پاک کلام دا جواب

 موت اِک دُشمن اے تے ایہدے توں ڈرنا کسے حد تک ٹھیک وی اے کیونکہ اِنج اَسی اپنی زندگی دی حفاظت کرنے آں۔ (‏1-‏کُرنتھیوں 15:‏26‏)‏ پر کجھ لوک موت بارے جھوٹھیاں گلاں تے یقین کردے نیں۔ ایس لئی اوہ موت توں حدوں ودھ ڈردے نیں تے ”‏ایس ڈر دی غلامی چ زندگی جی رہے نیں۔“‏ (‏عبرانیوں 2:‏15‏)‏ ایس وجہ توں اوہ اپنی زندگی چ خوش نئیں رہ پاندے۔ پر پاک کلام دی سچائی جانن نال اَسی موت دے ڈر توں آزاد ہو سکنے آں۔—‏یوحنا 8:‏32‏۔‏

موت بارے سچائی

•   جدوں انسان مر جاندا اے تے اوہ کجھ وی نئیں جان دا۔ (‏زبور 146:‏4‏)‏ ایس لئی سانوں ایس گل توں ڈرن دی لوڑ نئیں اے کہ جدوں اَسی مر جاواں گے تے سانوں تکلیف یاں عذاب سہنا پووے گا سگوں بائبل چ تے دَسیا گیا اے کہ موت نیندر وانگوں اے۔—‏زبور 13:‏3؛‏ یوحنا 11:‏11-‏14‏۔‏

•   جیہڑے لوک مر جاندے نیں، اوہ سانوں نقصان نئیں پونچا سکدے۔ ایتھوں تک کہ ظالم توں ظالم لوک وی موت دے سامنے بے‌بس نیں۔ (‏اَمثال 21:‏16‏)‏ بائبل چ دَسیا گیا اے کہ اوہناں دے مرن دے نال اوہناں دی نفرت تے اوہناں دا حسد وی ختم ہو جاندا اے۔—‏واعظ 9:‏6‏۔‏

•   مرن دا ایہہ مطلب نئیں اے کہ انسان ہمیشاں لئی ختم ہو جاندا اے سگوں خدا اوہناں لوکاں نُوں دُبارہ زندہ کرے گا جیہڑے فوت ہو گئے نیں۔—‏یوحنا 5:‏28، 29؛‏ اعمال 24:‏15‏۔‏

•   خدا نے وعدہ کیتا اے کہ اِک وقت آئے گا جدوں موت نئیں رہوے گی۔ (‏مُکاشفہ 21:‏4‏)‏ اوس وقت بارے بائبل چ دَسیا گیا اے کہ نیک لوک زمین دے مالک ہون گے تے ایہدے تے ہمیشاں زندہ رہن گے۔ ایس لئی اوہناں نُوں مرن دا کوئی ڈر نئیں ہوئے گا۔—‏زبور 37:‏29‏۔‏