پاک کلام دا جواب

 مسیح دا مخالف کوئی اِک انسان، گروہ یاں تنظیم نئیں اے سگوں بائبل چ دَسیا گیا اے کہ ”‏مسیح دے بوہت سارے مخالف“‏ نیں۔ (‏1-‏یوحنا 2:‏18)‏ ہر اوہ انسان مسیح دا مخالف اے جیہڑا ایہہ کم کردا اے:‏

•   اوہ یسوع نُوں مسیح تے خدا دا پُتر منن توں اِنکار کردا اے۔—‏1-‏یوحنا 2:‏22۔

•   اوہ مسیح نُوں خدا دا چُنیا ہویا بادشاہ نئیں من دا تے اوہدی مخالفت کردا اے۔—‏زبور 2:‏1، 2؛ لُوقا 11:‏23۔

•   اوہ اپنے آپ نُوں مسیح کہندا اے۔—‏متی 24:‏24۔

•   اوہ یسوع دے شاگرداں تے ظلم کردا اے تے یسوع دی نظر چ اوہ ظلم اِنج ای ہوندا اے جیویں اوہ اوہدے اپنے اُتے کیتا جا رہیا ہوئے۔—‏اعمال 9:‏5۔

•   اوہ مسیحی ہون دا دِکھاوا کردا اے پر اصل چ اوہ بھیڑے کم کردا اے تے دھوکھےباز ہوندا اے۔—‏متی 7:‏22، 23؛ 2-‏کُرنتھیوں 11:‏13۔

 بائبل چ اِصطلا‌ح ”‏مسیح دا مخالف“‏ دا اشارہ نہ صرف اِک انسان سگوں اوہناں سارے لوکاں وَل اے جیہڑے ایہو جہی سوچ رکھدے نیں تے ایہو جہے کم کردے نیں۔ (‏2-‏یوحنا 7)‏ مسیح دا مخالف سب توں پہلاں رسولاں دے زمانے چ ظاہر ہویا تے اوہ ہُن وی اپنا کم کر رہیا اے۔ بائبل چ پہلاں توں ای دَس دِتا گیا سی کہ اِنج ہوئے گا۔—‏1-‏یوحنا 4:‏3۔

مسیح دے مخالفاں دی پچھان کیہہ اے؟

•   اوہ یسوع بارے جھوٹھیاں گلاں سکھاندے نیں۔ (‏متی 24:‏9، 11)‏ مثال لئی، اوہ ایہہ تلیم دیندے نیں کہ یسوع تثلیث دا حصہ اے یاں فیر اوہ ایہہ سکھاندے نیں کہ یسوع ای خدا اے۔ ایہہ دونویں ای گلاں یسوع دی تلیم دے خلاف نیں کیونکہ اوہنے آپ کہیا سی کہ ”‏باپ میرے توں وڈا اے۔“‏—‏یوحنا 14:‏28۔

•   اوہ خدا دی بادشاہی بارے یسوع دی تلیم توں فرق تلیم دیندے نیں۔ جیویں کہ اوہ کہندے نیں کہ مسیح زمین دِیاں حکومتاں دے ذریعے بادشاہی کرے گا۔ پر ایہہ گل یسوع دی تلیم توں بالکل اُلٹ اے کیونکہ اوہنے تے آپ کہیا سی کہ ”‏میری بادشاہی ایس دُنیا دی نئیں اے۔“‏—‏یوحنا 18:‏36۔

•   اوہ مسیح نُوں اپنا مالک تے کہندے نیں پر اوہدے حکماں تے عمل نئیں کردے۔ جیویں کہ اوہ خدا دی بادشاہی دی خوش‌خبری نئیں سناندے۔—‏متی 28:‏19، 20؛ لُوقا 6:‏46؛ اعمال 10:‏42۔