پاک کلام دا جواب

 مسیحی ایس گل تے ایمان رکھدے نیں کہ یسوع نے انساناں دے گُناہ مٹان لئی اپنی جان قربان کر دِتی۔ (‏1-‏پطرس 3:‏18)‏ پر نجات پان لئی صرف ایس گل تے ایمان رکھنا کافی نئیں اے۔ باغی فرشتے وی ایس گل تے ایمان رکھدے نیں کہ یسوع ”‏خدا دا پُتر“‏ اے پر اوہناں نُوں نجات نئیں ملے گی سگوں اوہ تباہ ہو جان گے۔—‏لُوقا 4:‏41؛ یہوداہ 6۔

•  نجات پان لئی کیہہ کرنا ضروری اے؟

•  جے اِک گُناہ‌گار نجات پان لئی دُعا کردا اے تے کیہہ اوہنوں نجات مِل سکدی اے؟

•  نجات پان دی دُعا دی شروعات کیویں ہوئی؟

 نجات پان لئی کیہہ کرنا ضروری اے؟

•   سانوں ایس گل تے ایمان رکھنا چاہی دا اے کہ یسوع نے ساڈے گُناہواں لئی اپنی جان قربان کیتی۔ (‏اعمال 16:‏30، 31؛ 1-‏یوحنا 2:‏2)‏ یسوع تے ایمان لیان چ ایہہ شامل اے کہ اَسی ایہہ منیے کہ یسوع واقعی زمین تے آیا سی تے بائبل چ اوہدے بارے جو کجھ وی دَسیا گیا اے، اوہ بالکل سچ اے۔

•   سانوں بائبل دا صحی علم حاصل کرنا چاہی دا اے۔ (‏2-‏تیمُتھیُس 3:‏15)‏ جدوں پولُس تے سیلاس قید چ سن تے اوہناں نے حوالدار نُوں کہیا:‏ ”‏مالک یسوع تے ایمان لیا۔ فیر ای تُوں تے تیرے گھر والے نجات پان گے۔“‏ ایس توں بعد اوہناں نے حوالدار نُوں یہوواہ a دے کلام بارے تلیم دینی شروع کر دِتی۔ (‏اعمال 16:‏31، 32)‏ ایہدے توں پتہ چلدا اے کہ جے حوالدار پاک کلام دِیاں بنیادی گلاں نُوں نہ سکھدا تے اوہ یسوع تے ایمان نئیں لیا سکدا سی۔ ایس لئی اوہنوں پاک کلام دا صحی علم حاصل کرن دی ضرورت سی۔—‏1-‏تیمُتھیُس 2:‏3، 4۔

•   سانوں اپنے گُناہواں توں توبہ کرنی چاہی دی اے۔ (‏اعمال 3:‏19)‏ سانوں اپنے اوہناں گُناہواں تے غلط کماں توں توبہ کرنی چاہی دی اے جیہڑے اَسی پہلاں کیتے سن۔ جدوں اَسی اوہناں کماں توں دُور رہواں گے جنہاں توں یہوواہ نفرت کردا اے تے ”‏اپنے کماں توں ثابت“‏ کراں گے کہ اَسی ”‏توبہ کیتی اے“‏ تے دُوجیاں نُوں پتہ چل جائے گا کہ اَسی اپنے غلط کماں تے شرمندہ واں تے دُبارہ ایہناں نُوں نئیں کرنا چاہندے۔—‏اعمال 26:‏20۔

•   سانوں بپتسمہ لینا چاہی دا اے۔ (‏متی 28:‏19)‏ یسوع نے دَسیا سی کہ جیہڑے لوک اوہدے شاگرد بنن گے، اوہ بپتسمہ لین گے۔ جیس حوالدار دا پہلاں ذکر ہویا سی، اوہنے وی بپتسمہ لیا سی۔ (‏اعمال 16:‏33)‏ ایسے طرحاں جدوں پطرس نے لوکاں دی اِک بِھیڑ نُوں یسوع بارے تلیم دِتی تے ”‏جیہڑے لوکاں نے ایس پیغام نُوں خوشی نال قبول کیتا، اوہناں نے بپتسمہ لے لیا۔“‏—‏اعمال 2:‏40، 41۔

