں کہ یہوواہ خدا ساڈا بادشاہ اے۔‏ (‏یوحنا 4:‏23‏)‏ ایہدے علا‌وہ یسوع مسیح وانگوں سیاست تے جنگا‌ں وچ حصہ نہ لے کے اَسی شیطان دی حکومت نوں رَد کرنے آں۔‏‏—‏یوحنا 17:‏14 نوں پڑھو۔‏

شیطان لوکاں نوں بَھیڑے تے نقصان پہنچان والے کم کرن لئی اُکساندا اے۔‏ جدوں اَسی ایہو جہے کم کرن توں انکا‌ر کرنے آں تے ہو سکدا اے کہ ساڈے کجھ دوست تے رشتے دار ساڈا مذاق اُڈاؤن یاں ساڈی مخالفت کرن۔‏ (‏1-‏پطرس 4:‏3،‏ 4‏)‏ ایس لئی سانوں فیصلہ کرن دی لوڑ اے کہ اَسی کیہہ کراں گے۔‏ کیہہ اَسی خدا نوں پیار کرن والے لوکاں نال دوستی کراں گے؟‏ کیہہ اَسی اوہدے حکماں نوں مناں گے؟‏ اَسی صحی کم کر کے خدا نوں خوش کر سکنے آں۔‏ ایس طرحاں اَسی شیطان دے ایس دعوے نوں جھوٹا ثابت کراں گے کہ کوئی وی انسان مشکل گھڑیاں وچ خدا دا وفادار نئیں رہوے گا۔‏‏—‏1-‏کُرنتھیوں 6:‏9،‏ 10؛‏ 15:‏33 نوں پڑھو۔‏

خدا انساناں نوں بوہت پیار کردا اے۔‏ ایس لئی اَسی پورا یقین کر سکنے آں کہ اوہ بُرائی تے تکلیفاں نوں ختم کر دوے گا۔‏ جیہڑ‌ے یہوواہ خدا نوں اپنا بادشاہ من دے نیں،‏ اوہ زمین تے ہمیشاں دی زندگی پاؤن گے۔‏‏—‏یوحنا 3:‏16 نوں پڑھو۔‏