پاک کلام دا جواب

 ہاں جی۔ باغی فرشتے اصل چ اوہ فرشتے نیں جنہاں نے خدا دے خلاف بغاوت کر کے گُناہ کیتا۔ (‏2-‏پطرس 2:‏4)‏ پہلا فرشتہ جنہے خدا دے خلاف بغاوت کیتی، اوہ شیطان اِبلیس اے۔ ایسے لئی بائبل چ اوہنوں ”‏باغی فرشتیاں دا سردار“‏ کہیا گیا اے۔—‏متی 12:‏24، 26۔

نوح دے زمانے چ بغاوت

 بائبل دے مطابق نوح دے زمانے چ آن والے طوفان توں پہلاں کجھ فرشتیاں نے خدا دے خلاف بغاوت کیتی۔ بائبل چ لکھیا اے:‏ ”‏سچے خدا دے بیٹے ویکھن لگ پئے کہ انسان دِیاں بیٹیاں کنیاں خوب‌صورت نیں۔ جیہڑیاں عورتاں اوہناں نُوں پسند آندیاں سن اوہ اوہناں نُوں اپنیاں بیویاں بنا لیندے سن۔“‏(‏پیدائش 6:‏2)‏ ایہناں باغی فرشتیاں نے ”‏اپنے رہن دی اوس جگہ نُوں چھڈ دِتا جیہڑی خدا نے اوہناں نُوں دِتی سی“‏ تے عورتاں نال جنسی تعلقات قائم کرن لئی انساناں ورگے جسم اپنا لئے۔—‏یہوداہ 6۔

 جدوں طوفان آیا تے باغی فرشتے انسانی جسم چھڈ کے اسمان تے واپس چلے گئے۔ پر خدا نے اوہناں نُوں سزا دِتی تے اپنے خاندان چوں کڈھ دِتا۔ ایہدے علاوہ ہُن اوہ دُبارہ کدی وی انسانی جسم نئیں اپنا سکدے۔—‏اِفِسیوں 6:‏11، 12۔