•   سانوں یسوع دے حکماں تے عمل کرنا چاہی دا اے۔ (‏عبرانیوں 5:‏9)‏ سانوں ”‏اوہناں ساریاں گلاں تے عمل کرنا“‏ چاہی دا اے جیہڑیاں یسوع نے سکھائیاں نیں۔ اِنج اَسی ظاہر کراں گے کہ اَسی اوہدے شاگرد آں۔ (‏متی 28:‏20)‏ ایہدے علاوہ سانوں ”‏کلام تے عمل کرن والے“‏ بننا چاہی دا اے ”‏نہ کہ صرف سُنن والے۔“‏—‏یعقوب 1:‏22۔

•   سانوں آخر تک اپنے ایمان تے ڈٹے رہنا چاہی دا اے۔ (‏مرقس 13:‏13)‏ جے اَسی ”‏آخر تک اپنے ایمان“‏ تے ڈٹے رہواں گے تے اَسی نجات پاواں گے۔ (‏عبرانیوں 10:‏36)‏ پولُس رسول وی ساری زندگی یسوع دے حکماں تے چلدا رہیا تے یہوواہ دا وفادار رہیا۔ اوہ مردے دم تک اپنے ایمان تے ڈٹیا رہیا۔—‏1-‏کُرنتھیوں 9:‏27۔

 جے اِک گُناہ‌گار نجات پان لئی دُعا کردا اے تے کیہہ اوہنوں نجات مِل سکدی اے؟

 کجھ مسیحی فرقیاں دے لوک نجات پان لئی کجھ خاص دُعاواں کردے نیں۔ اوہ دُعا چ ایس گل نُوں من دے نیں کہ اوہ گُناہ‌گار نیں تے مسیح اوہناں دے گُناہواں لئی مریا۔ اوہ دُعا چ یسوع نُوں ایہہ وی کہندے نیں کہ اوہ اوہناں دے دل تے زندگی چ آئے۔ بائبل چ ایہو جہی کسے دُعا دا ذکر نئیں اے تے نہ ای ایہدے چ ایہہ کہیا گیا اے کہ اَسی ایہو جہیاں رٹیاں رٹائیاں دُعاواں کریئے۔

 کجھ لوک سوچدے نیں کہ جے اوہ اِکو وار نجات پان لئی دُعا کر لین گے تے اوہناں نُوں ہمیشاں لئی نجات مِل جائے گی۔ پر سچ تے ایہہ وے کہ کوئی وی دُعا سانوں نجات نئیں دَوا سکدی کیونکہ اَسی عیب‌دار آں تے ساڈے کولوں غلطیاں ہوندیاں رہندیاں نیں۔ (‏1-‏یوحنا 1:‏8)‏ ایسے لئی یسوع نے اپنے شاگرداں نُوں کہیا کہ اوہ دُعا چ اپنے گُناہواں لئی معافی منگدے رہن۔ (‏لُوقا 11:‏2، 4)‏ ایہدے علاوہ، ساڈے کول ایہو جہے مسیحیاں دِیاں وی مثالاں نیں جنہاں کول ہمیشاں لئی نجات پان دا موقع سی پر اوہناں نے ایہہ موقع گنوا دِتا کیونکہ اوہ خدا توں دُور ہو گئے سن۔—‏عبرانیوں 6:‏4-‏6؛ 2-‏پطرس 2:‏20، 21۔

 نجات پان دی دُعا دی شروعات کیویں ہوئی؟

 تریخ‌داناں دی ایس بارے فرق فرق رائے وے۔ کجھ کہندے نیں کہ ایہدی شروعات پروٹسٹنٹ فرقے دے نال ہوئی۔ کجھ ہور تریخ‌دان کہندے نیں کہ ایہہ دُعا لوکاں نے 18ویں تے 19ویں صدی چ اوس ویلے کرنی شروع کیتی جدوں نوِیاں نوِیاں مذہبی تحریکاں چلائیاں جا رہیاں سن۔ ایس دُعا دی شروعات بھانویں جیویں وی ہوئی، پر بائبل چ ایہدے بارے کِتے وی نئیں دَسیا گیا سگوں ایہہ بائبل دی تلیم دے خلاف اے۔