Skip to content

Skip to secondary menu

Olketa Jehovah’s Witness

Solomon Islands Pidgin

OLKETA KWESTIN WEA YOUNG PIPOL GAREM

Taem Mi Mistek, Wanem Nao Bae Mi Duim?

Taem Mi Mistek, Wanem Nao Bae Mi Duim?

 Wanem nao bae iu duim?

Readim wanem hem happen long Karina, and tingim sapos hem happen long iu. Wanem nao bae iu duim?

Karina: “Wantaem mi draev fast tumas for go long skul, so police stopem mi and talem mi for mas peim fine. Mi feel nogud! Mi talem mami bilong mi, and hem sei mi shud talem dadi bilong mi. Mi nating laek duim datwan.”

Wanem nao bae iu duim?

  1. A: Haedem, and hope Dadi bae no luksavve.

  2. B: Talem Dadi tru samting wea happen.

Iu maet laek for haedem. Maet mami bilong iu tu no savve sapos iu no talem dadi wanem hem happen. Bat staka gudfala reason stap for iu talemaot long dadi wanem iu duim, nomata hem abaotem fine wea iu kasem or eni nara samting.

 Thrifala reason for talemaot samting wea iu duim

  1. 1. Hem stretfala samting for duim. Bible sei: “Mifala laek for honest long evri samting wea mifala duim.”​—Hebrew 13:⁠18.

    “Mi waka hard for honest and luksavve mi mas givim ansa for olketa samting mi duim. So taem mi mekem mistek mi kwiktaem talemaot wanem mi duim.”​—Alexis.

  2. 2. Pipol savve willing for forgivim man wea no trae for haedem mistek bilong hem. Bible sei: “Man wea haedem sin bilong hem bae no win, bat man wea talemaot sin bilong hem and no duim moa bae kasem mercy.”​—Proverbs 28:13.

    “Hem no isi for talemaot olketa mistek bilong iu, bat datwan mekem pipol trustim iu. Olketa lukim iu honest. Taem iu talemaot olketa mistek bilong iu, gud samting savve kamaot from datwan.”​—Richard.

  3. 3. Barava important samting, hem mekem Jehovah hapi. Bible sei: “Jehovah barava heitim man wea laea, bat Hem fren gud witim olketa wea raeteous.”​—Proverbs 3:​32.

    “Bihaen mi mekem wanfala big mistek, mi luksavve mi mas talemaot wanem mi duim. Jehovah bae no blessim mi sapos mi no followim wanem hem talem.”​—Rachel.

Wanem nao Karina duim taem hem mekem mistek? Hem trae for haedem. Hem no talem dadi bilong abaotem fine from wea hem kasem. Bat hem no savve haedem datwan for olowe. Karina sei: “Bihaen wanfala year, dadi lukluk long record bilong insurance and lukim mi kasem wanfala fine. Mi insaed trabol nao! Mami tu hem kros bikos mi no duim samting hem talem mi for duim.”

Leson: Karina sei: “For haedem olketa mistek hem mekem olketa samting worse nomoa. Iu bae still kasem problem bihaen!”

 Lane from olketa mistek bilong iu

Evriwan savve mekem olketa mistek. (Rome 3:​23; 1 John 1:⁠8) Olsem iumi lukim finis, man wea hambol and mature nao bae talemaot olketa mistek bilong hem. And hem bae duim datwan kwiktaem.

Nara samting hem for lane from olketa mistek bilong iu. Sorre samting nao samfala young wan no duim datwan! Olketa maet feel olsem Priscilla wea sei: “Mi savve feel nogud tumas abaotem olketa mistek bilong mi. Datwan mekem mi ting daonem mi seleva and hem olsem mi gohed karem hevi samting wea mi no fit for karem. Mi savve feel nogud tumas and feel iusles nomoa.”

Waswe, iu savve feel olsem samfala taem? Sapos olsem, tingim diswan: Wei for evritaem tingim olketa mistek wea iu duim bifor hem olsem iu gohed for luk bak taem iu draevem trak. Wei for evritaem tingim olketa mistek wea iu duim bifor bae mekem iu feel iusles nomoa and no strong for feisim olketa hard taem wea bae kamap long future.

Wanem nao gud samting for duim?

“Tingim olketa mistek bilong iu, and lane from olketa mekem iu no duim moa. Bat no tingim olketa evritaem gogo iu wikdaon.”​—Elliot.

“Mi trae for lane from olketa mistek for helpem mi for kamap gud long wei bilong mi and for no duim sem mistek long narafala taem. Hem gud for lane from mistek bikos datwan bae helpem iu for kamap mature.”​—Vera.