Skip to content

OLKETA KWESTIN WEA YOUNG PIPOL GAREM

Wanem Nao Sexual Assault?​—Part 1: Hao for Protectim Iuseleva

Wanem Nao Sexual Assault?​—Part 1: Hao for Protectim Iuseleva

 Wanem nao sexual assault?

Nomata law abaotem “sexual assault” hem no barava semsem long evri ples, datfala toktok savve minim for mekem narawan duim samting saed long sex nomata hem no laekem, or for forcem hem for duim datwan. Hem savve minim tu for spoelem pikinini or teenager saed long sex, wanfala parent duim sex witim pikinini bilong hem, reipim samwan, or for wanfala bigman wea pipol savve trustim olsem doctor, teacher, or member long church spoelem samwan saed long sex. Samfala pipol wea spoelem narawan saed long toktok or long body savve talem victim olketa bae killim olketa nogud or killim olketa dae sapos olketa reportim olketa.

Wanfala report sei each year long America, klosap 250,000 pipol sei olketa kamap victim bilong sexual assault. Klosap haf long olketa hia, age bilong olketa midolwan 12 and 18 year.

 Wanem iu shud savve long hem

  • Bible barava againstim sexual assault. Samting olsem 4,000 year go finis, Bible storyim hao olketa man long datfala taon Sodom laekem tumas for reipim tufala man wea visit kam. Datfala nogud samting wea olketa laek duim showimaot why Jehovah distroem datfala taon. (Jenesis 19:4-​13) And tu, Law wea God givim long Moses samting olsem 3,500 year go pas sei hem no stret for olketa Israelite for durong witim eniwan long famili bilong olketa.​—Levitikas 18:6.

  • Plande taem victim bilong sexual assault savve long man wea spoelem hem. Datfala buk Talking Sex With Your Kids sei: “Tufala long evri thrifala wea samwan reipim olketa savve long man wea spoelem olketa . . . Hem no just wanfala stranger wea seknomoa kam long olketa.”

  • Sexual assault hem happen long olketa man and olketa woman. Long America, samting olsem wanfala long evri tenfala victim bilong sexual assault hem olketa man. Disfala organization wea olketa kolem Rape, Abuse & Incest National Network (RAINN), sei olketa man wea victim “savve fraet nogud datfala samting wea happen long olketa maet mekem olketa gay” or mekem “olketa ting daonem olketa seleva.”

  • Iumi no sapraes sexual assault hem kamap big tumas distaem. Bible profesi hao long “olketa last day” staka pipol bae “no garem love insaed long famili” and bae “raf” and “no savve kontrolem seleva.” (2 Timothy 3:​1-3) Hem nao wei bilong pipol wea trae for spoelem narawan saed long sex.

  • Victim bilong sexual assault no duim rong samting. Hem no stret for spoelem eniwan saed long sex. Man or woman wea spoelem narawan nao duim rong samting. Nomata olsem, iu savve duim samting for protectim iuseleva from sexual assault.

 Wanem iu savve duim

  • Prepare firstaem. Savve firstaem wanem iu bae duim sapos samwan, olsem man wea iu frenim or relative bilong iu, trae for duim eni samting saed long sex witim iu. Wanfala young woman wea nem bilong hem Erin sei hem gud for prepare firstaem for enikaen samting wea savve happen. Iu savve actim wanem savve happen and wanem iu bae duim. Hem sei: “Maet iu tingse hem fani for duim kaen samting olsem, bat sapos datwan hem really happen, maet iu no savve kamap victim.”

    Bible sei: “Lukluk gud long samting wea iufala duim, mekem iufala wise and no olsem pipol wea no wise, . . . bikos iumi stap long barava nogud taem.”​—Ephesus 5:​15, 16.

    Tingim diswan: ‘Wanem nao bae mi duim sapos samwan tasim mi long wei wea mekem mi feel nogud?’

  • Garem plan for lusim ples. Datfala organization RAINN sei hem gud for iu “chusim wanfala word wea olketa fren or famili bilong iu nomoa savve long hem, mekem sapos iu no feel sef iu savve ringim olketa and talem datfala word for mekem olketa nomoa luksavve iu stap long danger and no datfala man or woman wea iu stap witim. Then olketa fren or famili bilong iu savve kam pikim iu or talem excuse mekem iu savve lusim datfala ples.” Iu bae no kasem staka problem sapos iu no go long ples wea iu savve nogud samting savve happen.

    Bible sei: “Man garem save, hemi lukim trabol, hem go long sef ples. Man no garem save, hem gohed long trabol, an hemi panis.”​—Provebs 22:3.

    Tingim diswan: ‘Wanem nao plan bilong mi for lusim ples hia?’

    Evritaem garem plan for lusim ples

  • Mekem olketa rul and barava followim. Olsem example, sapos iu frenim samwan, iutufala shud storyim wanem nao stret samting for duim and samting wea no fitim for iutufala duim. Sapos man wea iu frenim tingse iu no need for mekem olketa rul, iu need for frenim samwan wea respectim standard bilong iu.

    Bible sei: “Man wea garem love . . . hem evritaem showimaot respect, no tingim hemseleva nomoa.”​—1 Corinth 13:​4, 5.

    Tingim diswan: ‘Wanem nao standard bilong mi? Wanem samting nao hem no fitim for mitufala duim?’