پاک کلام دا جواب

 نئیں، ساڈی موت دا وقت پہلے توں طے نئیں ہوندا۔ ایہہ عقیدہ پاک کلام دے مطابق نئیں اے کہ انسان دی تقدیر یاں قسمت پہلاں توں ای لکھی ہوندی اے۔ ایہدی بجائے پاک کلام چ ایہہ دسیا گیا اے کہ انسان نال اچانک کجھ وی ہو سکدا اے۔—‏واعظ 9:‏11۔

بائبل چ فیر ایہہ کیوں لکھیا اے کہ ”‏موت دا اِک وقت اے؟“‏

 واعظ 3:‏2 چ لکھیا اے کہ ”‏پیدا ہون دا اِک وقت اے تے مرن دا اِک وقت اے۔ درخت لان دا اِک وقت اے تے لائے ہوئے نُوں پُٹن دا اِک وقت اے۔“‏ پر جدوں اَسی ایس پورے باب نُوں پڑھنے آں تے سانوں پتہ چلدا اے کہ ایتھے صرف موت بارے نئیں سگوں زندگی چ ہون والے فرق فرق کماں دی گل کیتی جا رہی اے۔ (‏واعظ 3:‏1-‏8)‏ جیویں خدا نے ایہہ طے نئیں کیتا کہ اِک کسان کیس خاص منٹ تے پودا لائے گا بالکل اونویں ای اوہنے ساڈے مرن دا کوئی خاص وقت طے نئیں کیتا۔ اصل چ پاک کلام دِیاں ایہناں ایتاں چ ایہہ گل سمجھائی گئی اے کہ سانوں روز دے کماں چ ایہناں مگن نئیں ہو جانا چاہی دا کہ اَسی اپنے خالق نُوں نظرانداز کرن لگ پئیے۔—‏واعظ 3:‏11؛ 12:‏1، 13۔

کیہہ اَسی اپنی عمر ودھا سکنے آں؟

 ایہہ سچ اے کہ زندگی دا کوئی بھروسا نئیں پر ساڈے چنگے فیصلیاں دی وجہ توں ساڈی زندگی ودھ سکدی اے۔پاک کلام چ لکھیا اے”‏ دانش‌مند بندے دی تلیم زندگی دا چشمہ اے جیہڑی اِک بندے نُوں موت دے پھندے توں بچاندی اے “‏ (‏اَمثال 13:‏14)‏ موسیٰ نے وی اِسرائیلی قوم نوں دَسیا کہ جے اوہ خدا دے حکماں تے عمل کرن گے تے اوہناں دی عمر لمی ہو سکدی اے۔ (‏اِستثنا 6:‏2)‏ پر جے اَسی لاپروائی نال کم لینے آں تے بھیڑے کم کرنے آں تے ساڈی زندگی گھٹ ہو سکدی اے۔—‏واعظ 7:‏17۔

 ایہہ سچ اے کہ اَج اَسی جنے وی دانش‌مند ہوئیے تے احتیاط نال کم لئیے فیر وی اَسی موت توں نئیں بچ سکدے۔(‏رومیوں 5:‏12)‏ پر پاک کلام چ وعدہ کیتا گیا اے کہ اِک وقت آئے گا جدوں موت نئیں رہے گی۔—‏مُکاشفہ 21:‏4۔