معلومات چھیتی وکھاؤ

مینیو چھیتی وکھاؤ

مضموناں دی لسٹ وکھاؤ

یہوواہ دے گواہ

پنجابی (شاہ مُکھی)

اپنے بچیاں نُوں پاک کلام چوں سکھاؤ

 سبق 7

تُسی کلّے نئیں او!‏

تُسی کلّے نئیں او!‏

ذرا تصویر چ ایس بچے نُوں ویکھو۔‏ ایہہ کِنّاں کلّا تے ڈریا ہویا لگ رہیا اے!‏ کیہہ توانوں وی کدی ایس طرحاں محسوس ہویا اے؟‏—‏ سانوں کدی کدی اِنج محسوس ہوندا اے۔‏ بائبل یہوواہ دے کجھ دوستاں بارے دسدی اے جیہڑ‌ے کدی کدی اپنے آپ نُوں کلّا تے ڈریا ہویا محسوس کردے سن۔‏ آؤ،‏ خدا دے اِک دوست بارے پڑھیے جنہاں نے اِنج ای محسوس کیتا سی۔‏ اوہناں دا ناں ایلیاہ سی۔‏

ملکہ اِیزِبل،‏ ایلیاہ نُوں جانوں مارنا چاہندی سی۔‏

ایہہ یسوع مسیح دے پیدا ہون توں کئی سال پہلے دی گل اے۔‏ ایلیاہ،‏ ملک اِسرائیل چ رہندے سن۔‏ اوس زمانے چ اخی‌اب اِسرائیل دا بادشاہ سی۔‏ اوہ یہوواہ خدا دی عبادت نئیں کردا سی۔‏ اوہدی بیوی دا ناں اِیزِبل سی تے اوہ دونویں اِک دیوتا دی پوجا کردے سن۔‏ اوس دیوتا دا ناں بعل سی۔‏ بادشاہ اخی‌اب تے ملکہ اِیزِبل دی وجہ توں ملک دے بوہت سارے لوک بعل دی پوجا کرن لگ پئے۔‏ ملکہ اِیزِبل بوہت بُری سی۔‏ اوہ اوہناں سارے لوکاں نُوں مار دینا چاہندی سی جیہڑ‌ے یہوواہ خدا دی عبادت کردے سن۔‏ ایلیاہ وی یہوواہ خدا دی عبادت کردے سن ایس لئی ملکہ اِیزِبل اوہناں نُوں وی مار دینا  چاہندی سی۔‏ تواڈے خیال چ جدوں ایلیاہ نُوں ایس گل دا پتہ چلیا تے اوہناں نے کیہہ کیتا؟‏—‏

ایلیاہ دُور اِک ویران جگہ وَل نس گئے تے اوتھے اِک غار چ لک گئے۔‏ پر اوہناں نے اِنج کیوں کیتا؟‏—‏ اوہ بوہت ڈر گئے سن۔‏ پر ایلیاہ نُوں ڈرن دی کوئی لوڑ نئیں سی کیونکہ یہوواہ خدا اوہناں دا دوست سی۔‏ خدا نے پہلاں وی کئی واری ایلیاہ دی مدد کیتی سی۔‏ اِک وار ایلیاہ نے دُعا کیتی کہ یہوواہ خدا اسمان توں اَگ گھلے تے اوہنے ایلیاہ دی دُعا سنیُ۔‏ ایس لئی ایلیاہ نُوں پتہ سی کہ یہوواہ خدا بوہت طاقت‌ور اے تے اوہ ہُن وی اوہناں دی مدد کر سکدا اے۔‏

یہوواہ خدا نے ایلیاہ دی مدد کیویں کیتی؟‏

جدوں ایلیاہ غار وچ لکے ہوئے سن تے یہوواہ خدا نے اوہناں نُوں کہیا:‏ ایلیاہ!‏ تُوں ایتھے کیہہ کر رہیا ایں؟‏ ایلیاہ نے کہیا:‏ یہوواہ خدا!‏ بس مَیں ای کلّا بچیا واں جیہڑ‌ا تیری عبادت کرنا واں۔‏ مینوں ڈر اے کہ کِتے ملکہ اِیزِبل مینوں وی نہ مار دَوے۔‏ ایلیاہ نُوں لگدا سی کہ ملکہ اِیزِبل نے اوہناں سارے لوکاں نُوں مار دِتا اے جیہڑ‌ے یہوواہ خدا دی عبادت کردے سن۔‏ پر یہوواہ خدا نے ایلیاہ نُوں کہیا:‏ ایلیاہ نہ ڈر!‏ تُوں کلّا نئیں ایں۔‏ حالے وی ست ہزار لوک باقی نیں جیہڑ‌ے میری عبادت کردے نیں۔‏ ایس لئی بہادر بن۔‏ توں حالے میرے لئی بڑا کم کرنا اے۔‏ تواڈے خیال چ کیہہ ایہہ گل سُن کے ایلیاہ خوش ہوئے ہون گے؟‏—‏

تُسی ایلیاہ دی کہانی توں کیہہ سکھیا اے؟‏—‏ ایہہ کدی نہ سوچو کہ تُسی کلّے او تے نہ ای کدی ڈرو۔‏ تواڈے بوہت سارے دوست نیں جیہڑ‌ے یہوواہ خدا نُوں تے توانوں بوہت پیار کردے نیں۔‏ نالے یہوواہ خدا بوہت طاقت‌ور اے۔‏ اوہ ہمیشاں تواڈی مدد کرے گا۔‏ کیہہ تُسی ایس گل توں خوش او کہ یہوواہ خدا تواڈے نال اے؟‏—‏

ایہہ ایتاں پڑھو:‏