Skip to content

WASWE, SAMWAN DESIGNIM?

Glue blo Barnacle

Glue blo Barnacle

For longtaem nao olketa scientist wea studyim animal olketa lukim hao barnacle savve pas strong tumas lo ston, wharf, and andanit lo ship. Olketa sei glue blo barnacle hem barava winim eni glue wea olketa man wakem. Bat for longfala taem, olketa no savve hao nao barnacle savve pas lo ples wea tuwet, no longtaem go nomoa olketa just faendaot.

Tingim diswan: Wanfala barnacle larva wea kasem stage wea hem fit for swim, bae lukluk lo olketa difren ples bifor hem chusim wea nao hem laek for pas lo hem. Taem hem faendem datfala ples, datfala larva bae producem tufala samting. First wan, hem wanfala oily liquid wea mekem wata muv aot from datfala ples wea hem laek for pas lo hem. Datfala oily liquid creatim tu wanfala environment wea mekem datfala ples redi for second samting wea hem bae producem, wea hem mekem from olketa protein wea olketa kolem phosphoproteins.

Tufala samting hia formimap wanfala strongfala glue wea olketa bacteria no savve spoelem tu. Hem important for datfala glue hem strong and stap for longfala taem, bikos datfala barnacle bae stap lo there for full laef blo hem.

Olketa barnacle, and smol piksa wea showimaot glue blo barnacle

Hao barnacle hem savve mekem datfala glue, hem no simpol olsem wanem olketa scientist tingim firstaem. Wanfala lo datfala team wea discoverem datfala process, hem sei: “Diswan hem wanfala kleva and natural wei for solvem disfala problem lo hao for deal witim wei wea wata savve mekem hem hard for eniting for pas.” Samting wea olketa faendaot lo hem maet helpem olketa wea duim research for mekem olketa glue wea man savve iusim insaed wata, and wea olketa wakem from olketa samting lo nature for iusim lo samting saed lo electronic and olketa medical implant.

Wanem nao tingting blo iu? Waswe, glue blo barnacle kamap from evolution? Or samwan nao designim?